Likuatehila Wahasoye

OVE tyina ovipuka viahaende ngo omu wevihandela, ukala ñgeni? Ava vokuatanga vehole okupopia okuti epulo olio litukuatesako okutala ine tuvanthu vokusoya vala liwa. Onthwe atuho tuna ovitateka, namphila vamwe viavo ngoti ovinene vali. Opo omokonda yatyi vamwe velikuatehilila movitateka viavo, mahi vamwe nokatateka umwe vala okatutu kevesoyesa?

Soka ñgeno uli nokuovola ovilinga. Wenda movilinga vimwe, avekupulu vimwe, mahi avehekutavela uundape-mo. Mokala ñgeni? Okuti mosoko okuti kavekutavelele tupu, omokonda utupu-ale etyi uvila okulinga, kusilivila-ale? Okuti pahe mohinangela umwe ovipuka vimwe wahetekelele-ale okulinga aviahaende nawa? Ine usoka ngotyo, opo ngotyo umunthu wokusoya liwa.

Ove Motyivili

Pahe molingi ñgeni wahalinge omunthu wokusoya vala liwa? Tyo tete una okulinga, okuahasoko unene kovipuka mavikusoyesa. Mahi tete una okunoñgonoka omalusoko patyi apondola okukupola ononkhono. Upondola pahe olipulu omapulo amwe ngaa: Okuti kovilinga vina kaventhavelele mokonda ame hisilivila-le, ine vahandela-mo umwe vala omunthu utyivila okulinga nawa otyilinga tyimwe ame nehevili?

Otyikwavo una okulinga utyivile, okusoka ku evi uvila okulinga nawa. Wahula umwe okuti kwetavelelwe movilinga vina, mahi otyo katyilekesa okuti kusilivila. Hamwe una oupanga wapama na Huku, hamwe meumbo mulivila nawa nomukai wove, novana vove, hamwe una omapanga ekahi nawa ekuhole. Wahasoke vala okuti komutwe oku ovipuka kamaviende-ale nawa. Petupu omunthu wii onthiki ya muhuka. Olie utyii ine muhuka momono ovilinga? Mahi pena vali otyipuka otyikwavo una okulinga wahasoke unene kovipuka mavikusoyesa.

Okusoka Koviwa Matyikupe Ononkhono

Momanima ano, ovanongo vehole okupopia okuti omunthu wokuna onthumbi yotyipuka tyimwe, oyo una utyii umwe okuti evi apanga okulinga mevivili. Otyili umwe! Okuyumba-ko onthumbi umwe yokuti otyipuka tyimwe tuapanga okulinga matutyivili, tyituavela ononkhono mbokuenda no komutwe.

Opo tuyumbe-ko onthumbi okuti tyimwe tuapanga okulinga matutyivili, tete tuna okusoka ku vimwe tuapangaile-ale atuvivili umwe okuvilinga. Okuti pahe ñgaa wahinangela vimwe wetyivilile okulinga ngo omu wevipangelele? Okuti pahetyino ñgaa una vimwe wapanga okulinga? Otyiwa okusoka komapulo oo mokonda pamwe tupondola umwe okulinga ovipuka ovinyingi, mahi netyi tuvilingila katutyii. Pamwe netyi tuhandela omwenyo wetu, etyi tyesukisa vali ku onthwe, katutyii. Otyipuka otyo tyokutala etyi tyesukisa vali, Ombimbiliya yetyipopia-le kohale yati: ‘Talei nawa ovipuka viesukisa vali.’ — Ova Filipu 1:10.

Nga tuasoka nawa etyi tuahanda momwenyo wetu, etyi tyesukisa vali ku onthwe, opo pahe matutyivili okutala etyi matulingi tukale nombembwa meumbo, tulinge omapanga a Huku, tulinge ovilinga vikahi nawa, novipuka ovikwavo vali. Mahi tupu tuna okulunguka tuehelipe ovipuka. Tuna okusoka umwe kovipuka tueete okuti kamavitupono. Ine wamona ñgaa otyipuka tyimwe ngoti otyinene unene, linga-ko tyimwe, pahe okuate vali otyikwavo. Ine wapanga okulinga otyipuka matyityindi omuvo omunyingi, tyilinga katutu-katutu, oti olingi-ko etyi, olingi-ko etyi atee tyipwa.

Wehelionge onkhata otyiwa kamatyikuvasi. Omuhe oo wapopia umwe otyili. Tyina tyili tuahanda umwe otyipuka tyimwe tuapanga, tututumba umwe tutyimone, ine hatyo? Otyipuka tyimwe matyituavela umwe ononkhono tuende no komutwe netyi tuapanga, okusoka koviwa mavitundilila-ko. Ine tusoka ngotyo, nga tukala-kala ñgoo novitateka, kamatusoyo, matuende no komutwe mokonda etyi tuahanda tutyii.

Tyina tuapanga tyimwe, tupu tuna okusoka kovipuka vivali oo vitatu matulingi tulinge etyi tuasoka. Omukulu umwe utiwa Rick Snyder wati: ‘Otyiwa tyina una tyimwe wasoka okulinga, ohasoko vala okuti ine monthiki yo tete motyihetekela motyivili.’ Naina soka kovipuka vivali oo vitatu molingi uhike oku wahanda. Pahe olingi ñgaa: Ine tyimwe katyetavelele, ohetekela otyikwavo.

Omukulu oo Snyder tupu wati otyiwa okunoñgonoka onalupi tuna okuyekapo okuhetekela okulinga otyipuka tyimwe. Ine otyipuka tyimwe tuasoka okulinga, katyetavelele umwe, hamwe tyina tutyitala ñgaa, kamatyini-ale, opo ine tututumba umwe vala, matuponwa, atusoyo. Oityi tupondola okulinga tyina otyo tyameyapo? Opo hahe okupanga vali otyipuka otyikwavo ngatyo tututumba natyo. Okulinga ngotyo tuhambukwa vali.

Ombimbiliya ipopia omunthu umwe walingile ngotyo. Ohamba Daviti ankho wahanda okutungila-ko ondyuo Huku yae Siovaa. Mahi Huku emupopila okuti hae-ko una okuitunga, meitungu omona wae Salomau. Daviti ahanumana, ahatutumba vala nokuti ame muene ndyina okuitunga. Oityi alingile? Asoko okulinga otyipuka otyikwavo. Ahimbika okuongiya ovipuka aviho omona wae ankho mesukisa etyivile okutunga ondyuo ya Huku, aipu. — 1 Reis 8:17-19; 1 Crônicas 29:3-7.

Hamwe onthwe tyina tulitala katuvanthu-ko vokusoya vala liwa. Hamwe katusoko unene kovipuka vitusoyesa, hamwe tupanga umwe nawa ovipuka vietu atuvilingi, tulinga umwe ovipuka viesukisa vali ku onthwe. Mahi hamwe pamwe tyina tusoka kouye ou otyipuka ukahi, tuponwa umwe. Ondyala handyala, ovilwa oviovio, onombela nononkhia kambupopiwa. Otyo nkhele pamwe tumona umwe ovanthu valinga vakuavo onya. Ovitateka ovio aviho onthwe katuvivili okuvimanako, mahi no ngotyo tupondola okuhambukwa. Ñgeni ngotyo?

[Olutalatu]

Ine kwetavelelwe movilinga vimwe, opo ngotyo tyapwa umwe kumona-mona vali ovilinga?

[Olutalatu]

Ohamba Daviti etyi amona okuti etyi apanga okulinga katyetavelele, asoko okulinga otyikwavo