Noobaasa Kurwanisa Okwehwa Amatsiko

NOOREEBA ota oburemeezi obu orikutunga? Abahangu nibagira ngu oku orikugarukamu ekibuuzo eki nikyoreka yaaba ori endeebera birungi nari oyehwaire amatsiko. Twena twine emirabanamu, kwonka abamwe baine emirabanamu y’amaani kukira abandi. Kwonka shi ahabw’enki abandi nibarahuka kuruga omu mbeera ezo, kugumizamu barikukora ebyabo, kandi abandi nibahanika baatunga oburemeezi?

Nk’eky’okureeberaho, ka tugire ngu oriyo noosherura omurimo. Waabuuzibwa kwonka tibaagukuha. Noohurira ota ahabw’okugira ngu tibakuha omurimo? Nikibaasa kukukora kubi munonga okireebe nk’oburemeezi bw’obutwire, orikugira oti: ‘Tihaine orikubaasa kumpa omurimo. Tindikubaasa kutunga omurimo.’ Nari noobaasa kurengyesereza omurundi gumwe ogu gukureetere kuteekateeka oti: ‘Ndi embura mukoro. Tinyine mugasho gwona.’ Emiteekateekyere egi neeyoreka okwehwa amatsiko.

Okurwanisa Okwehwa Amatsiko

Noobaasa kurwanisa ota okwehwa amatsiko? Eidaara rikuru ry’okubanza n’okumanya ngu oine emiteekateekyere egwire egyo. Reero bwanyima obone kugirwanisa. Teekateeka aha nshonga ezindi. Nk’eky’okureeberaho, mbwenu shi buzima baangire kukuha omurimo ahabw’okugira ngu tihaine orikwenda kugukuha? Nari mukama waagwo naayenda omuntu oine ebirikwetengyesa ebi iwe otaine?

Waayeshwijuma, noija kumanya emiteekateekyere egwire ei oine. Mbwenu shi okwanga kukuha omurimo omurundi gumwe nikimanyisa ngu toine mugasho, nari noobaasa kuteekateeka aha nshonga ezindi nk’emikago, nari abanywani, nari ahu oine obusinguzi? Yega kweihamu ebiteekateeko bibi ebirikubaasa kuba eby’akabi. Mbwenu shi buzima noobaasa kumanya yaaba otaratungye omurimo? Noobaasa kukora bingi kweihamu emiteekateekyere egwire.

Gira Emiteekateekyere Mirungi Orikutaho Ebigyendererwa

Obunaku obu, abacondooza nibashoboorora amatsiko omu muringo ogugumire. Nibagira ngu amatsiko n’enyikiriza ngu noija kubaasa kuhikiiriza ebigyendererwa byawe. Nk’oku ekicweka ekirikukurataho kirikworeka, amatsiko nigatwariramu bingi, kwonka enshoboorora yaabo neereebeka nk’ey’omugasho omu miringo mingi. Okuta omutima aha nshoboorora egi nikiija kutuhwera kugira emiteekateekyere mirungi, n’okutaho ebigyendererwa.

Kubaasa kuhika aha bigyendererwa byaitu, twine kuba tutwire nitutaho ebigyendererwa kandi turikubihikiiriza. Waaba otwire nooremwa kuhikiiriza ebigyendererwa byawe, nikibaasa kukuhwera kuteekateeka n’obwegyendesereza aha bigyendererwa ebi orikutaho. Okubanza, oine ekigyendererwa kyona? Kyorobi kuguma nitukora eki tutwire nitukora omu mwanya gw’okuteekateeka aha ki turikwenda kukora ekiri kikuru ahariitwe. Aha bikwatiraine n’okwebembeza ebikuru, nitureeba ngu Baibuli ekagamba kare ngu twine ‘kumanya ebirikukira obukuru.’​—Abafilipi 1:10.

Twamanya ebi twine kwebembeza, nikyoroba kutooranaho ebigyendererwa ebirikukirayo obukuru nk’eby’omwoyo, amaka gaitu, n’emirimo yaitu ey’okwebaisaho. Kwonka ni kikuru ngu kutataho ebigyendererwa bingi omurundi gumwe, kureka kutaho kimwe-kimwe eki turikubaasa kuhikiiriza. Ekigyendererwa kyaba kigumire kukihikaho, nikibaasa kututiinisa, kandi nitubaasa kuhanika. N’ahabw’ekyo, nikiba kiri kirungi ebigyendererwa bihango kubiihamu ebikye eby’obwire bugufu.

“Waaba oine ekihika ky’okukora ekintu, tikikaakurema.” Egi n’engamba ya ira kworeka neereebeka nk’erimu amazima. Twaba twine ebigyendererwa, nituba twine kugira ekihika n’okumariirira kubihikaho. Nitubaasa kwongyera aha kumariirira kwaitu turikuteekateeka aha bukuru bw’ebigyendererwa, n’ebirungi ebirikurugamu twabihikaho. Nihaija kubaho ebirikuremesa, kwonka twine kubireeba nk’oburemeezi, beitu etari mperu.

Kwonka, twine n’okuteekateeka aha ku turikubaasa kubihikiiriza. Omuhandiiki C. R. Snyder, owaacondoorize munonga aha bukuru bw’amatsiko, naaha obuhabuzi aha miringo y’okuhikiirizamu ebigyendererwa. N’ahabw’ekyo, omuringo gumwe gwaba gutakozire, nitubaasa kukoresa ogwa kabiri, ogwa kashatu, n’endiijo.

Snyder naahabura ngu twegye kuhaanisa ekigyendererwa n’ekindi. Twaremesibwa kuhika aha kigyendererwa kyaitu, okuguubwa kubi nikubaasa kutumaramu amaani. Kwonka, ekigyendererwa ekyo waakihaanisa n’ekiringaniire, nikikuha amatsiko.

Baibuli erimu eky’okureeberaho kirungi omu nshonga egi. Omugabe Daudi akaba aine ekigyendererwa ky’okwombekyera Yehova Ruhanga hekalu. Kwonka Ruhanga akagambira Daudi ngu omutabani Sulemaani niwe araayombeke hekalu egyo. Kwonka Daudi omu mwanya gw’okuta omutima aha nshonga egi, akahindura ebigyendererwa bye. Amaani ge akagata aha kurundaana esente n’ebintu by’okuheza omurimo gw’okwombeka.​—1 Abagabe 8:17-19; 1 Obusingye 29:3-7

Nangwa n’obu twakusingura omu kurwanisa okwehwa amatsiko turikugira emiteekateekyere mirungi, turikutaho ebigyendererwa, nabwo nitubaasa kuguma twine amatsiko makye. Mu muringo ki? Okwehwa amatsiko omu nsi egi nikukira kureetwa enshonga ezi tutaineho bushoboorozi. Twateekateeka aha buremeezi oburikuteganisa abantu, nk’obworo, entaro, obutari buringaaniza, endwara, n’okufa, nitubaasa kuguma tuta twine amatsiko?

[Ekishushani]

Waaba otahairwe omurimo ogu orikwenda, nooteekateeka ngu toritunga murimo?

[Ekishushani]

Omugabe Daudi akahindura omu bigyendererwa bye