Bo Por Lucha Kontra Pesimismo

KON bo ta mira difikultat ku bo ta haña den bida? Hopi eksperto ta pensa ku bo kontesta riba e pregunta ei ta indiká pa un gran parti si bo ta un hende optimista òf pesimista. Nos tur ta enfrentá problema den bida; algun di nos mas ku otro. Pero dikon ta parse ku algun hende ta superá difikultat i ta kla pa sigui padilanti, miéntras ku otro hende ta entregá asina ku nan haña nan ku e problemanan di mas chikitu?

Por ehèmpel, imaginá ku bo ta buska trabou. Bo ta bai un entrevista i nan no ta duna bo e trabou. Kon bo ta sinti bo despues? Bo ta pensa ku ta abo ta e problema i ku e situashon ta algu permanente? Bo ta bisa bo mes: ‘Niun hende lo tuma un persona manera mi. Hamas lo mi haña un trabou.’ Òf pió ainda, bo ta laga e difikultat ei afektá e manera ku bo ta mira tur otro aspekto di bo bida, i bo ta pensa: ‘Mi ta un frakaso total. Mi no ta sirbi pa nada.’ Den ámbos kaso, e manera di pensa ei ta sumamente pesimista.

Lucha Kontra Pesimismo

Kon bo por lucha kontra pesimismo? Di promé, ta importante pa rekonosé e pensamentunan negativo ei. Di dos, lucha kontra nan. Trata di haña un splikashon rasonabel ku nan no a tuma bo na e trabou ei. Por ehèmpel, ta bèrdat ku nan no a tuma bo pasobra niun hende lo tuma un persona manera bo? Òf kisas e empresa simplemente tabata buska un persona ku otro kualifikashon?

Pensa riba algun kos spesífiko ku ta mustra ku sierto pensamentu negativo ta un reakshon eksagerá. Akaso bo ta un frakaso total djis pasobra nan a rechasá bo un biaha? Dikon no pensa riba otro aspekto di bo bida kaminda bo tin sierto éksito, por ehèmpel, bo aktividatnan spiritual, bo relashon ku bo famia òf ku bo amigunan? Siña rechasá pensamentu negativo ku tur kos ta bai malu. Bon mirá, di bèrdat bo por bisa ku nunka lo bo no haña un trabou? Kiko mas bo por hasi pa kore ku pensamentu negativo?

Pensa Positivo ku un Meta na Mente

E último añanan, e investigadónan a bini ku un definishon interesante, pero poko limitá di speransa. Segun nan, speransa ta e konvikshon ku bo por alkansá bo metanan. Manera e siguiente artíkulo lo mustra, speransa ta enserá muchu mas ku esei, pero e definishon ei por yuda nos den vários manera. Por ehèmpel, si nos konsentrá riba e aspekto ei di speransa, nos por desaroyá un aktitut mas positivo ku un meta na mente.

Pa nos por ta konvensí ku nos por logra nos metanan, nos mester desaroyá e kustumber di pone meta i logra nan. Si bo ta haña ku bo no tin e kustumber ei, lo ta bon pa bo pensa seriamente riba e metanan ku bo ta pone pa bo mes. Na promé lugá, bo tin algun meta? Ta masha fásil pa nos ta asina okupá ku e aktividatnan di bida diario ku nos no ta para ketu i pensa kiko realmente nos ke hasi ku nos bida, kiko ta mas importante pa nos. Pa loke ta e prinsipio práktiko di pone prioridat, nos ta mira un biaha mas ku hopi tempu pasá Beibel a duna nos un bon konseho: “Hasi sigur kiko ta e kosnan mas importante.”—Filipensenan 1:10.

Unabes nos a fiha nos prioridatnan, ta bira mas fásil pa skohe algun meta prinsipal den vários área di bida, manera den nos bida spiritual, bida di famia òf bida diario. Pero, ta masha importante pa no pone demasiado meta na kuminsamentu i ta mihó pa nos skohe meta ku nos por logra fásilmente. Si un meta ta muchu difísil, esei por desanimá nos i pone nos entregá. P’esei, hopi biaha ta mihó nos parti meta grandi i di largu plaso, den vários meta chikitu i di korto plaso.

Tin un dicho ta bisa: “Si bo ke, bo por.” I esei pa un parti ta bèrdat. Unabes nos a skohe nos metanan prinsipal, nos mester tin e forsa di boluntat, esta, e deseo i determinashon, pa hasi esfuerso pa logra nan. Nos lo por fortalesé e determinashon ei si nos meditá riba e balor di nos metanan i e benefisionan ku nos lo haña si nos logra nan. Klaru ku lo surgi opstákulo, pero nos mester mira nan komo un reto i no komo un strobansa.

Sinembargo, nos mester pensa tambe riba algun manera práktiko pa logra nos metanan. Eskritor C. R. Snyder, kende a hasi un estudio ekstenso tokante e balor di speransa, a duna e konseho pa pensa riba diferente manera pa logra un sierto meta. E ora ei, si nos no ta logr’é di un sierto manera, nos por purba e di dos manera, òf e di tres, etcetera.

Snyder a rekomendá tambe pa siña rekonosé ki ora nos mester kambia di meta. Si di ningun manera nos no ta logra nos meta, nos lo bira desanimá si nos sigui preokupá kuné. Ma si nos kambia pa un meta mas realístiko, nos lo tin algu otro pa spera ariba.

Beibel tin un bon ehèmpel di e punto ei. Rei David tabatin masha gana di traha un tèmpel pa su Dios, Yehova. Esei tabata su meta. Pero Dios a bis’é ku ta su yu Sálomon lo tin e privilegio di traha e tèmpel. Ora David a tende esei, e no a rabia òf keda insistí ku ta e mester hasié. Mas bien, el a kambia su meta. El a hinka tur su energia den kolektá fondo i material ku su yu lo tabatin mester pa kompletá e proyekto.—1 Reinan 8:17-19; 1 Krónikanan 29:3-7.

Pero asta si nos lucha kontra pesimismo i kultivá un aktitut mas positivo ku un meta na mente, tòg por sosodé ku nos no tin sufisiente speransa. Dikon? Pasobra gran parti di e sintimentu di desesperashon ku nos ta enfrentá den e mundu akí ta debí na sierto faktor ku nos no por kontrolá. Ora nos para pensa riba e kantidat di problema ku ta afektá humanidat, manera pobresa, guera, inhustisia, e menasa konstante di malesa i morto, kon nos por keda positivo i tene speransa?

[Plachi]

Si nan no tuma bo na e trabou ku bo tabata ke, bo ta konkluí ku hamas lo bo haña un trabou?

[Plachi]

Rei David tabata fleksibel ora di pone meta