Woo eena eene schlajchte Enstalunk äwakomen kaun

WOO jeist du doamet om, wan waut nich soo utkjemt, aus du die daut wurscht jewenscht haben? Woo du doamet omjeist, wiest sea väl doaräwa, aus du em Läwen eene goode ooda eene schlajchte Enstalunk hast. Wie aula moaken hanewada schwoare Tieden derch, eenje foakna aus aundre. Oba wuarom es daut soo, daut eenje leichta met Trubbels foadich woaren un mootich wiedamoaken un aundre bie ernoa kjliene Trubbels aul oppjäwen?

Saj wie mol, du sieekjst eene Oabeit. Du jeist no eene Kompanie, oba dee wellen die nich aunnämen. Woo feelst du die dan? Best du gaunz bedrekjt un denkjst du, du woascht kjeenmol eene Oabeit finjen, wiels kjeena wudd soonen Mensch aus die wellen toom Oabeida haben? Ooda denkjst du mau rajcht, daut dien gaunzet Läwen nuscht enhelt un daut du aulmols to nuscht to brucken best? Wan wäa soo aus dit denkjt, dan haft dee eene schlajchte Enstalunk.

Jäajen eene schlajchte Enstalunk schaufen

Woo kaun eena soone Enstalunk äwakomen? Daut ieeschte mott eena kloa haben, woone Jedanken orrajchte Jedanken sent. Mau dan kaun eena doajäajen schaufen. Eena wudd kjennen proowen, de Sach mol von eene aundre Kaunt to beseenen un äwa Froagen nodenkjen, soo aus: “Haben dee mie bie eene Oabeit nich aunjenomen, wiels kjeena mie haben well? Ooda sieekjen dee bloos eenen, waut sikj met aundre Sachen vesteit aus ekj?”

Wan eena veninftich nodenkjt, dan sitt eena, daut soone orrajchte Jedanken äwadräwen sent. Wan se eenem bie eene Kompanie nich aunnämen, bediet daut dan opp iernst, daut eena to nuscht to brucken es? Es eena nich en aundre Stekjen goot to brucken, soo aus em Deenst fa Jehova, enne Famielje ooda manke Frind? Eena mott lieren, orrajchte Jedanken utem Kopp to schmieten un de Trubbels nich jrata to seenen, aus dee werkjlich sent. Schlieslich kaun je kjeena fa secha sajen, daut eena kjeenmol eene Oabeit finjen woat. Eena kaun oba noch mea doonen, om orrajchte Jedanken loostowoaren.

Opp daut schaufen, waut eena sikj väajenomen haft

Enne latste Joaren sajen Forscha, daut Hopninj bediet, daut eena sikj secha es, daut eena daut volbrinjen kaun, waut eena sikj väajenomen haft. Dit kaun eenem werkjlich halpen eene goode Enstalunk to haben. Oba Hopninj helt noch väl mea en aus dit, un daut woat de näakjsta Artikjel ons wiesen.

Woo kaun eena sikj sechra feelen, daut eena daut werkjlich kaun, waut eena sikj väajenomen haft? Doatoo kaun eena doaraun denkjen, waut eena em Läwen aul towäaj jebrocht haft. Wan du denkjst, du hast en dien Läwen noch nuscht towäaj jebrocht, dan wudd daut goot sennen, mol doaräwa notodenkjen, waut du die em Läwen väajenomen hast. Hast du die äwaheipt waut väajenomen? Wan eena emma sea drock es, kaun daut leicht sennen, daut eena nich nodenkjt, no waut eena em Läwen werkjlich sträft un waut eena fa wichtich talt. Enne Schreft steit aul lang de gooda Rot, daut wie daut sellen kloa haben, waut werkjlich wichtich es. Dee sajcht: “Jie [sellen] fauststalen lieren, waut daut aulabaste es” (Filippa 1:10, PB).

Wan eena ieescht weet, waut em Läwen werkjlich talt, dan es daut leichta, sikj waut väatonämen, biejlikj em Deenst fa Jehova, fa daut Famieljenläwen ooda fa de Oabeit. Daut es uk wichtich, sikj nich too väl väatonämen un uk sikj Sachen väatonämen, wua eena weet, daut eena daut werkjlich kaun. Wan eena sikj waut väanemt, waut too groot es, dan woat eena leicht mootloos un jeft opp. Doawäajen es daut bäta, waut grootet schrettwies derchtofieren, waut eenem schlieslich doahan brinjt, wua eena hanwell.

“Wua een Wellen es, es uk een Wajch.” Daut es een oolet Sprechwuat, un daut es nich gaunz orrajcht. Wan eena sikj ieescht waut väajenomen haft, dan fält eenem uk eenen stoakjen Wellen, om schlieslich doa hantokomen. Dän Wellen kaun eena doaderch stoakjen, daut eena äwa dän Nutzen un de Beloonunk nodenkjt, waut eena haft, wan eena daut ieescht volbrinjt. Oppem Wajch doa han woat nich emma aules jlei ranen, oba eena mott Schwierichkjeiten soo aus Eewasch seenen, wua eena äwakaun, un nich aus eenen Boajch, wua kjeen wiedakomen es.

Eena mott uk äwalajen, waut doa krakjt fält to doonen, om daut to volbrinjen, waut eena sikj väajenomen haft. De Buakschriewa C. R. Snyder haft väl doaräwa jeforscht, waut Hopninj fa eenen Nutzen haft, un dee sajcht, eena saul emma miere Wäaj reedhaben, om doa hantokomen, wua eena hanwell. Wan daut opp eene Wajch nich schauft, dan kaun eena daut opp eene tweede Wajch ooda eene dredde Wajch proowen.

No disen Snyder no mott eena oba uk weeten, wanea daut bäta es, daut to endren, waut eena sikj väajenomen haft. Wan doa opp iernst kjeen Wajch es, doa hantokomen, dan kaun eenem daut mootloos moaken, bloos emma wieda to proowen. Wan eena sikj oba waut aundret väanemt, waut werkjlich to kjrieen es, dan haft eena waut nieet, wuaropp eena hopen kaun.

Enne Schreft finj wie een goodet Biespel doafäa. De Kjennich David wull sea jieren eenen Tempel fa sienen Gott, Jehova, buen. Oba Gott säd to David, daut nich hee, oba sien Sän Salomo de Iea haben wudd, dän Tempel to buen. David wia doaräwa nich vestalt un proowd uk nich stieekoppich wiedatomoaken. Enne Städ daut neem hee sikj waut aundret väa. Met väl Moot un Krauft muak hee aules reed, waut sienen Sän fa daut Buwoakj fäld (1. Kjennichs 8:17-19; 1. Chronik 29:3-7).

Eena kaun aulsoo eene jewesse Mot Hopninj kjrieen, wan eena jäajen eene schlajchte Enstalunk schauft un sikj aunstrenjt, bat doa to komen, waut eena sikj väajenomen haft. Oba rieekjt daut too? Na jo, en dise Welt jeft daut väl, waut eenem de Hopninj nämen kaun un wua eena oba nuscht aun endren kaun. Doa es biejlikj väl Oamoot, Kjrich, Ojjerajchtichkjeit, Krankheit un Doot. Woo kaun eena doawäajen mootich un voll Hopninj no väaren kjikjen?

[Bilt]

Wan du eemol eene Oabeit nich kjrichst, jleefst du dan, du woascht kjeenmol eene Oabeit finjen?

[Bilt]

De Kjennich David wia reed, daut to endren, waut hee sikj väajenomen haud