Ne rubʼan chi ne inqakanaʼ rukapebʼjik i maʼ holohik ta kapebʼinik

¿Nikʼwach inawil i hat noq inwihʼik kʼaxkilaal pan akʼachariik? Kʼih taqeh wilik kinaʼojbʼal inkikapaaj chi, noq reʼ hoj inqachaqʼweej i pahqaal wilih irukʼuhtaaj mi holohik inqakapaaj on maʼchih. Chiqunchelaal wilik kʼaxkilaal pan qakʼachariik, xa reʼ laʼ ¿chaj woʼ reet juʼjun taqeh kʼachareel kiʼikʼik chupaam i kikʼaxkilaal ruukʼ suqkiil kʼuxliis eh wilik i maʼxta inkaaj kibʼanam noq inchalik i kikʼaxkilaal?

Jenaj ehtalil, chakapaaj chi kʼahchiʼ asikʼim akamaj. Tiqʼorik ruukʼ i patroon eh maʼ ruyeew ta aweh i kamanik. ¿Nikʼwach inawikʼraaj awiibʼ? Mareh ne nakapaj: «Maʼ raaj ta nuwach» «Maʼ ajwach ta ne inyeʼwik nukamaj». «Maʼ jaruuj ne nureq nukamaj». On mareh xa ruum chi maʼ xkiyeew ta aweh i kamanik reʼreʼ ne nakapaaj: «Maʼxta hin kamaj». Maʼxta kinchol rubʼan. Ruukʼ taqeh wilih inkʼutinik chi maʼ holohik ta akapebʼal.

Chajarik ne tirutobʼeej

¿Chajarik ne inqabʼan reh chi, maʼ ne ta inqakapaaj i maʼ holohik ta? Reʼ peet, reʼ xti koruman reʼ runabʼjik chajarik taqeh i maʼ holohik ta kapebʼinik. Reʼ rukabʼ naasikʼim riij reh nikʼwach nawesam pan akapebʼaal. Chasikʼ riij chaj woʼ reet maʼ xkiyeew ta aweh i kamanik. Jenaj ehtalil, ¿korik na chi maʼ xkiyeew ta aweh i kamanik ruum chi maʼxta tichol on ruum chi kʼahchiʼ naq kisikʼim jenoʼ kʼachareel kʼih haabʼ rehtʼaliim chi riij i kamanik reʼreʼ?

Chakapaaj riij i kʼahchiʼ akʼulum eh chasik riij chaj woʼ reet jeʼreʼ inakapaaj. ¿Xa ruum chi maʼ xkiyeew ta qeh i kamanik, iraaj na ruqʼorom chi maʼxta qojchol rubʼaan on ne inqakapaaj i qojchol rubʼan pan qakʼachariik, pan qafamilia, ruukʼ taqeh qamigo, pan uxlabʼal reʼ inqabʼan taqeh chi korik? Makapaaj taqeh i mareh maʼ ne ta inkʼuljik, ¿nikʼwach qehtʼal mi maʼ naqareqem qakamaj? Wilik woʼ taqeh i ne qojrutobʼeej reh chi maʼ ne ta inqakaaj i maʼ raaj ta kapebʼjik.

Chakapaaj i holohik chi riij taqeh i naabʼanam

Chuwach taqeh haabʼ ikʼinaq, reʼ taqeh inkitzʼir riij i uyʼinik inkiqʼor chi reʼ wilih holohik eh xa juʼjun ne inwihʼik keh. Inkiqʼor chi reʼ wilih ne rubʼan chi ne inqareq chuʼnchel taqeh i inqaaj qabʼanam. Jeʼ rukabʼ naqilom chupaam i naʼojbʼal chalik reh, reʼ uyʼinik maʼ xa reʼ taj i wilih, xa reʼ laʼ ne qojrutobʼeej runaʼjik reh reh chik ruwiiʼ. Jenaj ehtalil, mi chʼiklik qakʼux chi riij i kʼahchiʼ quyʼeem reʼ wilih ne rubʼan chi suq qakʼux ruukʼ taqeh i inqaaj qabʼanam.

Reh chi ne inqakapaaj chi ne inqareq taqeh i inqaaj qabʼanam reʼ ne kichahmik haabʼ koruman chi ne inqabʼan juʼjun taqeh naʼojbʼal reh rureqarik. Mi maʼ hoj okrinaq chi rubʼanarik taqeh wilih, koruman chi ne inqatzʼir riij taqeh inqaaj qabʼanam. Reʼ peet: ¿wilik na i inqaaj qabʼanam? Maʼ kʼaxik ta rubʼanarik i hoj okrinaq chik chi rubʼanarik pan qakʼachariik eh maʼ inqakapaaj ta chi riij i xti koruman pan qakʼachariik. Ruum ajreʼ reʼ naʼojbʼal reh i Santo Laj Huuj iruqʼor chajarik i qʼeʼ koruman, «reh chi eliik taq neetichol rusikʼariik wach i maʼ xta reet chi bʼanarik» (Filipenses 1:10).

Noq asikʼim chik wach i maʼxta reet chi bʼanarik, maʼ kʼaxik ta chik rusikʼarik wach i ajwaal wach chi qeh jeʼ rukabʼ pan uxlabʼal, pan qafamilia, pan qakamaj. Pan rutihkʼik koruman chi ne inqabʼan i ne qojchol rubʼanarik reʼ maʼ kʼaxik ta chi reqarik. Mi maʼ xqabʼan i wilih, ne inqajik qakʼux eh ne qojqʼuhtik chi rubʼanarik i kʼaxik chi qeh. Ruum ajreʼ koruman chi ne inqachʼaq wach i inqaaj qabʼanam, reʼ nim kiwach reʼ kichahmik haabʼ eh reʼ kokʼ taq wach reʼ kichahmik kiʼibʼ ixibʼ poh.

Jeʼ rukabʼ inqʼorarik najtir, mi nawaaj ne nabʼan. Eh korik woʼ hoq. Noq inqasikʼ riij chajarik inqaaj qabʼanam, koruman chi qeh rajwanjik eh rubʼanarik reh chi ne inqareq. Ne rubʼan chi ne inqakowej i qaʼajwanik chi riij taqeh i inqaaj qabʼanam, noq inqakapaaj chi riij taqeh i naaqakʼulum noq ne inqabʼan. Atoobʼ ta ne inchalik taqeh kʼaxkilaal, maʼ ne ta inqakanaʼ chi ne qojkiqʼat reh rubʼanarik taqeh inqaaj qabʼanam.

Eh ne woʼ inqakapaaj chajarik taqeh naʼojbʼal koruman reh rureqarik taqeh i inqaaj qabʼanam. Reʼ ajtzʼihbʼon C. R. Snyder, reʼ rutzʼirim riij chi riij i ruloqʼil i uyʼinik iruqʼor chi ne nakapaaj reh reh ruwiiʼ reh rureqarik i kʼahchiʼ akapaam rubʼaan. Jeʼreʼ, noq maʼ ruyeew ta riibʼ i inawaaj abʼanam, ne chik inasikʼ jenoʼ ruwiiʼ reh rureqarik.

Reʼ Snyder iruqʼor woʼ hoq chi koruman runabʼjik eh rujalarik wach i inqaaj qabʼanam. Mi maʼ inqareq chajarik naq i inqaaj qabʼanam maʼ inyoj qakʼux, xa reʼ laʼ mi inqajal wach ruukʼ i wilik pan qaqʼabʼ rubʼanarik ne ruyeew quyʼinik.

Pan Santo Laj Huuj inqareq jenaj holohik laj ehtalil chi riij i wilih. Reʼ reey David xa raaj naq chik rukorsam jenaj rupaat i ruDios, Jehová, xa reʼ laʼ reʼ Jehová xuqʼor reh chi reʼ naq i rakʼuun Salomón na naq rukorsam i paat. Atoobʼ ta jeʼreʼ xqʼorarik reh, reʼ David maʼ xkaqrik ta eh xisaj ʹpan ranima xa reʼ laʼ xujal wach i iraaj naq rubʼanam. Xukoj laʼ chuʼnchel i ransil reh rusikʼarik i tumiin eh taqeh kamambʼal reʼ naq i narukojom i rakʼuun reh korsanik paat. (1 Reyes 8:​17 ko pan 19; 1 Crónicas 29:​3 ko pan 7).

Atoobʼ ta inqareq quyʼinik eh inqakapaaj i holohik eh suq qakʼux chi riij taqeh i inqaaj qabʼanam, mareh ko inqaaj ruman i quyʼinik. ¿Chaj woʼ reet? Ruum chi reʼ taqeh kʼaxkilaal inqakʼul iruqahsaj qakʼux ruum chi maʼxta pan qaqʼabʼ rukorsjik wach. Noq inqakapaaj chi riij taqeh i nimaq taq kʼaxkilaal inkikʼul i kʼachareel jeʼ rukabʼ i nebʼaʼil, puhbʼanik, reʼ maʼ korik ta wach bʼanooj, yabʼilaal eh i kimik, ¿chajarik ne inqabʼan reh chi holohik ne inqakapaaj?

[Ehtalil]

Mi maʼ xkiyeew aweh i kamanik reʼ naq inawaaj, ¿inakapaaj na chi maʼ jaruuj ne nareq akamaj?

[Ehtalil]

Re reey David xubʼan i wilik naq pan ruqʼabʼ rubʼanariik.