Manali iyaira vinsina ushanchi

CAMBA causaibi tiaj turmindusgunara ¿imasna ricungui? Ashca yachaujcuna quirinun cai tapuira can imasna cutipashcara ricuchin ali iyaira, manali iyaira charishcara. Tucuiguna turmindusgunara charinchi, huaquinguna mas charinun. Shinajpi ¿imarasha huaquin runauna turmindusgunara charisha cushihua ahuantasha ñaupajma catinun, maicambi shujcuna ichilla turmindusgunara charisha sambayarianun?

Iyaringui can tarbanara mascaushcai. Riungui shu tarbanara tupangaj shinajpi tarbanara mana cunun. ¿Imasnara sintiringui? Maicambi iyarina ushangui canllai shu turmindus charishcara: “Mana pis ñucara tarbana cungami” nisha iyarina ushangui. Astaumbas saquina ushangui cai tarbanara mana apishcamanda camba intiru causaibi llaquichichu: “Ñuca mana imangaj valinichu” nisha iyarina ushangui. Cai tunu iyarishcauna ricuchin ñucanchi llaqui manali iyaiguna charishcara.

¿Imasnara vinsina ushanchi?

¿Imasnara cai manali iyaigunara vinsina ushanchi? Pundaibi ricsina anchi maican anun cai manali iyaigunara. Huasha caigunara vinsina anchi. Shuj tunu iyaigunara mascangui. Tapuna ushangui ¿sirtuchu can cuinta runara tarbanara mana cununga o maicambi shuj tunu tarbanara rurajta ministinuca?

Iyaringui maican pasashcaunai manali iyaiguna yapajta ricuchicangui. ¿Shu punzha ñucanchira tarbanara mana cujpi ricuchin mana imais valinchichu nisha, maicambi shuj rurashcaunai alira rurana ushanchi Diosta sirvinai, ñucanchi aillu ucui, amigogunandi? Mana iyaringui tucui can rurashcauna manali tucununga. ¿Sirtuchu rimana ushangui mana ima huras tarbanara charingaraungui nisha? Astaumbas mas rurana ushangui cai manali iyaigunara saquingahua.

Ali iyaigunara charina metagunara pactachingaj

Puchucai huataunai mascaujcuna chapana ima ashcara ansahualla intindinushca, paiguna ninun ñucanchi metagunara pactachina iyai ashcara. Imasna ricuchishca anga catij temai chapana charina mas intindichin shinajpi cai intindichishca ashcara yanapan. Maicambi cai iyarina catisha chapanamanda, ñucanchi mas ali iyaiguna charina ushanchi metagunara pactachingahua.

Ñucanchi metagunara pactachingahua, ñaupajmanda ña metagunara pactachina ruraj acanchi. Caita mana ruraj asha ali iyarinami anchi ima tunu iyaigunara pactachina munashcara. Pundaibi ¿imara munangui? Ahualla an chillarara tucui huras rurangaj maicambi ashca tarbana charishcamanda chiraigu mana iyarinchi imara sirtu pacha causaibi rurana munanchi ima ñucanchij mas valishca ashcara. Imara pundaibi pactachina munaira charishcara Biblia ña ashca huatauna huashai rimaca “tucui ima ali ashcaras ricsingaj” (Filipenses 1:10).

Pundaibi ima pactachina munanchi yachasha mas ahualla anga huaquin iyaigunara pactachingahua maicambi ñucanchi Diosta sirvinai, aillu ucui tarbanais. Shinajpi callaringahua mana ashca metagunara churasha, astaumbas uctalla pactachina metagunara churana anchi. Caita mana rurasha huaquimbi llaquirina, sambayana ushanchi. Chaupiyachina anchi atun suni metaguna mas ruranalla ichilla metagunai pactachingaj.

Shu ñaupa rimashca nin, munasha ushanchimi. Cai sirtumi an, ñucanchi pactachina iyaigunara ajllashca huasha munaira ministinchi caigunara pactachingahua. Caita rurangaj iyarinami anchi ñucanchi metaguna masna valishca anun shinallara imasnara ñucanchira yanapanga ña cai metagunara pactachishcai. Maicambi arcaiguna tiangami shinajpi mana chibi tucurina cuinta ricuna anchi chi randi turmindusta alichina cuinta.

Iyarina anchi imasna rurasha ñucanchi metagunara pactachingaj. Cai quillcaj runa C. R. Snyder, chapana masna valishca an estudiaj runa nin, iyarina anchi caran tunui ñucanchi munashcara pactachingaj shina rurasha shu tunui mana pactachina ushasha shuj tunui shuj tunui rurasha ñucanchi munashcara pactachina ushangaraunchi.

Snyder yachachin riparana anchi ima huras ñucanchi metaguna shujhua turcangaj. Ñucanchi munaigunara mana pactachina ushasha chillai iyarisha mas llaquirishun. Chi randi shuj ruranalla iyaira churasha, chibi pactachingaj chapaushun.

Bibliai shu ali ejemplo tupanchi. Rey Apu David shu templo huasira rurana munaca paihua Diosta Jehová shinajpi pai nica paihua churi Salomón cai tarbanara charingaraushcara. Cai llaqui pasaushcai David mana piñarica, paihua munai rurangaj mana catica, pai iyaigunara turcachica. Mas ursarica paihua churi ministishcaunara, cullquiras tandachingaj templo huasira shayachingahua (1 Reyes 8:17-19; 1 Crónicas 29:3-7).

Ñucanchi mas chapanara charisha manali iyaigunara saquisha mas ali iyaigunara charisha metagunara pactachingaj, maicambi chapai pishiyasha catinga. ¿Imarasha? Maicambi llaquiuna shuj partiunamanda shamuna ushanun, cai Allpai tiaj runaunara turmindachishcaunai iyarisha pugri ana cuinta, guerraguna, manali rurashcauna, ungüigunas, huañunas ¿imasnara ali cushi iyaigunara charisha catina ushanchi?

[Foto]

Can munashca tarbanara mana cujpi ¿iyaringuichu mana ima huras tarbanara charisha?

[Foto]

David rey apu ali iyaiyuj aca metagunai iyarisha