E Patoi i te Manako Apikepike

EAA toou manako i te au manamanata tei tupu kia koe? E maata te aronga kite tei irinaki e ka riro taau pauanga ei akakite mai me e tangata manako papu koe me e tangata manako apikepike. E tupu ana te au turanga ngata kia tatou pouroa, e tetai pae e maata atu to ratou. Inara, eaa te tumu i autu ei tetai pae i te au turanga ngata e kua tauta akaou, kareka tetai pae kua tuku i te ‘au no te au manamanata rikiriki ua?

Ei akaraanga, akamanako ana e te kimi ra koe i te ngai angaanga. Ka aere koe no te uiuianga e kare koe i akatikaia mai. Eaa toou manako me kare koe e akatikaia no te angaanga? Penei ka manamanata tikai koe i te reira e ka manako koe e turanga ngata roa teia. Penei ka karanga koe kia koe uaorai, ‘Kare e tangata e inangaro iaku. Kare rava e rauka iaku i tetai angaanga.’ Tei kino atu, penei ka riro teia tupuanga ei taui i toou manako no te au tuanga ravarai o te oraanga. Penei ka manako koe, ‘kare e apinga e rauka iaku i te rave. E puapinga kore takiri au.’ Ka riro teia akaraanga ei akaari mai i te tu tikai o te manako apikepike.

Patoi i te Manako Apikepike

Akapeea koe me patoi i te manako apikepike? Te takainga mua e te puapinga, kia kite koe eaa te au manako papu kore. Te takainga e aru maira, e patoi i te reira. E kimi i te au akamāramaanga ke atu no te tumu kare koe i ikiia. Ei akaraanga, e mea tika tikai ainei e kare tetai tangata i inangaro ia koe? Me ko te tumu ainei e kua inangaro te pu i tetai tangata e tu karape ke tona?

Me akamanako koe i te au mea tika, ka kite mai koe e kua akamaata roa koe i te manamanata. Me kare koe i ikiia, ko te aiteanga ainei e e puapinga kore takiri koe? Kare ainei ka rauka ia koe i te akamanako i te au tuanga ke o te oraanga​—mei taau angaanga pae vaerua, te oraanga ngutuare, e te au pirianga oa​—i puapinga ai koe? E apii i te patoi i teia au manako apikepike e e kino ua te ka tupu. Ko te tika, ka kite tikai ainei koe e kare rava koe e rauka tetai angaanga? E maata atu taau ka rauka i te rave ei akakore i te manako apikepike.

Manako Papu ua Kia Itae Taau Akakoroanga

Kare i roa ake nei, kua kite mai te aronga kimikimi i tetai akamāramaanga umere no te manakonakoanga. Karanga ratou e ko te aiteanga o te manakonakoanga koia oki ka rauka ia koe i te itae i taau akakoroanga. I roto i te atikara ka aru mai, ka kite tatou e maata atu te ō maira i roto i te manakonakoanga, inara e puapinga teia akamāramaanga. Me akamou i te manako ki runga i teia akamāramaanga no te manakonakoanga, ka tauturu ia tatou kia manako papu ua kia itae i te au akakoroanga.

E rauka ai ia tatou kia itae i te au akakoroanga no te tuatau ki mua, ka anoanoia tatou kia akanoo e kia akatupu i te au akakoroanga. Me kare koe i rave ake i te reira, e mea puapinga kia akamanako meitaki i taau au akakoroanga. Mea mua, e au akakoroanga ainei taau? Tetai taime ka varenga ua tatou i te au mea noa ua nei o te oraanga ma te kore e akamanako eaa tikai te mea puapinga i roto i te oraanga. No runga i teia akoanga meitaki no te akamanako eaa te au mea puapinga kia koe, ka kite mai tatou e kua oti takere te Pipiria i te tata i te reira: “Kia timata oki kotou i te au mea e maata ua atu te meitaki.”​—Philipi 1:​10.

Me kite tatou i te au mea puapinga, ka māmā i reira i te akanoo i te au akakoroanga no te au tuanga tukeke o te oraanga, mei te turanga pae vaerua, te oraanga ngutuare e te ngai angaanga. Inara, e mea puapinga eiaa kia maata roa taau au akakoroanga i te akamataanga e kia riro taau au akakoroanga i iki ei mea māmā ua i te itae atu. Me ngata roa tetai akakoroanga, penei ka mataku tatou e ka tuku i te ‘au. No reira e mea meitaki kia tatuanga i te au akakoroanga mamaata ei au akakoroanga rikiriki mai e te māmā ua i te itae atu.

“Me inangaro koe i te rave i tetai mea, ka aruaru koe kia akatupu i te reira.” E maseli taito teia, e i te akaraanga e mea tika te reira. Me oti koe i te akanoo i taau au akakoroanga, ka anoanoia te tautaanga​—te inangaro e te aruaru anga​—kia itae i te reira. Ka aruaru maroiroi tatou i te au akakoroanga me akamanako i te puapinga o te reira e te au akameitakianga ka rauka mai me taeria te reira. Noatu ra, ka tupu te au manamanata inara kia akamanako tatou i te reira ei arairaianga, eiaa ei manamanata kare e rauka i te autu.

Inara, ka anoanoia tatou kia kimi i te au ravenga kia taeria ta tatou akakoroanga. Te tangata tata ko C. R. Snyder, tei apii matatio i te puapinga o te manakonakoanga, karanga aia kia akamanako i te au ravenga tukeke no te itae i tetai akakoroanga. Me kare tetai ravenga e puapingaia, e tamata i te rua o te ravenga, te toru e te vai atura.

Karanga katoa a Snyder kia apii eaa te taime tau no te akaruke i tetai akakoroanga ei aruaru i tetai mai. Me kare e rauka ia koe i te akatupu i tetai akakoroanga, ka maromaroa koe me akamanako ua i te reira. Inara, me mono koe i te reira ki tetai akakoroanga ke ka rauka ia koe i te itae atu, ka akatupu i te manakonakoanga.

Te oronga maira te Pipiria i tetai akaraanga manea no runga i teia. Kua akaperepere te Ariki ko Davida i te akakoroanga no te pātu i te iero no tona Atua ko Iehova. Inara akakite te Atua kia Davida e na tana tamaiti ko Solomona te reira tikaanga. Kare a Davida i aue ana e te marokiakia kia pātu i te iero, mari ra kua taui i tana akakoroanga. Kua akapou aia i tona maroiroi i te akaputu i te moni e te au apinga tei anoanoia e tana tamaiti no te pātu i te iero.​—1 Ariki 8:​17-​19; 1 Paraleipomeno 29:​3-7.

Noatu me puapingaia ta tatou tautaanga kia akatupu i te manakonakoanga na te patoianga i te manako apikepike e kia manako papu ua kia itae i te au akakoroanga, ka tupu rai te arairaianga no te manakonakoanga. Akapeea ra? Te tumu i ngere ei te maataanga o teianei ao i te manakonakoanga, no te au mea kare e rauka ia ratou i te akakore. Me akamanako tatou i te au manamanata teiaa te tupu ra ki te tangata​—te putaua, te tamaki, te tu tika kore, te maki e te mate​—akapeea tatou me akono tamou i te manakonakoanga?

[Tutu]

Me kare koe e akatikaia no tetai angaanga, ka manako ainei koe e kare rava e rauka tetai angaanga?

[Tutu]

Akaari mai te Ariki ko Davida e ka rauka i te taui i te au akakoroanga