Амэндэ вижала тэ на умэкас и вас

САР ту диқэс пэ кода, кай тутэ варисо на вижал? Бут учони адес гиндон, кай о атвето пэ кадэва вопросо сыкавэл, умэклян ту и вас чи най. Амэндэ всаворэндэ исин разно ԥаримос. Варикастэ лэс май бут, ай варикастэ лэс май мало. Тоди, васо о мануш, саво пэрэандярдя май баро ԥаримос, виарақэл зор тэ жувэл и май англэ, ай авэр парашэл тэ патял андэр пэстэ и нисо на терэл, хоть лэстэ сас и найбаро ԥаримос?

Ԥэнаса, о мануш старыийпэ тэ затерэл ловэ, но лэстэ нисо на вижал. И можэт во гиндой: «Кацавэстэ, сар мэ, нисо на вижал. Мэ никала на затерава». Или инке май хужэ, во лэла тэ диқэл пэ вся найлащя ригатар и лэла тэ ԥэнэн пэсти: «Мандар нисаво толко. Мэ никасти на трэбуй». И андо пэрво и андо дуйто случаё драго дицол, кай о мануш умэкля и вас.

Со о мануш тэ терэл, кай тэ на умэкэл и вас?

Пэрво и само важно, када, кай о мануш тэ полэл, сар во гиндой. И кала во полэл, кай лэсти ԥарэс через пэстирэ гиндоря, во трэбуй тэ улэл лэн. О мануш трэбуй тэ старыийпэ тэ диқэл пэ жызня лащя ригатар. Погиндосар, чаче тутэ на вижал тэ затерэс? Можэт най кодэлэса залэспэ? Или можэт о место най во? Или можэт тут на лэн пэ бути, важ кода кай лэнди трэбуй мануш, савэстэ авэр профессия?

Погиндосар пала проблема, чаче вой кацави дэ бари, сар ту гиндос? Если тутэ на вижыля кадэва разо, на гиндосар, кай кадя авэла вся и время. Сгиндосар пала кода, со тутэ драго вижал. Пала кода, сар ту драго ладис лэ ереса и лэ друӷонэнца, сар драго терэс андэ собрания варисави дила. Если ту полян, кай ту часто гиндос пала кода, со тутэ на вижал, старысав, кай тутэ кацаво тэ на авэл. Катар ту ӷанэс, кай ту никала на затерэса ловэ? Погиндосар, со ту инке можэш тэ стерэс, кай тэ на умэкэс и вас?

Диқэн пэ вся лащя ригатар и домардён кода, со камэн тэ стерэн

Андэ послидни бэрша, и учони набут полинэ, со авэла, кала о мануш надеийпэ пэ варисо. Вонэ ԥэндэ, кала о мануш фартэ патял, кай во сможэт тэ домардёл кода, со во камэл, лэстэ када вижала. Амэ ӷанас, кай о мануш можэт тэ надеийпэ пэр пэстэ и пэ авэр мануша. Анда авэр статья амэ диқаса, кай о мануш можэт инке тэ надеийпэ по Дэл. Када поможыя, кай о мануш тэ диқэл пэ вся лащя ригатар, и тэ домардёл кода, со камэл.

О мануш трэбуй тэ ӷанэн, со во камэл, и тэ домардёл, кай лэстэ вся тэ вижал. И кала во диқэла, кай лэстэ варисо вижыля, тоди во патяла андэр пэстэ. Если о мануш на ӷанэн тэ терэл када, тоди во трэбуй тэ загиндойпэ. Амэ трэбуй тэ сэрас, кай фартэ вушэро тэ ужас андэ дила, сави исин кажно дес и тэ бистрас пала кода, со па чачимастэ важ амэндэ само важно. Андэ Библия ужэ дэлмут сас пистромэ, кай спэрва трэбуй тэ полас, со май важно. Андэр латэ ԥэнэнпэ: «Тумэ [трэбуй] тэ полэн, со май важно всаворэстар» (Филиппийцам 1:10).

Кала о мануш полэла, со май важно, лэсти авэла май вушэро тэ полэл, со во камэл андэ жызня, андо ери и андэ служэния лэ Дэвлэсти. Но спэрва трэбуй тэ на стол англа пэстэ фартэ бут цэли, ай тэ витидэл кодэла цэли, савэ вижала вушэро тэ домардёл. Если тэ домардёл и цэль, сави во стодя, фартэ ԥарэс, через када во можэт тэ умэкэл и вас и тэ парашэл вообще варисо тэ терэл. Важ када фэдэр, кай о мануш тэ на стол бари цэль, пэ сави, кай тэ домардёл, трэбуй бут время. Ай тэ стол май цынёне цэли, пэ савэ ужала май набут время.

И мануша ԥэнэн: «Если закамэса, стерэса вся». И часто кадя и вижал. Посли кода, сар о мануш поля пэстирэ ӷлавни цэли, кай тэ домардёл лэн, трэбуй тэ авэл жылания и тэ пристол о зор. Кай во тэ закамэл инке май фартэ када тэ стерэл, трэбуй тэ гиндой, пэ скати дэ важни кадэла цэли и саво лашимос авэла, кала во лэн домардёла. Канешно, авэла разно ԥаримос, но о мануш трэбуй тэ диқэл пэ када най сар по тупико, ай сар пэ возможность тэ домардёл пэстири цэль.

Но кадяжэ важно о мануш тэ гиндой, сар тэ домардёл пэстири цэль. О Рико Снайдеро, саво стердя бари иследования, подԥэнэн, кай о мануш сразу тэ погиндой, кай пэстири цэль во можэт тэ домардёл по разному. Если кадя на вижала, тоди во тэ поджал каринг када авря ригатар, пока лэстэ када на вижала.

О Снайдеро кадяжэ ԥэнэн тэ сытювас тэ парувас и цэли. Если амэндэ нисар на вижал тэ домардювас варисави цэль, и амэ нэ можэм када тэ прилас, тоди через када амэ кати умэкаса и вас. Но если тэ парувас и цэль пэ кодэя, сави вижала тэ домардёл, тоди о мануш на умэкэла и вас.

Андэ Библия исин лашо примеро, саво доԥэнэн кадэва гиндо. О царё Давидо фартэ камэлас тэ строий о храмо важ пэско Дэл Иегова. Но о Дэл ԥэндя лэ Давидости, кай када стерэла лэско шаво о Соломоно. Кала о Давидо уӷангля пала када, во на умэкля и вас и на тердёлас пэ пэско, ай парудя пэстирэ цэли. Во отдэлас пэско зор, кай тэ стидэл и ловэ и материалоря, савэ потом авэна трэбуй лэстирэ шавэсти, кай тэ строий о храмо (1 Царей 8:17—19; 1 Летопись 29:3—7).

Дажэ если о мануш лэл зор кодэлэстар, кай старыийпэ тэ диқэл пэ вся лащя ригатар, гиндой пала лашимос и домардёл пэстирэ цэли, через и время во всаек можэт тэ умэкэл и вас. Васо? Важ кода кай диқэл, скати ԥаримос андэ жызня и во нащи нисо тэ парувэл. Но со поможыя лэ манушэсти, кай во всаек тэ на умэкэл и вас, кала диқэл кацаво ԥаримос, сар чорымос, войны, преступность, насвалимос и смэрть?

[Картинка, страница 7]

Если тутэ на вижыля кадэва разо тэ затерэс, на гиндосар, кай кадя авэла вся и время.

 [Картинка, страница 8]

О царё Давидо сас ӷотово тэ парувэл пэстирэ цэли.