Nuü̃ curüporamaẽ i ĩnügü i tchieü̃

TAꞌACÜGU curüĩnü ngẽguma gutchaü̃gü cuü̃ nangupetügu? Muü̃tchi i duturugü nagu nayaõgüü̃ na curü ngãü̃ i ngẽma catchiga nanaweꞌ na meü̃gu rüĩnü rüeꞌna tchieü̃gu rüĩnü. Muü̃eꞌpüꞌcüna gutchaü̃gü tüü̃ nangupetüü̃ i torü maü̃wa. Notürü nümaü̃ nüü̃́ nangẽma yeera i gutchaü̃gü. Ngẽmaãcü, tüꞌcüü̃ nümaü̃ i duü̃ü̃gü meã namaẽama i gutchaü̃wena rü togü paãma narümaãtchi i gutchaü̃güwa woo tama nagutcha niĩ i ngẽma gutchaü̃?

Nhaü̃gu rüĩnü: cuma rü nacaꞌ cudau i wüi puracü. Notürü puracütanüü̃arü ãẽꞌgacü tama cuna naã i puracü. Taꞌacügu curüĩnü? Bemana nagu rüĩnü na cuma rü tama cuü̃́ nangẽma i meü̃ i nacümagü, rü ta nagu rüĩnü na ngẽma rü taguma nanatoraü̃ rü ngẽmacaꞌ cugüãẽwa nüü̃ quiu i nhaü̃: ‘Taúema tchona naã i puracü. Tagutáma tchanayau i wüi puracü.’ Rüeꞌna, cuma rü ngẽma ngupetüguicatama rüĩnü rü ngẽmacaꞌ bemana nagu curüĩnü i nhaü̃: ‘Tchama rü tama duü̃ü̃ i meü̃ tchiĩ .’ Ngẽma ĩnügü naweꞌ na cuma rü tchieü̃guicatama rüĩnü.

Nhuãcü tama tchieü̃guicatama rüĩnü?

Taꞌacü tá cuü? Nüíraü̃ü̃, nüü̃ nacuaꞌ na ngeü̃rüüü̃ i ĩnügü i tchieü̃ cuü̃́ nangẽma. Rü yicama, cunawaꞌe ngẽma ĩnügüü̃ curüporamaẽ. Cuãẽwa nanatoraü̃ẽẽ i curü ĩnü. Cuaꞌãtchiruü̃, eꞌna na cuma rü tama cunayau i ngẽma puracü erü taúema nanawaꞌe i curü puracü? Rüeꞌna na yima puracütanüü̃arü ãẽꞌgacü nanawaꞌe i wüi duü̃ü̃ na nüü̃́ nangẽma i to i meü̃ i nacümagü?

Tchi cuma rü nagu rüĩnügu i taꞌacü aicuma niĩ, nüü̃ cucuaꞌ na ngẽma curü ĩnügü i tchieü̃ rü tama aicuma niĩ. Eꞌna ngẽguma cuma rü tama cunayaugu i taꞌacü cunawaꞌe, naweꞌ na cuma rü tama wüi duü̃ü̃ meü̃ niĩ? Nüna cucuaꞌãtchi i meü̃ i nacümagü na cuü̃́ nangẽma, cuaꞌãtchiruü̃ cutanüü̃maã rü cumücümaã? Name niĩ cuma rü guü̃guma meü̃gu narüĩnü i curü maü̃wa. Aicuma niĩ na taucürüwa nüü̃ cucuaꞌ tchi cuma rü nüü̃́ icuyangau i wüi puracü rüeꞌna tama. Rü cuma rü yeera cuü ta na ĩnügü i tchieü̃na quiũgatchi.

Meü̃gu rüĩnü nüü̃ narüngü̃ẽẽ na nanayauü̃caꞌ i taꞌacü nanawaꞌe

Nhamaãcüü, nacaꞌ daucügü nüü̃ niu taꞌacütchiga niĩ i nagu nayaõ i naãẽwa. Nümagü nüü̃ niu na nagu nayaõ i meü̃ ngupetüü̃ nüü̃ narüngü̃ẽẽ na nanayauü̃caꞌ i taꞌacü nanawaꞌe. Ngẽma poperawa yeera i ngẽmatchiga nidea tá, na nhuãcü nagu nayaõ yeera tüü̃ narüngü̃ẽẽ. Nhuꞌma, nüü̃ niu na nhuãcü nagu nayaõ nüü̃ narüngü̃ẽẽ na nanayauü̃caꞌ i taꞌacü nanawaꞌe.

Na nagu cuyaõü̃caꞌ na cunaü tá i taꞌacü cunawaꞌe name nüna cucuaꞌãtchi i taꞌacü marü cuüü̃. Rü ta name meãma nagu rüĩnü i wüitchigü i taꞌacü wipeꞌewa cunaütchaü̃. Nüíraü̃ü̃, marü nüü̃ cucuaꞌ i taꞌacü tá wipeꞌewa cunaütchaü̃? Nhamaãcüü, torü maü̃ tüü̃ nanagutchaü̃ẽẽ na meã nagu rüĩnüẽü̃caꞌ natchiga i taꞌacü tanaütchaü̃ tá. Notürü Tupanaarü Ore marü ngẽmatchiga tüü̃ naucuꞌẽ rü nhanagürü: ‘meã penangugü i taꞌacü niĩ i aicuma meü̃ na penaüü̃caꞌ.’ — Piripucü̃ãꞌ 1:10.

Ngẽguma marü nüü̃ icuaꞌgügu i taꞌacü tá tanaügütchaü̃, name nagu tarüĩnüẽ wüitchigü i taꞌacü tanaütchaü̃ i tatanüü̃wa, rü torü õwa, rü ta puracüwa. Notürü, tama torü mecaꞌ niĩ, muü̃tchi i puracügü wüigu iügüü̃. Rü ta, name nüü̃ nauneta i taꞌacü tama nagutcha na nüíraü̃ü̃ naüü̃caꞌ. Erü tchi naügu i taꞌacü nagutchaü̃tchi niĩ, ngẽma rü bemana nüü̃ narümaãtchiẽẽ. Ngẽmacaꞌ name niĩ inaügü i taꞌacü yeera natautcha niĩ rü ngẽmawena naü i taꞌacü nagutcha niĩ.

Muü̃ma i duü̃ü̃gü nüü̃ niugü i nhaü̃: “tchi cunawaꞌegu, cuma rü cunayau tá i ngẽma.” Ngẽma rü bemana aicuma niĩ. Ngẽguma marü nüü̃ icuaꞌgügu i taꞌacü iügüü̃tchaü̃, inawaꞌegü yigü iporaẽẽ na iügüü̃caꞌ i ngẽma. Rü nagu tarüĩnüẽ na nhuãcü ngẽma rü tacaꞌ narümemaẽ niĩ, tórü ngútchaü̃ naporaẽẽ. Aicuma niĩ na gutchaü̃gü tacaꞌ íngu na iügüü̃caꞌ i ngẽma, notürü inawaꞌegü ngẽma gutchaü̃güü̃ tarüporamaẽ.

Notürü inawaꞌegü meãma yigü ínameẽẽgü na iügüü̃caꞌ i taꞌacü tanawaꞌegü. Nguꞌẽẽruü̃ ya Charles Snyder, na nacaꞌ nanguꞌ na tüꞌcüü̃ torü mecaꞌ niĩ nagu tayaõgüü̃ rü ngẽmatchiga nüü̃ niu na name niĩ meã nagu tarüĩnüẽ na nhuãcü iügüü̃ i taꞌacü inawaꞌegüü̃. Rü ngẽmaãcü, ngẽguma gutchaü̃ ngupetügu, nüü̃ icuaꞌgüü̃ na nhuãcü ítameẽẽ i ngẽma.

Nguꞌẽẽruü̃ ya Charles tüü̃ naucuꞌẽ ta, na name niĩ nüü̃ icuaꞌgüü̃ nhugu name nanaütchicüü i torü ngútchaü̃. Erü ngẽguma tama tayaugügu i ngẽma ngútchaü̃ rü tarümaãtchi tá. Notürü ngẽguma tanaütchicüügu i torü ngútchaü̃ i taꞌacütchiga inawaꞌegü, wenaarü nagu tayaõgüü̃ na iügüü̃caꞌ i ngẽma.

Tupanaarü Orewa nangẽma wüi cuaꞌruü̃ i ngẽmatchiga. Ãẽꞌgacü ga Dawí ãũrima nanawaꞌe nanaü ga Tupanapata. Notürü, Yeuwa ya Tupana namaã nidea na nüma rü tama nanaü ga yema. Dawí nane ga Charumáu ga nanaü ga Tupanapata. Dawí tama nanu ga yemagagu, nüma rü nanaütchicüü ga norü ĩnü natchiga ga taꞌacü naütchi. Rü yemacaꞌ Dawí Charumáuü̃ narüngü̃ẽẽ ga guü̃ma ga norü yemaü̃maã na naüü̃caꞌ ga yema. — 1 Reis 8:17-19, 1 Crônicas 29:3-7.

Woo cuma rü nüü̃ curüporamaẽ i ĩnügü i tchieü̃ rü tama tchieü̃guicatama rüĩnü rü ta nagu cuyaõ na cunaü i taꞌacü cunawaꞌe, bemana nangupetüü̃ yeera i gutchaü̃ na cuü̃́ nanagutchaẽẽ na nagu cuyaõü̃caꞌ na wüi meü̃ nangupetüü̃ tá. Cuaꞌãtchiruü̃, guü̃ i naãnewa, duü̃ü̃gü niõẽ nagagu i gueragü, tchieü̃gü, daꞌawegü, rü yueü̃. Ngẽmaãcü, taꞌacü tá iügüü̃ na nagu tayaõgüamaü̃caꞌ na meü̃ wipeꞌewa nangupetüü̃?

[Natchicünaꞌã]

Eꞌna ngẽguma cuma rü tama cunayaugu i taꞌacü cunawaꞌe, naweꞌ na cuma rü tama wüi duü̃ü̃ meü̃ niĩ?

[Natchicünaꞌã]

Ãẽꞌgacü ga Dawí nanaütchicüü ga norü ĩnü i taꞌacü naütchaü̃tchiga