Wani xbʼobʼ kʼulaxuksok luchar ja chʼayel kujtik ja smajlajeli

¿JASTAL waxa wila ja yajni wa x-ekʼ jastik bʼa mi xmajlaxi ja bʼa sakʼanili? Ja matik jel chapane wa skʼuʼane ke ja sjakʼjel ja sjobʼjel jaw jani ti chʼikan ta wa xchʼaykujtik ja smajlajel ma miyuk. Jpetsaniltik wani x-ekʼ jbʼajtik wokolik ja bʼa sakʼanili, jujuntik mas yuja tuki. Pe, ¿jas yuj jujuntik kristyano wa xkuchyujile ja jastik mi xmajlaxi, sok chapan aye bʼa oj snoch-eyi, yajni ja tuk mi xkuchyujile ama kechantasok jun chʼin wokol?

Jun sjejel, pensaraʼan wana slejel jun aʼtel. Waja jobʼ bʼa june pe mi ajiwi ja aʼteli. ¿Jastal oja wabʼ? Bʼobʼta ojni awabʼ mila kisji sok yiljel jun wokol bʼa mixa oj chʼayuk sok spensarajel: «Mini ma oj yaki kaʼtel. Mixani oj taʼ». Pe ja mas tuki bʼobʼta oj sjom yibʼanal jawa sakʼanili sok oj kʼot ya pensaraʼuk: «Mi jas kaʼtel. Mi la makuniyon». Ja pensarik it wa sjeʼa wan chʼayel ja smajlajeli.

Jastal skʼulajelsok luchar

¿Jastal oj bʼobʼa kʼulsok luchar bʼa mi oj chʼayukawuj ja smajlajeli? Bʼajtan jani jel tʼilan oja naʼ sbʼaj ja tikʼe pensarik mi xmakuni. Tsaʼan, skʼulajelsok luchar. Pensaran bʼa pilan modo. Jun sjejel, ¿meran maʼ ja mi ajiwi ja aʼtel jaw yuj mila kisji, ma yuja empresa wan slejel june bʼa ayiʼoj pilan chapjelal?

Pensaran bʼa jujuntik ekʼele bʼa jelxelxa chʼayelawuj ja smajlajeli. Yuja mi kisjitik jun ekʼele, ¿wan maʼ stojolan mixa jas kaʼteltik, ma oj bʼobʼ jpensaraʼuktik bʼa tuk modoʼik ja bʼa jsakʼaniltik, jastal ja bʼa kaʼteltik bʼa Dyos, ja jastal wa xkila jbʼajtiksok ja jpamilyatik sok ja kamigotik bʼa jelni lek xwajkujtiksoke? Mokni akis ja pensarik mi stojoluk sbʼaja jas ojto ekʼuki. ¿Pe seguro xa maʼ aytik bʼa mixa oj jtatik aʼtel? Cha ayni pilan modoʼik bʼa mi oj jkistik ja pensarik mi xmakuni.

Modoʼik bʼa stojol sbʼaja kʼelsatik

Ja bʼa tsaʼanikxta jabʼil, ja paklanumik xcholuneje ja smajlajel bʼa jun modo jel cham yabʼjel, ama mini ayta stikʼanil, wani xyalawe ojni bʼobʼ lajxukujtik stajel ja jkʼelsatiki. Jastalni oj sjeʼ ja bʼa artikulo jakumi, ja smajlajeli mastoni ekʼxel yuja jaw, pe ja yaljel it wa stojolan bʼa tuktukil modo. Jun sjejel, ta jaʼ wa xwaj jkʼujoltik ja bʼa smajlajeli it, ojni kʼe ajyukujtik jun modo bʼa mas stojol ja bʼa jkʼelsatiki.

Bʼa skʼuʼajel oj jtatik ja jkʼelsatik ja bʼa tyempo jakumi, tʼilani oj ajyukujtik ja kostumbre bʼa slejel sok stajel. Ta kaʼa jbʼajtik kuenta mey kiʼojtik ja kostumbre jaw, masni lek oj jpensaraʼuktik ja tikʼe jkʼelsatik kiʼojtiki. Sbʼajtanil: ¿ay maʼ kiʼojtik jun jkʼelsatik? Jelni pasil oj stim-otik ja jas kʼajyel wa xkʼulantik ta mix jpensaraʼantik ja jas meran mas tʼilan wa xkʼanatik ja bʼa jsakʼaniltiki. Sbʼaja rason it jel xkoltani bʼa stsajel lek jas skʼulajel, bʼa jitsanxa tyempo ja Biblia yalunejxani ‹ke oj natik lek ja jastik junuk mas tʼilani› (Filipenses 1:10).

Yajni jtsaʼatikta ja jas oj jkʼuluktik, maxani pasil oj tsatik jujuntik jastik wa xkʼanatik oj jtatik ja bʼa jsakʼaniltiki, jastal ja bʼa kaʼteltik bʼa Dyos, bʼa jpamilyatik ma bʼa kaʼteltik. Pe jelni tʼilan ja bʼa skʼeʼulabʼil mok katik ajyuk jitsan jkʼelsatik sok jani la jtsatik ja bʼa mas pasil oj lajxukujtik. Yujni bʼobʼta oj el jganatik sok mixa oj kʼuluktik. Ja yuj masni lek oj katik koʼuk bʼa tʼusan tyempo ja jkʼelsatik mas niwan, yajel ajyuk bʼa mas chʼin bʼa mas wego oj jtatik.

Jastalni wa xyala jun poko yaljel, skʼanjel wani xbʼobʼi. Sok jelni stojol. Yajni jtsaʼatikta ja jas mero wa xkʼanatik, jaxani wa xmakunikujtik ja ipal bʼa skʼulajel, ja skʼanjel bʼa skʼuljel luchar bʼa oj jtatik. Ojni katik tsatsbʼuk ja jas jtsaʼatikta skʼulajel spensarajel janekʼto chaʼanyabʼalil ja jkʼelsatik sok ja slekilalik oj ajyukujtik yajni xtaʼatiki. Ama ojni ekʼ jbʼajtik wokolik pe tʼilani mi oj katikan bʼa oj stim-otik.

Chomajkil, tʼilani oj jpensaraʼuktik modoʼik bʼa wa xmakuni bʼa stajel ja jkʼelsatiki. Ja C. R. Snyder, ja maʼ spaklunej lek sbʼaja janekʼto chaʼanyabʼal ja smajlajeli, wa xyala ke apensaraxuk bʼa tuktukil modo jastal stajel jun jkʼelsatik. Jachuk ta bʼa jun modo mi xlajxi kujtik stajel ja jas jtsaʼunejtiki, ojni bʼobʼ katik makunuk pilan sok jach man oj jtatik.

Ja Snyder cha wa xyala tʼilani oj jnatik jas ekʼele oj jtukbʼestik jun jkʼelsatik bʼa pilan. Ta mi xlajxikujtik ja jkʼelsatiki sok jel xpensaraʼantik ojni el jganatik. Pe ta jtukbʼestik yuj june bʼa yiljel jastalni stojol, ojni ajyukujtik smajlajel.

Ja bʼa Biblia wa xtaʼatik jun sjejel jel xkoltani sbʼaja it. Ja rey David wani xkʼankʼuniyuj yajel kʼeʼuk jun templo sbʼaja sDyos Jyoba, pe aljiyabʼ jani ja yunin Salomón ja ma oj ajyukyuj ja cholal jaw. Anima mi bʼobʼ ja jas wa skʼana, ja David mini tajki cha mini sleʼa modo man oj staʼ, jani stukbʼes ja skʼelsati. Jani wa skʼujol bʼa stsomjel ja takʼin sok ja yamkʼabʼalik oj makunukyuj ja yunin bʼa yajel kʼeʼuk ja templo (1 Reyes 8:17-19; 1 Crónicas 29:3-7).

Pe ama lajxitakujtik bʼa skʼulajel luchar ja chʼayel kujtik ja smajlajel sok ajyelkujtik modoʼik bʼa stojol ja bʼa jkʼelsatiki, bʼobʼta cha mitoni ay kiʼojtik lek smajlajel. ¿Jas yuj? Yujni ja mey kiʼojtik smajlajel tini jakel bʼa jastik mini tʼun xbʼobʼ jkomtik. Yajni wa xpensarantik ja bʼa wokolik wa x-aji chamskʼujole ja kristyano, jastal ja pobreʼil, ja guerraʼik, jastik mi tojuk, ja chamelik tikʼanxta wa x-ixtalani sok ja chamelal, ¿jasa oj jkʼuluktik bʼa mi chʼaykujtik ja smajlajeli?

[Dibujo]

Ta mi x-ajiwi ja aʼtel waxa kʼana, ¿oj maʼ apensaraʼuk mixa oja taʼ?

[Dibujo]

Ja rey David mini jelxi soka skʼelsatiki