Wo se Phi Oshọ ri jẹ Iphiẹrophiyọ Evwo Kparobọ

ẸRO vọ yen wo vwo nẹ ebẹnbẹn wo hirharokuẹ? Ihwo buebun re tẹn ona tare nẹ ẹkpahọnphiyọ rẹ onọ yena che djephia sẹ wẹwẹ ohwo ro vwo iphiẹrophiyọ yẹrẹ ohwo ro je vwo. Avwanre eje hirharokuẹ ebẹnbẹn vwẹ akpeyeren, jẹ ọ rẹ ihwo evo gan vrẹ ọ rẹ ihwo efa. Diesorọ ihwo evo se vwo phi ebẹnbẹn rayen kparobọ, efa davwẹngba ayen se vwo phikparobọ, jẹ efa ghwe muomaphiyotọ ayen rha davwẹngba vuọvo-o siẹrẹ ayen de hirharoku emebẹnbẹn?

Kerẹ udje, vwẹ ẹro roro nẹ wọ guọnọ iruo. Wo kpo asan ọvo rẹ iruo de rhiephiyọ jẹ a rhọnvwe reyọ owẹ phiyọ iruo na-a. Mavọ yen oma che ru we siẹrẹ orọnvwọn tiọyen da phia? Ọkiọvo wo se no nẹ owẹ komobọ yen ayen senre, wo mi roro nẹ ọyen ebẹnbẹn ri bẹdẹ, wọ me ta: ‘O vwo ohwo vuọvo rọ cha reyọ owẹ phiyọ iruo-o.’ Ma bra kparobọ, wọ sa vwẹ uphẹn kẹ orọnvwọn vuọvo yena nẹ o wene ẹro rẹ wo vwo nẹ akpeyeren wẹn nẹ ‘wo che se ru emu vuọvo ro yovwiri-in, ji roro nẹ wo fiemu kẹ ohwo vuọvo-o.’ Oka rẹ iroro tiọyena ghini djephia nẹ wo vwo iphiẹrophiyọ-ọ.

A Vwọ Sen Ẹwẹn rẹ Jẹ Iphiẹrophiyọ Evwo

Mavọ yen wọ sa vwọ sen iroro yena? E vwo vughe oka rẹ orharhe rẹ iroro tiọyena ọyen owọẹjẹ ọghanghanre rẹsosuọ. Owọẹjẹ rọvwọ kpahọn ọyen a vwọ họnre vwọsuọ. Davwẹngba vwọ riẹn oboresorọ e vwo jẹ owẹ ẹreyọ. Kerẹ udje, ghini uyota nẹ a rhọnvwe reyọ owẹ-ẹ kidie nẹ ohwo vuọvo guọnọ reyọ owẹ phiyọ iruo-o? Gbanẹ ohwo ro vwo oka rẹ ona ọfa yen ọga na guọnọre?

Wo de mu ẹwẹn kpahen omamọ rẹ iroro, ọ cha nẹrhẹ wọ mrẹvughe nẹ erharhe iroro tiọyena vrẹka. A da sen wẹ obọvo kọyen o vwo mudiaphiyọ nẹ wo che se ru emu vuọvo ro yovwiri-in yẹrẹ wọ sa vwẹ ẹwẹn roro ẹdia efa vwẹ akpeyeren wẹn; kerẹ ẹga ri Jihova, igbeyan wẹn yẹrẹ oyerinkugbe rẹ orua; re dia asan ru wo de phiẹkparobọ re? Yono oborẹ wọ sa vwọ sen erharhe iroro ri shekpahen obo re sa phia kẹ wẹ vwẹ obaro na, rere wo vwo imuẹro nẹ iroro tiọyena ghwa “iroro rẹ oshọ ghevweghe nẹ orọnvwọn ọbrabra cha phia.” Vwọrẹ uyota, wọ ghene sa riẹn sẹ wọ cha nama mrẹ iruo-o? O ji vwo erọnvwọn efa wo se ru wọ vwọ sen erharhe iroro.

Omamọ rẹ Iroro re Riariẹ Obo Wo Se Ru Phiyọ

Vwẹ ikpe evo rhire na, ihwo ri ruẹ ehiahiẹ ta ota rọ vwerhen oma kpahen oborẹ iphiẹrophiyọ mudiaphiyọ dedena, obo rẹ ayen tare na ghwa nabọ dje obo ro mudiaphiyo fiotọ-ọ.  Ayen tare nẹ iphiẹrophiyọ churobọ si imuẹro ohwo vwori nẹ ọ cha yanmu obo rọ vwọtua. Kirobo rẹ uyovwinrota rọ vwọ kpahọn ọnana che djephia, vwọrẹ uyota iphiẹrophiyọ vrẹ a vwọ yanmu oboravwọtua, ẹkẹvuọvo, ọ họhọre nẹ a sa reyọ oborẹ ayen fanrọ wan na vwo ruiruo vwẹ idjerhe evo. A da tẹnrovi iphiẹrophiyọ romobọ, ọ sa chọn avwanre uko vwo vwo omamo rẹ iroro kpahen obo re se vwo ru yovwinphiyọ.

Avwanre se vwo vwo imuẹro nẹ a cha yanmu oboravwọtua rehẹ obaro na, ofori nẹ e vwo asan re si oboravwọtua vẹ obo ra vwọ yanmu ayen phiyọ. Wo rhe vwo asan ru wo si ayen phiyọ-ọ, o yovwin siẹrẹ wọ da nabọ roro kpahen ẹkẹn ru wo bru kẹ oma na. Ẹsosuọ, wo vwo oborẹ wọ vwọ tua? Ọlọhọre mamọ e vwo mu ẹwẹn kpahen irueru ri kẹdẹ kẹdẹ rẹ akpeyeren te asan a gbe tobọ mrẹ ọke vwo roro kpahen oborẹ avwanre ghene ma guọnọ vwẹ akpeyere-en. Vwọ kpahen uruemu nana re vwo vwo oboravwọtua vwẹ akpeyeren na, Baibol na je ta ota kpahọn ọke grongron jovwo re: “Rere ovwan vwo vughe obo ri yovwiri.”—⁠Filipae 1:10.

A da sa rhuẹrẹ ekuakua ra vwọ tua vwẹ akpeyeren phiyọ vwo nene ọ rọ ma ghanre, kọ cha lọhọ a vwọ sane e ra cha vwọtua vwẹ ẹdia evọ vwẹ akpeyeren rẹ avwanre kerẹ vwẹ ẹga ri Jihova, vwẹ orua avwanre vẹ akpeyeren ri nẹdẹ ra ruẹdẹ rẹ avwanre. O che yovwin siẹrẹ ẹkẹn re bru kẹ oma na gbi bun nọ-ọ rere ọ sa vwọ lọhọ ra vwọ yanmu ayen. Oboravwotua da bẹn ẹyanmuo, ọ sa nẹrhẹ udu nẹ avwanre owọ. Otiọyena, o che yovwin siẹrẹ a da ghare oboravwotua phiyọ ẹkẹn itete, a me vwo tua ọvuọvo rọyen.

“Owenvwe na da herọ, ke se ruo.” Ọtiọyen isẹ rẹ awanre ọvo tare, isẹ yena gbare. E de vwo oboravwotua nure, a guọnọ owenvwe vẹ erhiorin a sa vwọ yanmu ayen. A sa kpuriẹn phiyọ owenvwe avwanre na womarẹ e vwo roro kpahen obo ri se nẹ obuko rẹ oborẹ avwanre vwọtua na rhe vẹ obo rọ ghanre te kẹ avwanre. A riẹnre nẹ ebẹnbẹn cha rhe jẹ e nẹ ebẹnbẹn na kerẹ eshegberudio-on kidie e se phi ayen kparobọ.

O ji fo nẹ e roro kpahen owọẹjẹ re sa wian rere a sa vwo yanmu oboravwọtua na. Author C. R. Snyder ro yono kpahen oborẹ iphiẹrophiyọ ghanre te, vwẹ iroroẹjẹ phia nẹ, o vwo idjerhe buebun ra sa vwọ yanmu oboravwọtua. Ọtiọyena, idjerhe ọvo rha wia-an, ka sa davwen ọfa, oyena rha je wia-an, a je sa davwen ọfa, ọtiọtiọyen e che rhe ruo a ke mrẹ ọ rọ cha wian.

Snyder je vwẹ iroroẹjẹ ọfa phia, oyovwirin ra vwọ riẹn ọke ro fori ra vwọ vwẹ oboravwọtua ọvo vwo wene ọfa. Wọ da davwẹngba wẹn eje jẹ wọ sa yanmuẹ emu ọvo ru wọ vwọ tua-a, ọnana sa so ofudjevwe kẹ wẹ. Ukperẹ ọtiọyen, wọ sa vwẹ ọfa rẹ wọ sa yanmu vwo wene, ọnana cha nẹrhẹ wo vwo iphiẹrophiyo ọfa rọ fẹnẹre.

Baibol na vwo omamọ udje rọ sa chọn avwanre uko vwẹ ẹdia nana. Ovie Devid mrẹrẹ kerẹ okpuphẹn rọ vwọ bọn uwevwin rẹ ẹga kẹ Jihova Ọghẹnẹ rọyen. Ẹkẹvuọvo Ọghẹnẹ vuẹrẹ nẹ ọmọ rọyen Solomọn yen vwo uphẹn yena. Ukperẹ Devid vwo siọrhan nẹ ọyen yen cha bọn uwevwin rẹ ẹga na, o de wene oborẹ ọ vwọtua. Ọ da vwẹ ẹgba rọyen vwo koko igho vẹ ekuakua rẹ ọmọ rọyen cha guọnọ rere o se vwo ruiruo rẹ ebanbọn na re.—1 Ivie 8:17-19; 1 Ikun Rivie 29:3-7.

Ọ da tobọ dianẹ avwanre se ru iphiẹrophiyọ avwanre ganphiyọ womarẹ a vwọ vwẹ omamọ ẹro vwo ni obaro na ji vwo oborẹ avwanre vwọtua vwẹ ẹwẹn, o ji vwo ẹdia evo rẹ iphiẹrophiyọ avwanre de ji shekpotọ. Diesorọ a vwọ ta ọtiọyen? Erọnvwọn rẹ avwanre vwẹ ẹgba vwe enu raye-en rẹ avwanre hirharokuẹ yen ma nẹrhẹ avwanre jẹ iphiẹrophiyọ evwo. Siẹrẹ e de roro kpahen egbabọse egangan rẹ ihworakpọ rhiẹromrẹ nonẹna kerẹ ọbẹnvwẹ, ifovwin, oshenyẹ vẹ imuoshọ rẹ ega vẹ ughwu, mavọ yen e se vwo iphiẹrophiyọ ghene egbabọse nana eje?

[Uhoho rọhẹ aruọbe 7]

Wọ da guọnọ iruo kpo asan jẹ a reyọ owẹ-ẹ, ku wo ghwe roro nẹ ohwo vuọvo gbe cha sa reyọ owẹ phiyọ iruo-o?

[Uhoho rọhẹ aruọbe 8]

Vwọ kpahen oboravwọtua, Ovie Devid dje uruemu ra vwọ nuẹ