Ni Nga Lwa Na Mavhonele A Si Avhuḓi

NI ITA mini musi no ṱangana na thaidzo? Vhaḓivhi vhanzhi vha ri nḓila ine na fhindula ngayo yeneyo mbudziso i sumbedza arali ni muthu a re na mavhonele avhuḓi kana a si avhuḓi. Roṱhe ri ṱangana na zwiimo zwi konḓaho vhutshiloni, zwa vhaṅwe ndi zwinzhi u fhira zwa vhaṅwe. Ndi ngani vhaṅwe vhathu vha sa ṅali musi vho ṱangana na thaidzo khulwane ngeno vhaṅwe vha tshi ṅala musi vho ṱangana na thaidzo i sa ri tshithu?

Sa tsumbo, kha ri ri ni khou ṱoḓa mushumo. Na ita nyambedzano ya uri ni tholiwe, fhedzi ni si tholiwe. Ni ḓipfa hani ni songo wana wonoyo mushumo? Ni nga vhona u nga hu na zwo khakheaho nga inwi, na zwi dzhia uri ndi thaidzo ine ya ḓo dzula i hone, na humbula uri: ‘A hu na ane a nga nthola. Ndi nga si vhuye nda vuwa ndo wana mushumo.’ Kana ni nga vhona u nga a ni muthu wa tshithu nge ni si wane wonoyo mushumo. U humbula nga yeneyo nḓila zwi sumbedza uri ni na mavhonele a si avhuḓi.

U Lwa Na Mavhonele A Si Avhuḓi

Ni nga lwa hani na mavhonele a si avhuḓi? Vhukando vhuhulwane ndi u thoma u ḓivha arali ni na mavhonele a si avhuḓi. Vhukando vhu tevhelaho ndi u lwa na eneo mavhonele. Lingedzani u wana zwo itaho uri ni si wane wonoyo mushumo. Sa tsumbo, naa ndi ngoho uri wonoyo mushumo a no ngo u wana nga nṱhani ha uri vhathu a vha ni funi? Kana naa mutholi o vha a khou ṱoḓa muthu o gudelaho zwithu zwe inwi ni si zwi gudele?

Ni nga zwi vhona uri no kaludza zwithu arali na vhambedza mavhonele ane na vha nao na zwine na zwi ḓivha uri ndi ngoho. Naa ndi ngoho uri ni nga si kone u ita tshiṅwe tshithu zwavhuḓi nge na kundelwa u ita tshithu tshithihi? Ni nga humbula zwine na khou zwi ita zwavhuḓi vhutshiloni haṋu, u fana na kha vhushaka haṋu na Yehova, muṱani waṋu na u vha na khonani dzavhuḓi. Ni songo vha na mihumbulo ya uri zwoṱhe zwine na ita zwi ḓo fela mbevha. Hu ḓivha nnyi uri a ni tsha ḓo dovha na wana mushumo? Hu na zwiṅwe zwine zwa nga ni thusa uri ni si vhe na mahumbulele a si avhuḓi.

Ivhani Na Mavhonele Avhuḓi Musi Ni Tshi Ḓivhetshela Zwipikwa

Vhaṱoḓisisi miṅwahani ya zwino a vha ṱalusi fhulufhelo nga nḓila yo ṱanḓavhuwaho. Vha ri u vha na fhulufhelo ndi u tenda uri u ḓo kona u swikelela zwipikwa zwau. Thero i tevhelaho i ḓo sumbedza uri u vha na fhulufhelo a si u sokou tenda uri u ḓo swikelela zwipikwa zwau. Fhedzi zwine vhaṱoḓisisi vha amba zwi nga ri thusa u vha na mavhonele avhuḓi nga ha zwine ra nga kona u zwi ita.

Uri ni vhe na mavhonele avhuḓi nga ha zwine na nga kona u zwi ita, ni fanela u thoma nga u ḓivhetshela zwipikwa zwiṱuku. Musi ni tshi zwi swikelela, ni ḓo vha na fhulufhelo ḽa uri na zwipikwa zwa ndeme ni ḓo zwi swikelela. Arali ni si na zwipikwa zwe na zwi swikelela, zwi nga vha zwavhuḓi u humbulisisa nga ha zwipikwa zwaṋu. Ni nga ḓivhudzisa uri: ‘Naa ndi na zwipikwa zwe nda ḓivhetshela zwone?’ Zwi a leluwa u farakanea lune ni si ḓifhe tshifhinga tsha u humbula zwine na ṱoḓa vhutshiloni na zwine zwa vha zwa ndeme. Bivhili i a ri thusa uri ri ḓivhe zwi re zwa ndeme, i ri: “Ni kone u ḓivha zwine zwa vha zwa ndeme vhukuma.”​—Vhafilipi 1:10.

Musi ro no pfesesa uri zwa ndeme ndi zwifhio, zwi ḓo ri lelutshela u nanga zwipikwa zwi tshimbidzanaho na vhushaka hashu na Yehova, muṱa washu na vhutshilo hashu nga u angaredza. Fhedzi ri songo thoma nga u ḓivhetshela zwipikwa zwinzhi-zwinzhi. Ri nange zwipikwa zwine ra ḓo kona u zwi swikelela. Arali tshipikwa tsha konḓesa u tshi swikelela, zwi nga ri kula nungo, ra litsha. Nga zwenezwo, zwi nga vha zwavhuḓi u thoma nga u ḓivhetshela zwipikwa zwiṱuku zwine zwa ḓo ita uri ri kone u swikelela tshipikwa tshine tsha dzhia tshifhinga tshilapfu u tshi swikelela.

Arali muthu a ḓiimisela u ita tshiṅwe tshithu, u wana nḓila ya u tshi ita. Musi ro ḓivhetshela zwipikwa, ri fanela u ḓiimisela u zwi swikelela. Ri ḓo ṋaṋa u ḓiimisela u swikelela zwipikwa zwashu arali ra humbula zwivhuya zwine ra ḓo zwi wana. Zwone a zwi nga leluwi, fhedzi ri songo kulea nungo ra litsha.

Naho zwo ralo, ri tea u luka maano a uri zwipikwa zwashu ri ḓo zwi swikelela hani. Muṅwe muṅwali ane a pfi C. R. Snyder we a ita ṱhoḓisiso yo ṱanḓavhuwaho malugana na uri ndi zwa ndeme u vha na fhulufhelo, u ri muthu a songo vha na nḓila nthihi fhedzi ya u swikelela tshipikwa. Nga zwenezwo, arali iṅwe nḓila ya sa shuma, ri nga shumisa iṅwe.

Snyder u dovha a ri nga tshiṅwe tshifhinga, zwi khwine u litsha tshiṅwe tshipikwa wa ḓivhetshela tshiṅwe. Arali ri tshi khou kundelwa u swikelela tshiṅwe tshipikwa nahone ra dzula ri tshi khou vhilaela ngatsho, ri ḓo kulea nungo. Fhedzi arali ra ḓivhetshela tshiṅwe tshipikwa, ri nga vha na tshiṅwe tshithu tshine ra vhona uri ri ḓo tshi swikelela.

Ri na tsumbo yavhuḓi i re Bivhilini malugana na zwenezwi. Khosi Davida o vha o ḓivhetshela tshipikwa tsha u fhaṱela Yehova Mudzimu wawe thembele. Fhedzi Mudzimu a vhudza Davida uri wonoyo mushumo u ḓo u ṋea Salomo murwa wawe. Nṱhani ha uri Davida a sinyuwe, a bvele phanḓa na u fhaṱa thembele, o ḓivhetshela tshiṅwe tshipikwa. O ita zwoṱhe zwine a nga kona u kuvhanganya masheleni na thundu ye Salomo murwa wawe a vha a tshi ḓo i ṱoḓa uri a fhaṱe thembele.​—1 Dzikhosi 8:17-19; 1 Koronika 29:3-7.

Naho ro no ḓigudisa u vha na mavhonele avhuḓi vhutshiloni hashu, ri nga kha ḓi wana zwi tshi ri konḓela u vha na fhulufhelo. Ndi ngani? Ndi ngauri a ri na maanḓa a u piringulula thaidzo nnzhi dzine dza ita uri vhathu vha si vhe na fhulufhelo kha ḽino shango. Ri nga kona hani u vha na fhulufhelo ngeno ri tshi khou vhona vhushai, dzinndwa, mahaṱulele a si avhuḓi nahone ri tshi dzula ri tshi vhilaedziswa nga malwadze ṋamusi?

[Tshifanyiso]

Arali ni songo wana mushumo, naa ni ḓivhudza uri ni nga si vhuye na vuwa no u wana?

[Tshifanyiso]

Khosi Davida o tendelana na zwiimo a ḓivhetshela tshiṅwe tshipikwa