თქვა შეილებნა მერუათ პესიმიზმის

მუნერ დამოკიდებულება გიღნა რთულ სიტუაციეფიშ მიმართ? ბრელ სპეციალისტის მიორჩქჷ, ნამდა თე კითხვაშ პასუხშე იძირე, პესიმისტ რეთ დოვარ ოპტიმისტ. არძას მიხვადნა განსაცდელეფიშ გინოღალა, ნამთინეს უმოს მეტ პრობლემა უღჷ, ვინემ შხვეფს. მარა, მუშენ ხვადუ, ნამდა ნამთინე ორჯგინანს რთულ სიტუაციეფს დო მზათ რე, ხოლო გეგმოცადას მუშ ძალეფ, მუჟამსით შხვეფ ჭიჭე პრობლემეფიშ დროს ეჭოფნა ირფელშე ხეს?

მაგალთო, წერმიდგინით, ნამდა სამუშას გორუნთ. მეურთ გასაუბრებაშა დო ვარიას გირაგადნა. თე დროს მუნერ აზრეფ გირჩქინდუნა? შილებე ფიქრენთ, ნამდა თქვა, მუჭოთ ადამიან, უარგყვეს; შილებე თეს ვემიგვარებენ ფერ პრობლემათ მირჩქინანდათ დო თქვან დუდის ურაგადუდათ: „ჩქიმცალ კოჩის სამუშაშა მითინ ვეჭოფუნს. დღას ვადმაჭყინე მუშობა“. ვარდა, მუთ ხოლო უფრაშ რე, თე ართ წარუმატებლობას შილებე მთელ თქვან ცხოვრებას უკავშირენდათ დო ფიქრენდათ: „მა ხომ მუთუნ ვეგშმალე. მითინს ვა ვოსაჭირუქ“. არგამა რე, თეცალ აზროვნება პესიმიზმშა მეუთითენს.

ქებრძოლით პესიმიზმის

მუჭო შემლებნა მივერუათ პესიმიზმის? თიშ გააზრება, ნამდა თეცალ უარყოფით აზრეფ გიღნა, პირველ მნიშვნელოვან ნაბიჯ რე. თეშ უკულ, ოკო მერუათ თინეფს. ირნერო ქეცადით, თქვან წარუმატებლობას თე აზრეფიშ საპირისპირო ახსნა დუგორათ. მაგალთო: მართალო თიშენ გიწუესო ვარია, ნამდა მითინს ვაკო სამუშაშა გერჭოფან? დოვარ დამსაქმებელ, შხვა კვალიფიკაცია უღუნ ფერ პიროვნებას გორუნდჷ?

კონკრეტულ ფაქტეფშა დაფიქრება ქუგოძირანა, ნამდა პესიმისტურ აზრეფ გინოჸუნელ რეაგირებაშ შედეგ რე. ართ სიტუაციას ვარია ქოიწის-და, ნიშნენსო თენა თის, ნამდა წარუმატებელ რეთ? შეილებნანო ქიგიშინათ თქვან ცხოვრებაშ შხვა სფეროეფ — მაგალთო, მუს მიოჭირინეთ სულიერო, ოჯახურ ვარდა მეგობრულ ურთიერთობეფს, სოდეთ უმოს წარმატებულ რეთ? ქიდიგურეთ თქვან უარყოფით მოლოდინიშ „კატასტროფულ“ პროგნოზიშ დუდშე ეჩილითაფა. სოვრეშე გიჩქნა, ნამდა დღას ვა გაშინა სამუშა? უარყოფით აზრეფ მიშორათინ თეშო შხვა ბრელ მუდგარენიშ კეთება ხოლო შეილებნა.

დადებით განწყობა დო მიზანმიმართულ აზროვნება

ბოლო წანეფს მარკვიებელეფქ იმენდის საინტერესო ახსნა დუგორეს. მუჭოთ თინეფ იჩიებნა, იმენდ გულისხმენს დასახულ მიზნეფიშ მეჭირნაფაშ რწმენას. მუჭოთ უკულიან სტატიაშე გებგენთ,  იმენდ უმოს მეტის ნიშნენს. მარა ნამთინე შემთხვევას ჟიშე მოშინაფილ ახსნა სწორ რე. ყურადღებას იმენდიშ თე მხარეშა გუვამახვილენთ-და, თენა მიმეხვარებნა დადებით დო მიზანმიმართულ აზროვნებაშ გავითარებას.

ჩქინ მიზნეფიშ მენჭირნაფაშ რწმენა მიღდანინ, საჭირო რე, მიზნეფიშ დასახვა დო თინეფიშ მეჭირნაფაშ გამოცდილება მიღდან. ქარწყეთ, ნამდა თეცალ გამოცდილება ვაიღნან-და, შილებე ღირდას, დეფიქრათ, მუნერ მიზნეფს გოკონა მიოჭირინუათ. ქოიღნანო მუთუნნერ მიზან? ჯგირო ვედეფიფქრებუთ, მუ მოკონა სინამდვილეს დო მუ რე ჩქინო არძაშე უმოს მნიშვნელოვან-და, თე დროს ადვილო შილებე ქევაჸუნათ ცხოვრებაშ რიტმის დო გეგნვაჸუნათ ირდღაშიან საქმეეფს. თე პრაქტიკულ პრინციპწკუმა დაკავშირებით, ნამუთ ოხუ პრიორიტეტეფიშ გიშაგორუას, ბგებულენთ, ნამდა ბიბლიას თე აზრ დიდ ხანით ადრე რდუ მოჩამილ: „დერწმუნათ, მუ რე უმოს მნიშვნელოვან“ (ფილიპელები 1:10).

მუჟამსით ვადგინენთ პრიორიტეტეფს, უმოს ადვილ რე, მიღდან მიზნეფ შხვადოშხვა სფეროს, მუნერით რე სულიერ საკითხეფ, ოჯახურ ცხოვრება დოვარ გურაფა. მნიშვნელოვან რე, დუდშე ბრელ მიზან ვამღუდან. უჯგუშ იჸუაფ თიცალ მიზანიშ მენჭირნაფას ვეცადათ, ნამდგას უმოს ადვილო მივოჭირინუანთ. ზედმეტო რთულ მიზან ქუმაღვენუ-და, შილებე ხიოლქ მემდინან დო დუდ დუვანებათ. ათეშენ, უჯგუშ იჸუაფ თიცალ მიზნეფ, ნამდგაშ მეჭირნაფას ბრელ დრო ოკო, გოფრთათ ჭიჭე მიზნეფო, ნამდგას უმოს ადვილო მივოჭირინუანთ.

რაგადებულ რე, „სოდეთ მონდომა რენ, თექ ირფელ იკეთებენია“. მიზანს ქიმვოჭირინუათინ საჭირო რე, ნებისყოფა დო თიშ სურვილ, ნამდა შევასრულათ ჩქინ მიზან. შემლებნა, გუვამანგარათ ჩქინ გადაწყვეტილება თით, ნამდა დეფიფქრათ ჩქინ მიზანშე დო თი ჯგირობუაშე, მუთ თიშ მეჭირნაფას მაჸუნუ. მუშო ოკო რაგად, სირთულეეფ ხოლო მაღვენუნა, მარა თინეფს თეშ ოკო ვუჯინათ, მუჭოთ მიგვარებენ ფერ პრობლემეფს დო ოკო ვეფიფქრათ, ნამდა თენა ირფელიშ დასასრულ რე.

ჯგირ იჸუაფ, ჩქინ მიზნეფიშ მიოჭირნაფალო პრაქტიკულ საშვალებეფშე ხოლო დეფიფქრათ. რიკ სნაიდერ, ნამდგაქ საფუძვლიანო გიმირკუ, მუსხით მნიშვნელოვან რე იმენდ, ელამჩანა, ნამდა კონკრეტულ მიზანიშ მიოჭირნაფალო ბრელ საშვალება გეგმიბრინუათ. თაშ ნამდა, ართ საშვალებაქ ვა გამართლ-და, შილებე მაჟია ვარდა მასმა გეგმიბრინუათ.

თეს გეძინელ, სნაიდერ ელამჩანა, ნამდა ქიდიბგურუათ ართ მიზანიშ მაჟიათ თირუა. მიზანიშ მეჭირნაფა ქომჭირან-და, ირიათო თიშე ფიქრით გურ გომტირხუნა. მარა, უმოს რეალურ მიზან ქუმაღვენუნან-და, იმენდ გომრჩქიდუნა.

ბიბლიას, თეწკუმა დაკავშირებით, ჯგირ მაგალით რე მოჩამილ. მეფე დავითის მთელ გურით ოკოდ, მუშ ღორონთშო, იეჰოვაშო ტაძარიშ აშენება. მარა ღორონთიქ დავითის უწუ, ნამდა ტაძარიშ შენებაშ პატი დავითიშ სქუას, სოლომონს აღვენუდ. თიშ მანგიორო, ნამდა დავითის გურქ გუტირხკო ვარდა მუშ ეჩემკო, მიზნეფ დოთირუ. თიქ მთელ მუშ ენერგია ტაძარიშ ოშენებელო საჭირო მასალაშ დო თანხეფიშ შაყარუას ქიმკახარჯ, მუდგათ მუშ სქუას ქიმეხვარ შეასრულკო ტაძარიშ შენებაშ საქმე (1 მეფეები 8:17—19; 1 მატიანე 29:3—7).

თიმწკუმა ხოლო, მუჟამსით პესიმიზმის ვობრძოლუთ დო ვოცადუთ დადებით აზროვნებაშ გავითარებას, შილებე იშენით მორკუდან იმენდ. მუშენ იფჩიებუთ თეს? მუშენდა უიმენდობა, ნამდგას ამდღა შეფხვადუთ თი ფაქტორეფიშ შედეგ რე, ნამდგაშ მოგვარება ჩქინ ძალეფით ვეშემლებნა. მუჭო შემლებნა ვა ვოდინუათ იმენდ, მუჟამსით ფიფქრენთ თი პრობლემეფშე, ნამუთ მთელ მსოფლიოს რე, მუნერით რე სიღარიბე, ჩხუპეფ, უსამართლობა, ლახალა დო ღურა?

[Picture on page 7]

მუჟამსით სამუშაშე ვარიას გირაგადნა, ფიქრენთო, ნამდა დღას ვადგაჭყინენა მუშობა?

[Picture on page 8]

მიზანიშ თირუათ მეფე დავითიქ ახალ სიტუაციას ქიმუხუჯუ.