Akajasaga Mtima Mwachitema

ANA yakusawusya yakusasimana nayo akusamalana nayo uli? Ŵajinji akusati kajanje ka chiwusyochi mpaka kalosye kuti wawojo akusajasa mtima mwachitema kapena iyayi. Wosopewe tukusasimana ni yakusawusya, yine yikusaŵa yekulungwa kupunda ya ŵane. Nambo ana ligongo chichi ŵane ŵangajasaga mtima mwachitema pasimene ni yakusawusya, pele ŵane akusajasaga mtima mwachitema atamose yakusawusyayo yiŵe yamwana?

Mwambone tuwanichisye kuti akusosa masengo. Papite kukuwuchisya masengo ngakwalemba. Ana mpaka apikane uli mu mtima? Mwine mpaka ajiwoneje kuti jili ngani jekulungwa. Mwine mpaka aliŵechetele kuti, ‘ana pana mundu jwampaka anembe masengo lisikini mpela une? Yili yangakomboleka une kupata masengo.’ Mwine mpaka agambeje kuyiganichisya yayatendekweyi, ni palepele kutenda yine basi ni gamba kujila kuti paja une nili jwakulepela jula. Basitu une nili mundu jwangali mate. Naga mundu akusaganisya myiyi pa chakutendekwa chilichose nikuti ali jwakwasa mtima mwachitema.

Yampaka Tutende Kuti Tumalane ni Kwasa Mtima

Ana mpaka tumalane uli ni chakusawusyachi? Chindu chandanda chakusosekwa mnope chili kumanyilila kuti tukwete futoji. Kaneko tuloleje yampaka tutende kuti tumalane nalo. Akusosekwa apate yisyesyene yakwe. Mwachisyasyo ana yili yisyene yakuti pangali jwampaka ŵalembe masengo wawojo ligongo lyakuti ali lisikini? Kapena mwine yigambile kuŵa kuti achisyene masengogo asachileje mundu jwine jwakwete umanyilisi wakulengana ni wakwete wawojo?

Kumanyilila yisyesyene yakwe mpaka kwakamuchisye kuti akajasaga mtima chitema. Ana kulepela kupata masengo kampepe kukugopolela kuti wawojo ali ŵakulepela? Uli ngaganichisya yindu yakusakombola kutenda chenene, mpela yakusatenda pakumtumichila Yehofa, yakusatenda ku liŵasa lyawo soni kwa achimjawo? Nganisyo syakuliwona kuti ali ŵakulepela pasyayichile, akasikosyaga atendeje yakuti syatyoche mwachitema. Nambosoni ana wawojo akumanyilila uli kuti nganaŵa apatile masengo? Pana yejinji yampaka atende kuti akakolaga nganisyo syakulemwechekwasi.

Aganichisyeje Yampaka Yakamuchisye Kwanilisya Yakulinga Yawo

Yaka yapachangakaŵapa ŵakuwungunya apatile ngopolelo jakutesya chidwi pa maloŵe gakuti chembecheyo. Nambope ngopoleloji ngajikusala yosope pa maloŵega. Jemanjaji akusati chembecheyo kuli kulupilila kuti yakulinga yamkwete yichitendekwa. Mu ngani jakuyichisya tuchikambilana yakuti maloŵe gakuti chembecheyo gakusagopolela yejinji. Nambope ngopolelo jaŵasasile ŵakuwungunyaŵa jili jakamuchisya m’matala gejinji. Naga nganisyo syetu sili payindu yatukuyijembecheya, mpaka yitukamuchisyeje kuti tukakolaga nganisyo syakulemwechekwa nambosoni kuti tukajasaga mtima.

Naga tukukola yakulinga apanopano ni kuyikwanilisyaga, yichitukamuchisya kuŵa ŵakusimichisya mtima kuti tuchikwanilisya yakulinga yatukwete kusogolo. Naga ngakusatenda yeleyi mpaka luŵe lunda kuganichisyasoni ya yakulinga yakwete. Chandanda aliwusye kuti ana mgwete yakulinga yiliyose? Yili yangasawusya kumalilaga ndaŵi soni kuŵikaga nganisyo syetu payindu yatukusatenda pa umi wetu, nambo ni ngamanyililaga kuti ana kusyesyene pa umi wetu tukusaka chichi soni ana chakusosekwa mnope chili chapi. Pangani jakulola chakusosekwa mnope, Baibulo jasasile kalakala mwakupikanika chenene kuti, ‘Msaguleje ayo yayili yambone mnope.’—Afilipi 1:10

Patumanyilile yayili yakusosekwa mnope, yichiŵa yangasawusya kwa m’weji kusagula yakulinga yakwayana ni kutumichila kwetu Yehofa, liŵasa lyetu soni masengo getu. Nambope yili yakusosekwa mnope kuti tukaliŵichilaga yakulinga yejinji pa ndaŵi jimo. Nambosoni tuliŵichileje yakulinga yampaka tukombole kuyitenda. Naga chakulinga chetu chili chakusawusya mnope mpaka tutenguche soni kuwujila munyuma. Myoyo mpaka luŵe lunda kutendaga yakulinga yetu panandipanandi.

Ŵandu ŵane akusati “Naga mkwete chakulinga mkusapata matala gakuti uchikwanilisye.” Yeleyitu yili yisyene. Patusimichisye kuti tutende chinechakwe tukusaŵichilapo mtima, machili, soni tukusatenda yakomboleka kuti tuchikwanilisye. Patukaganichisya kusosekwa kwachakulinga chetu soni ya yakuyichisya yele yichipagwa panyuma pakuti tukombwele kuyitenda tukusaŵichilapo mtima. Yili yisyene kuti mpaka tusimaneje ni yakusawusya patukutenda yeleyi. Nambo tuyiwoneje yakusawusyayo kuti mpaka tukombole kumalana nayo, m’malo mwakuyiwona kuti jili mbesi ja yosope.

Nambosoni tuganichisyeje yampaka tutende kuti tukwanilisye yakulinga yetu. Jwakulemba jwine lina lyakwe Author C. R. Snyder, juŵalijiganyisye ya yakusosekwa kwa chembecheyo jwatite mundu akusosekwa kuganichisya yamatala gakulekanganalekangana gampaka gamkamuchisye kukwanilisya chakulinga chakwe. Naga litala lyaŵasagwile pandanda nganilikamuchisya mpaka asagule litala line.

Snyder jwatitesoni naga chakulinga chatwakwete pandanda chikusawusya mpaka tugambe kuchenga ni kola chakulinga chine. Patukulepela kukwanilisya chakulinga chetu ni gambaga kudandawula ya chakulingacho mpaka yituwujikasye munyuma. Nambo naga tukuchenga ni kola chakulinga chine mpaka yitukamuchisye ligongo mpaka tukole chinechakwe chatukuchijembecheya.

Baibulo mwana yisyasyo yejinji yakamuchisya pa ngani jeleji. Mwenye Daudi jwakwete chakulinga chakutaŵa nyumba ja Mlungu. Nambo Mlungu ŵamsalile Daudi kuti mwanache jwakwe Solomoni ni ŵachachitaŵa nyumbaji. M’malo mwakudandawula kuti chakulinga chakwe chilepelechekwe ni kulimbichilaga kuti ataŵe basi, jwalakwe jwagambile kuchenga chakulinga chakwe. Jwalipeleche pa kumkamuchisya mwanache jwakwejo. Jwasongangenye mbiya soni yindu yele yakumuchisye pakutaŵa nyumbaji. 1 Ayimwene 8:17-19; 1 Mbili 29:3-7

Atamose kuti mpaka tukombole kumalana ni ndamo jakwasa mtima mwachitema, ni ganichisyaga yampaka yitukamuchisye kwanilisya chakulinga chetu, nambope ndaŵi sine mpaka tulikayichileje. Ligongo chichi tukuti myoyo? Ligongo lyakuti yindu yejinji yayikusatendekwa pa umi wetu yayikusatutendekasya kuti tuwujile munyuma nganituŵa tukombwele kuyilekasya. Ana mpaka tutende uli kuti tukolepe chembecheyeyo atamosi kuti tukusimana ni yakusawusya yejinji mpela usawuchi, ngondo, ungali chilungamo, yilwele soni chiwa?

[Chiwulili]

Naga nganapata masengo gaŵasakaga ana yikugopolela kuti ngasapatasoni masengo?

[Chiwulili]

Mwenye Daudi naga chakulinga chakwe chilepechekwe jwachengaga ni kola chakulinga chine