Jeʼel u béeytal u kiʼimaktal a wóoleʼ

¿BIX a wuʼuyikaba le kéen yanaktech problemas? Le máaxoʼob kaʼanchajaʼan u xookoʼoboʼ ku yaʼalikoʼobeʼ le baʼax ken a núuk kéen beetaʼaktech le preguntaaʼ yaan u yeʼesik wa mantatsʼ kiʼimak a wóol bey xan wa séeb u lúubul a wóol. Tiʼ tuláakal máak yaan problemas, baʼaleʼ yaan máaxoʼob maas talam u kuxtaloʼob. ¿Baʼaxten túun yaan máakoʼobeʼ kex yaantiʼob problemaseʼ kiʼimak u yóoloʼob yéetel ku kaxtikoʼob bix jeʼel u yutskíintikoʼobeʼ? ¿Baʼaxten yaan uláakʼoʼobeʼ ku lúubul u yóoloʼob yéetel maʼ tu beetkoʼob mix baʼal utiaʼal u yutskíintikoʼob?

Koʼox aʼalikeʼ techeʼ ka bin a wil junpʼéel meyaj, pero maʼ tu tsʼaʼabaltech. ¿Bix ken a wuʼuyilaba? Maʼ xaaneʼ jeʼel u káajal a tuukul beyaʼ: «Mix máak ken u contratarten, mix bikʼin ken in kaxt meyaj». Wa jeʼel tak u káajal a tuklik: «Mix baʼal ku jóokʼol ten maʼalobil. Mix baʼal in biilal». Wa ka tuukul beyaʼ u kʼáat u yaʼaleʼ séeb u lúubul a wóol.

Ilawil baʼax jeʼel u yáantkecheʼ

¿Baʼax jeʼel a beetik utiaʼal maʼ u séeb lúubul a wóoleʼ? Yáax táanileʼ kʼaʼabéet a wilik baʼax beetik a tuukul beyoʼ. Tsʼoʼoleʼ luʼs ta tuukul le baʼax beetik u lúubul a wóoloʼ. Maas maʼalob ka tukult yaan uláakʼ baʼax oʼolal maʼ tsʼaʼabtech le meyajoʼ. Maʼ xaaneʼ táan kaʼach u kaxtaʼal juntúul máak yaanal baʼax u xokmaj, leloʼ maʼ u kʼáat u yaʼal wa maʼ a wojel meyajiʼ.

Ilawil baʼaxoʼob beetik u káajal a chiʼichnaktal. ¿Yaan wa a tuklik mix baʼal a biilal chéen tumen maʼ béeychaj le baʼax a tukultmaj kaʼachoʼ? U jaajileʼ maas maʼalob ka tuukulnakech tiʼ le baʼaloʼob maʼalobtak ka beetkoʼ jeʼex a adorartik Diosoʼ, a biskaba yéetel a láakʼtsiloʼob bey xan yéetel a amigoʼob. Maʼ a tuklik wa jach kʼaas kun tsʼoʼokol tuláakal baʼal. Tsʼoʼoleʼ maʼ tu páajtal a wojéeltik wa maʼ tun tsʼaabiltech meyaj tiʼ uláakʼ tuʼux. Yaan xan uláakʼ baʼaloʼob jeʼel u páajtal a beetik utiaʼal maʼ u séeb lúubul a wóoleʼ.

Beet le baʼax ka chʼaʼtuklikoʼ

Teʼ tsʼook añosaʼ le máaxoʼob ku investigarkoʼob bix u yáantik máak le esperanzaoʼ, ku yaʼalikoʼobeʼ chéen bin ku yáantik máak utiaʼal u béeykuntik le baʼax ku chʼaʼtuklikoʼ. Chéen baʼaleʼ teʼ tuláakʼ xookoʼ yaan k-ilkeʼ le esperanzaoʼ jeʼel u yáantik máak tiʼ jejeláas baʼaloʼobeʼ. Pero le baʼax ku yaʼalik le investigadoroʼob yoʼolal le esperanzaoʼ jach jaaj, tumen ku yáantaj utiaʼal u maas tsʼáaik u yóol máak u beet le baʼax ku chʼaʼtuklikoʼ.

Kʼaʼabéet u suuktal a béeykuntik le baʼaxoʼob ka chʼaʼtuklikoʼ, beyoʼ yaan a wuʼuyik jeʼel u páajtal a beetik le u maasil baʼaloʼob a kʼáat a beetoʼ. Wa ka tsʼáaik cuenta maʼ suuk a béeykuntikeʼ, ilawil baʼaxten. Yaan horaeʼ chéen ku beetik máak le baʼaloʼob suuk u beetkoʼ, pero maʼatech u beetik le baʼaxoʼob maas kʼaʼanaʼantak yéetel uts tu yichoʼ. Le Bibliaoʼ desde úuch u yaʼaleʼ unaj ‹k-jach ilik máakalmáak le baʼaloʼob maas kʼaʼanaʼantakoʼ› (Filipenses 1:10).

Le kéen tsʼoʼokok a wilik máakalmáak le baʼaloʼob maas kʼaʼanaʼantakoʼ jeʼel u páajtal a yéeyik baʼax maas taak a beetkeʼ. Maʼ xaaneʼ tiʼ bix a meyajtik Jéeoba, ichil a familia wa tiʼ uláakʼ baʼaloʼob. Pero tu káajbaleʼ maas maʼalob ka a yéey le baʼaxoʼob maas séeb jeʼel a beetkoʼ, tumen wa ka yéeyik le baʼaloʼob maas difíciltakoʼ le kéen a wil maʼ tu páajtal a séeb tsʼoʼokbesikeʼ jeʼel u lúubul a wóoleʼ. Pero wa taak a beetik junpʼéel baʼal difícil u tsʼoʼokbesaʼaleʼ maʼ xaaneʼ jeʼel u páajtal a jatsikeʼ. Beyoʼ yaan a wilik chéen chʼaʼabil ken a beetil yéetel séeb kun tsʼoʼokol.

Desde úuchjeakileʼ suuk u yaʼalaʼaleʼ le máax jach ku tsʼíiboltik junpʼéel baʼaleʼ, yaan u béeykuntik. Le baʼax ku yaʼalaʼaloʼ jach jaaj. Le kéen tsʼoʼokok a chʼaʼtuklik le baʼax ken a beetoʼ, maʼ unaj u xuʼulul a tsʼíiboltik yéetel a tsʼoʼokbesik yéetel u jaajil a wóoliʼ. Utiaʼal u páajtal a tsʼoʼokbesikeʼ kʼaʼabéet a tuukul tiʼ le utsiloʼob ken u taasoʼ. U jaajileʼ deporsi yaan u yantal baʼaloʼob kun talamkúuntik le baʼax tsʼoʼok a chʼaʼtuklikoʼ, pero maʼ unaj a tuklik wa maʼ kun béeytaliʼ.

Unaj a tuklik bey baʼaxoʼob jeʼel a beetik utiaʼal a tsʼoʼokbesik le baʼax ka chʼaʼtuklikoʼ. Juntúul máak ku kʼaabaʼtik C. R. Snyder, ku xakʼalxoktik bix u meyaj le esperanzaoʼ, ku yaʼalikeʼ kʼaʼabéet u tuklik máak jejeláas bix jeʼel u béeykuntik le baʼax ken u beetoʼ. Tumen wa maʼ tu béeytal yéetel junpʼéeleʼ yaan uláakʼ bix jeʼel u beetkeʼ.

C. R. Snydereʼ tu yaʼalaj xaneʼ wa maʼ béeychaj le baʼax ta yáax chʼaʼtukultoʼ maas maʼalob ka a kʼexe yéetel ka a chʼaʼtukult yaanal baʼal. Wa chéen táan a pechkaba tiʼ junpʼéel baʼal maʼ tu béeytaleʼ yaan u lúubul a wóol. Pero wa ka yéeyik junpʼéel baʼal maas jeʼel u páajtal a beetkeʼ yaan u kiʼimaktal a wóol yéetel yaan u yantaltech esperanza.

Le Bibliaoʼ ku tsikbaltik le baʼax úuch tiʼ rey Davidoʼ. Letiʼeʼ u chʼaʼtukultmaj kaʼach u beetik u templo Jéeoba, pero Jéeobaeʼ tu yaʼalajtiʼeʼ Salomón kun beetik. Kex maʼ béeychaj le baʼax u chʼaʼtukultmaj kaʼach Davidoʼ, letiʼeʼ maʼ kʼuuxilnajiʼ mix tu pechuba u beet le baʼax u kʼáatoʼ. Tu kʼexaj le baʼax ken u beetoʼ ka tu listokíintaj le baʼax kun meyaj tiʼ Salomón utiaʼal u beetik le templooʼ (1 Reyes 8:17-19; 1 Crónicas 29:3-7).

Yaan horaeʼ kex táan k-beetik tuláakal le ku páajtal utiaʼal k-béeykuntik le baʼaxoʼob k-chʼaʼtuklikoʼ, láayliʼ ku kʼaʼabéettaltoʼon esperanzaeʼ. ¿Baʼaxten? Tumen yaʼab baʼaloʼob beetik k-sufrir jeʼex le óotsililoʼ, le guerraoʼ, le kʼasaʼaniloʼ, le kʼojaʼaniloʼ yéetel le kíimiloʼ. ¿Baʼax túun jeʼel u páajtal k-beetik utiaʼal u kiʼimaktal k-óol yéetel u yantaltoʼon esperanzaeʼ?

[Oochel]

Wa maʼ tsʼaʼabtech le meyaj a kʼáat a beetoʼ, ¿u kʼáat u yaʼaleʼ mix tuʼux kun tsʼaabiltech meyaj?

[Oochel]

Rey Davideʼ tu kʼexaj le baʼax u chʼaʼtukultmaj u beetkoʼ