Cadi guiníʼ íqueluʼ qué zanda gúniluʼ xiixa

¿XI RINÍʼ íqueluʼ ora guidxaagaluluʼ guendanagana? Pur modo riníʼ íquenu rusihuínninu pa nácanu ti binni ni riníʼ ique zanda guni xiixa o qué zanda guni ni. Guiranu rápanu guendanagana. Peru ¿xiñee nuu tu riguixhe ique gudxiilú cani sin guiree gana ne nuu tu riníʼ ique qué zanda gudxiilú cani yaʼ?

Guzéʼtenu ti ejemplu, guníʼ ique cuyúbiluʼ dxiiñaʼ. ¿Ximodo ñuni sentirluʼ pa nisaanaluʼ solicitud stiluʼ ti lugar ne qué niniʼnécabe lii yaʼ? Zándaca nidxiichiluʼ ne niníʼ íqueluʼ maʼ qué ziuu dxi guidxélaluʼ dxiiñaʼ o dede guiníʼ íqueluʼ qué iquiiñeluʼ para gúniluʼ xiixa purtiʼ si qué nudiicabe lii dxiiñaʼ ca. Ora guiníʼ ique binni zacá, ribeeni gana laa.

¿Xi zanda gúniluʼ?

¿Ximodo zanda gusaana de guiníʼ íqueluʼ zacá ya? Primé la? biiyaʼ xi rucaa lii guiníʼ íqueluʼ zacá. De racá biʼniʼ stipa guchaaluʼ modo riníʼ íqueluʼ. Guníʼ ique: «¿Ñee qué niniʼnécabe naa purtiʼ qué iquiiñeʼ la? o purtiʼ cuyúbicabe ti binni ni nanna xiixa dxiiñaʼ ni qué zanda guneʼ la?».

Ante guiníʼ íqueluʼ qué iquiiñeluʼ para gúniluʼ xiixa, guníʼ ique pa zacá lii lu guiráʼ cosa, casi ora quixhe íqueluʼ guiziidiluʼ de Dios o pur modo runi tratarluʼ familia stiluʼ ne ca xhamíguluʼ. Cadi guiníʼ íqueluʼ qué zaree guiráʼ ni gúniluʼ jneza. ¿Ñee dxandíʼ nga qué ziuu dxi guidxélaluʼ ti dxiiñaʼ la? Nuu xcaadxi cosa ni zanda gacané lii gusaana de guiníʼ íqueluʼ zacá.

Guníʼ ique ca cosa ni zanda gúniluʼ

Lu ca últimu iza ni maʼ gudiʼdiʼ ca, maʼ bisiene caadxi investigador racané esperanza ca laanu ugaandanu xiixa meta lu xquendanabáninu. Peru cadi ngasi nga modo racané esperanza ca laanu, lu sti artículo ca zadúʼyanu ximódoruʼ zanda gacaneni laanu. Peru pa chinándanu ni guníʼ ca investigador ca la? zanda gúninu guiráʼ ni quixhe íquenu lu xquendanabáninu.

Para gúʼyaluʼ zanda ugaandaluʼ ti meta la? zanda quíxheluʼ tobi ni cadi gaca nagana para lii gúniluʼ. Pa gúʼyaluʼ qué ganda ugaandaluʼ ni la? guníʼ ique xi clase meta racaláʼdxiluʼ ugaandaluʼ. Peru ante gúniluʼ ni, guníʼ ique: «¿Ñee napaʼ xiixa meta la?». Pur tantu riuu xhiiñanu, nin tiempu gápanu para guiníʼ íquenu xi racaláʼdxinu ugaandanu lu xquendanabáninu o xii nga ni jma risaca para laanu. Lu Biblia zeeda ti conseju ni zanda gacané laanu, cayábini laanu caquiiñeʼ ganna chaahuinu xii nga ni jma risaca para laanu (Filipenses 1:10).

Ora maʼ nánnanu xii nga ca cosa ni jma risaca, zanda cuinu xi racaláʼdxinu gúninu primé. Zanda quixhe íquenu gúninu ni ná Dios, gúninu xiixa né familia stinu o gúninu xiixa ni jma riuuláʼdxinu. Peru jma galán pa cadi quíxhenu stale meta, sínuque chupa chonna si ca ni rábinu zanda gúninu nagueenda ti cadi guireʼnu gana ne guiníʼ íquenu qué zanda gúninu. Yanna, para ganda ugaandanu xiixa meta jma naroʼbaʼ la? caquiiñeʼ gúninu ni chaahuidugá ti cadi gácani nagana para laanu.

Nuu ti dichu ná pa nápaluʼ gana gúniluʼ xiixa la? zanda gúniluʼ ni. Ne biaʼsi peʼ nga ni nani, purtiʼ para ganda ugaandanu xiixa ni naguixhe íquenu la? caquiiñeʼ guiale de laanu gúninu ni ne para guni sentirnu zacá la? caquiiñeʼ guidúʼyanu pabiáʼ risaca ca meta ni naguixhe íquenu ugaandanu ne pabiáʼ zanda gacaneni laanu. Zándaca zadxaagalunu xiixa guendanagana, peru cadi gudiʼnu lugar cueeni gana laanu, sínuque gudxíʼlunu ni.

Peru cadi ti modo si zanda ugaandanu ti meta, sínuque nuu stale modo zanda ugaandanu cani. Escritor C. R. Snyder, ni biʼniʼ investigar xiñee risaca gapa binni esperanza guníʼ zanda guyúbinu gadxé gadxé modo para ugaandanu ti meta, purtiʼ pa qué ganda ugaandanu ni de ti modo la? zanda gúninu ni sti modo.

Snyder guníʼ laaca galán gánnanu pora guchaʼnu de meta purtiʼ pa maʼ biraruʼ ni bíninu ne qué ganda ugaandanu ni la? zareʼnu gana. Peru pa guchaʼnu ni pur stiʼ meta ni rábinu zanda gúninu, záparunu esperanza.

Lu Biblia zeeda sti ejemplu ni zanda gacané laanu. Guidúʼyanu ni bizaaca rey David, gucaláʼdxibe nucuibe ti templu para Jehová, Dios stibe, peru gudxi Jehová laabe cadi laadibe ngue chigucuibe templu que, sínuque xiiñibe Salomón. ¿Ñee bidxiichi rey David ne gucuá tema gucuinu la? Coʼ, sínuque bichaabe ni naguixhe íquebe gúnibe, gudixhe íquebe guyúbibe ca material ni chitiné templu que para gacanebe xiiñibe (1 Reyes 8:17-19; 1 Crónicas 29:3-7).

Yanna, neca peʼ gúninu stipa para cadi gunítinu esperanza ne quixhe íquenu ugaandanu ca meta stinu, zándaca ziuu ora zuni sentirnu cayaadxaʼ laanu gápanu esperanza pur ca cosa cadi nuu lu nanu guni chaahuinu ni nabé runiná binni, casi guendapobre, guerra, injusticia, guendahuará ne guendaguti. ¿Xi zanda gúninu para cadi cuee ca ndiʼ gana laanu yaʼ?

[Imagen]

Pa qué gudiicabe lii ti dxiiñaʼ, ¿ñee zaníʼ íqueluʼ qué ziuu dxi guidxélaluʼ dxiiñaʼ la?

[Imagen]

Bichaa rey David ni naguixhe ique guni