Labúu tzoʼ gan xcalnabanyno

¿XIMOD rabiʼlo galnagan ni cacalólo? Xidal buñnan raniʼyibu, par labúu guicapyno galrranabdiitz ni napno raslooyno pal noʼ gan xcalnabanyno o yaca. Guiráno racalóno galnagan, per noʼ tipnés ni más racaló galnagan. Per ¿xigony noʼ tipnés buñ ni labúu racaló galnagan né xigony noʼ tipnés buñ rareʼgan?

Por ejemplo, buny pensary que cayopylo dxiin. Rieelo toib entrevista, né diti radudyibu dxiin looy. ¿Ximod rasaclo? Labúu guisaclo que cacalólo toib galnagan né ñonylo pensary modreʼ: «Diti noʼ chú sadudy dxiin naʼ. Dipa sadzela dxiin». O ñonylo pensary modreʼ: «Diti noʼ pu raquiinna». Modreʼ caslooylo que diti noʼ gan xcalnabanylo.

¿Xí labúu gonyno?

¿Xí labúu gonyno par diti guireʼganno nimaca? Raquiin guienno xigony ronyno pensary modreʼ. Stoib cós ni raquiin gonyno ngú diti guireʼganno, guienno xigony gocni scú. Por ejemplo, ¿diti bidudyibu dxiin looy portín looy naplo dool la o gocni portín fábrica cu cayopy buñ ni rony gadzé dxiin?

Buny pensary que pal nigolú nacni scú, o pal looy cayony xiroʼlo láani. ¿Radudyni diitz que por ni ma goleʼyibu lóono tiplad ma diti noʼ pu raquiinno la, o labúu gonyno pensary ló cós ni labúu ronyno xomod órni radzakno Dios, radzakno xfamilno o stoib cós ni labúu ronyno galán? Diti gonylo pensary que diti sarebuʼ ni gonylo. ¿Labúu guinino que dipa sadzelno dxiin la? Láaca noʼ stipnés cós ni labúu gonyno par diti guireʼganno.

Gonyno pensary que labúu gonyno toib cós

Ló ndeʼga tipnés investigadores rasetlayibu xi ngú esperanza, náyibu que labúu gony cumplirno metas xtunyno. Xomod guisuidyno ló artículo ni sieed esperanza radudy diitz stoib cós. Por ejemplo, pal ronyno pensary ló esperanza ni napno, labúu tzagaʼlno metas ni napno.

Par labúu tzagaʼlno metas ni napno, raquiin coʼno guicno cós ni labúu tzagaʼlno. Pal radudyno cuent que diti napno costumbre cu raquiin gonyno pensary xi metas raquiin tzagaʼlno. Primer: ¿napno toib meta la? Labúu guialadxno xi metas napno portín ronyno pensary ló stipnés cós né diti nantzayno xi láani nainy lóono gonyno. La Biblia nayadit rasetlaa xi raquiin gonyno: «Raquiin guientzaayno xi ngú ni más rasac gonyno» (Filipenses 1:10).

Órni ma nanno xi láani gonyno, ma diti sasac naganno gonyno láani, pal nacni xchiin Jehová la, xfamilno la o stipnés dxiin. Per diti rac fuers gapno xidal metas né guiyopyno metas ni labúu tzagaʼlno. Pal diti ronyno láani modreʼ sareʼganno. Scú láani, meta ni nac más nagan labúu gonyno láani por xiroʼ tiemp né ni diti nagan la, gonyno láani nimaca.

Xomod ná toib dicho, pal nainy looy gonlo láani labúu sácni. Né scú nacni. Órni ma nanno xi metas napno, raquiin coʼno gan xcalnabanyno par labúu gonyno láani. Par diti guireʼganno gonyno pensary xigony nigolú rasac metas ni napno né ximod gacnéni lóono. Ná guicalóno tipnés galnagan diti guidudyno lagary que ndeʼ guicaa lóono.

Láaca non gonyno pensary stipnés mod ni labúu tzagaʼlno metas ni napno. Toib autor ni laa C. R. Snyder, ni buny toib estudio nanoydiguieʼ xigony rasac esperanza, rasetlabu que buñ gony pensary xidal mod par tzagaʼl toib meta. Modcu pal diti rarebuʼ toib mod sayopybu stoib mod par labúu tzagaʼlbu meta xtunybu.

Snyder láaca rasetlaa que raquiin ganno pu ór labúu guitzaʼno toib meta por stoib meta. Pal ma bunyno rutirigaʼlni lóono né diti rarebuʼni guisianno láani par diti guireʼganno. Xalagaryni gapno stoib meta ni labúu gonyno, ro labúu gapno esperanza.

Ló la Biblia radzelno toib ejemplo sacróyen. Rey David goniiny láabu nasaʼbu toib templo par Jehová, Dios xtunybu. Per Jehová góoch láabu que xiimbu Salomón ñap privilegio cu. Per David diti bitzuitz né diti gochbu Jehová que nainy láabu gonybu láani xalagary ngú bitzaʼbu metas xtunybu. Bitopbu bidxiich né materiales ni naquiin xiimbu par nasaʼ templo (1 Reyes 8:​17-19; 1 Crónicas 29:​3-7).

Scú láani ná napno esperanza né noʼ gan xcalnabanyno né nainy lóono tzagaʼlno metas ni napno, labúu guisacno que diti napno esperanza. ¿Xigony? Portín racalóno tipnés galnagan, né diti labúu ronyno xitcal. Órni ronyno pensary guirá galnagan ni racaló buñ xomod galsii, guerr, órni diti rac xinésni, galguitz né galgoity, ¿labúu tzoʼ gan xcalnabanyno la?

[Dibuj]

Pal diti radudybu dxiincu looy, ¿ronylo pensary que ma diti sadzelo dxiin la?

[Dibuj]

Rey David bitzaʼbu meta xtunybu.