Dini Alai Nuan Ulih Tetemuka Semaya ti Bendar pasal Jemah Ila?
Dini Alai Nuan Ulih Tetemuka Semaya ti Bendar pasal Jemah Ila?
GAMBARKA jam nuan udah jai lalu nuan ngiga orang ke ulih ngaduka iya. Tang bisi mayuh kedai ke ulih ngaduka jam nya. Ni bagi kedai ke patut dipilih nuan? Tang maya nya, nuan baru nemu orang ke diau berimbai enggau nuan meh ke ngaga jam nya. Ke ngagaka ati agi, iya ulih ngaduka jam nuan enggau pechuma. Nuan tentu deka ngasuh iya ngaduka jam nuan.
Perundingka tu. Mensia bisi penau ulih ngarapka utai manah ke deka nyadi jemah ila. Tang, mayuh orang kemayaharitu enda ngarapka utai manah ulih nyadi jemah ila laban gaya dunya amat jai. Sapa ulih nulung nuan andal, jemah ila tentu bisi utai manah ke deka nyadi? Mayuh orang deka meri bantu sereta jaku ajar, tang jaku ajar tu engka enda sejalai enggau pangan diri sereta nyarutka runding. Nyadi endaka nya manah agi enti kitai ngiga Penempa kitai ke udah nepuka penau tu ba ati kitai? Bup Kudus madahka, ‘Petara enda jauh ari kitai seiku-seiku’ lalu Iya amat deka nulung kitai.—Surat Kereja Rasul 17:27; 1 Peter 5:7.
Pengadang—Nama Reti Iya
Leka jaku pengadang mai reti ti besai agi lalu iya ukai baka utai ti dipadah sekeda bala lutur, bala sains, tauka bala psikologi. Ba jaku asal Bup Kudus “pengadang” mai reti nganti sesiti utai enggau bebendar sereta dekaka utai ti manah. Pengadang nyengkaum dua pekara tu. Kesatu, pengingin ke dekaka utai ti manah lalu kedua, pugu ti teguh kena pechaya pekara tu deka dikeamatka.
Nyadi, pengadang enggau pengarap bisi kaul enggau pangan diri. Kedua iti nya patut bepelasarka bukti ti teguh. (Hebrew 11:1) Tang, nama bida entara pengadang enggau pengarap?—1 Korint 13:13.
Aram meda chunto tu: Nuan minta tulung ari seiku bakih nuan. Nuan ngarapka iya ulih nulung nuan. Kebendar iya nuan pechaya iya ulih nulung nuan laban iya orang ti manah sereta gerah jari. Nya alai, taja pan pengadang enggau pengarap nya bebida, tang kedua iti nya bisi kaul enggau pangan diri. Tanya iya diatu, nama kebuah nuan ulih arapka Petara?
Pugu Pengadang ti Teguh
Jehovah nya pun pengadang ti bendar. Kenyau ari menya, Jehovah dikumbai Petara “ke dikarapka orang Israel.” (Jeremiah 14:8) Orang Israel endang ulih arapka semaya ari Petara. Nama kebuah? Laban pengelama beratus taun, Iya enda kala mungkirka semaya Iya. Josua madah ngagai orang Israel: ‘Genap iku kita nemu dalam ati enggau dalam semengat kita. Jehovah Petara kita udah meri ngagai kita semua utai ti manah, ti udah disemaya Iya. Genap semaya ti udah digaga Iya, udah dikamatka Iya magang. Nadai siti semaya nya ti enda dikamatka Iya.’—Josua 23:14.
Taja pan beribu taun udah nya, Jehovah agi ulih dikearapka. Ari sejarah, kitai ulih meda mayuh semaya enggau jaku benabi ba Bup Kudus udah dikeamatka. Ketegal semaya Jehovah tentu deka dikeamatka, mayuh penulis Bup Kudus nuliska semaya Iya baka ke pekara nya udah nyadi.
Kebendar iya, Bup Kudus nya bup ti meri kitai pengadang. Lebuh kitai mansik chara Petara ngintu nembiak Iya, kitai nyau sedar Jehovah endang ulih dikearapka. Asil iya, pengadang kitai deka majak tegap. Rasul Paul nulis: “Semua utai ti udah ditulis dulu kelia endang ditulis kena ngajar kitai, ngambika ulih pengeliat ati kitai enggau ulih peransang ari Bup Kudus, kitai bisi pengadang.”—Rome 15:4.
Nama Utai ti Manah ke Deka Nyadi Jemah Ila ti Disemayaka Petara?
Tiap iku orang ngembuan munsuh ti enda ulih dialahka, iya nya, pemati. Lebuh kitai tauka orang ke dikesayau kitai nyauka mati, nya meh maya kitai begunaka semaya ari Petara. Ketegal nadai orang ulih rari ari pemati, Bup Kudus ngumbai pemati nya “munsuh ti pemadu dudi” kitai.—1 Korint 15:26.
Baka ni semaya ti manah pasal utai ti deka nyadi jemah ila ulih nulung kitai lebuh kitai napi pemati? Bup Kudus besemaya, munsuh ti pemadu dudi nya deka “dirusakka.” Ulih Jehovah ngalahka pemati? Tentu ulih. Baka ni? Enggau ngangkatka idup baru orang ke udah mati. Bisi semilan iti chunto pengangkat ari mati ke ditulis dalam Bup Kudus.
Siti ari chunto ti ngalitka ati nya, maya Jehovah meri Jesus kuasa kena ngangkatka Lasarus idup baru. Taja pan Lasarus udah mati pengelama empat hari, Jesus udah ngangkatka iya idup baru ba mua orang mayuh.—John 11:38-48, 53; 12:9, 10.
Nuan engka berunding, ‘Nama guna diangkatka idup baru deh? Ila sida deka mati baru.’ Taja pan nya amat, Jehovah nentuka cherita pasal pengangkat ari mati nya ditulis dalam Bup Kudus kena neguhka pengadang kitai. Semua cherita pasal pengangkat ari mati nya bukti kena nunjukka semaya pasal pengangkat ari mati ukai semaya ti bula.
Jesus madahka: “Aku tu meh pengangkat enggau pengidup.” (John 11:25) Jehovah deka meri Jesus kuasa kena ngangkatka orang idup baru ba serata dunya. Bup Kudus madahka: “Maya deka datai alai semua orang ke udah mati deka ninga nyawa [Jesus], lalu deka pansut ari kubur.” (John 5:28, 29) Amat, semua orang ke udah mati bisi pengadang deka diangkatka idup baru ba dunya paradais.
Baka ni gaya dunya maya nya? Nabi Isaiah nulis tu: ‘Bala kami ke udah mati, deka idup baru! Bangkai sida deka idup baru. Semua sida ke tinduk dalam kubur deka dani lalu belagu gaga ati. Baka ambun ti bekebelik ngemasahka tanah, baka nya meh Jehovah deka ngidupka baru sida ke lama udah mati.’—Isaiah 26:19.
Endaka jaku tu ngelantangka ati nuan? Orang ti dikesayau kitai ke udah mati benung nganti maya sida deka diangkatka idup baru. Tang ke diatu sida ba endur ti pemadu likun, iya nya, ba pengingat Petara ti Pemadu Bekuasa. (Luke 20:37, 38) Baka anak mit ke baru ada ti disambut enggau penuh penyayau enggau pengaga ati, orang ti dikesayau kitai ke diangkatka idup baru mega deka disambut enggau pengaga ati ti besai!
Nama Penguntung Iya ke Nuan enti Nuan Arapka Semaya ti Manah tu pasal Jemah Ila?
Rasul Paul madahka, pengadang nya baka selapuk besi. (1 Tesalonika 5:8) Tu begian ti beguna ba kereban perang pengarap kitai. Nama reti iya? Ba jeman kelia, soldadu deka ngena selapuk besi kena ngelindung pala iya lebuh beperang. Pia mega, pengadang nya baka selapuk besi pengarap kitai ke ulih ngelindung runding kitai. Lebuh napi penanggul kitai enda jampat asa ati sereta lemi semengat. Tang kitai deka bisi pemaik ba runding lalu arapka semaya ari Petara.
Paul mega ngambarka pengadang nya baka “sauh ti tegap ke semengat kitai.” (Hebrew 6:19) Paul nemu kapal amat begunaka sauh. Tu ketegal iya empu beberapa kali napi kapal karam. Baka ni sauh ulih nulung kapal? Maya kabut mangka, kelasi deka nurunka sauh ba laut ngambika kapal enda anyut. Semaya ari Petara nya baka pengadang ti tegap ke tentu deka nyadi.
Enti kitai bepegai ba semaya ari Petara, kitai ulih napi penusah ke baka kabut ba pengidup. Jehovah besemaya, enda lama da agi perang, jenayah, penusah ba ati, enggau pemati deka nadai agi. (Peda kutak ba lambar 10.) Semaya ari Petara mega deka nulung kitai nyeliahka diri ari ulah ti enda bemoral ke mayuh nyadi kemayaharitu, lalu kitai deka idup nitihka peneka Petara.
Jehovah meri semaya ti sama ngagai nuan mega. Iya deka nuan ngembuan pengidup ti manah jemah ila. Bup Kudus madahka, Petara deka “semua mensia diselamatka.” Tang, nama utai ke patut digaga kitai? Kitai patut nemu penemu pasal pemendar. (1 Timoti 2:4) Nya alai, bebendar meh belajar pasal pemendar ari Bup Kudus lalu belajar meh pasal semaya ari Petara ti ngalitka ati tu.
Enggau semaya ti manah tu, Petara deka meri kitai pengering kena nyapai tuju pengidup ti sejalai enggau peneka Iya. (2 Korint 4:7; Pilipi 4:13) Nya alai, anang meh putus asa. Semaya ti bendar tu endang bisi, lalu ulih nyadi enggi nuan!
[Kutak/Gambar]
Kebuah Kitai Ulih Arapka Semaya pasal Jemah Ila
Ayat Bup Kudus tu ulih nulung nuan andal agi ke semaya nya:
◼ Petara besemaya deka meri kitai pengidup ti ngagaka ati jemah ila.
Bup Kudus madah, bumi tu deka nyadi endur ti amat manah. Mensia deka beserakup lalu idup enggau lantang.—Masmur 37:11, 29; Isaiah 25:8; Pemandang 21:3, 4.
◼ Petara enda bula.
Petara amat begedika ulah ti bula sereta nipu orang. Petara Jehovah nya kudus lalu Iya enda ulih bula.—Jaku Dalam 6:16-19; Isaiah 6:2, 3; Titus 1:2; Hebrew 6:18.
◼ Kuasa Petara nadai tatak.
Jehovah nya Petara ti Pemadu Bekuasa. Nadai utai ulih nagang semaya Iya ari dikeamatka.—Pemansut 15:11; Isaiah 40:25, 26.
◼ Petara deka nuan idup belama iya.
◼ Petara enda putus pengarap ba kitai.
Jehovah meda pemanah sereta utai ti digaga kitai. Iya enda beratika pengelemi tauka penyalah kitai. (Masmur 103:12-14; 130:3; Hebrew 6:10) Iya ngarapka kitai ngereja utai ti bendar lalu Iya gaga ati enti kitai ngereja nya.—Jaku Dalam 27:11.
◼ Petara deka nulung nuan ngereja utai ti sejalai enggau peneka Iya.
Orang ke tetap ati ngagai Petara enda lenyau pengarap. Petara seruran meri kitai roh kudus Iya, iya nya kuasa ti pemadu besai di dunya raya.—Pilipi 4:13.
◼ Petara enda ngasaka ati kitai.
Petara ulih dipechaya lalu Iya enda ngasaka ati nuan.—Masmur 25:3.
[Gambar]
Baka selapuk besi ti ngelindung pala, pengadang kitai ke jemah ila deka ngelindung runding kitai
[Gambar]
Pengadang ti teguh nya baka sauh
[Credit Line]
Courtesy René Seindal/Su concessione del Museo Archeologico Regionale A. Salinas di Palermo