Сын ізеністі хайдаң аларға?

Сірернің чазыңар турыбысты, одыл парғанға тӧӧй. Аны тыхтаҷаң орыннар уғаа кӧп. Реклама толдыра! Олар прайлары киртістіг пасчалар, че піреелеріне киртінерге аар. Сағыбаан туста ис салчазар: сірернең хонҷыхти чазыңарның модельін сағын таап алған мастер чуртапча. Ағаа хоза, чазыңарны тикке тыхтап пирерге тимде. Кемзер парарзар? Пілдістіг, я?

Ам чазыңарны ізеніп оңнапчатханыңарнаң тиңнестір кӧріңер. Пу, хорғыстар толдыра чир-чалбахта кӧп кізі ізеніс чох чуртапча. Оларох чіли, ізенізіңер чідірчетсер, полызығ суранып, кемзер айланарзар? Сидіктерні тобырарға кӧп полысчылар табылча, че уғаа кӧп чӧптер кізі пазын айландырчалар, пірее чӧптер удур-тӧдір тоғыр чӧптер полчалар. Кізілерні ізеніп оңнир иде чайаан Чайаачызар айланмаҷаң ма? Библияда «Ол пістің полғаныбыстаң на тың даа ырах нимес» паза піске полыс пирерге хынча тіп чоохталча (Илҷілернің 17:27; 1 Петрның 5:7).

Ізеністеңер тиреңерек піліс

Амғы тустағы имҷілер, ученайлар паза психологтар ізеніс тіпчеткен нимедең Библияда пазылған ізеніс хай-хай алғым. Библия пазылған тіллердең «ізеніс» тіп тілбестелген сӧс чидікпин сағирын паза чахсы нимені сағирын таныхтапча. Сынында ізеніс ікі чардыхтығ ниме. Ізеніске хайдағ-да чахсы нимее хынғаны паза ол чахсы ниме толарына киртінерге тӧстег пары кірче. Библияда чоохталчатхан ізеніс — олаңай ла фантазиялар нимес. Ол ізестіг факттарда паза киречілестерде тӧстелче.

Ізеніс, киртінізӧк чіли, сағын таап алған нимелерге нимес, че факттарға тӧстенерге кирек (Еврейлерге 11:1). Че Библия ізеніс паза киртініс ікі пасха ниме полчатханын кӧзітче (1 Коринфтегілерге 13:13).

Кӧзідім кӧр кӧреелер. Чағын арғызыңардаң пірее полызығ сурзар, ол полыс пирер тіп ізенчезер. Сірер тик ле ізенминчезер, арғызыңарға киртінчезер — аны чахсы пілчезер, ол паарсах паза сыйҷы кізі. Киртінізіңер паза ізенізіңер уғаа чағын палғалыстығлар, че тӧӧй ниместер. Худайға ідӧк ізенерге чарир ба?

Ізеніс тӧстии

Сын ізеністі Худай пирче. Библиядағы тустарда Иегованы «Израильнің ізенізі» тіп адаҷаңнар (Иеремия 14:8). Израиль чонының ноо даа ізенізін Иегова пирҷең, ол оларның ізенізі полған. Оларның ізенізі олаңай ла хынған ниме полбаан, аның тӧстии пик полған. Израиль чонының Худайы, Иегова, чӱзер чыллар аразында кӧп молҷағлар пиріп, оларны толдыр салған. Израильнің пазы полған Иисус Навин чонға піди теен: «Сірер... пілчезер, сірернің Худайыңар Иегова чоохтаан чахсы сӧстердең толбаан сӧс халбаан» (Иисус Навин 23:14).

Муңар чыллар ирт парды, че ол тол парған молҷағлар ам даа киртінізібісті тыытчалар. Библияда Худайның уғаа чахсы молҷағлары кӧп, ідӧк ол молҷағларның толғанына киречілестер кӧп. Аның ухаанҷыластары уғаа ізестіг, аннаңар пірееде ол ухаанҷыластар оларны пасхан тустох тол парған чіли пазылғаннар.

Аннаңар Библияны ізеніс киндезі тіп адирға чарир. Худай кізілерге хайди хайғанын істескені ағаа уламох ізенерге полысча. Павел илҷі пасхан: «Алында пазылған ниме пісті ӱгреде пазылған. Худай Пічии пирчеткен тыстаныс паза часхарыс пастыра ізеніс аларыбыс ӱчӱн пазылған анзы» (Римдегілерге 15:4).

Худай хайдағ ізеніс пирче?

Хаҷан піске ізеніс иң кирек? Чағын кізі ӱреп парза, иң кирек нимес пе? Че чағын кізі ӱреп парза, кӧбізі ізеністеңер пір дее сағынминча. Ӧлім саңай ізеніс чох артыс салча. Ол полған на кізіні сӱрісче. Нинҷе-де ле тусха чуртазыбысты узарадып алчабыс, че ӧлімнең саңай тис полбинчабыс. Библияда ӧлім «тӱгенҷі ыырҷы» тіп адалча (1 Коринфтегілерге 15:26).

Чағын кізі ӱреп парза, ізеніс таап алар оңдай пар ба? Ӧлімні тӱгенҷі ыырҷы тіп адапчатхан стихта ідӧк ӧлім чох иділер тіп пазылча. Иегова Худай ӧлімнең кӱстіг. Анзын ол аймах-пасха оңдайларнаң кӧзіткен. Хайди? Ӧлген кізілерні тірілдіріп. Библияда Худайның кӱзінең тоғыс кізіні тірілдіргенінеңер пазылча.

Иегова позының Оолғына, Иисусха, аның чағын нанҷызын, Лазарьны, тӧрт кӱн ӧліг полған кізіні, тірілдірерге кӱс пирген. Иисустың Лазарьны тірілдіргенін кӧп чон кӧрген, ол аны чазырып итпеен (Иоанн 11:38—48, 53; 12:9, 10).

Арса, сірер сағынчазар: «Ноға кізілерні тірілдірерге кирек полған? Олар соонаң, киріп парып, хатап ӱреп парбааннар ба?» Я, анзы андағ. Піс ӧлген чағыннарыбыс хатап чуртазыннар тіп хынчабыс, че ол полған киректернің сылтаанда анзына киртінерге тӧстег пар. Пасха сӧстернең чоохтаза, пістің сын ізеніс пар.

Иисус теен: «Мин ӱрееннерні тірілдірчем паза чуртас Ээзі полчам» (Иоанн 11:25). Иегова ағаа прай ӱрееннерні тірілдірерге кӱс пирер. «Сыыраттарда чатчатханнар прайзы Кізі Оолғының ӱнін ис салар тус килче. Чахсы ниме иткеннері чуртирға тірілерлер, че хомай ниме иткеннері чарғыладарға тур килерлер» (Иоанн 5:28, 29). Сыыраттарда чатчатханнарға, прайзына, тіріліп, чирдегі райда чуртирға оңдай пар.

Исаий ухаанҷы тірілістеңер мындағ, кізі чӱреен тибіретчеткен, сӧстер пас салған: «Хан Худай, синің ӧліглерің тіріл килерлер, оларның ӧліг ит-сӧӧктері ӧлімнең турарлар. Олар турып алып, тың ӧрінерлер. Синде арчы, наа иртеннің арчызы. Пасха тус килче, пӱӱн чирде чатчатханнарға наа чуртас пирілер» (Исаия 26:19, СоП).

Пу сӧстер часхарыстығ сӧстер нимес пе? Ӱреен кізілер саңай хорғыс чох орындалар. Хайди іҷезінің істіндегі пала хайраллалча, ӱрееннер Прай нимедең кӱстіг Худайның сағызында ідӧк хайраллалчалар (Лука 20:37, 38). Ӱр ниместең олар часкалығ тилекейде чуртирға тірілерлер. Паарсах сӧбіре пала тӧрееніне хайди ӧрінче, оларға ідӧк ӧрінерлер. Хайди кӧрдібіс, кізі ӱреп парза даа, ізеніс чітпинче.

Сірерге ізеніс хайдағ туза пир полар

Ізеніс нинҷе аарлығ полчатханына Павел пісті кӧп ӱгретче. Ізеністі ол духовнай хусхуйахтарның чардығы, пӧрік, тіп адапча (1 Фессалониктегілерге 5:8). Ноға? Ол тустарда чааҷы, чааға парчатса, тимір пӧрік кизіп алҷаң. Удаа аның алтына киис алай теер пӧрік кис салҷаң. Ол тимір пӧрік чааҷының пазын хайраллаҷаң. Павел нимедеңер чоохтапча? Хайди тимір пӧрік пасты арачылапча, ізеніс пістің сағызыбысты ідӧк арачылапча. Сірернің Худайның сағын салған сағызына килістіре пик ізеніс полза, хайдағ даа сидіктер полза, чӱрееңерде амыр полар, иртіре ӱрӱкпессер, холларың тӱзірбессер. Піске, прайзыбысха, андағ пӧрік кирек.

Ізеніс Худайның кӧңнінең палғалыстығ полчатханын Павел паза пір кӧзідімнең кӧзіт пирген. Ол пасхан: «Ізеніс піске пик паза ізестіг керіп кӧспезі осхас» (Еврейлерге 6:19). Павел нинҷе-де хати талайда саайға кірген, аннаңар керіп кӧспезі нинҷе аарлығ полчатханын чахсы пілген. Хазыр чил пол сыхса, талайҷылар керіп кӧспезін тӱзірҷеңнер. Талай тӱбіне читсе паза пик тудылза, ол керіпті чарға сығара тастабызарға пирбеҷең. Іди керіпке иңзеріл парарға пирбеҷең.

Худайның молҷағлары піске андағох «пик паза ізестіг» ползалар, ізеніс чуртаста хайдағ даа «чиллерге» пісті аңдарарға пирбес. Иегова ӱр ниместең чаалар, сайбағлар, чобағлар паза ӧлім дее чох полар тус килер тіп молҷапча. (10 страницадағы рамканы кӧріңер.) Ізеніс піске, керіп кӧспезі чіли, «хазыр чиллерде» тур халарға полызар. Паза ізеніс, пу чир-чалбахта тарап парған ай-пораан, сайбах тудынысха сабылбин, Библияның нормаларынҷа чуртирға кӱс пирер.

Иегова пирчеткен ізеніс сірерге туза ағыл полар. Ол сірерге позы сағын салған чуртасты пирерге хынча. «Ол прай кізілерні арачыланзыннар» тіп хынча. Хайди арачыланып аларға? Иң пурнада полған на кізее «сынны пілеріне чидерге» кирек (1 Тимофейге 2:4). Ол чуртас пирчеткен піліс Худай Сӧзінде, аны алып алыңар. Худай пирчеткен ізеніс пу чир-чалбах пирчеткен ноо даа ізеністең хай-хай артых.

Андағ ізеніс сірерні хаҷан даа ачырғандырбас. Худай аның кӧңніне килістіре кӧстеглерге чидіп аларға кӱс пирче (2 Коринфтегілерге 4:7; Филипптегілерге 4:13). Сірерге андағ ізеніс кирек нимес пе? Кирек полза, аны тілепчетсер, холларың тӱзірбеңер. Сірерге аны таап аларға оңдай пар!

[Рамка/Хоос]

Ізеніске тӧстеглер

Библиядағы пу сағыстар ізенізіңерні тыыдарға полыс пирерлер.

◼ Худай часкалығ чуртас молҷапча.

Аның Сӧзінде прай чир рай пол парар тіп чоохталча. Анда кізілер часкалығ паза пір сӧбіре чіли чуртирлар (Псалом 36:11, 29; Исаия 25:8; Азых чоох 21:3, 4).

◼ Худай хаҷан даа чойланминча.

Ол хайдағ даа оңдайнаң чойланғанын хырт кӧрче. Иегова ах-арығ, аннаңар чойланминча (Притчи 6:16—19; Исаия 6:2, 3; Титке 1:2; Еврейлерге 6:18).

◼ Худайның ӱлгӱзінең пӧзік ӱлгӱ чоғыл.

Иегова ла прай нимедең кӱстіг Худай. Аның кӧңнін толдырарға ағаа пір дее ниме харығ пол полбас (Исход 15:11; Исаия 40:25, 26).

◼ Худай сірерні мӧгі чуртазыннар тіп хынча.

(Иоанн 3:16; 1 Тимофейге 2:3, 4).

◼ Худай піске ізенче.

Ол пістің алҷаастарыбысты ла кӧрглеп чӧрбинче, че пістің кӱстенчеткенібіске паза чахсы качестволарыбысха хайиин айландырча (Псалом 103:12—14; 130:3; Еврейлерге 6:10). Ол пісті орта тудынарлар тіп ізенче, орта тудынчатсабыс, ӧрінче (Притчи 27:11).

◼ Худай аның кӧңніне кірчеткен кӧстеглерге чидерге полызарбын тіпче.

Худай нымысчыларын полызығ чох хаҷан даа артыспинча. Ол піске ызых худын пирче. Ызых хут, тізең, иң илбек кӱс (Филипптегілерге 4:13, НТ).

◼ Худайға ізензер, хаҷан даа ачырғанмассар.

Худайдаң ізестіг пір дее ниме чоғыл. Ол сірерні хаҷан даа ачырғандырбас (Псалом 24:3).

[Хоос]

Хайди тимір пӧрік пасты арачылапча, ізеніс сағысты ідӧк арачылапча.

[Хоос]

Пик тӧстегліг ізеніс, керіп кӧспезі чіли, тыыт полар.

[Хайдаң алылғаннаңар искіріглер]

Courtesy René Seindal/Su concessione del Museo Archeologico Regionale A. Salinas di Palermo