Oꞌnon pata yairon nîmîkî ya manniꞌ eporî amîrîya?

ESENUMENKAKÎ îꞌ ayemanne yaꞌmîriꞌkaꞌpî pî. Mîrîrî yarîꞌpîya ikonekatoꞌpe mîrîrî ikonekanenya taꞌpî morî pe mîrîrî konekanen uurî, tiaronya nîrî taꞌpî mîrîrî yeꞌka pe. Tîîse amîrîya epuꞌtîꞌpî ayemanne koneka tîpon yewîꞌ wanîꞌpî ayewîꞌ pia, mîîkîrî wanîꞌpî apîikaꞌtî yuꞌse, mîîkîrî yeꞌmaya eserîke pra wanîꞌpî.

Taꞌmîriꞌkaꞌpî ayemanne wanî, îꞌ iipî manniꞌ nîmîîkî yeꞌka pe. Uurînîkon taise esenumenaka eꞌpainon tiaronkon pemonkonyamîꞌ esenumenkatoꞌ yeꞌka pe, îꞌ morîkon iipî pepîn taa toꞌya. Tîîse oꞌnon pata pai pîikaꞌtîntoꞌ eporî eꞌpainon? Mararî pra pemonkonyamîꞌya taa tiaronkon pîikaꞌtînen uurî, tîîse toꞌ panamatoꞌ wanî yairî pra. Tîîse, uurînîkonya pîikaꞌtîntoꞌ yuwa uurînîkon koneka tîpon yapai? Paapa Maimuya taꞌpî man: ‘aminke pra mîîkîrî wanî uurînîkon pia tiwin pî eꞌnî tanneꞌ, moropai uurînîkon pîikaꞌtî yuꞌse awanî.

Esenupakî inîꞌ panpî îꞌ iipî manniꞌ nîmîkîtoꞌ pîꞌ

Îꞌ pensa morîkon yekare eꞌkupî eꞌpainon mîrîrî nîmîkîtoꞌpe? Îꞌ pensa priꞌya pra eꞌnînya moropai aminke mare saꞌmantantoꞌ wanîya. Tiaron pemonkonya pemonkon saꞌmantasaꞌ eraꞌma, mîrîrî yeꞌnen îꞌ morî iipî nîmîkîiya eserîke pra awanî. Îꞌ wani awanî yeꞌnen aranneꞌ pe eꞌnî saꞌmantantoꞌ pî? Uurînîkon wakîri pepîn mîrîrî, mîrîrî iwanmîrîꞌpî Paapaya. Saꞌmantantoꞌ mîrîrî uurînîkon wakîri pepîn, mîrîrî yuꞌse pra Paapa man, inewanmarî mîrîrî.

Îꞌ iipî manniꞌ nîmîkî innape eꞌtoꞌ yeꞌka pe wanî, mîrîrî wenai yairon nîrî iipî. (Hebreus 11:1) Paapa Maimu eeseurîmaꞌpî man: “Innape eꞌtoꞌ pî moropai îꞌ nîmîkî pî uurînîkon eꞌtoꞌ pî.” — 1 Coríntios 13:13.

Esenumenkakî: îꞌ pensa pîikaꞌtîntoꞌ yuꞌse wanî ya, ayonpa yarakkîrî eseurîma, mîîkîrîya apîikaꞌtîtoꞌpe inna taa amîrîya yeꞌnen mîîkîrî pî. Amîrîya mîîkîrî eputîꞌpî man, amîrîya eraꞌmaꞌpî tiaronkon pîikaꞌtîiya, mîrîrî yeꞌnen mîîkîrî pî inna taa amîrîya. Moriya, oꞌnon yeꞌka pe inna taa eꞌpainon Paapa pî?

Îꞌ ton pe îꞌ iipî manniꞌ nîmîkî

Îꞌ morîkon iipî manniꞌ nîmîkî Paapa Jeová wenai. Pena, Paapa poitîrîtonon israelitayamîꞌ pata ponkon pîikaꞌtîpîtîꞌpî Paapa Jeováya. (Jeremias 14:8) Îꞌ nîmîkîꞌpî israelitayamîꞌya manniꞌ iipîꞌpî Paapa Jeová wenai. Tuꞌke iteꞌka Paapa Jeováya tîpemonkonoyamîꞌ pîikaꞌtîpîtîꞌpî. Îꞌ taasa Paapa Jeováya manniꞌ eꞌkupîtîꞌpî mîrîrî yai. Inkamoroya nîrî epuꞌtîꞌpî îꞌ iipî manniꞌ iipîꞌpî Paapa Jeová wenai. Josué Israel pata pon esaꞌpe tîweꞌsenya taꞌpî: “amîrînîkonya epuꞌtî pî man îꞌ taasa Jeováya manniꞌ eꞌkupîꞌpî tamîꞌnawîrî.” — Josué 23:14.

Tuꞌke konoꞌ koꞌmansaꞌ tanne îꞌ taasa Paapa Jeováya manniꞌ koꞌmansaꞌ man mîrîrî yeꞌka pe rî. Mararî pra panton man Paapa Maimuya, îꞌ taꞌpîiya manniꞌ eꞌkupîꞌpî, Îꞌ taasa Paapa Jeováya manniꞌ mîrîrî nîrî eꞌkupîꞌpî. Îꞌ taasa Paapa Jeováya manniꞌ pî, inna taa uurînîkonya eꞌpainon moropai mîrîrî eꞌkupî.

Uurînîkon eeseurîma eꞌpai man see panpe, îꞌ morî iipî manniꞌ nîmîkî uurînîkonya Paapa Maimu wenai. Maasa amîrî esenupaya Paapa Maimu pî, amîrîya epuꞌtî mararî pra pemonkonyamîꞌ pîikaꞌtîꞌpî Paapa Jeováya. Mîrîrî yeꞌnen, îꞌ morî iipî manniꞌ nîmîkîya, meruntî ke awanî inîꞌ panpî mîrîrî wenai. Jesusya Paulo yeipontîꞌpî, mîîkîrîya taꞌpî: “Pena tamîꞌnawîrî aweꞌmenukasaꞌ manniꞌ Paapa Maimu po, mîrîrî wanî uyenupanenkon pe. Inîmîkî pîꞌ eꞌnîtoꞌ ton tîrîiya. Moropai atausinpantoꞌ ton tîrîiya. Îꞌ taasaꞌ tîuya kupî Paapaya nîmîkî pîꞌ koꞌmannî. Mîrîrî yeꞌnen tamîꞌnawîrî yapîtanîpî eserîke awanî.” — Romanos 15:4.

Îꞌ iipî nîmîkî manniꞌ tîrî Paapaya?

Îꞌ pensa morîkon yekare eꞌkupî eꞌpainon mîrîrî nîmîkîtoꞌpe? Îꞌ pensa priꞌya pra eꞌnîya moropai aminke mare saꞌmantantoꞌ wanîya. Tiaron pemonkonya pemonkon saꞌmantasaꞌ eraꞌma, mîrîrî yeꞌnen îꞌ morî iipî nîmîkîiya eserîke pra awanî. Îꞌ wani awanî yeꞌnen aranneꞌ pe eꞌnî saꞌmantantoꞌ pî? Uurînîkon wakîri pepîn mîrîrî, mîrîrî iwanmîrîꞌpî Paapaya. Saꞌmantantoꞌ mîrîrî uurînîkon wakîri pepîn, mîrîrî yuꞌse pra Paapa man, inewanmarî mîrîrî. — 1 Coríntios 15:26.

Îꞌ pensa tune eꞌnîya oꞌnon pata pîikaꞌtîntoꞌ eporî eꞌpainon? Paapa Maimuya taasa man inewamarî saꞌmantantoꞌ yareꞌtîꞌka Paapaya. Paapa Jeová mîîkîrî meruntî saꞌmantantoꞌ yentainon. Mîrîrî yeꞌnen mîrîrî yareꞌtîꞌkaiya tamîꞌnawîrî. Paapa Maimuya 9 kaisarî panton man, inkamoro saꞌmantaꞌpî, tîîse inîꞌrî toꞌ ennaꞌpoꞌpî enen toꞌ koꞌmantoꞌpe. Mîrîrîkon eꞌkupîꞌpî Paapa meruntîri wenai.

Panton man Lázaro pantoni pî, mîrîrî epuꞌtî pîꞌ pemonkonyamîꞌ man. Paapa Jeováya tîmeruntîri tîrîꞌpî tinmu pia itonpa Lázaro saꞌmantasaꞌ eꞌmîꞌsaꞌkatoꞌ pîꞌ, mîîkîrîya maasa saakîrîrî wei kaisarî aꞌkomansaꞌ tanne, pemonkonyamîꞌya mîrîrî eꞌkupî eraꞌmaꞌpî. — João 11:38-48, 53; 12:9, 10

Amîrîya taise ekaranmapo: ‘Pemonkonyamîꞌ enaꞌpî enen? Tîîse aꞌyekeꞌton pe toꞌ enaꞌpî moropai toꞌ saꞌmantaꞌpî inîꞌrî? Inna, yairon pe man. Mîrîrî pî inna taa uurînîkonya? Inna, saꞌmantaꞌsan anna yonpayamîꞌ, anna wakîriꞌkon ennaꞌpo inîꞌrî enen to koꞌmantoꞌpe. Mîrîrî yeꞌnen, îꞌ iipî manni morî nîmîkî uurînîkonya.

Jesusya taꞌpî: “Uurî eꞌmîꞌsaꞌkantoꞌ moropai enen koꞌmannîtoꞌ.” (João 11:25) Paapa Jeováya tîmeruntîri tîrîꞌpî Jesus pia, tamîꞌnawîronkon eꞌmîꞌsaꞌkatoꞌpe inîꞌrî tamîꞌnawîrî pata poro. Jesusya taꞌpî: “Awanî kupî sîrîrî, tamîꞌnawîronkon isaꞌmantaꞌsanya umaimu eta kupî sîrîrî.” (João 5:28, 29) Ruwaiya pemonkonyamîꞌ wetun manni, inkamoro eꞌmîꞌsaꞌka kupî sîrîrî inîꞌrî morî pataꞌseꞌya toꞌ koꞌmantoꞌpe tarî pata pona.

Paapa poitîrîya taꞌpî: “Saꞌmantaꞌsan ennaꞌpo inîꞌrî enen toꞌ koꞌmantoꞌpe, yuꞌnaꞌtîsan pemonkonyamîꞌ eꞌmîꞌsaꞌka inîꞌrî. Uuruwai yapai pemonkonyamîꞌ epaꞌka morî pe toꞌ koꞌmantoꞌpe.” — Isaías 26:19, The New English Bible.

Morî pe senni yekare nai Paapa Maimuya? Inna, morî pe man. Saꞌmantaꞌsan wanî morî pe uruwaiya, mîrîrî yeꞌnen aranneꞌ pe pra toꞌ wanî. Tîsan roꞌtaya more konekasaꞌ yeꞌka pe toꞌ wanî. Paapa Jeová puꞌpaiya inkamoro wanî, mîrîrî yeꞌnen, toꞌ pî awenpanata, toꞌ pîmîꞌsaꞌkaiya enen toꞌ eꞌtoꞌpe. (Lucas 20:37, 38) Eꞌmîꞌsaꞌkaꞌsan yapisî uurînîkonya morî pe, mîrîrî wanî more esenposaꞌ panpe, taatausinpai pemonkonoyamîꞌ wanî. Mîrîrî yeꞌnen, morî nîmîkî saꞌmantantoꞌ wenai.

Îꞌ ekupî eꞌpainon îꞌ iipî nîmîkîya manniꞌ wenai

Paulo eseurîmaꞌpî îꞌ morîkon iipî manniꞌ pî. Mîîkîrî nîrî eseurîmaꞌpî surara pon pî, saꞌme ipon eꞌtoꞌ pî mîîkîrîya tarakko tîrîꞌpî – tîpuꞌpai pona. (1 Tessalonicenses 5:8) Îꞌ taa yuꞌse mîrîrî wanîꞌpî? Îꞌ pensa ekoreꞌmai attîya mîîkîrî saꞌmantaꞌ namai, tarakko tîrîꞌpîiya tîpuꞌpai pona. Mîrîrî itarakkoya morî pe surara puꞌpai konekaꞌpî, mîrîrî yeꞌka pe, morî iipî manni nîmîkî uurînîkonya Paapa piapai. Îꞌ pensa eꞌtarumaꞌtînya, mîrîrîya uurînîkon pîikaꞌtî esewankonoꞌma namai, mîrîrî yuꞌse uurînîkon man.

Paulo eseurîmaꞌpî tiaron pantoni pî, morî iipî manniꞌ nîmîkîtoꞌ pîꞌ. Mîîkîrîya imenukaꞌpî: “Manniꞌ apoꞌyen yeꞌseꞌ pe toꞌ nîtîrî panpe, mîrîrî innape ikuꞌtoꞌ wanî saꞌman pe. Uyapîtanîꞌnenkon pe awanî uyewankon yaꞌ.” (Hebreus 6:19) Paulo asarîꞌpî apoꞌyenya, mîîkîrî eseuronkaꞌpî, mîîkîrî saꞌmantasaꞌ pra man. Mîîkîrîya epuꞌtîꞌpî apoꞌyen yense yapinen wanîꞌpî, apoꞌyenya esenyakamakoiꞌkon warayoꞌkon wanîꞌpî. Apoꞌyen yapinenya toꞌ pîikaꞌtîꞌpî, asitun wanîꞌpî meruntî ke, mîrîrîya toꞌ yenumî yeꞌka pe wanîꞌpî tîꞌ pona, tîîse toꞌ tarimaꞌpî mîrîrî pata pai.

Îꞌ iipî manni morîkon Paapa piapai mîrîrî nîmîkîꞌpî uurînîkon man, mîrîrî yeꞌnen mîrîrîkonya uurînîkon pîikaꞌtî maasa eꞌtarumaꞌtîntoꞌ wanî tanne, mîrîrîkon yapîtanîꞌpî. Paapa Jeováya ekoreꞌmantoꞌ, eꞌtarumaꞌtîntoꞌ, saꞌmantantoꞌ, yareꞌtîꞌka tamîꞌnawîrî. (Seeniꞌ itoꞌko manniꞌ yare eraꞌmakî.) Îꞌ iipî manni morîkon nîmîkî, mîrîrî yeꞌnen nariꞌ pe wanî manni piapai uurînîkon atarima. Morîkon iipî manni Paapa Jeová yapai, mîrîrî yawîrî eꞌpai uurînîkon man.

Amîrîya morî iipî manni nîmîkî yuꞌse Jeová man. Jeová nîrî man, amîrîya morîkon iipî manni nîmîkîtoꞌpe moropai epuꞌtîpa, îꞌ yuꞌse Paapa wanî amîrî tonpe. (1 Timóteo 2:4) Jeová nîrî man tamîꞌnawîronkon anpîikaꞌtîpai, oꞌnon yeꞌka pe? Imaimu epuꞌtoꞌpe toꞌya yuꞌse Jeová man. Kaareta konekatîponkon yeꞌka pe amîrî eꞌpai man, yairon epuꞌtoꞌpe amîrîya. Senni esenupantoꞌ wenai, Paapa Jeováya morîkon tîrî, pata ponkonya mîrîrî yeꞌka tîrî pepîn aꞌpia.

Îꞌ inîmîkîya manni wenai, morî pe awanî, tiwin kin tiwinsarî awanî pepîn. Amîrîya epuꞌtî Paapa Jeováya ameruntîri ton tîrî meruntî ke awanîpa. (2 Coríntios 4:7; Filipenses 4:13) Mîrîrî taise wanî morîꞌ pe aapia? Inna! Amîrîya morî yuwa manni, eporîya eꞌpainon, mîrîrî wenai taatausinpai awanî.

[Imenukasa’/Yekaton]

Îꞌ tonpe morî nîmîkî eꞌpainon

Yairon Paapa Maimu, eraꞌma sîrîrî, mîrîrîya apîikaꞌtî eꞌpainon morî nîmîkîpa:

◼ Paapaya morî tîrî uurînîkon pia.

Paapa Maimuya taꞌpî man tamîꞌnawîrî pata etinyakama morî pataꞌse pe, tamîꞌnawîronkon koꞌmamî tîmurukonpe taatausinpai. — Salmo 37:11, 29; Isaías 25:8; Revelação (Apocalipse) 21:3, 4.

◼ Tiwin kin Paapa eseurîma pepîn seruꞌyeꞌ pe.

Tamîꞌnawîrî seruꞌye iwanmîrî nen mîîkîrî Paapa. Paapa mîîkîrî morî puꞌkuru imakuiꞌpî ton pîn, mîrîrî yeꞌnen seruꞌye pepîn mîîkîrî Paapa. — Provérbios 6:16-19; Isaías 6:2, 3; Tito 1:2; Hebreus 6:18.

◼ Meruntî ke Paapa eꞌtoꞌ eꞌtîꞌka pepîn tiwin kin.

Meruntî ke Paapa eꞌtoꞌ eꞌtîꞌka pepîn tiwin kin. Paapa Jeová mîîkîrî, meruntî puꞌkuru tamîꞌnawîronkon yentainon. — Êxodo 15:11; Isaías 40:25, 26.

◼ Ipatîkarî amîrî koꞌmamî yuꞌse Paapa Jeová man.

— João 3:16; 1 Timóteo 2:3, 4.

◼ Morî kuꞌpî uurînîkonya yuꞌse Paapa wanî.

Paapa Jeová wanî pepîn îꞌ imakuiꞌpî manni eraꞌma pî, tîîse morî koneka uurînîkonya eraꞌmaiya. (Salmo 103:12-14; 130:3; Hebreus 6:10) Jeováya inna taa uurînîkon pî, morîkon koneka uurînîkonya manni eraꞌmaiya, mîrîrî yeꞌnen Paapa Jeová tausinpa. — Provérbios 27:11.

◼ Paapaya taꞌpî man, mîîkîrîya apîikaꞌtî îꞌ konekapa îꞌ ituꞌse aweꞌtoꞌ konekatoꞌpe.

Paapaya tîpoitîrîtonon rumaka pepîn tiwin kin, mîîkîrîya tîmeruntîri tîrî uurînîkon pîikaꞌtîtoꞌpe. Îꞌ iipî manni nîmîkî uurînîkon ya Paapa wenai, mîrîrî wanî pepîn see tapairî. — Filipenses 4:13.

◼ Jeová mîîkîrî yairon, uurînîkonya inna taa eꞌpainon mîîkîrî pî.

Mîîkîrîya tiwin kin uurînîkon rumaka pepîn. — Salmo 25:3.

[Yekaton]

Mîrîrî arakkoya morî pe surara puꞌpai konekaꞌpî, morî iipî manniꞌ nîmîkî uurînîkonya Paapa piapai

[Yekaton]

Manniꞌ apoꞌyen yense yapinen warantî, îꞌ morîkon iipî inîmîkî manniꞌya uurînîkon kupî morî pe

[Crédito]

René Seindal/Su concessione del Museo Archeologico Regionale A. Salinas di Palermoya seeniꞌ morî tîrîꞌpî