O ka Hwetša Kae Kholofelo ya Kgonthe?

SEŠUPA-NAKO sa gago se eme gomme se bonagala se senyegile. O na le dikgetho tše dintši ge go tliwa tabeng ya go se lokiša. Dipapatšo mabapi le go lokiša dišupa-nako di gohle, ka moka ga tšona di bolela dilo tše di holofetšago, tše dingwe tša tšona di a ganetšana. Eupša go thwe’ng ge e ba o hwetša gore moagišani wa gago ke sehlalefi seo se ilego sa hlama sešupa-nako sona seo nywageng e fetilego? Go oketša moo, o lemoga gore o ikemišeditše go go thuša ka ntle le tefo. Kgetho ya gago e be e ka ba molaleng, na ga go bjalo?

Anke bjale o bapiše sešupa-nako seo le bokgoni bja gago ka noši bja go ba le kholofelo. Ge o lemoga gore o lahlegelwa ke kholofelo—go etša ge batho ba bantši ba dira bjalo mehleng ye ya mathata—o be o ka retologela kae bakeng sa thušo? Batho ba bantši ba ipolela gore ba kgona go rarolla mathata, eupša ditšhišinyo tše dintši tšeo ba di neago e ka ba tše di ferekanyago le tše di ganetšanago. Ka gona, ke ka baka la’ng o sa lebe go Yo a hlamilego batho ba e-na le bokgoni bja go ba le kholofelo mathomong? Beibele e bolela gore “ó kxaufsi le e mongwê le e mongwê wa ba re lexo fá” le gore o ikemišeditše kudu go re thuša.—Ditiro 17:27; 1 Petro 5:7.

Tlhaloso e Tseneletšego ya Kholofelo

Kgopolo ya Beibele mabapi le kholofelo ke e nabilego gomme ke ya kgonthe go feta yeo e tlwaetšwego go dirišwa ke dingaka, bo-rathutamahlale le ditsebi tše dintši tša tša monagano lehono. Mantšu a leleme la setlogo ao a dirišitšwego ka Beibeleng ao a fetoletšwego e le “kholofelo” a bolela go leta ka go fagahla le go letela tše dibotse. Ge e le gabotse, kholofelo e hlamilwe ka dikarolo tše pedi. E akaretša kganyogo ya selo se itšego se sebotse gotee le motheo wa go dumela gore selo seo se sebotse se tla tla. Kholofelo yeo e newago ka Beibeleng ga se toro feela. E na le motheo wo o tiilego e le ka kgonthe le bohlatse.

Tabeng ye, kholofelo e swana le tumelo, yeo e swanetšego go thewa kgodišegong le bohlatseng—e sego tabeng ya go dumela feela. (Ba-Hebere 11:1) Lega go le bjalo, Beibele e bontšha phapano magareng ga tumelo le kholofelo.—1 Ba-Korinthe 13:13.

 Ka mohlala: Ge o kgopela thušo go mogwera yo a botwago, mo gongwe o ka holofela gore o tla go thuša. Kholofelo ya gago ga se yeo e se nago motheo ka gobane o bota mogwera wa gago—o mo tseba gabotse le gona nakong e fetilego o ile wa mmona a dira dilo ka botho le ka seatla se se bulegilego. Tumelo ya gago le kholofelo di tswalana kgaufsi, gaešita le go thekgana, eupša di a fapana. O ka ba le kholofelo e bjalo bjang go Modimo?

Motheo wa go ba le Kholofelo

Modimo ke mothopo wa kholofelo ya kgonthe. Mehleng ya Beibele, Jehofa o be a bitšwa gore ke “kholofelo ya Isiraele.” (Jeremia 14:8, PK) Kholofelo le ge e le efe e botegago yeo batho ba gagwe ba bego ba e-na le yona e be e e-tšwa go yena; ka gona, e be e le kholofelo ya bona. Kholofelo e bjalo e be e sa felele feela tabeng ya go kganyoga selo se itšego. Modimo o be a ba neile motheo o tiilego wa kholofelo. Ge a be a dirišana le bona go theoša le nywaga-kgolo, o ile a ba le pego e botse ya dikholofetšo tšeo a di dirilego le dikholofetšo tšeo a di phethagaditšego. Jošua yo e bego e le moetapele wa bona o ile a botša ba-Isiraele gore: “A nkè Le lemoxeng . . . xe xo sa ka xwa hlaêla le setee sa tše botse tše Morêna Modimo wa lena a Le boletšexo ka tšôna.”—Jošua 23:14.

Pego e bjalo e sa dutše e le therešo ka morago ga nywaga e dikete. Beibele e tletše ka dikholofetšo tše di lemogegago tša Modimo gotee le pego e nepagetšego ya histori ya phethagatšo ya tšona. Dikholofetšo tša gagwe tša boporofeta ke tše di botegago kudu moo ka dinako tše dingwe di bego di ngwalwa bjalo ka ge e ka di be di šetše di phethagetše ka nako yeo di bego di dirwa ka yona.

Ke ka baka leo re ka bolelago ka Beibele e le puku ya kholofelo. Ge o dutše o ithuta ka pego ya Modimo ya go dirišana le batho, mabaka a gago a go bea kholofelo go yena a tla fo tia. Moapostola Paulo o ngwadile gore: “Tše di ngwadilwexo kxalê, di ngwaletšwe xo ruta rena, xore re hwetšê kholofêlô ka xo tiišwa le ka xo homotšwa ka ôna mangwalô.”—Ba-Roma 15:4.

Ke Kholofelo Efe Yeo Modimo a re Neago Yona?

Ke neng mo re ikwago re nyaka kholofelo kudu? Na ga se nakong ya ge re lebeletšane le lehu? Lega go le bjalo, go ba bantši ke nako yeo ka yona—ka mohlala, ge motho yo a rategago a e-hwa—moo kholofelo e bjalo e bonagalago e sa tia. Go ba gona, ke selo sefe se sengwe go feta lehu seo se ka dirago gore o se be le kholofelo? Lehu ke kobo re apere. Re ka le phema feela ka lebaka le itšego gomme ga re na matla a go le bušetša morago. Beibele e bitša lehu ka mo go swanetšego gore ke ‘lenaba la mafelelo.’—1 Ba-Korinthe 15:26.

Ka gona, re ka hwetša bjang kholofelo ge re lebeletšane le lehu? Ge e le gabotse, temana ya Beibele yeo e bitšago lehu gore ke lenaba la mafelelo e bolela gape gore lenaba le le tla “fedišwa.” Jehofa Modimo ke yo matla go feta lehu. O bontšhitše se mabakeng a mantši. Bjang? Ka go tsoša bahu. Beibele e hlalosa ditiragalo tše senyane tše di sa swanego tša ge Modimo a be a diriša matla a gagwe go tsošetša batho bao ba bego ba hwile bophelong.

Tiragalong e lemogegago, Jehofa o ile a nea Morwa wa gagwe Jesu matla a go tsoša mogwera wa gagwe yo a rategago yo a bitšwago Latsaro, yo a bego a hwile ka matšatši a mane. Jesu ga se a ka a dira se ka sephiring, eupša o se dirile phatlalatša, pele ga lešaba la babogedi.—Johane 11:38-48, 53; 12:9, 10.

Mohlomongwe o ka ipotšiša gore, ‘Ke ka baka la’ng batho ba ile ba tsošwa? Na ga se ba ka ba tšofala gomme ba feleletša ba hwile gape?’ Go bile bjalo. Lega go le bjalo, ka baka la dipego tše di botegago tša tsogo tše bjalo ka ye, re ka ba le seo se fetago go fo ba le kganyogo ya gore baratiwa ba rena bao ba hwilego ba tla phela gape; re na le lebaka la go dumela gore ba tla phela. Ka mantšu a mangwe, re na le kholofelo e tiilego.

Jesu o itše: “Ké Nna tsoxô le bophelô.” (Johane 11:25) Ke Yena yo Jehofa a tlago go mo nea matla a go tsoša batho lefaseng ka moka. Jesu o itše: “Xo tla lebaka leo bohle ba lexo mabitleng ba tl’o xo kwa Lentšu la [Kriste] ka lôna, xomme ba tlo tšwa.” (Johane 5:28, 29) Ee, bohle bao ba robetšego mabitleng ba na le tebelelo ya go tsošetšwa bophelong lefaseng la paradeise.

Moporofeta Jesaya o ile a nea seswantšho-kgopolo se se se kgomago pelo mabapi le tsogo: “Bahu ba xaxo ba tlo phela . . . Ba tlo tsoxa. Phafoxang! Hlalalang! Ba Le robetšexo leroleng; xobane phoka ya xaxo ké phoka ya seetša; ’me lefase le tlo nthša ba hwilexo.”—Jesaya 26:19.

Na seo ga se nee khomotšo? Bahu ba boemong bjo bo šireletšegilego kudu bjo bo ka naganwago,  go etša lesea leo le šireletšegilego ka popelong ya mmago lona. Ka kgonthe, bao ba khuditšego mabitleng ba beilwe ka mo go phethagetšego kgopolong yeo e sa lekanywego ya Modimo yo Matla-ohle. (Luka 20:37, 38) Go se go ye kae ba tla bušetšwa bophelong, ba tsena lefaseng le le thabilego, le le ba amogelago go swana le kamoo lesea le amogelwago ke lapa le lerato leo le bego le le letetše! Ka gona, go na le kholofelo gaešita le ge re lebeletšane le lehu.

Seo Kholofelo e ka go Direlago Sona

Paulo o re ruta mo gontši mabapi le bohlokwa bja kholofelo. O boletše ka kholofelo e le karolo e bohlokwa ya ditlhamo tša moya—e lego kefa. (1 Ba-Thesalonika 5:8) O be a bolela’ng ka seo? Ge e le gabotse, mehleng ya Beibele mohlabani o be a rwala kefa ya tšhipi ge a e-ya ntweng, gantši a e rwala godimo ga tuku ya wulu goba kepisi ya mokgopa. Ka baka la go rwala kefa, bontši bja dilo tšeo di mmethago hlogong di be di feta di sa mo dira selo go e na le go mmolaya. Paulo o be a e-ra go re’ng? Go etša ge kefa e šireletša hlogo, kholofelo e šireletša monagano, e lego matla a go nagana. Ge e ba o e-na le kholofelo e tiilego yeo e dumelelanago le merero ya Modimo, khutšo ya gago ya monagano ga se ya swanela go senywa ke go tšhoga goba go hloka kholofelo ge o lebeletšana le mathata. Ke mang gare ga rena yo a sa nyakego kefa e bjalo?

Paulo o ile a diriša seswantšho se sengwe seo se kwagalago gabotse sa kholofelo yeo e tswalanago le thato ya Modimo. O ngwadile gore: “Kholofêlô yé e ke ké yôna thêkxô e tiilexo ya meôya ya rena, thêkxô ye e sa tomoxexo, ye e tsemilwexo.” (Ba-Hebere 6:19) Ka ge e be e le mophologi wa go robegelwa ke sekepe ka makga a fetago le tee, Paulo o be a tseba gabotse bohlokwa bja tshetledi. Ge ba hlaselwa ke ledimo, basesiši ba be ba fološa tshetledi ya sekepe. Ge e be e ka tsema lebatong la lewatle gomme ya dula e tiile, sekepe se be se e-ba le sebaka sa go sesa gare ga ledimo se šireletšegile se sa tšutla-tšutlelwe lebopong ke moka sa thula mafsika.

Ka mo go swanago, ge e ba dikholofetšo tša Modimo go rena e le kholofelo ye e “sa tomoxexo, ye e tsemilwexo,” kholofelo e bjalo e ka re thuša go kgotlelela le go atlega dinakong tše tša khuduego. Jehofa o holofetša gore kgaufsinyane go tla tla nako yeo ka yona batho ba ka se sa hlwago ba tlaišwa ke dintwa, bosenyi, manyami goba gaešita le lehu. (Bona lepokisi go letlakala 18.) Go kgomarela kholofelong yeo go ka re thuša go hlahla mesepelo ya rena gore re pheme kotsi, gwa re nea tšhušumetšo yeo re e nyakago ya go phela ka ditekanyetšo tša Modimo go e na le go ineela mokgweng o gobogilego wa tlhakatlhakano wo o bušago lefaseng lehono.

Kholofelo yeo Jehofa a e neago e bile e akaretša le wena ka noši. O nyaka gore o phele go ya kamoo a bego a rerile gore o phele ka gona. Kganyogo ya gagwe ke gore “batho bohle ba phološwê.” Bjang? Sa pele, yo mongwe le yo mongwe o swanetše gore a “fihlêlê tsebô ya therešô.” (1 Timotheo 2:4) Bagatiši ba makasine wo ba go kgothaletša gore o monye tsebo e bjalo e neago bophelo mabapi le therešo ya Lentšu la Modimo. Ka gona, kholofelo yeo Modimo a tlago go go nea yona e feta kgole kholofelo le ge e le efe yeo o ka e hwetšago lefaseng le.

Ka kholofelo e bjalo e tšwago go Modimo, le ka mohla ga se wa swanela go ikwa o itlhobogile, ka gobane Modimo a ka go nea matla ao o a nyakago bakeng sa go fihlelela dipakane le ge e le dife tšeo o ka bago o e-na le tšona tšeo di dumelelanago le thato ya gagwe. (2 Ba-Korinthe 4:7; Ba-Filipi 4:13) Na woo ga se mohuta wa kholofelo yeo o e nyakago? Ka gona ge e ba o nyaka kholofelo, ge e ba o be o dutše o tsomana le yona, kgothatšega. Kholofelo e kgaufsi. O ka e hwetša!

 [Lepokisi/Seswantšho go letlakala 18]

Mabaka a go ba le Kholofelo

Dikgopolo tše tša Mangwalo di ka go thuša gore o matlafatše kholofelo ya gago:

▪ Modimo o holofetša bokamoso bjo bo thabišago.

Lentšu la gagwe le bolela gore lefase le tla fetoga paradeise ya lefase ka moka, yeo e tlago go dulwa ke lapa la batho bao ba thabilego le bao ba nago le botee.—Psalme 37:11, 29; Jesaya 25:8; Kutollo 21:3, 4.

▪ Modimo a ka se ke a aketša.

O hlaswa maaka ka mehuta ya ona ka moka. Jehofa ke yo mokgethwa le yo a sekilego ka mo go sa lekanywego, ka gona ga go kgonege gore a bolele maaka.—Diema 6:16-19; Jesaya 6:2, 3; Tito 1:2; Ba-Hebere 6:18.

▪ Modimo o na le matla ao a sa lekanywego.

Jehofa a nnoši ke yo matla-ohle. Ga go na selo legohleng seo se ka mo thibelago go phethagatša dikholofetšo tša gagwe.—Ekisodo 15:11; Jesaya 40:25, 26.

▪ Modimo o nyaka gore o phele ka mo go sa felego.

—Johane 3:16; 1 Timotheo 2:3, 4.

▪ Modimo o re lebelela ka kholofelo.

O kgetha go lebiša tlhokomelo dikeng tša rena tše dibotse gotee le maiteko, e sego diphošong tša rena le dilong tšeo di re palelago. (Psalme 103:12-14; 130:3; Ba-Hebere 6:10) O holofela gore re tla dira se se lokilego gomme o a thaba ge re dira bjalo.—Diema 27:11.

▪ Modimo o holofetša go go thuša go fihlelela dipakane tše di dumelelanago le thato ya gagwe.

Bahlanka ba gagwe ga se ba swanela go ikwa ba itlhobogile. Modimo o nea moya o mokgethwa ka seatla se se bulegilego, e lego matla a magolo kudu a lego gona bakeng sa go re thuša.—Ba-Filipi 4:13.

▪ Kholofelo e beilwego go Modimo ga e ke e lebišwa gošele le ka mohla.

Ke yo a botegago e le ka kgonthe le yo a ka holofelwago, a ka se ke a go nyamiša le ka mohla.—Psalme 25:3.

[Seswantšho go letlakala 20]

Go etša ge kefa e šireletša hlogo, kholofelo le yona e šireletša monagano

[Seswantšho go letlakala 20]

Ka go swana le tshetledi, kholofelo yeo e theilwego motheong o tiilego e ka re matlafatša

[Mothopo]

Courtesy René Seindal/Su concessione del Museo Archeologico Regionale A. Salinas di Palermo