Пэр со тэ надеисавас?

ТУТЭ терделэ и часоря и, здэлпэ, кай вонэ ԥаделэ. Ту родэс, каринг лэн тэ отдэс, кай тэ стерэн. Исин бут разни мастероря, савэ ӷанэн тэ терэн и часоря. И ту гиндос, саво авэла май лашо. И акэ ту уӷанэс, кай паша тутэ жувэл мастеро, саво вимэкля кацавэ часоря, сар тутэ. И со май важно, во камэл тути тэ поможый и важ када нисо на мангэл. Понятно, кай любо мануш витидэла лэс.

Ту жаса кай о мануш, саво драго стерэла и часоря, ту надеиспэ пэр лэстэ. Ай кала андэ жызня бут проблемы и ту умэкэс и вас, тоди кастэ ту бандёса? Бут мануша ԥэнэн, кай моӷут тэ поможын тути андэ кода, со тердяпэ. Вонэ бут со ԥэнэн, но када най кода, со трэбуй или на поможый. Васо бы тэ на мангэс помощь кодэлэстар, ко создал лэ манушэн кадя, кай вонэ тэ надеинпэ? Андэ Библия ԥэнэнпэ, кай «во... найдур кажнонэстар амэндар» и кай во радо тэ поможый (Деяния 17:27; 1 Петра 5:7).

Сар када тэ надеиспэ?

Андэ Библия пала надежда росԥэнэнпэ май бут и май драго, чем пала када ԥэнэн и врачоря и учони, и психолоӷоря. И Библия сас пистромэ пэ ӷреческо и еврейско шыб. Пар лэндэ сас пэрэандярдо о алав «надежда». Кадэва алав сыкавэл най кати, кай о мануш фартэ аштярэл варисо лашо, но лэстэ исин, васо во патял, кай када авэла. И надежда, пала сави ԥэнэнпэ андэ Библия, када най варисави сказка. Када чачимос, важ кода кай исин, со када доԥэнэн.

Кала о мануш патял и кала надеийпэ пэ варисо, лэстэ исин, васо во кадэлэсти патял. И надежда и вера, здэлпэ, кай када еқэндар (Евреям 11:1). Но андэ Библия ԥэнэнпэ, кай када най ек (1 Коринфянам 13:13).

Кала ту мангэс лэ друӷос, савэсти ту патяс, тэ поможый тути, ту ӷанэс, кай пэр лэстэ можно тэ надеиспэ. Ту ӷанэс, васо ту патяс лэсти, ту драго ӷанэс лэс, ӷанэс, кай во терэл лашимос и кай во вся терэл анда оди. Кадя сар ту надеиспэ по пэско друӷо, можэш тэ надеиспэ кадя по Дэл?

Трэбуй тэ авэл, васо тэ патяс

О израильско народо най ек вико диқэлас, сар о Иегова дэлас алав и зритярэлас лэс. О Иисусо Навино, саво диқэлас пала израильско народо, ԥэндя: «Тумэ драго ӷанэн, кай на ашэляпэ най исполнено ни ек алав, анда всаворэ лашэ алава, савэ тумэнди ԥэндя тумаро Дэл, о Иегова» (Иисус Навин 23:14). О Дэл ашэл, кай лэсти тэ патян, важ кода кай, со во ԥэнэн, кадя и терэл вся. Андэ библейско время о Иегова сас важ о Израилё кодэва, пэр кастэ вонэ «надеинаспэ» (Иеремия 14:8). Анда када дицол, кай кати по Дэл о мануш можэт тэ надеийпэ.

Андэ Библия запистромэ бут лэ Дэвлэстирэ обещянии. И кода, со сас дэлмут, доԥэнэн, кай о Иегова зритярэлас пэско алав и через када амэ лас май фартэ тэ патяс лэсти. Дэкала во дэлас дума кадя, ԥэнэса, во ужэ када стердя.

Важ када амэ можэм тэ ԥэнас, кай и Библия, када книӷа, сави дэл надежда. Кала амэ май бут уӷанас, сар о Дэл обжаласпэ лэ манушэнца, амэндэ исин инке май бут кода, васо амэ можэм тэ надеисавас пэр лэстэ. О апостоло Павло пистросардя: «Вся, со сас пистромэ, када важ амэндэ. Через кода, кай амэ виритярас о ԥаримос и кай амэн подритярэн алавэнца анда Писании, амэ тэ аштярас англэ о лашимос» (Римлянам 15:4).

Сави надежда дэл амэнди о Дэл?

Андэ сави время амэ май фартэ камас тэ патяс, кай авэла вся драго? Хэба най тоди, кала варико хасардя анда пэстирэ чачен? Важ бут мануша, кала варико мэрэл анда чаче, када кадя ԥарэс, кай вонэ умэкэн и вас. Со можэт тэ авэл май страшно кодэлэстар, сар варико мэрэл? Андэ Библия ԥэнэнпэ, кай и смэрть, када «послиднё вороӷо» (1 Коринфянам 15:26). Поджан и бэрша и о мануш никай на терэлапэ ла смэртятар. Амэ можэм тэ обжас ла пэ дэсави время, но най па амаро зор тэ улас ла.

Сави исин надежда, кала варико мэрэл? Андэ Библия ԥэнэнпэ, кай и смэрть, када послиднё вороӷо и пистромэ, кай кадэва вороӷо будэр на авэла. Када сыкавэл, кай авэла время, кала и мануша на лэна тэ мэрэн. Кай о Иегова исин зор тэ улэл када. Андэ Библия запистромэ, кай о Дэл ужэ девять раз рисарэлас манушэн каринг и жызня.

Кадяжэ о Иегова дя зор пэстирэ Шавэсти лэ Иисусости тэ рий каринг и жызня пэстирэ друӷос лэ Лазарёс, саво сас муло штар дес. О Иисусо стердя када най чоралэс, када диқлэ фартэ бут мануша (Иоанна 11:38—48, 53; 12:9, 10).

И мануша, савэн о Дэл рисардя каринг и жызня, потом ԥурелэ и мулинэ. Но блаӷодаря кодэлэсти, кай о Дэл рисардя лэн каринг и жызня, амэ най кати камас, кай амарэ чаче, савэ мулинэ, упалэ тэ жувэн, амэндэ исин, васо амэ патяс андэ када.

О Иисусо ԥэндя: «Через мандэ о Дэл рий каринг и жызня кодэлэн, ко муля и дэл тэ жувэн» (Иоанна 11:25). О Иегова дэла лэсти зор тэ рий каринг и жызня всаворэн, ко муля. О Иисусо ԥэндя: «Поджал о часо, андэ саво всаворэ, ко мулинэ, ашунэна лэско ӷолосо и ущена» (Иоанна 5:28, 29). Всаворэ, ко муля, моӷут тэ ринпэ каринг и жызня андо раё пэ ԥув.

О апостоло Павло ԥэндя, кай «ринапэ каринг и жызня кодэла, ко муля, праведни и нэправедни» (Деяния 24:15).

Када фартэ амэн подритярэл. Кала о мануш бэшэл андо баруно, лэстирэ чаче лэс на бистэрдэ и фартэ аштярэн, кала во вижала. Кадяжэ и о Иегова на бистэрдя кодэлэ манушэн, кас ужэ нинай (Луки 20:37, 38). Кала авэла раё пэ ԥув кодэла, ко ужылэтар, ринапэ каринг и жызня. И мануша лэна фартэ тэ радуинпэ кадэлэсти, кай диқэна пэстирэ чачен.

Саво лашимос можэт тэ анэн амэнди и надежда?

О Павло ля тэ сыстой и надежда, сави исин кай о мануш, ла саструня стадяса, сави сас кай о воино, андэ время, кала сас война (1 Фессалоникийцам 5:8). Андэ кодэя время, сар жувэлас о Павло, и воиноря пэ война лэнас пэр пэстэ и саструни стади упрал па май цыкни стади, сави анда пушом или анда ӷаравля. Кала во марэласпэ лэ вороӷонэнца, вой фэрияс о шэро. Кадяжэ, кала амэ аштярас англэ о лашимос, амэ на парашас тэ патяс, кай авэла вся драго. Если амэ патяс андэ кода, со о Дэл стерэла англэ, тоди сар бы амэнди ԥарэс тэ на авелоп, амэ на умэкаса и вас и амэндэ авэла, васо дальшэ тэ жувас. Амэнди всаворэнди трэбуй кацави саструни стади!

О Павло росԥэндя инке ек лашо примеро, саво сыкавэл, сар кода, со амэ аштярас, сжалпэ кодэлэса, со загиндосардя о Дэл. Во пистросардя: «Кадэя надежда амэндэ, сар якорё важ оди, вой надёжно и састи» (Евреям 6:19). О Павло най ек разо попэрэлас, кала о кораблё розмардёлас, и во драго ӷанэнас, пэ скати дэ важно о якорё. Кала пэ моря сас бари балвал и морякоря умэкэнас о якорё андо паи. О якорё дорэсэлас жы каринг о дно, тоди о кораблё састэс ритярдёлас и лэс на вишолас по бэрэӷо, через када во на розмардёлас андэ бара.

Кадяжэ, если лэ Дэвлэстирэ обещянии важ амэндэ «надёжни и састэ», тоди кода, кай амэ надеисавас по лашимос, поможыя амэнди тэ виритярас любо ԥаримос. О Иегова дэл алав, кай йто авэла и время, кала и войны и преступность, и биды, и дажэ и смэрть, будэр на авэла. (Дик и рамка пэ страница 10.) И надежда можэт тэ авэл важ амэндэ сар якорё, саво трэбуй, кай тэ виритярас и ԥари время. Ай кадяжэ, кала амэ надеисавас по лашимос, поможыя тэ жувас па лэ Дэвлэстирэ законоря. Инке поможыя тэ на андярас пэс сар и мануша андэ кадэя билажаварди люма.

И надежда, сави дэл о Иегова, можэт тэ анэн лашимос и тути. Во камэл, кай тутэ тэ авэл лащи жызня, сави во и загиндосардя. Во камэл, кай всаворэ мануша тэ спасынпэ. Сар? Трэбуй «драго тэ полэн о чачимос» анда Библия (1 Тимофею 2:4). Прилэн кода, со тумэ уӷанглэ, важ кода кай када ԥэнэн о Дэл. Кала о мануш надеийпэ по лашимос, саво жал лэ Дэвлэстар, када май драго кодэлэстар, пэр со надеинпэ и мануша андэ люма.

Кала ту аштярэс о лашимос, саво авэла англэ, тоди ту никала на умэкэса и вас. О Дэл дэла тути зор, кай тэ домардёс кода, со ту камэс, если када сжалпэ кодэлэса, со во камэл (2 Коринфянам 4:7; Филиппийцам 4:13). Кажно надеийпэ пэ када. Никала на умэк и вас и виарак, пэр со тэ надеиспэ. Тутэ када вижала!

 [Рамка, страница 10]

Васо ту можэш тэ надеиспэ по Дэл?

Кадэла гиндоря анда Библия, моӷут тэ поможын тути, май фартэ тэ патяс лэ Дэвлэсти.

▪ О Дэл дэл алав, кай англэ авэла бахтали жызня.

Андэ лэ Дэвлэско Алав андэ Библия ԥэнэнпэ, кай па вся и ԥув авэла раё, андэ саво всаворэ мануша лэна тэ жувэн, сар ек бахтало ери (Псалом 36:11, 29; Исаия 25:8; Откровение 21:3, 4).

▪ О Дэл нэ можэт тэ хохавэл.

Во нэнавидит любо хохаимос. О Иегова андэ вся свынто и вужо, важ када во нэ можэт тэ хохавэл (Притчи 6:16—19; Исаия 6:2, 3; Титу 1:2; Евреям 6:18).

▪ Кати кай о Дэл само баро зор.

Кати о Иегова Всемоӷущё. Нисо андэ вся и люма нэ можэт тэ стерэл кадя, кай тэ на авэл кода, пала со во дя алав (Исход 15:11; Исаия 40:25, 26).

▪ О Дэл камэл, кай ту тэ жувэс вечно.

(Иоанна 3:16; 1 Тимофею 2:3, 4).

▪ О Дэл аштярэл, кай ту лэс кандэса.

О Дэл диқэл пэ кода, со тутэ на вижал и пэ кода, кай ту шылиспэ. Но май бут шол сама пэ кода, кай ту пристос зор и кай тутэ исин варисо лашо (Псалом 102:12—14; 129:3; Евреям 6:10). Во патял, кай ту лэса тэ терэс кода, со правильно, и лэсти чалёл, кала ту терэс кадя, сар во аштярэл (Притчи 27:11).

▪ О Дэл дэл алав, кай поможыя тэ домардёс кода, со лэсти уӷодно.

Лэ Дэвлэстирэ служытеля моӷут вся и время тэ патян, кай во подритярэла лэн. Во анда вся оди дэл тути пэско свынто духо, када со май баро зор (Филиппийцам 4:13).

▪ Кода, кай надеиспэ по Дэл, никала на авэла евья.

Ту можэш тэ патяс лэ Дэвлэсти, важ кода кай во никала на ашавэла и никала на подвэдия тут (Псалом 24:3).

 [Картинка, страница 12]

Амэ ӷанас, кай и саструни стади фэрий о шэро, кадяжэ, кала амэ надеисавас, кай авэла лашимос, тоди на умэкаса и вас.

[Картинка, страница 12]

О якорё ритярэл, кай о кораблё тэ на шувидэл андэ разни рига. Кадя и амэ, кала ӷанас, васо амэ надеисавас, када дэл амэнди зор састэс тэ тердювас по Дэвлэско дром.

[Сведения пала кода катар линэ]

Courtesy René Seindal/Su concessione del Museo Archeologico Regionale A. Salinas di Palermo