Tivọ Yen a Da Sa Mrẹ Uvi rẹ Iphiẹrophiyọ?

Ughọjọ wẹn miovwirin, ọ rha wia-an. Wọ vwọ guọnọ rhuẹrẹ, iroro buebun da djẹ ro ẹwẹn wẹn. Ihwo buebun re rhuẹrẹ ughọjọ tanẹ ayen nabọ riẹn rhuẹrẹ, jẹ ona rẹ ẹrhuẹrẹ rayen dede tobọ vwọso ohwohwo. Ẹkẹvuọvo, kẹ ọ da rha dianẹ wọ rhe mrẹvughe nẹ ohwo ọvo vwẹ ekogho wẹn yen ru ughọjọ wẹn na vwo? Vwọba, wọ da je mrẹ vughe nẹ ọ tobọ vwo owenvwe rọ vwọ rhuẹrẹ ughọjọ na kẹ wẹ ọphẹ. Omuẹro nẹ wọ riẹn obo wo che ru enena re!

Enẹna, gba vwẹ iphiẹrophiyọ wẹn vwọ vwanvwe ughọjọ yena. Wọ da mrẹ vughe nẹ iphiẹrophiyọ wẹn va wẹ abọ kirobo rẹ ọ va ihwo buebun abọ vwẹ akpọ nana rọ vọnre vẹ okpetu na, tivọ kọyen wọ da sa mrẹ ukẹcha? Ihwo buebun tanẹ ayen sa rhuẹre ebẹnbẹn na phiyọ, ẹkẹvuọvo, iroroẹjẹ rayen na sa vwọso ohwohwo, o ji se tighi ẹwẹn rẹ ihwo. Ọtiọyena, o rhe fo ra vwọ yare ukẹcha mie Ohwo rọ ma ihworakpọ vẹ ẹgba re se vwo vwo iphiẹrophiyọ-ọ? Baibol na tare nẹ, o “sheri kẹ avwanre ohwo ọvuọvo-o,” o ji vwo owenvwe rọ vwọ chọn avwanre uko.—Iruo Rẹ Iyinkọn Na 17:27; 1 Pita 5:7.

Oborẹ Iphiẹrophiyọ Mudiaphiyọ Dẹn

Oborẹ Baibol na dje kpahen iphiẹrophiyọ nabọ fiotọ vwọ vrẹ oborẹ idọkto, egbaerianriẹn, kugbe egba-iroro evughe ra nabọ vughe djere. Ejajẹ ra vwọ fan ota na “Iphiẹrophiyọ” vwẹ Baibol na mudiaphiyọ ra vwọ hẹrhẹ vẹ oruru kugbe a vwọ rhẹro rẹ erhuvwu. Iphiẹrophiyọ churobọ si erọnvwọn ivẹ. O churobo si urhurusivwe ra vwọ mrẹ obo ri yoma vẹ oboresorọ re vwo vwo imuẹro nẹ obo ri yoma cha vwẹ obaro. Iphiẹrophiyọ rọhẹ Baibol na dia iroro rẹ erhuvwu ghevweghe-e. O vwo imuẹro ra sarọ mu.

Vwẹ ẹdia nana, iphiẹrophiyọ vẹ esegbuyota họhọ ohwohwo. Ọyen obo re mu kpahen orọnvwọn kiriguo, ọ dia ọ ra riẹriẹ owẹ wẹ vwo vwo imuẹro kpahe-en. (Hibru 11:1) Ẹkẹvuọvo, Baibol na ji phi ofẹnẹ phiyọ uvwre rẹ iphiẹrophiyọ vẹ esegbuyota.—1 Kọrẹnt 13:13.

Re vwo dje: Wọ da nokpẹn rẹ ukẹcha vwo mie ugbeyan wẹn, wo se vwo iphiẹrophiyọ nẹ ọ cha chọn we uko.  Iphiẹrophiyọ wẹn kpahen ugbeyan wẹn na ghwotọ kidie wo vwo imuẹro kpahọn, wọ nabọ vughe, wọ je mrẹ ro dje uruemu rẹ ẹse-eruo vẹ uruemuesiri phia jovwore. Esegbuyota vẹ iphiẹrophiyọ wẹn churobọ si ohwohwo. Dede nẹ ayen wiankuẹgbe jẹ ayen fẹnẹre. Kẹ mavọ wo se vwo vwo oka rẹ iphiẹrophiyọ tiọyena kpahen Ọghẹnẹ?

Oborẹ e Mu Iphiẹrophiyọ Kpahen

Ọghẹnẹ yen esiri rẹ obọdẹn rẹ iphiẹrophiyọ. Vwẹ Baibol na e se Jihova “iphiẹrohọ rẹ Izrẹl.” (Jerimaya 14:8) Iphiẹrophiyo eje ra sa vwẹroso rẹ ihwo rọyen vwori, obọ rọyen yen o nurhe, ọtiọyena, Jihova yen ayen mu iphiẹrophiyọ rayen kpahen vwẹ oke yena. Iphiẹrophiyọ tiọyena dia urhurusivwe ghevweghe-e. Ọghẹnẹ kẹ ayen uvi rẹ iroro rọ sorọ rẹ ayen vwo vwo iphiẹrophiyọ. Ikpe buebun rẹ Jihova vẹ ayen vwọ herọ, ive ro ve ke ayen eje o ru ayen gba. Joshua rọ dia osun rayen vuẹ ayen nẹ, “ovwan riẹnre . . . nẹ egbudugbu rẹ emu esiri na ejobi rẹ Ọrovwohwo Ọghẹnẹ rẹ ovwan veri kẹ ovwan, ejobi ru gba re.”—Joshua 23:14.

Ikpe uriorin buebun wanre, jẹ iyẹnrẹn rẹ orugba rẹ ive ri Jihova je herọ. Baibol na vọnre vẹ ive iyoyovwin ri Jihova kugbe Iyẹnrẹn ọgbagba rẹ obo rẹ ayen rugba wan. A nabọ vwẹroso ive rẹ aroẹmrẹ rọyen te ẹdia rẹ ọkiọvo dede a tobo niyẹrẹn rayen kerẹsiẹ a da mrẹ nẹ e tobọ rugba re vwẹ ọke ra vwọ mraro rayen na.

Ọna yen sorọ e se vwo se Baibol na ọbe rẹ iphiẹrophiyọ. Wo vwo yono kpahen oborẹ Jihova vẹ ihworakpọ yerin wan ye, iphiẹrophiyọ ru wo vwo kpahọn che re kodophiyọ. Ọyinkọn Pọl de si: “Kidie kemu kemu re siri phihọ otọ rhabae rhe, e si ayen phihọ otọ kẹ eyono rẹ avwanre, rere vwẹ erhiori kugbe uchebro ro nẹ ẹbe ọfuanfon na rhe avwanre se vwo iphiẹrohọ.”— Rom 15:4.

Iphiẹrophiyọ Vọ Yen Ọghẹnẹ vwọ Kẹ Avawnre?

Ọke vọ yen avwanre ma vwọ guọnọ iphiẹrophiyọ? Ọ dia ọke re de hirhiaroku ughwu? Vwọ kẹ ihwo buebun, ọke yena yen ayen da ma guọnọ iphiẹrophiyọ, kerẹ udje, ọ bẹn re vwo vwo iphiẹrophiyọ ọke rẹ ohwo re vwo ẹguọnọ kpahen de ghwu. Ughwu yen orọnvwọn ọvo ro brẹ iphiẹrophiyọ rẹ avwanre krẹn. Ọ vwọ tua ihwo eje. Ọke rẹ a je vwọ hẹ akpọ yen a sa vwọ ta nẹ a vrabọ rọyen. Ẹkẹvuọvo, ọ da rhe, e se kuo rhẹriẹ-ẹ. Ọna yen sorọ Baibol na vwo se ughwu “ọvweghrẹ rọ ka uko”—1 Kọrẹnt 15:26.

Kẹ mavọ avwanre sa vwọ mrẹ iphiẹrophiyọ vwẹ ẹdia rẹ ughwu? Ẹkpo ri Baibol na ro se ughwu ọvweghrẹ rọ ka uko na je tanẹ a “cha ghwọrọ.” Jihova gan vrẹ ughwu. O dje ọnana phia vwẹ ọke buebun re. Mavọ yen o djerephia wan? Ọyen ọ rọ vwọ rhọvwọn ihwo ri ghwuru nushi. Baibol na djisẹ rẹ ẹdia irhinrin sansan rẹ Ọghẹnẹ vwọ reyọ ẹgba rọyen vwọ rhọvwọn ihwo ri ghwuru nushi.

Vwẹ idjerhe rẹ oghẹresan, Jihova kẹ ọmọ rọyen, Jesu, ẹgba rọ vwọ rhọvwọn ugbeyan rọyen Lazarọs ro ghwuru ẹdẹ ẹne re nushi. Ọ dia odjahọn yen Jesu da rhọvwọn nushi-i, Ihwo buebun mrẹrẹ ọke rọ vwọ rhovwọn nushi.—Jọn 11:38-48, 53; 12:9, 10.

Wọ sa nọ, diesorọ a vwọ rhọvwọn ihwo nushi? Ayen ra rhoma ghwo ji ghwu ọke vwọ yanran na? E, ayen ghwuru. Ẹkẹvuọvo, fikirẹ iyẹnrẹn rẹ ẹrhọvwọn nushi tiọyena, kẹ avwanre se vwo oboresọrọ e vwo vwo imuẹro nẹ ihwo rẹ avwanre ri ghwuru cha rhoma yerin ukperẹ ọ vwọ dia urhurusivwe ghevweghe ra vwọ rhoma mrẹ ayen. Kọyen a sa tanẹ avwanre vwo uvi rẹ iphiẹrophiyọ.

Jesu da ta: “Mẹvwẹ hẹ evrẹnushi na kugbe arhọ na.” (Jọn 11:25) Ọyen yen Jihova cha vwẹ ẹgba kẹ vwọ rhọvwọn ihwo nushi vwẹ akpọeje. Jesu da ta: “ọke na cha rẹ irivwi rẹ hẹ evun rẹ ishi ejobi che vwo nyo urhuru [ri Jesu]. Ke che yan phia.” (Jọn 5:28, 29)  Ọtiọyen dẹn, ihwo ri ghwuru rehẹ ushi vwo iphẹrophiyọ rẹ ẹrhọvwọn nushi kpo Iparadaisi vwẹ otọrakpọ na tavwen ayen ki ghwu.

Mrẹ oborẹ ọmraro Aizaya djisẹ rẹ obo rẹ evrẹnushi na cha dia vwẹ The New English Bible: “Irivwin wẹn ri ghwuru cha rhọ, ugboma rayen che vrẹn, ihwo re vwerhẹn vwẹ evunrẹ otọ na cha rhoma vrẹn, kẹ ayen che kperi phia vẹ aghọghọ; kidie, irho wẹn ọyen irho rọ nyavwaro galagala, otọrakpọ na kọ cha rhoma vwiẹ irivwin rehẹ evun rọyen rhe akpọ.”— Aizaya 26:19

Ive nana phiuduphiyọ avwanre awọ? Kerẹ ọmọboba rọhẹ evun rẹ oni rọyen, ihwo ri ghwuru na hẹ ẹdia ro me fuoma kparobọ ra sa vwẹ ẹwẹn roro. Vwọrẹ uyota, ihwo rehẹ ushi na hẹ evunrẹ ẹkarophiyọ rẹ Ọghẹnẹ ro me vwo ẹgba na, ẹgba rẹ ẹkarophiyọ re Oghẹnẹ basa-an. (Luk 20:37, 38) O rhe che kri-i, kọ cha rhọvwọn ayen nushi, kirobo re ihwo rẹ orua dede ọmọ re vwiẹre obọ ye, ọtiọyen e ji che dede ihwo nana rhe otọrakpọ na rọ cha vọn vẹ omavwerhovwẹn vwẹ ọke yena. Eriyina, o se mu avwanre ẹro nẹ iphiẹrophiyọ herọ tobọ vwẹ ẹdia rẹ ughwu dede.

Oborẹ Iphiẹrophiyo Se Ru Kẹ Wẹ

Pọl yono avwanre erọnvwọn eghanghanre buebun kpahen iphiẹrophiyọ. Ọ ta ota kpahen iphiẹrophiyọ kerẹ ẹbẹre ọvo rẹ ewun rẹ ofovwin rẹ ẹwẹn na—erhu. (1 Tẹsalonaika 5:8) Diesorọ ọ vwọ reyọ iphiẹrophiyọ vwo dje erhu? Vwọrẹ uyota, ọke re vwo si Baibol na, isodje kuẹ erhu rẹ utehru phiyọ tavwen o ki kpo ofovwin, ọke buebun na e kuọ rhurhẹ ubierhu rẹ ophiẹn. Kidie nẹ ayen kuẹ erhu rẹ ofovwin phiyọ na, obo ro rhe hwe ayen jovwo rha cha so ughwu vwọ kẹ aye-en. Die yen udje ri Pọl na yono avwanre? Kirobo rẹ erhu rẹ ofovwin chonchọn rẹ uyovwin rẹ isodje ye, ọtiọyen iphiẹrophiyọ je sẹro rẹ ẹgba rẹ iroro rẹ avwanre. Wo de vwo uvi rẹ iphiẹrophiyọ ro shephiyọ vẹ ọhọre rẹ Ọghẹnẹ, ku wo che vwo ufuoma rẹ ẹwẹn siẹrẹ wo de hirhiarokuẹ ebẹnbẹn. Ono usun rẹ avwanre na yen jẹ erhu ọtiọyena ẹ guọnọ?

Pọl vwẹ udje ọfa rẹ obo re rhiẹromrẹ vwo ruiruo ro vwo dje obo rẹ iphiẹrophiyọ rẹ avwanre vwo churobọ si ọhọre rẹ Ọghẹnẹ. Ọ de si: “[Iphiẹrophiyọ yen] ọtan rẹ avwanre churu erhi rẹ avwanre mu ro vwo je bo.” (Hibru 6:19) Kerẹ ohwo rẹ okuna shuru vrẹ obọ ọvo jovwore, Pọl nabọ riẹn obo rẹ ọtan ghanre te vwọ kẹ okuna. Ọke rẹ ogiribo de djuẹ ye, ke do ọtan na phiyo abadi na. Ọtan na de te otọ rẹ abadi na je mrẹ asan jẹ phiyọ, okuna na kọ sa gua te orhoma rẹ abadi na vwọrẹ ufuoma, o rhe che shu-u.

Kirobo rẹ ọtan yọnrọn okuna ro vwo je bo ye, siẹrẹ ive rẹ Ọghẹnẹ da kẹ avwanre iphiẹrophiyọ rọ ghwotọ ro ji muẹro, iphiẹrophiyọ yena sa chọn avwanre uko vwọ yọnre gan vwẹ ọke rẹ ogiribo ride. Jihova veri nẹ o rhe che kri-i, ihworakpọ gbe cha rioja rẹ ifovwin, ohwekufia, odjadja, yẹrẹ ughwu dede-e. (Ni ekpeti rọhẹ aruọbe 10.) Avwanre de tinka mu iphiẹrophiyọ yena, kẹ avwanre sa kẹnoma kẹ okpetu, ọnana ko che mu avwanre vwo yeren akpọ nene iwan rẹ Ọghẹnẹ ukperẹ e vwo vwo iruemu ebrabra rẹ akpọ na re vọn asan eje nonẹna.

Iphiẹrophiyọ rẹ Jihova vwọ kẹ avwanre ji churobo si we komobọ. Ọ guọnọre nẹ wo yeren akpọ nene ọhọre rọyen. Ọ guọnọre nẹ , “ihwo na ejobi rhọre.” Kẹ, avwanre ghene sa rhọ? Ẹsosuọ, Ohwo ọvuọvo ko “rhi vwo erianriẹn rẹ uyota na.” (1 Timoti 2:4) Ihwo ri si ọbe nana jiriro kẹ wẹ nẹ wo rhi vwo erianriẹn ro shekpahen uyota rọhẹ ota rẹ Ọghẹnẹ rọ sa kẹ wẹ arho na. Iphiẹrophiyọ rẹ Ọghẹnẹ cha vwọ kẹ wẹ rho vrẹ koka koka rẹ iphiẹrophiyọ rẹ wọ sa mrẹ vwẹ akpọ nana.

Vẹ iphiẹrophiyọ tiọyena ro nẹ obọ rẹ Ọghẹnẹ rhe na, wo rhe jẹ oshọ mu we-e, kidie Ọghẹnẹ sa kẹ wẹ ẹgba ru wọ guọnọre wọ sa vwọ yanmu ẹkẹn ru wo bru kẹ oma ro shephiyọ vẹ ọhọre rọyen. (2 Kọrẹnt 4:7; Filipae 4:13) Ọ dia ọyena yen oka rẹ iphiẹrophiyọ ru wọ guọnọre? Ọtiọyena, wọ da guọnọ iphiẹrophiyọ, wọ da hiẹ guọnọ jovwo re, gbe jẹ ọnana muwẹro ne, iphiẹrophiyọ sikẹre re. Wo se vwo!

 [Ekpeti/Uhoho rọhẹ aruọbe 10]

Oboresorọ re Vwo Vwo Iphiẹrophiyọ

Ẹkpo ri Baibol nana sa chọn wẹ uko vwọ bọn iphiẹrophiyọ wẹn gan:

◼ Ọghẹnẹ ve ive rẹ akpeyeren rẹ omavwerhovwẹn vwẹ obaro na.

Baibol na tare nẹ akpọneje che hirhephiyọ iparadaisi, orua rẹ ihwo rẹ oma vwerhan ri yeren kuẹgbe yen cha dia evun rọyen.—Une Rẹ Ejiro 37:11, 29; Aizaya 25:8; Ẹvwọphia 21:3, 4.

◼ Ọghẹnẹ che se gun efia-an.

O vwo utuoma kpahen koka koka rẹ efian. Jihova ọyen afunre, ọtiọyena ọ che se gun efia-an.—Isẹ 6:16-19; Aizaya 6:2, 3; Taitọs 1:2; Hibru 6:18.

◼ Ẹgba rẹ Ọghẹnẹ basa-an.

Jihova ọvo yen ọromevwẹgba. O vwo emu vuọvo rọ sa dobọ rọyen ji ro vwo jẹ obo ro veri eruo-o.—Eyanno 15:11; Aizaya 40:25, 26.

◼ Ọghẹnẹ guọnọre nẹ wọ dia bẹdẹ.

—Jọn 3:16; 1 Timoti 2:3, 4.

◼ Ọghẹnẹ vwẹroso avwanre.

Ọghẹnẹ tẹnroviẹ ẹgbaẹdavwọn vẹ omamọ rẹ iruemu avwanre ukperẹ echobọ vẹ ovwiẹrẹ rẹ avwanre. (Une Rẹ Ejiro 103:12-14; 130:3; Hibru 6:10) Ọ vwẹroso avwanre nẹ e che ru obo ri yovwirin, oma je vwerhọn e de ru ọtiọyen.—Isẹ 27:11.

◼ Ọghẹnẹ veri nẹ ọyen cha chọn wẹ uko vwọ yan mu ẹkẹn ru wo bru koma ri shephiyọ ọhọre rọyen.

O rhe fo nẹ oshọ mu idibo rọyen kakaka-a. Ọghẹnẹ vwẹ okẹ rẹ ẹwẹn ọfuanfon na rọ vọnre vẹ ẹgba na vwọ chọn avwanre uko.—Filipae 4:13.

◼ Iphiẹrophiyọ re vwo kpahen Ọghẹnẹ muẹro dẹn.

Ọyen ohwo ra sa vwẹroso kare kare, o che se ku avwanre phiyotọ bẹdẹ-ẹ.—Une Rẹ Ejiro 25:3.

[Uhoho rọhẹ aruọbe 12]

Kirobo rẹ erhu sivwin uyovwin ye, ọtiọyen iphiẹrophyiọ je sẹro rẹ iroro na

[Uhoho rọhẹ aruọbe 12]

Kerẹ ọtan, iphiẹrophiyọ rọ ghwotọ sa yọnrọn avwanre gan

[A kpẹvwẹ ihwo nana]

Courtesy René Seindal/Su concessione del Museo Archeologico Regionale A. Salinas di Palermo