Munrowa Ophwanya Woowi Nlipelelo Neekeekhai?

ERELOOXIO anyu khenivara muteko, vanikhala ntoko wira yoohononeya. Vaavo munimwaavya anyu mutthu wira olokihe, nyuwo munnaaphanya atthu anceene anilokiha. Atthu akina anihimya wira annisuwela oratteene olokiha ni annivara saana muteko aya, akina annitepiha itthu anihimya aya. Mwaarowa woonela sai vaakhanle wira munnisuwela wira mutthu opanke erelooxio anyu murimwaattamana? Nave yookhala etthu ekina muhinsuwela anyu: Owo onniphavela wookhaliheryani ni khamunrowa oliva etthu. Khamunikupali wira vaamukhweya opaka yoothanla?

Vano mulikanyihe erelooxio eyo ni nlipelelo nanyu. Moonaka wira vannoovilani okhalana nlipelelo, ntoko atthu anceene a olumwenku ola wootakhala, etthu xeeni enrowa wookhaliheryani okhalana nlipelelo? Aakhala atthu anceene anihimya wira anniwerya omaliha mixankiho, masi itthu anihimya aya ti soohiloka ni sinnaahuurya maaru atthu. Nto khamunoona wira ti vooloka okhaliheriwa ni mutthu onipattunxe wira nikhalane nlipelelo? Biibiliya onihimya wira “owo ori vakhiviru wa khula mmosa a hiyo” ni onniphavela onikhaliherya.​—Miteko 17:27; 1 Pedru 5:7.

Ele Nintaphulela Aya Nlipelelo

MBiibiliyani nuulumo noowi nlipelelo nookhalana sootaphulela soovirikana ovikana ele anihimya aya mameediku, masientista ni mapisikooloku a olelo-va. Nttaava aalepaniwa awe Biibiliya, nuulumo noowi “nlipelelo” nintaphulela olipelela itthu sooloka. Nto nlipelelo ninhela muhina itthu piili: ophavela etthu yooloka ni okupali wira muhoolo sinimwiiraneya itthu sooloka. Nlipelelo Biibiliya onnivaha awe khahiyo oloha, masi itthu sekeekhai. Sookhala itthu sinceene sinnikupaliha eyo.

Nlipelelo nri ntoko waamini, weiwo onivarihana ni itthu sekeekhai ohiya sowoothiwa. (aHeeberi 11:1) Masi, Biibiliya onihimya wira nlipelelo ni waamini itthu soovirikana.​—1 aKorinto 13:13.

Wira nivahe ntakiheryo: Vaavo muninvekela anyu nikhaliheryo mpatthani anyu, woonasa wene nyuwo munnilipelela wira onimookhaliheryani. Sookhala itthu siniwiirihani okhalana nlipelelo, mwaha woowi munnimwaamini, munnimusuwela ni ootoko wookhaliheryani khalai. Waamini ni nlipelelo onnivarihana vanceene hata siri ene itthu soovirikana. Munrowa okhalana sai nlipelelo nooloka ni Muluku?

Itthu Sinniiriha Okhalana Nlipelelo

Muluku tori mwaneene nlipelelo neekeekhai. Khalai Yehova aahimmwa okhala nlipelelo na “atthu a Isarayeli”. (Yeremiya 14:⁠8) Khula etthu atthu awe yaalipelela aya yaakhuma wa Yehova, nto owo aari nlipelelo naya. Nlipelelo nlo khinaavarihana paahi ni olipelela itthu sooloka yaaphavela aya. Maana Muluku aanaavaha itthu sinceene saalipiha nlipelelo naya. Moota aathokorerya awe mwa iyaakha sinceene, awo yaanisuwela wira itthu aaleiherya awe aanipaka. Muhooleli a nloko nne iihaniwa Yoxuwa, aalenle so aIsarayeli ale: “Nyuwo musuwelexe . . . wira Apwiya Muluku anyu àmaliherya molumo othene yahimyalyaya”.​—Yoxuwa 23:14.

Iyaakha sinceene muhoolo mwaya, Muluku khaahiyale opaka itthu aaleihenrye awe. Biibiliya onnihimya itthu sinceene Muluku aaleihenrye awe ni moota aapanke awe. Itthu aaleihenrye awe saahilempwa sikhalaka ntoko wira saahiiraneya okathi ene yoole aalavunle awe.

Tivonto Biibiliya ori awe eliivuru ennivaha nlipelelo. Nto vaavo munrowa anyu osomaka moota Muluku aathokorerya awe apinaatamu, munimoona itthu sinrowa wookhaliheryani okhalana ni olipiha nlipelelo nanyu. Murummwa Paulo aalempe so: “Itthu silempwale khalai, silepeliwe wira siniixuttihe, nave hiyo nookhalana nlipelelo mwaha wa nuulumo na Muluku, nenlo ninnilipiha ni ninnikhaliherya ovilela”.​—aRoma 15:4.

Nlipelelo Xeeni Muluku Onnivaha Awe?

Okathi xeeni nimphavela ahu nlipelelo? Niireke khahiyo okathi nnoona ahu wira nnimookhwa? Mwa ntakiheryo, okathi owo vaavo nninweha ahu mutthu namphenta ahu okhwaaka, pooti wira khaninkhalana nlipelelo. Nyuwo khamunikupali wira naakhwa onniniiriha ohikhalana nlipelelo? Otheene ahu ninnilipelela okhwa. Hiyo khaniwerya otthyawa okhwa nnakhala osyaka. Tivonto Biibiliya onihimya awe wira “okhwa, ti nwanani ookiserya”.​—1 aKorinto 15:26.

Ninrowa okhalana sai nlipelelo okathi nnoona ahu wira nnimookhwa? Moone wira eversiikulu ela ya mBiibiliyani khenihimya paahi wira okhwa ti nwanani ookiserya, enihimya-tho wira okhwa “onrowa opwetexiwa”. Tthiri Yehova Muluku ookhalana ikuru ovikana okhwa. Yehova ohooniherya eyo mwa inamuna soovirikana. Moota xeeni? Maana ahaahihimuxa atthu yaakhwiiye. Biibiliya onnaahimya atthu 9 yaahihimuxiwe.

Okathi woohiliyaleya waari okathi yoole Yehova anvanhe awe ikuru Mwanawe, wira omuhihimuxe mpatthani awe iihaniwa Laazaro. Owo aahiviriha mahiku maxexe okhwiiye ene. Yesu khaamuhihimunxe Laazaro wiiphini, maana aamuhihimunxe owehiwaka ni atthu anceene.​—Yohani 11:38-48, 53; 12:9, 10.

Woonasa wene munniikoha so: ‘Xeeni atthu awo yaahihimuxiwe aya? Niireke atthu awo khiyuuluvanle anatthikela okhwa?’ Aayo, awo yaahuuluvala ni yaahitthikela okhwa. Masi sowiiraneya iyo sinninikhaliherya ohiya paahi ophavela wira ale nnaaphenta ahu akhwiiye ahihimuxiwe, masi sinninikupaliha wira onookhala ohihimuxiwa wa alipa-ookhwa. Olavula mookwasa naarowa ohimya wira, sinninivaha nlipelelo neekeekhai.

Yesu aahimmye so: “Miyo ki ohihimuwa ni okumi”. (Yohani 11:25) Yehova oomuthanla Yesu wira muhoolo aahihimuxe atthu anceene. Yesu aahimmye so: “Enoophiya ewoora atthu otheene ari mmahiye anrowa aya wiiwa nsu nawe [Kristu], akhume mmahiye”. (Yohani 5:28, 29) Tthiri atthu otheene ari mmahiye anoohihimuxiwa wira yakhaleke mparayiisu valaponi.

Profeta Yesaya aahilavula oratteene voohimya sa ohihimuxiwa vaavo aahimmye awe so: “Amus’inyu akhwiye anokhala-tho akumi: irutthu saya sinohihimuwa. Alipa-òkhwa avithiwe anovenya, anotthapa etteliwaka murima. Ntoko okame wowarya sinririhaya etthaya, siso Apwiya animwatthikiherya mulaponi atthu akhwiye”.​—Yesaya 26:19.

Khamunikupali wira moolumo ala anninimaaliha vanceene? Alipa-ookhwa ari nipuro noovareleleya ntoko mwaana ori mmirimani mwa maama awe. Tthiri atthu ale akhwiiye ari mmuupuweloni mwa Muluku Oowerya Sotheene. (Luka 20:37, 38) Moohipisa awo anoohihimuxiwa wira atthikele okhala akumi olumwenku woohakalaliha, ntoko siisaale atthu anihakalala aya okathi oniyariwa awe mwaana! Tthiri nlipelelo ninninikhaliherya hata nirowaka okhwa.

Nlipelelo Ninrowa Wookhaliheryani Sai

Paulo ooniixuttiha efaita nlipelelo nrina aya. Owo olavula ntoko ekaruma yuulupale ya ekhotto ahu ya omunepani, eyo piiyo, ekapaseeti. (1 aTesaloonika 5:⁠8) Paulo aaphavela ohimya exeeni? Okathi aalempwa awe Biibiliya, anakhotto yaaniwara ekapaseeti ya yuuma okathi yaarowa aya okhottoni, nto eyo yaanimukhaliherya nakhotto owo ohiiviwa. Nto ekapaseeti eyo yaanikhapelela muru wa nakhotto wira ohihommwe ni mattheere wala mavaka. Nto Paulo aaphavela ohimya exeeni? Paulo aaphavela ohimya wira ntoko siisaale ekapaseeti enikhapelela aya muru, nlipelelo ninnikhapelela muupuwelo ahu. Akhala wira munnikupali ni murima wotheene sooleiherya sa Muluku, munookhalana murettele wa mmuupuweloni ni khamunrowa otepa oxanka okathi wa mixankiho. Tani ohiniphavela ekapaseeti ntoko eyo?

Paulo aahilavula nlikanyiho nikina ophavelaka wooniherya moota nlipelelo ninvarihana aya ni ele Muluku oniphavela awe. Owo aalempe so: “Nlipelelo nla, nenno nri ntoko nankura a okumi ahu, ninnikhaliherya okhala oolipa, nihihoveryaka etthu”. (aHeeberi 6:19) Atthu yooponwe okathi ekalawa yaasamme aya, Paulo aahisuwela oratteene efaita nankura orina awe. Okathi wa munamukhaya, ale aneettiha ekalawa annimurihela mmaasini nankura. Akhala wira aamwaaka vathi va ephareya, ekalawa eyo yanwerya woopowa okathi wa munamukhaya, ohiya opuruleliwa mukerekhere mwa ephareya wala omana maluku.

Mwa enamuna emosaru, akhala wira nlipelelo nahu sooleiherya sa Muluku ti ‘noolipa’, nnoonikhaliherya ovilela okathi wa mixankiho sinlikana ni munamukhaya. Yehova ooleiherya wira moohipisa onoophiya okathi apinaatamu ahinrowa aya ohasuliwa ni ikhotto, ikrime, oriipiwa murima nnakhala okhwa. (Nwehe ekaaxa eri epaaxina 10) Ovarexexa nlipelelo nno pooti onikhaliherya okhala ottaiwene wa mixankiho. Nave eyo enoonikhaliherya wiiwelela malamulo a Muluku ni ohipaka itthu soohiloka sinipakiwa ni atthu anceene olelo-va.

Yehova onnoovahani nyuwo nlipelelo nno. Owo oniphavela wira musuwele itthu onrowa awe woovahani. Maana owo oniphavela “wira atthu a makhalelo otheene yoopowe”. Moota xeeni? Wanipacerya, khula mutthu ohaana ‘okhalana osuwela weekeekhai’. (1 Timootheyo 2:4) Ale akumihenrye erevista ela, aniphavela wira nyuwo musuwele ekeekhai eyo ya Nuulumo na Muluku. Orumeelaka osuwela iyo, Muluku onnoovahani nlipelelo muhaarowa anyu ophwanya olumwenku ola wootakhala.

Mwakhalana nlipelelo, nyuwo khamunrowa otepaka oxanka, maana munookupaliki wira Muluku onimoovahani ikuru wira mphwanye khula etthu muniphavela anyu enivarihana ni yootthuna awe. (2 aKorinto 4:7; aFilipi 4:13) Niireke khahiyo nlipelelo nenno nyuwo muniphavela anyu? Akhala wira ti nenno muniphavela anyu, muhikhulumuwe ophavelasa. Nyuwo munoophwanya. Tthiri nri mmatatani mwanyu!

 [Ekaaxa/Ilatarato epaaxina 10]

Itthu sinniiriha okhalana Nlipelelo

Soolepa sa mBiibiliyani sinittharelana sinimookhaliheryani olipiha nlipelelo nanyu:

▪ Muluku ooleiherya wira muhoolo ninrowa okhalaka moohakalala.

Biibiliya onihimya wira elapo yotheene enrowa okhala eparayiisu, nto anrowa okhalaka atthu oohakalala ni oowiiraana.​—Esalimo 37:11, 29; Yesaya 25:8; Wiisuupulula 21:3, 4.

▪ Muluku khonootha.

Muluku onninyokha inamuna sotheene sa wootha. Okhala wira Yehova toowaarya, owo khonikhala-khala oothaka.​—Miruku 6:16-19; Yesaya 6:2, 3; Tito 1:2; aHeeberi 6:18.

▪ Muluku toowerya sotheene.

Yehova paahi tori oowerya sotheene. Khiivo etthu eniwerya omukhoottiherya opaka ele oniphavela awe.​—Okhuma 15:11; Yesaya 40:25, 26.

▪ Muluku oniphavela wira mukhaleke mahiku otheene.

​—Yohani 3:16; 1 Timootheyo 2:3, 4.

▪ Muluku oniphavela wira nipakeke itthu sooloka.

Muluku onnithanla ohiwehexexa soovonya sahu, ohiya-vo owo oniwehexexa mikhalelo sahu sooloka ni wiimananiha wahu. (Esalimo 103:12-14; 130:3; aHeeberi 6:10) Owo oniphavela wira nipakeke itthu sooloka ni onnihakalala vaavo nimpaka ahu itthu sooloka.​—Miruku 27:11.

▪ Muluku onimookhaliheryani ophwanya itthu muniphavela anyu seiyo sinivarihana ni yootthuna awe.

Arumeyi a Muluku kharina mathowa manceene a ohikhalana nlipelelo. Muluku onnaavaha munepa awe woowaarya, yoowo ori ikuru sootepexa owerya wira onikhaliherye.​—aFilipi 4:13.

▪ Nlipelelo Muluku onnivaha awe khahiyo na ethiru.

Muluku toororomeleya, owo khonikhala-khala oninyanyalaka.​—Esalimo 25:3.

 [Ilatarato epaaxina 12]

Ntoko siisaale ekapaseeti enikhapelela aya muru, nlipelelo ninnikhapelela muupuwelo ahu

[Ilatarato epaaxina 12]

Ntoko nankura nlipelelo ninninikhaliherya