სო შეილებნა გორათ ნამდვილ იმენდ?

წერმიდგინით, ნამდა თქვან ხეშ საათიქ გეფუჭ დო გაჩერდჷ. მუჟამსით თიშ შეკეთება მინდომით, ქოძირით, ნამდა ბრელს შეულებ მოიგვარან თე პრობლემა. ირდიხას ორწყეთ სარეკლამო განცხადებეფს, ნამუთ დამაჯერებლურო რჩქუ, მარა ნამთინე განცხადება ვემურე ართიანს. მუჭო მიქციებუთ, მუჟამსით ქიგეგენთ, ნამდა თქვან სამეზობლოს ცხოვრენს მოხელე, ნამდგაქ წანეფიშ წოხოლე თქვა გიღნან თიცალ საათიშ მოდელ გიმიგონ? თეს გეძინელ, გებულენთ, ნამდა თინა მზათ რე, უფარეთ გაიკეთან საათ. მუშო ოკო რაგად, ძნელ მიოხვამლაფარ ვა რე, მის ოკეთებაფუანდით საათის.

მორთ თე საათ იმენდის ქეშვადარათ. მის შეილებნა თხუათ მოხვარა, მუჟამსით ქოძირუნთ, ნამდა ბოლო დროს მახორუ ხალხიშ უმენტაშცალო თქვა ხოლო ოდინუანთ იმენდის? ბრელ იჩიებ, ნამდა შეულებნა პრობლემეფიშ მოგვარება, მარა თი აუარებელ რჩევეფ, ნამდგას თინეფ ირზენა, შილებე გაუგებარ რდას დო ართიანს ოწინააღმდეგუდას. ათეშენ, გონივრულ ვეჸუაფუდუო, პირველ რიგის თის ფთხითკო მოხვარა, მიდგაქ გაჭყჷ კაცობრიობა დო ადამიანეფს იმენდ მეჩჷ? ბიბლია იჩიებ, ნამდა თინა „შორს ვა რე ჩქინდე თითოულშე“ დო თინა ირიათო მზათ რე, მიმეხვარან (საქმეები 17:27; 1 პეტრე 5:7).

მუს ნიშნენს იმენდ?

იმენდიშ მნიშვნელობაშ გურშენ ბიბლია უმოს მეტ ინფორმაციას მარზენა, ვინემ ექიმეფ, მეცნიერეფ დო ფსიქოლოგეფ. სიტყვეფ, ნამუთ ბიბლიას ითარგმნუ, მუჭოთ „იმენდ“ ნიშნენს, ართ შურ გოლუნ თეშ მუდგარენიშ ჯინას დო ჯგირიშ მოლოდინს. იმენდ, ძირითადო ჟირ მხარე მიშურს. თიშა მიშურს, მუდგარენ ჯგირიშ სურვილ დო თიშ საფუძველ, ნამდა ბჯერდან, თინა აუცილებერო შისრულებ. ბიბლიურ იმენდ უბრალოთ ოცნება ვა რე, თინა გერსხილ რე სანდო ფაქტეფშა დო მტკიცებეფშა.

იმენდ გუ რწმენას, ნამუთ გერსხილ ოკო რდას მტკიცებეფშა დო ვართ ხოლო უსაფუძვლო ნდობაშა (ებრაელები 11:1). მარა ბიბლია რწმენას დო იმენდის ართიანშე განასხვავენს (1 კორინთელები 13:13).

წერმიდგინით თეცალ მუდგარენ: მაგალთო, მუჟამსით თქვან ხოლოშიან მეგობარს მუდგარენს თხინთ, ალბათ იმენდ გიღნა, ნამდა თინა ქიმგეხვარებნა. თქვან იმენდ უსაფუძვლო ვა რე, მუშენდა რჯერა თქვან მეგობარიშ, ჯგირო იჩინენთ თის დო რშუნა, მუჭო მიგეხვარეს შხვა დროს. თქვან რწმენა დო იმენდ ართიანწკუმა კავშირს რე, მარა, თეწკუმა ართო, თინეფ ართიანშე გენესხვავებ. მუჭო შილებე, ღორონთიშ ხოლო თაშ რჯერდან დო თიშ იმენდ გიღუდან?

იმენდიშ საფუძველ

იმენდის ღორონთ მარზენა. ბიბლიურ დროს იეჰოვას მიშინუანდეს, მუჭოთ „ისრაელიშ იმენდ“ (იერემია 14:8). ნებისმიერ რეალურ იმენდ, ნამუთ თიშ ხალხის უღუდ, იეჰოვაშე აფდეს მეღებულ. ათეშენ, ღორონთ რდუ თინეფიშ იმენდ დო თეცალ იმენდ უბრალოთ ოცნება ვა ჸოფე. ღორონთიქ თინეფს მტკიცე იმენდიშ საფუძველ მეჩჷ. საუკუნეეფიშ დინახალე იეჰოვაქ მუშ ხალხის ქაძირუ, ნამდა ირიათო ასრულენდჷ დოდვალირ სიტყვას. ისრაელიშ წინამძღოლქ, იესო ნავეშ სქუაქ ხალხის უწუ: „ჯგირო გიჩქუნა ... ნამთინ დუნაპირებუეფ ვა გამტყუნებე, ნამუთ იეჰოვაქ, თქვან ღორონთიქ, თქვან საჯგირობუოთ მერჩეს“ (იესო ნავეს ძე 23:14).

ამდღა, ანთასობით წანაშ მიკულაშ უკულ ხოლო ვათირე თე ფაქტ. ბიბლიას ბრელშა შეფხვადუთ ღორონთიშ სარკო დუნაპირებუეფს. თეს გეძინელ, ბიბლიას მოჩამილ რე მუნერ ზუსტას შისრულ თიქ. ღორონთიშ წინასწარმეტყველურ აღთქმეფ თიცალ სანდო რე, ნამდა მინშა თინა თეშ რე გინოჩამილ, ითამ თეიშახ რდუკო შესრულებურ სოიშახ ნაწინასწარმეტყველებ იჸუაფუდ.

ათეშენ, შემლებნა ბიბლია სიცოცხლეშ წიგნო მიფშინუათ. ღორონთიშ მენდებაშ საფუძველ უმოსო გაღვენუნა, მუჟამსით უმოსის ქიგეგენთ, მუნერ ურთიერთობა უღჷ ღორონთის ადამიანეფწკუმა. მოციქულ პავლექ ჭარჷ: „ირფელქ, მუდგაქ ადრე იჭარ, ჩქინ ოგურაფალო იჭარ, მუშენდა მოთვინებათ დო წმინდა წერილეფშე მეღებულ გურიშ ექექაფათ მიღდან იმენდ“ (რომაელები 15:4).

მუ იმენდის მარზენა ღორონთ?

არძაშ უმოსო მუჟამ ბგინაფლენთ, ნამდა მოსაჭირნა იმენდ? თი დროს ვარიო, მუჟამსით ღურას ინვოჯინეთ თოლს? ბრელს, მიდგას საჸოროფო პიროვნებაქ უღურ, თეცალ დროს შურო ვა უღჷ მუთუნიშ იმენდ. მუ ოკო რდას ღურაშ უფრაშ? თინა მითინს ვენდენს. ჩქი მუდგარენ დროთ შემლებნა დუდ ევუჩილითუათ თის, მარა თიშა ვამმარიებენა. ბიბლია თის უძახ „უკანასკნელ ნტერს“ (1 კორინთელები 15:26).

მუჭო შემლებნა ბგორათ იმენდ, მუჟამსით ღურას ინვოჯინეთ თოლს? ბიბლიურ მუხლ, სოდეთ ღურა მოშინაფილ რე, მუჭოთ „უკანასკნელ ნტერ“ ჭარჷ, ნამდა თინა მისპუ. იეჰოვა ღორონთ ღურაშე უმოს ძალიერ რე. ღორონთიქ თენა ბრელ შემთხვევას დამტკიც ღურელეფიშ გათელებათ. ბიბლიას მოჩამილ რე ჩხორო შემთხვევა, მუჟამსით ღორონთიქ მუშ ძალა გიმირინუ ღურელეფიშ გათელებერო.

იეჰოვაქ მუშ სქუას, იესოს ხოლო მეჩჷ თიშ ძალა, ნამდა გუთელებუდკო მუშ მეგობარ ლაზარე, ნამუთ ოთხ დღაშ ნაღურა რდუ. იესოქ თენა ტყობაშე ვარინ, არგამათ, არძაშ ოძირაფალო აკეთ (იოანე 11:38—48, 53; 12:9, 10).

შილებე გიკვედან: „მუშენ გათელეს თე ხალხ? ბოლოს იშენით ხომ დირჩინეს დო დოღურეს?“. ქო, თექ თაშ ქუმოხვად. მარა გათელებაშ გურშენ თეცალ სანდო ინფორმაციეფ მარწმუნენა, ნამდა შემლებნა საჸოროფო კათაშ კინ ძირაფაშ ხვალე სურვილ ვარინ თიშ საფუძვლიან რწმენა ხოლო მიღდან, ნამდა თენა მომავალს მოხვადუ. შხვა სიტყვეფით ქოფთქუათინ, რეალურ იმენდ მიღნა.

იესოქ თქუ: „მა ვორექ გათელება დო სიცოცხლე“ (იოანე 11:25). იეჰოვა ზუსტას იესოს მეჩანს ღურელეფიშ გათელებაშ ძალას დო თინა თე საქმეს მთელ მსოფლიო მასშტაბით შეასრულენს. იესოქ თქუ: „მოურს საათ, მუჟამსით არძა, მით სასაფლეფს რენა, თიშ ხონარს ქიგეგონენა დო გიმილენა“ (იოანე 5:28, 29). ნამდვილო, არძაშო, მით სამარეს რე, არსებენს გათელებაშ იმენდ სამოთხეთ გინორთელ დედამიწას.

წინასწარმეტყველ ესაიაქ გათელებაშ მოვლენა თეცალო ეჭარ: „გეცოცხლებნა სქან ღურელეფ. გემწოდირთუ ჩქიმ ხალხ, ნამუთ ღურელ რდუ. გოკურცხით დო ხიოლით ქიმიოძახით, ტვერს დამკვიდრებულეფქ! თქვან ცუნდ ოჭმარეშ ცუნდცალ რე, დიხა გაცოცხალენს ღურელეფს“ (ესაია 26:19).

თე სიტყვეფ მართალო გურშა ელამკინანა. მუჭოთ ბაღანა რე თხილერ დიდაშ საშვილოსნოს თეშ, ღურელეფ ხოლო არძაშ უმოს თხილერ ადგილს რენა. თინეფ თხილერ რენა უზენაეს ღორონთიშ მეხსიერებას (ლუკა 20:37, 38). მალას ღორონთ თინეფს გაცოცხლენს დო იცხოვრენა ბედნერ მსოფლიოს, სოდეთ თინეფს თეშ ელნა, მუჭოთ ბაღანაშ დაბადებას ელჷ მთელ ოჯახ. თაშ ნამდა, ღურაშ საშიშროებაშ დროს ხოლო არსებენს იმენდ!

მუჭო შილებე იმენდიქ იმოქმედას თქვანწკუმა?

მოციქულ პავლე ბრელს მოგურუანა იმენდიშ ძალაშე. თინა იჩიებ იმენდშე, მუჭოთ მეომარიშ სულიერ აღჭურვილობაშ მნიშვნელოვან ნაწილშე — მუზარადშე (1 თესალონიკელები 5:8). მუს გულისხმენდჷ მოციქულ პავლე? ბიბლიურ დროს ჯარიშკოჩის ჩხუპიშ დროს ნაბადიშ ვარდა ტყებიშ ქუდიშ ჟიშე ლითონიშ მუზარად გიორთუდ. თე მუზარადიშ ჭყოლოფათ დუდის მოხვალამირ დარტყმეფ, ნამდგას ჯარიშკოჩიშ ჸვილუა შეულებუდ, ზგირტუდ. მუშ ძირაფა ოკოდ თეთ პავლეს? მუჭოთ მუზარად თხილანს დუდის, თეშ იმენდ თხილანს გონებას დო აზროვნებას. ღორონთიშ დუნაპირებუეფიშ შესრულებაშ მტკიცე იმენდ ქოიღუნან-და, რთულ სიტუაციეფიშ დროს შიშის ვენოლუთ დო გურ ვა გოიტირხუნა. მის ვასაჭირ თეცალ მუზარად?!

ღორონთიშ ნებაწკუმა დაკავშირებულ იმენდიშ გურშენ მოციქულ პავლექ შხვა ჯგირ მაგალით ხოლო მიჸონ. თიქ ჭარჷ: „თე სანდო დო მტკიცე იმენდ ღუზაცალო რე ჩქინო“ (ებრაელები 6:19). გემიშ აკოცუმაშ დროს ბრელშა გინოსქილადირ პავლეს ჯგირო არჩქილედ, მუშმადიდა მნიშვნელობა უღჷ ღუზას. ქარბორიაშ დროს მეზღვაურეფ ღუზას ინმაჸათანა წყარს. ზღვაშ ქვინჯის მოხვალამირ ღუზაშ საშვალებათ, ნამუთ მუდგარენს ქუმაბუნუ დო გიზინდუ, შილებე გემქ უმოს უსაფრთხოთ გეგნიღას გლახა ამინდ დო გინუსქიდას ქარბორიას, ნამდგას შილებე წყარპიჯშახ ქიმუჸნაფუდკო დო კირდეს ქიმკატახკო გემი.

თეშნერო, ღორონთიშ აღთქმეფ ჩქინო ხოლო „სანდო დო მტკიცე იმენდ“ ქორენ-და, თის შეულებ ცხოვრებას ქარბორიაცალ რთულ პრობლემეფ გეგნმოღალაფუან. იეჰოვა მოპირნა, ნამდა მალას დოდირთუ დრო, მუჟამსით ვეჸუაფ ჩხუპეფ, დამნაშავეობა, წუხება დო ღურა ხოლო (ქოძირით ჩარჩო მა-10 გვერდის). თე იმენდ უბედრობაშ დროს დოფთხილანა დო ქომჩანა ძალას, ნამუთ მოსაჭირნა, იფცხოვრათ ღორონთიშ ნორმეფიშ შესაბამისო დო ვევაჸუნათ ამდღანერ ქვეყნიერებას გავრცელებურ გლახა საქმეეფს.

იმენდ, ნამდგას იეჰოვა მარზენა, პირადო თქვა ხოლო გოხუნა. ღორონთის ოკო, ნამდა გეხარათ თიცალ სიცოცხლეთ, მუნერით თქვანო აფჷ განზრახულ. თიშ სურვილ რე, „არძანერ კოჩიქ გეგნოსქიდას“. მუჭო რე თენა შეიოლებერ? პირველ რიგის თითოულქ ოკო მიღას „ჭეშმარიტებაშ ზუსტ რჩქინა“ (1 ტიმოთე 2:4). იეჰოვაშ მოწმეეფს ოკონა, წუგახალისან, ნამდა მიღათ თე სიცოცხლეშ მუმაჩამალ ჭეშმარიტება ღორონთიშ სიტყვაშე. იმენდ, ნამდგას ღორონთშე თეშნერო მიღენთ, ბრელით უმოს რე შხვა ნებისმიერ იმენდშე, ნამუთ შილებე თე ქვეყნიერებაქ შემორთავაზან.

თეცალ იმენდით თქვა დღას ვეგინანთ დუდის დაუცველო, მუშენდა ღორონთის შეულებ მერჩან ძალა, ნამუთ თიშ ნებაწკუმა შეთანხმებულ ნებისმიერ მიზანიშ მეჭირნაფას მიგეხვარებნა (2 კორინთელები 4:7; ფილიპელები 4:13). თაშ ნამდა, თეცალ იმენდ ქუგოსაჭირნან-და, შეილებნა მიღათ, მუშენდა თინა რეალურ რე!

 [Box/Picture on page 10]

იმენდიშ საფუძველ

თე ბიბლიურ აზრეფ მიგეხვარებნა, უმოსო გამანგარათ თქვან იმენდ:

▪ ღორონთ მოპირნა ბედნერ მომავალს.

ღორონთიშ სიტყვა იჩიებ, ნამდა დედამიწა სამოთხეთ გეგნირთუ, სოდეთ ადამიანეფ ბედნერო დო ართ გაერთიანებულ ოჯახცალო იცხოვრენა (ფსალმუნი 37:11, 29; ესაია 25:8; გამოცხადება 21:3, 4).

▪ God cannot lie.

ღორონთის არძანერ ტყურა ჯოგჷ. იეჰოვა წმინდა რე დო შეიოლებერ ვა რე, თიქ ტყურა თქუას (იგავები 6:16—19; ესაია 6:2, 3; ტიტე 1:2; ებრაელები 6:18).

▪ ღორონთის უსაზღვრო ძალა უღჷ.

ხვალე იეჰოვა რე ირფელიშშემალებე. სამყაროს მუთუნს ვეშიალებე ქეცილას თის, შეასრულას მუშ ნება (გამოსვლა 15:11; ესაია 40:25, 26).

▪ ღორონთის ოკო, მიღდან ულიებ სიცოცხლე.

(იოანე 3:16; 1 ტიმოთე 2:3, 4).

▪ ღორონთ იმენდიშ თოლით მიჯინენა.

თინა ოკვირ ჩქინ ჯგირ თვისებეფს დო მონდომას დო ვართ ხოლო ჩქინ გლახა თვისებეფს დო შეცდომეფს (ფსალმუნი 103:12—14; 130:3; ებრაელები 6:10). თის იმენდ უღჷ, ნამდა გუვაკეთენთ თის, მუთ სწორ რე დო ოხიოლ, მუჟამსით თაშ იფქციებუთ (იგავები 27:11).

▪ ღორონთ მოპირნა, ნამდა ქიმმეხვარებნა თი მიზნეფიშ მეჭირნაფას, ნამუთ მუშ ნებაწკუმა რე შეთანხმებულ.

ღორონთიშ მსახურეფ დღას ვა გინაფლენა დუდის მეტებულო. თინა ხვეიანო მარზენა წმინდა შურს, ნამდა მიმეხვარან (ფილიპელები 4:13).

▪ ღორონთიშ იმენდ დღას ვეგემტყუნებ.

ღორონთ რე სანდო დო თინა დღას ვა გაიმტყუნენა იმენდის (ფსალმუნი 25:3).

 [Picture on page 12]

მუჭოთ მუზარად თხილანს დუდის, თეშ იმენდ თხილანს ჩქინ გონებას.

[Picture on page 12]

ღუზაცალო, მტკიცე იმენდის შეულებ სიმტკიცე მუჩან.

[Credit Line]

Courtesy René Seindal/Su concessione del Museo Archeologico Regionale A. Salinas di Palermo