Wari gu Rengbe Mo ka Gbia Ndikidi Maabangirise Ni?

GA MO sa ima gberã na si nangera wa si ima kuo. Ho mo aberã pa mbakadaha ni, ba dungu aboro payo aye ku riro yo nga aguyo rengbe ka mbakadaha. Abataki pande pa mbakada asaa, i dunduko naya i nakido nga i ima rengba ka mbakadaha, ono bete ga aguyo aberãpai natagbaga tihe atagbaga. Ono ginipai rengbe ka manga ka mo ye ka ino gupai nga gamo murakporo du nambakadi gu saa re ti agu aregbo si akuru tini? Na kuri gure, ni na nyemu ka undo ro ka mbakadaha foro gbua zanga mo tumo marã atumo funi tipaha. Gu siapai mo nika mangaha ima du gbaiga, nga wo te?

Awere mo ringbisinga gu saa re na gu rengba na pai du mo na ni tipa maabangirise. Ka si dunga mo bi gupai nga ga maabangirise nazera azera—a wa duhe tipa dungu aboro rogo gi kpakarakpakara aregbo re—wari gu rengbe mo ka gbata undo ni? Badungu aboro naya i ima rengba ka mbakada akpakarapai, ono gu badungu aberãpai i afuhe ima rengba ka du ni vunduvunduhe na kini tagbagatihe atagbaga. Si angba gbe ka mo ndu fuo gu Boro nambakadi aboro na gu rengba na pai nga i du na maabangirise. Baibiri nagumba gupai nga “ko aturã nga na ani wa sa te” na ko na bakere nyemu ka undo.—Amokedi 17:27; 1 Petero 5:7.

Gu Dudunguro Sakarogopai yo du Tipa Maabangirise

Gu bipai nga ga Baibiri tipa maabangirise ima kio na si ima nyaka ki susi gu bipai du amunganga na ni areme, aboro biri-inohe gbiati abawirikipai tipa berã aboro. Gu bambata afugo i amangisunge na ni rogo Baibiri nga gu i asaha nga “maabangirise” rogo yo nga ka pido pai kakaka na kaa ngera tipa wenepai. Ono maabangirise gbe, naru riiapai ue. Si nakoda pa du na nyemupai tipa wenepai na ki du na ndupai tipa ka ida kuti gupai nga wenepai nika manga amanga. Anga gu maabangirise du paha rogo Baibiri yo nga kungbo berãpai boro aberãha nga si nika manga te. Si na ru rii nyanyaki mburu goapai.

Rogo gi gene re, maabangirise wakina idapase, nga gu si aida mburuhe du rii gopai—angianga ida kuti kungbo pai ya. (AEbere 11:1) Wa vura duhe wo, Baibiri napepa gu kparakpara pai ape du dagba idapase gbiati maabangirise.—1 AKorindo 13:13.

Ani yugungo ho na kpiapai: Ho mo asana gu bakureamo ni mo naima kido kuti ni gbe tipa undo, mo ima rengba kadu na maabangirise nga ni nika undo ro aundo. Anga ga maabangirise gbua zanga gopai te, bambiko mo ima du na kido kuti bakureamo—mo ima ino ni wenengai, na mo aima digo ni bi ni ni niyugu gu sino nga ga mangapase gbiati gu sino nga ga gamahe mbata kusayo. Gu idapase du mo na ni gbiati ga maabangirise nandu kina sa, ono wa vura duhe nga si na ngbanya dagbaha, si dunduko ni bakiakia. Waigu rengbe mo ka du na gu ngbatunga maabangirise re kuti Mbori?

Gu Ndupai du Maabangirise Mbiko Ho

Mbori nga mburu ndikidi maabangirise. Ti agu aregbo i aakeka Baibiri ti ni, i ayamba Yekova nga “ga aYisaraere maabangirise.” (Yeremaya 14:8) Ai gu ndikidi maabangirise gako aboro adu na ni aye kina beko; ngba gi gene re, ko du nangia gayo maabangirise. Ngbatunga gu ndikidi maabangirise re angianga kungbo berãpai boro aberãha nga si nika manga te. Mbori aima fu ndikidi mburu pai tipa maabangirise fuyo. Ni mangako pai na yo susi dungu kama agarã, ko anaadigiso gako akidohe fuyo na kini moi bangiriko ka digiso agu ko akidopaha kumbatayo. Gayo bangbembatayo nangia Yosua agumba gupai fu aYisaraere nga: “Oni dunduko ini he . . . ya a nga wenepai nakpa sa dagba agu apai dunduko Yekova gaoni Mbori akido pa ha fu roni te.”—Yosua 23:14.

Fuo susa agarã kutu kusa, ko anaadigiso gako akidohe kindi fuyo kina wai ko akidoho. Baibiri na badungu wenewene akidohe nga gu Mbori akidoho na si a na gu ndikidi apangbanga rogoho nadigisi tihe. Gu sangbaanebi nga gu nabi pa gako akidohe si ima du ni ndikidihe na ti kura aregbo i anaakehe si kidu wa gupai naima manga ti agu aregbo i amangi agu akidohe re ti ni.

Si nga gu ndupai ani narengbe ka fura ti ni tipa Baibiri ni gu buku nga ga maabangirise. Wa mo nikaa wisigo ga Mbori mangapai na aboro, dungu nduapai nika du bero tipa ka sonosa gamo maabangirise kutiko nyanyaki. Gu mokedi nangia Pauro akepai nga: “Agu apai i ake mbata rogo Ziazia Kekeapai i ake he tipa gaani wirikapai, ani moi bangirani mbiko gu zera nga ga kekeapai na wasa.”—ARomo 15:4.

Gini Maabangirise Mbori Nafuhe Furani?

Gini aregbo ani naabi gupai nga ani naida na bakere maabangirise? Ya mo anga si gbe nga gu regbo ani agbia tirani na agu apai nga ga kpio te? Ono tipa badungu aboro, kina boro ti gu regbo re du ho gayo aboro akpi ni nga aguyo i akpinyemu yo gbe, ni kpiapai—si nadu fuyo ni kpakarapai i du na maabangirise. Nirengo, he ho rengbe ka fu zanga maabangirise berewe ki kisusi kpio te. Kpio nga guhe nado fuo rani ado kindi wa du ani dunduko. Ani ima rengba ka nehe tipa gbanga regbo, na ome tirani tipa ka diaha kusayo te. Si rẽarẽ tie nga, Baibiri nayamba kpio nga “yangara vura” aboro.—1 AKorindo 15:26.

Waigu tie rengbe ani ka gbia maabangirise ho ani agbiatirani ni na kpio? Sidu, gu veresi nga ga Baibiri nga gu nayamba kpio nga yangara vura aboro, si nape gupai a nga i “nikagbarasa ha.” Yekova Mbori du na ome tiko kisusi kpio. Ko aima yugo gipai re rogo dungu apai yo. Rogo gini gene? Ni zingisako kpikpi aboro. Baibiri nagumbapa azingabekpio ribua nibasasa nga gu nayugopa gu regbo Mbori amangisunge na gako ome tipa ka zingisa agu aboro naima kpiko i du ni ungayo berewe.

Rogo iiriwo gene, Yekova afu ome fu Wiriko nga Yesu tipa ko zingisi bakureako nangia Razaro, nga gu ko nakpi si ki ima dia arame biama. Yesu aamanganga gipai re ni gbuko te ono ko amangihe gbaiga, ku bangiri gu ndurumo aboro naadu ho naabi gipai re.—Yoane 11:38-48, 53; 12:9, 10.

Mo rengbe kaa baka bangiro nga, ‘Tipagine i azingisi aboro ti ni? Ya mo i agbinzanga na ni yangaraha ki kpiki berewe te?’ I aima kpiko. Wa si avura duwo, mbiko gu ndikidi apangbanga nga ga zinga be kpio wa ngbatunga gere, ani ima rengba ka du na ndikidi maabangirise nga gaani aboro nakpiki araka araka berewe angianga kungbo nyemupai gbua ya; ani ima du na ndikidi goapai nga i nika zingisayo azingisa berewe. Ka pepai ngba kura gene, ani na ndikidi maabangirise.

Yesu aya: “Mi nga zingabekpio, nga unga.” (Yoane 11:25) Ko du nga gu Boro Yekova nika fu ome fuko tipa ko zingisi aboro rogo zegino dũ. Yesu aya: “Ragoho nada, ho agu yo ka gia fugoko [Kristo] ni dunduko du rogo amurã yo, ki kuru.” (Yoane 5:28, 29) Nirengo, agu aboro dunduko nara rogo amura yo i nika zingisayo azingisa tipa i raki berewe rogo paradizo auru kpotosende ane.

Gu nebi nangia Yesaya aima gumba gu bawenepai du tipa zinga be kpio ki ya: “Kangba aboro adu ni ungayo, kangba yo azinga. Ako oni nga araki nvutu yo, oni zingi ki nibi bia ni ngbarago! Mbiko ga ndomo adu wa ndomo imarago, mo aída ha si ti ku ri ringara kangba aboro.”—Yesaya 26:19.

Ya mo gipai re afunga wasa te? Kpikpi aboro rogo gu wene ba ani arengbanga ka berãpa wai duhe ya, wa kina wai du fogo gude nibanda banda ru rukumbu nai yo. Nirengo, agu aboro naongoda rogo amurö payo ni bandabandaha rogo gu tingidapa apai adunga digidoho ti ni ya nga ga gu Mbori Du na Tanduapai Dũ. (Ruka 20:37, 38) Barambeda i nika zingisayo i raki berewe, i nika du na ngbarago mbiko i nika dia yo kugume kina wai agu aborokporo du na nyemuse naapido ka dia gu vovo gude i navungu ru kugume! Sidu, zavura ho boro akpi ni maabangirise kinaho.

Gupai Maabangirise Narengbe ka Mangaha Foro

Pauro nayugo dungu apai furani tipa wai nyaki pa maabangirise. Ko afura tipa maabangirise wa nyanyaki papara aũvura nga ga toro—nga kpakpari. (1 ATesaroniko 5:8) Tipagine ko aringbisi maabangirise ti ni kuti kpakpari? Sidu, ti agu aregbo i aakeka Baibiri ti ni banzengere anaavo kpakpari mara tipa vura, dedede si anidu rogo kpoto na mara. Mbiko gu kpakpari i anaavoho re, ai guhe na ni rengbe ka ye sa riyo ani zi kina gu kpakpari re kuba gupai nga si zi riyo ka gbarasaha. Ginipai Pauro aida ka pehe? Kina wai kpakpari abanda rise, kina wo a maabangirise abanda berã boro gbiati gani tandu berãpai. Ka gamo maabangirise du ni nyanyakihe ringbisihe kuti ga Mbori ringbisapai, pai ho si aida si gundesi ro watadu ka gbarasa pa ga mo zereda nga ga berãse yo ho mo agbia tiro ni na akpakarapai te. Ani dunduko naida na ngbatunga gu kpakpari re.

Pauro amangi sunge na kura kpiapai ziazia tipa ka ringbisa maabangirise kuti gupai Mbori akpinyemuhe. Ko akepai nga: “Gi du be rani re wa ũzada mbisimo, nga maabangirise du ni nyanyaki he nganganga.” (AEbere 6:19) Wa duhe nga kurungba aima gberã ni dunguhe na Pauro ko ki bati, ko aima ino wai nyakipa ũzada he. Ho bavugumo anaamanga ni, abakama kurungba ana gbiso gayo ũzada kurungba kusende. Ka si zi tihe ti agu ahe du tii ime yo nyanyaki, si nika sa gupai nga kurungba du adu na rengba kaa ndu bavugumo ki vura du vurũ kuba gupai nga si ya ku pangba ime yo ki fõ tihe ti mbia.

Wakina gure a, ka si du nga gaani maabangirise tipa ga Mbori akidohe ni “nyanyaki he nganganga” gu maabangirise re ima rengba ka undo rani ti agu aregbo du ani rogo agu akpakarapai du wa kina bavugumo. Yekova nakidohe nga regbo nika ye aye barambeda ho aboro nikaa rungo ngo ni berewe be avura, gbegberẽ mangapai, arungo, watadu kpio ya. (Mo bi gu sanduki du ti kpewaraga 10.) Pa ka ani kuti gu maabangirise re ima rengba ka undo rani ani ne akpakarapai, kini ngarasi rani ani niraki ringbisihe kuti ga Mbori arugute kuba gupai nga ani namanga bau, ki du na gu gbegberẽ mangapai nga gu naima maapai areme rogo zegino.

Gu maabangirise Yekova afuhe nabi ro abi a. Ko naida mo raki gu raka ko aida si du tipa ro. Gako nyemupai nga “aboro bati dunduko.” Ngba gini gene? Bambatapai nga, ai boro si aida ni “ye sa gu inahe nga ga rengo.” (1 Timoteo 2:4) Abakusi gi waraga re nazungodi ro nga mo dinga gu inohe nafu unga adia re ku gume nga gu nabi pa agu arengo du rogo Fugo Mbori yo. Gu maabangirise nga gu Mbori nika fuhe foro paha ima kio kisusi ai gu maabangirise nga gu gi zegino re narengbe ka fuhe foro.

Na gi ngbatunga maabangirise re, si aidanga mo naabi tiro nga gene bero te te, Mbori ima rengba ka fu gu ome foro si aidaha tipa mo da ti ai agu asásá rengbe ka du bero nga gu du na ngbanya dagbaha na gupai ko akpinyemuhe. (2 AKorindo 4:7; AFiripoio 4:13) Gere du nga gu ngbatunga maabangirise mo aida na ni. Ka mo aida ka du na maabangirise, ka si du nga mo aima digo ni gbataha, mo du na wingbaduse. Maabangirise kinaho. Mo ima rengba ka gbia gu maabangirise re!

Gu Ndu Apai si Aida Ani du na Maabangirise Ti Ni

Agi aberãpai nga ga Ziazia Kekeapai re ima rengba ka undo ro mo sonosi ga maabangirise:

▪ Mbori kidopa wene raka kumbatayo.

Fugoko naya we kpotosende naabaha nika du ni paradizo na agu aborokporo nikaa raka rogoyo nika du ni kodikodi yo na ki du na ngbarago.—Atambuahe 37:11, 29; Yesaya 25:8; Yugoti 21:3, 4.

▪ Ka Mbori penga ziree te.

Ko ima soga ngbatunga aziree naabaha. Yekova ni ziazia ko watadu ni gigiri ko, si du ka ko penga ziree te.—Asanza 6:16-19; Yesaya 6:2, 3; Tito 1:2; AEbere 6:18.

▪ Mbori na gu ome tiko kaa digongo ya.

Kina Yekova sa du na tanduapai dũ. He ho rogo haurago ka ka nako ti digiso ko gako akidohe te.—Gate 15:11; Yesaya 40:25, 26.

▪ Mbori naida mo raki nyeanye kindi.

—Yoane 3:16; 1 Timoteo 2:3, 4.

▪ Mbori nabi rani na kido.

Ko sia ka zanga gbe berã ko kuti gaani aingahe, ono ko nagbe berã ko kuti gu wene asino du tirani na agu aome ani amangaha. (Atambuahe 103:12-14; 130:3; AEbere 6:10) Ko na maabangirise nga ani nika manga gupai amanga du ni ruruhe na ko nadu na ngbarago ho ani amangaha ni.—Asanza 27:11.

▪ Mbori nakidohe ka undo ro tipa mo da ti gamo asásá nga ga toro.

Si aidanga gako amoyambu du na zanga maabangirise te. Mbori nafu gako ziazia toro kpaima, nga gu nyanyaki ome duho tipa si undo rani.—AFiripoio 4:13.

▪ Kido kuti Yekova arengbanga ka ye na gberã rago te.

Ka mo kido kutiko na kpotoro yo dunduko, ko abanga gberã rago tiro te.—Atambuahe 25:3.

Kina wai kpakpari abanda rise, kina wo a maabangirise abanda berã boro

Wakina ũzadahe, gu maabangirise du mburuhe ni nyanyakihe ima rengba ka nyakasa boro