E Gosonan i e Difikultatnan di Adolesensia

ADOLESENSIA por ta un periodo maravioso di bida. De echo, pa hopi hóben e ta esei. I hopi adulto tin dushi rekuerdo di nan hubentut.

Pero na mesun tempu nos tin ku atmití ku nos ta bibando den “tempunan trabahoso,” difísil pa trata kuné. (2 Timoteo 3:1) Esaki ta pone èkstra preshon riba hóbennan; anto un preshon distinto for di loke generashonnan anterior a eksperensiá. Podisé ta p’esei Sabrina Solin Weill, hefe di redakshon di un revista pa hóbennan, a bisa ku loke adolesentenan ta eksperensiá ta masha difísil mes. Ta komo si fuera bo ta kana riba un kabuya di span na haltu, sin nada bou di dje pa fangu bo si bo kai. En bèrdat, adolesensia—ku ta un periodo turbulento di bida—por ta yen di sintimentunan di ansiedat i konfushon. Tambe lo bo por sinti bo pete òf ku bo tin dos man lenks. Sra. Weill a skirbi: “Durante e temporada di nan bida ku nan ta entre infansia i edat adulto, tinernan tin ku trata ku e aspektonan mas indeseabel di tantu infansia komo di edat adulto.”

Si bo ta un adolesente, kon bo por trata ku éksito ku e difikultatnan ku bo ta enfrentá? Si bo ta un mayor di un yu adolesente, kiko por yuda bo kòrda kon e añanan turbulento ei tabata, i asina bo por komprondé mihó kiko bo yu hòmber òf yu muhé ta pasando aden? Den e seri aki nos ta invitá tantu hóbennan komo adultonan pa analisá e tópiko di adolesensia mas a fondo. Esaki lo yuda hóbennan no solamente pa sobrebibí e periodo ei sino tambe pa nan tin éksito.