Nakaisigudan ti Panagsursuro

“Agtayab dagiti tumatayab, aglangoy dagiti ikan; agpanunot ken agsursuro ti tao.”​—JOHN HOLT, AUTOR KEN EDUKADOR.

ADDA nainkasigudan a panagregget ti kappasngay nga ugsa a tumakder babaen kadagiti nawasnay ken nakapuy a sakana tapno surotenna ti inana. Iti kasumbangirna, ti maladaga ket mabalin a di magna iti unos ti makatawen. Nupay kasta, naparaburan dagiti tattao iti nakaskasdaaw unay nga utek a nalalaing nga amang ngem iti aniaman nga animal. Maiparangarang daytoy iti kanayon a kinausioso ti ubing ken ti panagreggetna nga agsukisok ken agsursuro.

Tapno mapennek dayta a panagusioso, dagiti normal ken nasalun-at a maladaga ageksperimento ken agpaliiwda iti aglawlawda. No ikkam ida ti maysa a banag, usarenda ti amin a sentidoda a mangadal ken mangammo iti dayta agraman ti ramanna! Ken saan la a kasta ti pamay-an ti panageksperimentoda. Kas ammo ti tunggal nagannak, masansan a maragsakan dagiti maladaga a mangpilko, mangrumek, manggunggon, ken mangdadael kadagiti bambanag, gapu iti reggetda a mangtarus ken mangpadas iti aglawlawda.

Ad-adda pay a madlaw ti panagregget dagiti ubbing nga agsursuro no mangrugidan nga agsao​—maysa a nakaskasdaaw a gapuanan! Kellaat a kasla nagadu ti saludsoden dagiti ubbing. Di agsarday dagiti saludsodda a kas iti, ‘Ania daytoy?’ ‘Ania dayta?’ isu a masansan a marurod payen dagiti nagannak. ‘Kellaat ti panagreggetda nga agsursuro,’ kinuna ti autor a ni John Holt.

Ket kalpasan laeng ti sumagmamano a tawen, iti adu a pagilian, mangrugin ti panawen ti panagadal dagiti ubbing​—panawen a kaadda dagiti mannursuro, libro, tugaw, ken nalabit ginasut pay nga ubbing. Ngem nakalkaldaang ta kalpasan ti adu a tawen a panageskuelada, adun nga agtutubo ti saan nga agregget nga agsursuro. Sumagmamano pay ketdi ti mangibilang iti panageskuela a makapaaburido wenno makauma. Nalabit saan a makaparegta ti dadduma nga adalen wenno mannursuro. Wenno nalabit madanaganda unay gapu iti pannakapilitda a manggun-od kadagiti nangato a marka.

Ti pannakaumada nga agsursuro ket mabalin nga agtultuloy agingga nga agmataenganda ken uray pay inton  lumakay wenno bumaketda, isu a di kayat dagidiay nauma nga agsursuro ti aniaman a nauneg a panagpanunot, panagadal, wenno panagsukimat. Adda pay maysa a lapped a sarsarangten dagiti lallakay ken babbaket​—ti panamati a ti kinalakay ken kinabaket ti automatiko a manglapped iti abilidadda nga agsursuro. Ngem kas makitatayto, saan nga agpayso dayta a panangmatmat.

Kayatmo kadi a parang-ayen ti abilidad ken tarigagaymo nga agsursuro, aniaman ti edadmo? No maysaka a nagannak, kayatmo kadi nga agbalin dagiti annakmo a nalalaing nga estudiante ken tagiragsakenda ti agadal iti amin a tawen ti panageskuelada ken uray kalpasanna? No kasta, pangngaasim ta itultuloymo a basaen dagiti sumaganad nga artikulo.

 [Ladawan iti panid 2]

Pagay-ayat dagiti ubbing ti agsursuro

[Ladawan iti panid 3]

Nakalkaldaang ta adu nga agtutubo ti maaburido ken madanagan iti panageskuela