Naimbag a Samaritano iti Agdama a Panawen

BABAEN ITI MANNURAT TI AGRIINGKAYO! IDIAY MEXICO

Adu kadatayo ti nakangngegen iti estoria ti Biblia maipapan iti mannakikaarruba a tao a masansan a maawagan iti Naimbag a Samaritano. (Lucas 10:29-37) Iti daytoy a pangngarig, impakita ni Jesu-Kristo ti nagpaiduma a panangikagumaan ti Samaritano a mangipakita iti ayatna iti padana a tao nga agkasapulan. Adda kadi pay dagiti naimbag a Samaritano itatta? Amirisem ti sumaganad a salaysay manipud Mexico.

Iti panagbiaheda nga agawid, nakita ni Betuel ken ti pamiliana ti nakaro nga aksidente ti lugan iti haywey. Simmardengda tapno tumulong. Maysa kadagiti tsuper a nairaman iti aksidente, a maysa a doktor, ti nagkiddaw kadakuada nga ipanda ti masikog nga asawana ken ti dua nga ubbing pay nga annakna a babbai iti kaasitgan nga ospital tapno maagasanda. Kasta ti inaramidda, sa nagsubli ni Betuel iti nakapasamakan ti aksidente tapno makitana no ania pay ti maitulongna.

Insalaysay ni Betuel: “Simmangpeten dagiti tartarawidwidan ti gobierno nga agpatpatrolia iti haywey, ket masapul a maimbestigaran ti doktor ta adda natay. Idi inimtuod ti doktor no apay a tultulongak, inlawlawagko a dakami dagiti Saksi ni Jehova ket naammuanmi iti Biblia a masapul nga ayatenmi ti kaarrubami. Imbagak a di agdanag maipapan iti agiinana, ta aywananmi ida. Makasangsangit a nagyaman, intalekna ngarud dagiti napapateg a sanikuana kaniak tapno aywanak.”

Inyawid ti sangapamiliaan ni Betuel ti pamilia ti lalaki ket inaywananda ida iti sumagmamano nga aldaw. Rinugian ni Betuel nga inyadalan ida iti Biblia. Idi nawayawayaanen ti doktor, nagyaman ket pinadayawanna dagiti Saksi ni Jehova. Inkarina nga itultuloyna ti makipagadal iti Biblia idiay ilina, ket imbagana a no lalaki ti ipasngay ni baketna, panaganannanto iti Betuel. Kinuna pay ni Betuel: “Ita, kalpasan ti dua a tawen, naaddaankami iti gundaway a bimmisita kadakuada. Nasdaawak ta intultuloyda ti nakipagadal iti Biblia, ket Betuel ti impanaganda iti anakda!”

[Ladawan iti panid 13]

Ni Betuel