Le Manatu o le Tusi Paia

Pe e Alofa Mai ea le Atua i Tamaiti?

E FAITAU miliona tamaiti o loo faileagaina ma fasi faamo‘amo‘a i tausaga ta‘itasi. O le to‘atele o i latou o loo galulue e pei o ni pologa i ni tulaga mata‘utia. O nisi ua ave faamalosi e fai ma fitafita po o le auai i faiga faatalitane. O faiga mataifale ma isi faiga matagā ua fai i tamaiti, ua atili ai ona faigatā i tamaiti ona faatuatuaina isi.

O se tulaga lea ua faapopoleina ai le to‘atele o tagata e alolofa ma naunau i tamaiti, talu ai lo latou tulaga pagātia. Ua iloaina e nisi o le māfuaaga o le tele o ia tulaga, ona o le matape‘ape‘a ma le amio leaga tele o tagata, ae e faigatā ona latou talitonu e mafai ona faataga e se Atua alofa ia faiga leaga. Atonu latou te lagona ua tuulafoa‘ia e le Atua nei tamaiti ma e lē o manatu mai iā i latou. Pe e moni lea manatu? Pe e ao ona avea le faileagaina o tamaiti ma mea e faapea ai ua lē alofa mai le Atua iā i latou? O le ā le faamatalaga a le Tusi Paia?

E ‘Ino‘ino le Atua i Ē Faileagaina Tamaiti

E lē finagalo Ieova le Atua e faileagaina tamaiti e tagata matutua lē alolofa. O le tulaga pagātia ua oo i tamaiti, o se tasi lea o i‘uga faigatā o le fouvale na tupu i Etena. Na  avea le teena o le pulega a le Atua ma tulaga na amata ai ona faileagaina tagata e o latou uso a tagata.—Kenese 3:11-13, 16; Failauga 8:9.

E inosia e le Atua i latou e faileagaina i latou e vaivai ma lē mafaia se mea. E tele ni nuu sa lē tapua‘i iā Ieova na latou faia taulaga i tamaiti, ae na fetalai mai Ieova “o le mea ou te le‘i poloa‘i atu ai, ou te le‘i manatu fo‘i i ai.” (Ieremia 7:31) Na lapata‘i Ieova i ona tagata anamua: “Afai e te agaleaga [i lē mātuaoti], ona alaga mai lea o ia iā te a‘u, ou te faalogo lava i lona alaga mai. E matuā tupu ai lo‘u ita.”—Esoto 22:22-24.

E Alofa Ieova i Tamaiti

O le alofa o le Atua i tamaiti o loo vaaia lea i ta‘iala aogā ua ia aumai i mātua. O tamaiti e ola a‘e i se aiga e puipui ma alolofa iā i latou, o le a sili atu ona avea ma ni tagata matutua e sologa lelei. O lea la, na amataina ai faaipoipoga e Lē na Faia i tatou, ma o lea fuafuaga “e tuua ai e le tane lona tamā ma lona tinā, a e faatasi ma lana avā; ona avea ai lea o i la‘ua ma tino e tasi,” i le olaga atoa. (Kenese 2:24) I le Tusi Paia, e na o feusua‘iga i le va o ulugalii faaipoipo ua faatagaina, ina ia ola a‘e ai tamaiti i se aiga mautū lelei.—Eperu 13:4.

Ua faamamafa mai fo‘i i le Tusi Paia le tāua o le a‘oa‘oina o fanau e mātua. Ua faapea mai le Tusi Paia: “O le fanau, o le tofi lea mai iā Ieova; o ē ua fanau mai, o le taui lea mai iā te ia. E pei o ū fanafana i le lima o le toa, e faapea lava atalii o taulele‘a.” (Salamo 127:3, 4) O fanau, o se meaalofa tāua mai iā Ieova, ma o lona finagalo, ia sologa lelei o latou olaga. Ua fautuaina e le Atua mātua ina ia faatonutonu lelei a latou fanau, e pei ona faatonutonu lelei e le tagata fanafana ū lana ū. Ua faapea mai le Afioga a le Atua, “O outou tamā fo‘i, aua ne‘i tou faaonoono atu i a outou fanau, a ia tausi atu i ai i a‘oa‘iga ma apoapoa‘iga a le Alii.”—Efeso 6:4.

O se tasi auala ua faaali mai ai le alofa o Ieova mo fanau, e ala lea i le a‘oa‘oina o mātua ia puipui a latou fanau mai tagata e faia amioga matagā i tamaiti. I Isaraelu anamua, sa faatonuina fo‘i ‘tamaiti’ ina ia faalogo i le Tulafono, lea na faamanino mai ai amioga lelei ma amioga leaga faaleituaiga. (Teuteronome 31:12; Levitiko 18:6-24) O le finagalo o le Atua, ia matuā fai taumafaiga a mātua e puipui a latou fanau mai se isi e faileagaina pe faataugāina i latou.

Le Faamoemoe mo Tamaiti

Ua faaata atoatoa e Iesu uiga o lona Tamā, ma e uiga ese le faata‘ita‘iga na ia faia e faaalia ai le tumau pea o le alofa o Ieova mo tamaiti. (Ioane 5:19) E sesē le manatu na iai i soo o Iesu ina ua latou vaoia mātua mai le avatu o a latou fanau iā te ia, ma sa matuā a‘oa‘ia i latou e Iesu. Na ia fetalai atu: “Inā tuu mai ia o tamaiti e ō mai iā te a‘u.” Ona “siitia lea e ia o i latou i ona lima, . . . ma faamanuia iā te i latou.” (Mareko 10:13-16) E tāua tele tamaiti i le silafaga a Ieova le Atua, ma lona Alo.

O le mea moni, e toeitiiti ona aumaia lea e Iesu Keriso, le Tupu tofia a le Atua, se mapusaga mo tamaiti o loo faileagaina. O tagata o loo faileagaina ma le matape‘ape‘a isi, o le a aveesea e faavavau. (Salamo 37:10, 11) A o ē agamalu o loo faamoemoe iā Ieova, ua faapea mai le Tusi Paia: “E sōloiesea fo‘i e le Atua loimata uma i o latou mata; e leai fo‘i se toe oti, po o se faanoanoa, po o se auē, e leai fo‘i se toe puapuaga; auā ua mavae atu mea muamua.”—Faaaliga 21:3, 4.

Ae i le taimi nei, o loo faaalia e le Atua lona alofa e ala i le foa‘i mai o le fesoasoani faaleagaga ma le lagolagosua tau faalogona mo i latou o loo faileagaina ma faataugāina. Ua ia folafola mai: “Ou te sa‘ilia fo‘i lē ua sē, ou te aumaia lē ua tulia, ou te fusia lē ua gau, ou te faamalosia lē ua vaivai.” (Esekielu 34:16) Ua faamāfanafanaina e Ieova tamaiti ua puapuagatia ma vaivai e ala i lana Afioga, lona agaga paia, ma le faapotopotoga Kerisiano. O se fiafiaga tele le iloaina, i le taimi nei, ‘o le Tamā e ona le alofa mutimuti vale, o le Atua fo‘i e ana le faamāfanafanaga uma; o loo faamāfanafanaina mai iā te i tatou i lo tatou puapuaga uma lava,’ e pei lava ona ia finagalo e faia i le lumana‘i.—2 Korinito 1:3, 4.

[Ē Ana le Ata i le itulau 16]

© Mikkel Ostergaard/Panos Pictures