Sinawng mga Magasin—“Dali, Punita Ako ug Palita Ako!”

ANAA sila giladlad, mabulokon ug sayag, ang tanan gidispley ug maayo aron makuha ang imong pagtagad. Dili ka gustong mohunong ug motan-aw, apan karon nadani ka sa ilang pagkamabulokon. Ang tanan nga sinawng mga magasin diha sa baligyaanag mga basahon morag nag-ingon, “Dali, punita ako ug palita ako!” Ug bisag tinuod nga dili nimo mahukman ang libro pinaagi sa hapin niini, dili ikalimod nga ang mga hulagway sa hapin sa sinawng mga magasin dako ug epekto sa pumapalit. Diha sa daghang nasod, nagbaha kining matanga sa magasin, ug grabe kaayo ang kompetensiya aron kini mahalin.

Ang mga magasin mabahin sa duha ka pangunang mga kategoriya: mga magasin nga gidisenyo alang sa usa ka partikular nga interes​—nga gitawag usab ug trade ug technical magazine—​ug consumer magazine. Ang ulahi nga ginganlang magasin naghisgot sa halos tanang ulohan, apan ang gitumong sa mga magpapatik mao ang pipila ka grupo. Ang mga magasin nga regular nga giimprenta gitawag ug mga periodical, ug ang mga magasin nga edukasyonal ang unod gitawag ug mga journal. Ang mga magasin lahi sa mga mantalaan maylabot sa porma ug mga materyal nga gihisgotan, nga mas gamay ug giimprenta sa mas maayog kalidad nga papel, nga kasagaran sinaw, nga makadani sa pumapalit. Kon itandi sa mga mantalaan, ang unod sa mga magasin kasagaran walay kalabotan sa dali mag-usab-usab nga mga panghitabo ug mga balita. Daghan kini ug mga magsusulat ug lainlaing mga impormasyon ug mga opinyon ang hisgotan niini. Sila naggamit usab ug nagkalainlaing mga estilo sa pagsulat, gikan sa yano nga pagbalita ngadto sa mas personal o makatandog sa emosyon nga estilo.

Samtang nagtan-aw ka sa displey sa baligyaanag basahon, seguradong daghang butang ang nakaimpluwensiya sa imong pagpilig magasin o bisan sa imong pagdesisyon kon mopalit ka ba o dili. Sa tinuod, dako ug kalabotan ang imong pagkalalaki o pagkababaye, maingon man ang imong interes ug tingali, labaw sa tanan ang kantidad sa magasin. Oo, ang sinawng mga magasin mahal, tingali tulo o upat ka pilo sa kantidad sa mantalaan. Bisan pa niana, ang mga mantalaan para karong adlawa ilabay ug pulihan sa mantalaan para ugma, samtang ang magasin dili dayon madaan. Ang magasin nga imong pilion mahimong basahon  agig lingawlingaw, ug mahimong hiposon kini sulod sa daghang semana o mga bulan ug tingali ihatag kini ngadto sa uban. Ang mga librarya usahay malipayng modawat ug daang mga kopya sa mga magasin, ug ang ubang mga magasin bililhon kaayo alang sa mga kolektor.

Balor ba Kini sa Kantidad Niini?

Kon nagtuo ka nga balor sa kantidad kining mga magasina, siyempre, personal nga desisyon na kini. Ang pangunang katarongan sa mahal nga kantidad niini mao nga kini gastoso nga imprentahon. Ang magpapatik kinahanglang manukiduki usag maayo bahin sa gidaghanon sa pumapalit sa dili pa magsugod pag-imprenta diha sa natad nga daghan nag kakompetensiya. Karong mga panahona, ang dagkong mga kompaniya nagpatik ug nag-imprenta ug kutob 30 o kapin pa ka lainlaing mga magasin ug naggamit ug ilang kaugalingong imprentahanan. Bisan pa niana, dako kaayo sila ug gasto, kay ang matag publikasyon nagkinahanglan ug kaugalingong mga empleyado.

Kon motan-aw ka sa sulod nga bahin sa hapin sa consumer magazine, makurat ka nga masayod nga daghan kaayong mga editor ug mga manedyer ang gikinahanglan. Ang matag departamento sa magasin nagtagad ug lainlaing mga artikulo nga ilakip diha sa unod niini, ug ang matag usa dunay iyang kaugalingong mga empleyado. Ang dagkong mga magasin sagad adunay ilang kaugalingong mga magsusulat ug mga letratista, apan daghang magsusulat ug mga letratista nagkinaugalingon pagtrabaho o wala magtrabaho sa usa lamang ka kompaniya, nga nagpasabot nga sila mahimong patrabahoon nga regular o partaym.

Ang tanang artikulo nga isumiter sa mga magsusulat susihon ug maayo sa mga proofreader. Ang kadaghanan sa artikulo sulaton pag-usab o labing menos ipahiangay sa mga copy editor. Ang mga hulagway adunay dakong bahin sa sinawng mga magasin, busa gikinahanglan ang mga graphic designer. Ang mga magtatagik sa magasin magsugod sa pagplano sa tibuok dagway sa magasin, nga magdesisyon kon unsay ibutang diha sa matag panid. Ang artikulo ug ang mga ilustrasyon kinahanglang ipresentar sa paagi nga makadani sa magbabasa ug modani sa mga mata sa matag pakli sa panid. Ang kadaghanang mga magpapatik mogamit ug style book​—usa ka manuwal nga naglatid kon unsang mga pulong ug mga estilo ang gamiton diha sa ilang mga publikasyon. Ang mohimo sa kataposang desisyon mao ang hepe sa mga editor. Siya ang mohimo ug dinalian nga mga desisyon, aron dili malangan ang pagpatik sa publikasyon. Usa ka sampol nga kopya ang andamon aron masusi sa senior staff sa dili pa imprentahon ang magasin.

Ang kantidad naglakip sa gasto sa pag-imprenta ug pag-apod-apod maingon man sa mga suweldo sa mga empleyado. Kay dili man mahalin ang tanang kopya nga maimprenta, ang mga tigbaligya sagad modawat ug daghang magasin ug ang dili mahalin iuli. Tinuod nga ang presyo sa magasin dili makasapar sa gasto sa pag-imprenta. Gani, ang kasarangang consumer magazine dili makatigayon kon dili pa sa mga paanunsiyo nga nag-unod halos sa tibuok nga magasin. Ang bag-ong edisyon sa usa ka internasyonal nga sinawng magasin nga may 200 ka panid nasudlan ug kapin sa 80 ka tibuok panid nga paanunsiyo. Ang mga tigpaanunsiyo nahibalo nga ang kalidad sa sinawng papel ug ang upat-ug-kolor nga pag-imprenta makadugang sa kusog nga halin sa ilang mga produkto.

Sa Australia, gibanabana nga ang matag tawo, sa aberids, mogugol ug 1.2 ka minutos sa usa ka adlaw sa pagbasag magasin. Katumbas kini sa gibanabana nga 1.1 minutos sa usa ka adlaw sa pagtan-aw ug sine o 0.7 minutos sa usa ka adlaw sa pagpamati ug musika diha sa teyp. Dayag nga kini maoy usa sa katarongan kon nganong ang mga magasin nahimong maayo kaayong gamit alang sa paanunsiyo nga mokita ug dako.

Ang Makapadani

Kay dili man nato matan-aw ang tanang gipatik nga magasin, tingali motan-aw kita makadiyot sa mga magasin para sa mga babaye. Ang unod sa  sinawng mga magasin para sa mga babaye gisusi di pa dugay, kay bisan pag gilantaw kini sa pipila ka mga tawo nga makalingaw, ang uban nagtuo nga gipahimuslan niini ang mga babaye. Ang mga unod niini makapainteres gayod, ug kini ang makapakusog sa halin niini. Apan, ang mga magasin para sa mga babaye gibag-o sa milabay nga pipila ka tuig. Ang ubang mga journal kaniadto nga naghisgot ug halos bahin lamang sa panimalay karon naghisgot na bahin sa mga tawo nga inila. Ang mga artikulo bahin sa panglawas napopular usab. Ang mga babaye gusto ug mugbong mga nobela, ug kining mga magasina nag-imprenta ug mga nobela nga may mga sumpay sa sunod gula nga magpakusog sa halin. Apan karon pipila na lang ka sinawng mga magasin ang dunay mugbong mga nobela ug mga nobela nga may sumpay sa sunod gula.

Unsay nagpakusog sa halin sa sinawng mga magasin karon? Kanang makita diha sa mga hapin nga morag nanawag, “Dali, punita ako ug palita ako!” Kon usa ka babaye ang gipasundayag sa hapin, siya kinahanglang inila o guwapa. Ang modelo diha sa hapin kinahanglang batan-on ug niwang, ug ang pagretoke sa letrato pinaagig digital makapanindot ug samot sa letrato. Komosta ang bahin sa mga pulong diha sa hapin? Siyempre, kini depende kon unsang pangedaron ug estilo sa kinabuhi ang gitumong. Ang ubang mga hapin sa magasin nagpasiugda ug mga uso nga sinina; ang uban nagtanyag ug mga premyo nga dag-on. Ang hapin kasagaran maoy giya kon unsay anaa sa sulod sa magasin.

Ang Sinawng mga Magasin Makaimpluwensiya ba Kanato?

Ang mga magpapatik sa magasin moingon nga sila nahibalo kon unsay gusto sa mga babaye. Ug tinuod nga nanukiduki sila ug maayo sa pagsusi kon unsay gusto sa kadaghanang mga babaye. Apan maayong mangutana kita, Sila ba nagtagana sa panginahanglan nga tinuod nga naglungtad, o sila ba nagmugna ug panginahanglan aron ilang tagan-an kini? Atong hisgotan ang mga paagi nga gihulma sa daghang sinawng mga magasin para sa mga babaye ang kaisipan sa mga tawo. Una, kini walay puas nga naghisgot sa mga estilo sa kinabuhi ug mga opinyon sa mga tawong inila. Kining mga artikuloha tingali maoy gustong basahon sa mga tawo, apan wala bay mga kapeligrohan nga nagpahipi niini? Diha sa iyang pagtuon nga About Face, si Jonathan Cole, usa ka clinical neurophysiologist sa University of Southampton, Inglaterra, nagpasidaan nga ang pagkaila sa dagway sa tawong inila bisag wala siya makakita sa personal o wala makadungog sa iyang tingog makahatag ug ilusyon sa pagkahimong suod kaniya. Dugang pa niini mao ang daghang impormasyon nga nasulat bahin sa mga tawong inila, ug lagmit maoy nakaingon niining katingad-anang kaguol nga bation karon sa publiko dihang mamatay ang mga tawo nga dili nila kaila apan kansang mga hulagway kanunay nilang makita diha sa sinawng mga magasin. Siyempre, ang mga report sa telebisyon ug mantalaan makapasamot usab niining ilusyon sa pagkahimong suod sa tawong inila.

Ang laing butang nga gituki karon mao ang potensiyal sa mga magasin sa pag-impluwensiya sa tinamdan sa mga babaye nianang giisip nga tilinguhaong korte sa lawas. Bisan tuod ang mga sukdanan lahi sa nagkalainlaing kayutaan, ang kasagarang mensahe sa bag-ong mga magasin para  mga babaye sa adunahang mga nasod mao nga ang pagkaniwang mao ang uso. Ang mga edukador, mga ginikanan, ug bisan mga modelo mismo nakasaway sa mensahe nga ginapasa sa mga larawan nga kanunayng gipasundayag diha sa sinawng mga magasin sa kababayen-an. Matod pa nila, kini maoy nakaingon usab sa pagdaghan sa sakit labot sa batasan sa pagkaon ug sa uso nga pagdiyeta sa mga babaye​—ilabina, sa batan-ong mga babaye.

Aron masusi kon tinuod kini, usa ka edisyon sa Australia sa usa ka internasyonal nga magasin naghimo ug surbi sa mga magbabasa niini ug nagdapit ug grupo sa mga eksperto sa pagkomento bahin sa mga resulta. Kapin sa 2,000 ka babaye ang gisurbi, nga 82 porsiyento kanila nag-edad ug 16 hangtod 29. Usa ka girekomendar nga tsart sa timbang sa lawas ang gitan-aw​—usa ka tsart nga naglatid sa timbang sumala sa gitas-on, edad, ug uban pa. Mga 60 porsiyento sa mga babaye nagtuo nga sila sobra ug timbang, apan 22.6 porsiyento lamang ang bug-at ug timbang kay sa girekomendar. Bisan tuod 59 porsiyento niadtong ubos ug timbang kay sa girekomendar nagtuo nga normal ang ilang timbang, ang 58 porsiyento nga ginaingong normal ug timbang nagtuo nga sila sobra ug timbang. Dose porsiyento lamang ang natagbaw sa ilang timbang. Gisaway sa uban ang tsart nga gihatag sa Australia’s Commonwealth Department of Health, nga nag-ingon nga sobra ra ang sukod sa timbang nga gihatag diha sa tsart alang sa matag gitas-on. Dugang pa, 67 porsiyento miadmitir nga nasina gayod sila sa mga lawas sa ubang mga babaye, ug 1 sa 8 miadmitir nga siya sa karon o kaniadto dunay sakit labot sa batasan sa pagkaon.

Si Fiona Pelly, nga nutrisyonista sa grupo, miingon: “dayag kaayo nga ang timbang sa lawas mao nay gihatagan ug importansiya sa mga kinabuhi sa mga babaye.” Ug si Dra. Janice Russell, direktor sa usa ka klinika sa sakit labot sa batasan sa pagkaon didto sa Sydney, mikomento: “Mas nakadaot pa mao nga ang mga pagbati sama sa pagkasad-an ug kasina nangibabaw [sa surbi]. Dili maayo nga mailalom kanunay nianang matanga sa mga pagbati.”

Apan, ang labing hinungdanon nga nakaplagan, mao nga bisan pag ang uban sa mga gisurbi miadmitir nga gisundog nila ang mga artista, 72 porsiyento miingon nga ang mga modelo nga makita diha sa mga magasin dako ug impluwensiya kanila. Usa ka babayeng batan-on, nga natabangan sa usa ka klinika nga nagtambal sa mga tawo nga may sakit labot sa batasan sa pagkaon, miingon nga siya magarbohon kaayo sa iyang timbang nga 55 kilos apan miadmitir: “Gusto gihapon akong magpaniwang tungod sa pagpang-awhag sa media, magasin ug sa mga tawong inila.” Ang pipila sa mga surbi nga gihimo sa ubang dapit sama usab niini ug mga resulta.

Duha ka Magasin nga Lahig Matang

Ang usa sa labing mapuslanon ug impormatibong mga magasin nga mabatonan mao kanang imong gikaptan, ang Pagmata! Wala nimo kini palita gikan sa baligyaanag magasin​—tingali gitanyagan ka niini sa usa ka tawo nga miagi, o tingali dunay nagdala niini diha sa imong balay. Gimantala, giimprenta, ug giapod-apod sa lainlaing mga nasod pinaagi sa mga boluntaryo, kining magasina gitanyag nga walay bayad. Ang mga magsusulat sa Pagmata! nagapadala ug mga artikulo gikan sa tibuok kalibotan, ug sila usab mga boluntaryo, maingon man ang tanang dibuhista ug mga maghuhubad niini. Ang magasing Pagmata! unang migula niadtong 1946. Ang gipulihan niini mao ang Consolation ug The Golden Age, nga gisugdan pag-imprenta sa 1919. Walay bisan unsang binayran nga mga paanunsiyo kining mga magasina. Ang Pagmata! karon gipatik diha sa 87 ka pinulongan, ang kadaghanan niini duha ka beses sa usa ka bulan mogula sa tibuok kalibotan, nga giimprenta sa kapin sa 22 ka milyong kopya.

Ang Bantayanang Torre, nga kaubang magasin sa Pagmata! mas dako pag sirkulasyon, nga karon giimprenta diha sa 148 ka pinulongan. Ang Bantayanang Torre giimprenta sa kapin sa 25 ka milyong kopya matag gula ug giapod-apod sukad pa sa 1879. Kining duha ka basahon nakahatag ug dakong tabang sa pagpahibalo sa mga tawo bahin sa hinungdanong mga isyu sa ilang kinabuhi, ug kini makapaikag sa mga lalaki, mga babaye, ug mga batan-on sa tibuok kalibotan.

Angayng palandongon natong tanan nga kita wala mangatawo nga duna nay kahibalo. Ang kaalam ug kahibalo anam-anam nga mabatonan sa magkadako kita, ug sagad ang atong mga opinyon maumol ug ang atong estilo sa kinabuhi maugmad ingong bunga sa atong pagbasa. Busa, importante gayod kaayo nga magpili kitag mapuslanon ug makapalig-ong mga basahon.

[Hulagway sa panid 25]

Ang mga magasin makaimpluwensiya sa mga tinamdan bahin sa korte sa lawas

[Hulagway sa panid 26]

Bisag dili kini sinaw nga mga magasin, Ang Bantayanang Torre giapod-apod sa kapin sa 25 ka milyong kopya diha sa 148 ka pinulongan ug ang Pagmata! giapod-apod sa kapin sa 22 ka milyong kopya sa 87 ka pinulongan