Dagiti Nasileng a Magasin​—“Piduten ken Gatangendak!”

ADDADA sadiay a nakadispley, namaris ken napintas, nga agur-uray a pidutem. Saanmo koma a taldiapan, ngem ita, naallukoykan iti kinamarisda. Dagiti nasileng a magasin a nakadispley iti paglakuan kas man la ibagbagada a, “Piduten ken gatangendak!” Ket nupay kaaduanna, mabalin a saanmo a talaga a matingiting ti maysa a libro babaen ti akkubna, masapul nga admitirentayo a dagiti ladawan iti akkub dagiti nasileng a magasin dakkel ti epektoda kadagiti mayat a gumatang. Kadagiti paglakuan iti adu a pagilian, nakaad-adu dagitoy, a masansan a matukoy kas dagiti nasileng a magasin, isu a napigsa ti kompetision iti pannakailakoda.

Mabalin a mabingay dagitoy a magasin iti dua a kangrunaan a kategoria: dagiti magasin a nadisenio wenno maibagay iti partikular a panggep​—a maawagan met iti teknikal a magasin ken magasin a paginteresan dagiti negosio, industria, ken propesional​—ken ti magasin dagiti aggatang. Kasla saklawen ti naud-udi ti dandani amin a suheto, ngem adda sumagmamano a grupo nga ipangpangruna dagiti manangipablaak. Ti estilo ken linaon dagiti magasin ket naiduma kadagiti periodiko, ta basbassit dagitoy ken nayimprenta iti napimpintas ti kalidadna a papel, a masansan a nasileng, isu a magustuan unay ti gumatang. No linaon ti pagsasaritaan, kaaduanna, saan nga itampok dagiti magasin ti agkarabaliw a paspasamak ken padamag no idilig kadagiti periodiko. Nagadu dagiti mannurat a mangputar iti dayta, ken saklawenda ti adu a kita ti impormasion ken opinion. Agsasabali met ti estilo ti pannakaisuratda, manipud panangipadamag kadagiti agpayso a pasamak agingga kadagiti mas personal wenno emosional nga estilo.

Bayat a nakatakderka a kumitkita kadagiti nakadispley a pagiwarnak iti paglakuan, sigurado nga adda sumagmamano a banag a mangikeddeng iti panagpilim wenno makatulong pay ketdi kenka nga agdesision no gumatangka wenno saan. Sigurado nga adda impluensia ti kinalalaki wenno kinababaim kas met ti personal nga interesmo ken nalabit kangrunaanna, ti gatad ti magasin. Wen, mabalin a nangina dagiti nasileng a magasin, nalabit mamitlo wenno mamimpat iti gatad ti periodiko. Ngem ti periodiko ita ket maibellengton inton bigat ta adda manen  kabarbaro, idinto ta mabalin a napapaut ti magasin. Daydiay piliem ket mabalin a basaem tapno pagpalpaliwaam ken mabalin nga idulinmo iti adu a lawas wenno bulan wenno nalabit ipabulodmo iti sabsabali. No dadduma, interesado dagiti libraria kadagiti nadadaanen a magasin. Dadduma a magasin ket tagikuaen payen dagiti kolektor, wenno dagiti agur-urnong kadagiti masnup a banag.

Sulit Aya ti Gatadda?

Sika a mismo ti mangikeddeng no nasken a gatangem dagiti nasileng a magasin. Ti nagdakkel a magastos iti pannakaaramidda ti kangrunaan a mangpangina kadagitoy. Ti maysa a manangipablaak ket masapul nga agsirarak a naimbag maipapan iti paginteresan dagiti aggatang sakbay a mangipablaak iti baro a magasin agpaay iti datin a napigsa ti kompetensiana a merkado. Kadagitoy nga aldaw, mangipablaak dagiti dadakkel a korporasion iti inggat’ 30 wenno ad-adu pay a nadumaduma a magasin ken usarenda dagiti bukodda a pagimprentaan. Nupay kasta, nangina ti magastoda, ta tunggal publikasion ket agkasapulan iti bukodna a grupo dagiti trabahador.

No kitaem ti uneg ti akkub ti magasin maipapan kadagiti aggatang, masdaawka a makakita iti kaadu dagiti editor ken manedyer a kasapulan. Tunggal maysa ti mangtarawidwid iti departamento dayta a kompania ti warnakan agraman dagiti linaonna, ken tunggal maysa ti addaan iti bukodna a grupo dagiti trabahador. Kaaduanna, addaan dagiti daddadakkel a magasin kadagiti bukodda a mannurat ken retratista, nupay adu a mannurat ken retratista ti mangged nga awanan iti amo no di ti bagida wenno kabaelanda ti agtrabaho para iti nadumaduma a kompania iti limitado a tiempo. Kaipapananna a masapul a matangdananda iti regular wenno paset tiempo.

Sukimaten dagiti proofreader ti amin nga artikulo nga isumite dagiti mannurat. Mabaliwan ti kaaduan kadagita wenno dagitoy ket medio baliwan pay ketdi dagiti copy editor. Dagiti ladawan ti mangbukel iti kangrunaan a disenio dagiti nasileng a magasin, isu a kasapulan ti maysa a grupo dagiti artist ken retratista. Dagiti para urnos mangrugin nga asikasuenda ti kaaduan a buya ti magasin sada ikeddeng ti agparang iti tunggal panid. Masapul a maiparang ti sasao ken ilustrasion iti wagas a makaatrakar iti agbasbasa, tapno maguyugoy a mangbasa ken matignay a mangkita iti amin a panidna. Kaaduan a pagimprentaan ti mangusar iti maysa a libro maipapan kadagiti estilo​—maysa a manual a mangidetalye kadagiti termino ken estilo a mausar kadagiti publikasionda. Ti chief editor ti maudi a mangngeddeng. Isu ti nasken a mangaramid kadagiti naganat a desision, tapno saan a mataktak ti panangipablaak. Maisagana ti sampol ti maipablaak tapno usigen ti senior staff sakbay a mayimprenta ti magasin.

Ti panagimprenta ken panangibunong agraman ti sueldo dagiti trabahador ket karaman iti gastos. Gapu ta saan a malako ti amin a mayimprenta a kopia, dagiti agtingi masansan nga akseptarenda ti ad-adu a suplay nga ilakoda ngem isublidanto met laeng dagiti dida malako. Hustoka no pampanunotem a ti presio ti tingi dina saklawen ti magasto iti pannakaipablaakna. Kinapudnona, imposible a mayimprenta ti magasin para kadagiti ordinario nga aggatang no saan a naitampok a nangnangruna ti anunsio dagiti produkto iti kaaduan a pasetna. Ti nabiit pay nga internasional a nasileng a magasin nga addaan iti 200 a panid, 80 nga intero-panidna ti nakaimalditan dagiti anunsio ti nadumaduma a produkto. Maamiris dagiti agan-anunsio a nalatlatak dagiti produkto no maipakita dagitoy kadagiti de kalidad a nasileng a papel ken de kolor ti pannakayimprentana.

Idiay Australia, mapattapatta a tunggal tao ti mangbusbos iti 1.2 a minuto iti kada aldaw nga agbasa iti magasin. Katupag dayta ti mapattapatta a 1.1 a minuto iti kada aldaw a panagbuya iti sine wenno 0.7 a minuto iti kada aldaw a panagimdeng kadagiti tape ti musika. Sigurado a daytoy ti maysa a makagapu a napigsa a panguartaan ti panaganunsio kadagiti pagiwarnak.

 Ti Pangallukoyda

Nupay ditay masukimat ti tunggal magasin a naipablaak, nalabit kayattayo a kitaen biit dagiti magasin a para kadagiti babbai. Nabiit pay a nausig ti linaon dagiti nasileng a magasin a para kadagiti babbai, ta nupay saan kano a makadangran dagitoy sigun iti dadduma a tattao, patien ti dadduma a manggundaway dagitoy kadagiti babbai. Sigurado a makapagagar ken makaallukoy dagitoy, ken makatulong tapno umadu ti mailako. Ngem nagbalbaliw dagiti magasin a para kadagiti babbai iti napalabas a sumagmamano a tawen. Ad-adda itan a maipapan kadagiti nalatak a tattao dagiti artikulo a maipablaak iti dadduma a pagiwarnak a mangitamtampok la idi kadagiti pamay-an ti panangaywan iti pagtaengan. Limmatak metten dagiti artikulo maipapan iti salun-at. Dagiti babbai dati a kaykayatda dagiti nobela, ket masansan nga ad-adu idi ti malako no maitampok dagiti serial, wenno nobela a maipablaak iti agsasaganad a ruar. Ngem ita, sumagmamano laengen a nasileng a magasin ti addaan kadagiti nobela ken serial.

Ania ti mangpapigsa ita iti panaglako kadagiti nasileng a magasin? Daydiay agparang iti akkub a kas man la ibagbagana a, “Piduten ken gatangendak!” No babai ti modelo iti akkub, masapul nga isut’ nalatak wenno napintas. Nasken met nga agkabannuag ken nakuttong ti modelo iti akkub, ket ad-adda a pumintas ti retrato babaen ti teknolohia ti computer. Ti ngay sasao iti akkub? Siempre, masapul a maibagay daytoy iti edad dagiti grupo ken estilo ti panagbiag dagiti kangrunaan nga agbasa. Dadduma nga akkub ti magasin ti mangitampok iti uso, dadduma ti mangitukon iti premio a mabalin nga abaken. Ti akkub ti masansan a giya iti linaon ti magasin.

Maimpluensiaandatay Aya Dagiti Nasileng a Magasin?

Sigun kadagiti manangipablaak iti magasin, ammoda ti kayat dagiti babbai. Ket agpayso nga agsirsirarakda a naimbag tapno maammuanda ti kayat ti kaaduan a babbai. Ngem mabalin a nasayaat no mayimtuod, Talaga aya nga ipapaayda ti pudno a kasapulan, wenno nangpartuatda iti kasapulan tapno kanayon a maipaayda dayta? Usigentayo dagiti pamay-an ti adu a nasileng a magasin para kadagiti babbai a mangimpluensia iti kapanunotan ti tattao. Umuna, agtultuloy a salaysayenda dagiti estilo ti panagbiag ken opinion ti nalatak a tattao. Mabalin a daytoy ti kayat a basaen ti tattao, ngem mabalin ngata nga adda dagiti nalmeng a peggad? Iti panagadalna maipapan iti About Face, mamakdaar ni Jonathan Cole, maysa nga eksperto idiay University of Southampton, England, maipapan iti panagandar ti sistema nerbio, a no malasinmo ti rupa ti maysa a tao ngem saanmo pay a pulos a naam-ammo wenno nangngeg ti timekna, agilusionka a nasingedka kenkuana. Mainayon iti daytoy ti kaadu dagiti impormasion a naisurat maipapan kadagiti nalatak a tattao. Nalabit daytoy ti makagapu iti karkarna a panagleddaang unay ti publiko no matay dagiti dida am-ammo ngem masansan a makitkitada ti retrato dagitoy kadagiti nasileng a magasin. Siempre, kumaro met daytoy nga ilusion a kinasinged gapu kadagiti damag iti telebision ken periodiko.

Ti maysa pay a madama a maus-usig isu ti mabalin nga impluensia ti magasin iti panangmatmat  ti babbai iti maibilang a maakseptar a pammagi. Nupay agsasabali ti pagannurotan iti nadumaduma a pagilian, itampok dagiti agdama a magasin para kadagiti babbai iti napanglaw a pagpagilian ti pangkaaduan a mensahe a napintas ti nakuttong. Nakaro ti panangbabalaw ti dadduma nga edukador, nagannak, ken uray dagiti modelo a mismo. Ngamin, kunada nga uray dagiti ladawan a makita iti adu a nasileng a magasin para kadagiti babbai ti maysa met a makagapu iti iyaadu dagiti addaan iti sakit a nainaig iti pannangan ken ti kanayon nga uso a panagdieta ti babbai​—nangruna kadagiti agtutubo.

Tapno masubok ti kinanainkalintegan dagita a pagarup, pinagsaludsodan ti maysa nga edision ti internasional a magasin sadi Australia dagiti agbasbasa iti dayta ken inawisda ti maysa a grupo dagiti eksperto nga agkomento maipapan kadagiti resulta. Nasurok a 2,000 a babbai ti nakipaset. Agtawen iti nagbaetan ti 16 ken 29 ti 82 a porsiento kadakuada. Nagkonsultada iti naisingasing a tsart maipapan iti timbang​—kayatna a sawen, ti timbang sigun iti katayag, edad, ken dadduma pay. Agarup 60 a porsiento kadagiti babbai ti mangipagarup a nalukmegda unay, nupay 22.6 a porsiento laeng ti nadagdagsen ngem iti maisingasing a timbangda koma. Nupay nalaglag-an ti 59 a porsiento kadagidiay natimbang ngem iti naisingasing a normal a timbangda, 58 a porsiento ti nangipagarup a nalukmegda unay. Sangapulo ket dua a porsiento laeng ti mapnek iti timbangda. Dadduma ti nangbabalaw iti tsart nga inted ti Australia’s Commonwealth Department of Health, nga agkuna a nadagsen unay ti timbang a nadakamat iti tsart para iti tunggal katayag. Kanayonanna, 67 a porsiento ti nangadmitir a kanayon nga umapalda iti pammagi ti dadduma a babbai, ket 1 iti kada 8 ti nangadmitir nga ita wenno iti napalabas, adda sakitda a compulsive eating disorder.

Kinuna ni Fiona Pelly, ti nutrisionista a kameng ti grupo dagiti eksperto: “Nabatad a ti timbang ket napateg iti biag dagiti babbai.” Kastoy ti kuna ni Dr. Janice Russell, direktor iti maysa a klinika iti saksakit a nainaig iti pannangan idiay Sydney: “Ti ad-adda a pagdaksanna ket [kadagiti napagsaludsodan], ad-adu dagiti makonsiensia ken umapal. Saan a nalimbong ti panunotmo no kanayon a mariknam ti kasta.”

Ngem ti kapatgan a naammuan ket nupay inadmitir ti dadduma kadagiti napagsaludsodan a tultuladenda dagiti artista, 72 a porsiento ti nagkuna a dagiti modelo nga agparang kadagiti magasin ti kangrunaan a nangimpluensia kadakuada. Maysa nga agtutubo a babai a natulongan ti maysa a klinika a nainaig iti panagdieta ti nagkuna a pagpannakkelna ti timbangna itan a 55 a kilo ngem inaminna: “Kayatko pay ti kumuttong, gapu kadagiti mabuybuyak iti media, makitkitak kadagiti magasin ken nalatak a tattao.” Umasping kadagita ti naammuan iti dadduma pay a naaramid a surbey.

Dua a Magasin a Nagpaiduma ti Kitada

Ti ig-iggamam nga Agriingkayo! ti maysa kadagiti kasayaatan ken makaisuro unay a magasin a mabalinmo a magun-odan. Saanmo a ginatang dayta iti paglakuan kadagiti pagiwarnak​—mabalin nga intukon dayta ti maysa a limmabas, wenno nalabit adda nangipan iti dayta iti pagtaengam. Gapu ta ipabpablaak, iyim-imprenta, ken iwarwaras dagiti boluntario iti intero a lubong, maituktukon daytoy a magasin nga awan bayadna. Dagiti mannurat iti Agriingkayo! agipatulodda kadagiti artikulo manipud iti intero a lubong, ken boluntarioda met, agraman ti amin nga artist ken managipatarus iti dayta. Damo a naipablaak idi 1946 ti magasin nga Agriingkayo! Dagiti immun-una iti dayta ket ti Consolation ken The Golden Age, a nangrugi a naipablaak idi 1919. Kanayon a naipablaak dagitoy nga awan ti aniaman a mabayadan a kita ti anunsio. Maipabpablaak itan ti Agriingkayo! iti 87 a pagsasao. Mamindua iti kada bulan ti kaaduan kadagitoy, sa nasurok a 22 a milion a kopia ti maiwarwaras iti intero a lubong.

Ad-adu pay ti maipabpablaak a Ti Pagwanawanan, a kadua ti magasin nga Agriingkayo! ta mayim-imprenta daytan iti 148 a pagsasao. Iti kada ruar, nasurok a 25 a milion a kopia Ti Pagwanawanan ti mayimprenta sa nangrugi pay dayta a maipablaak sipud idi 1879. Nakatulongen a naimbag dagitoy dua a magasin iti panangipakaammo kadagiti tattao maipapan iti napapateg nga isyu iti biagda, ket makapainteres dagita kadagiti lallaki, babbai, ken agtutubo iti intero a lubong.

Masapul a panunotentayo amin ti kinapudno a ditay naipasngay nga addaan iti sigud a pannakaammo. Magun-odantayo ti kinasirib ken pannakaammo bayat nga agmatmataengan ken tumantanortayo, ket masansan a matubay dagiti opinion ken ti estilo ti panagbiagtayo gapu iti basbasaentayo. Isu a nasken unay a pilientayo a basaen dagiti makagunggona ken makapabileg a publikasion.

[Ladawan iti panid 25]

Dagiti magasin maimpluensiaanda ti panangmatmat ti tattao maipapan iti pammagi

[Ladawan iti panid 26]

Nupay saanda a nasileng, maipabpablaak “Ti Pagwanawanan” iti nasurok a 25 a milion a kopia iti 148 a pagsasao ken maipabpablaak ti “Agriingkayo!” iti nasurok a 22 a milion a kopia iti 87 a pagsasao