Ang Pinakamaayo nga mga Hampanganan

Ano nga klase sang hampanganan ang baklon ko para sa akon bata? Pila ang gastuhon ko? Kon isa ikaw ka ginikanan, mahimo nga napamangkot mo na ini sing madamo nga beses. Bueno, malipay ka sa paghibalo nga ang pinakamaayo nga mga hampanganan mahimo amo ang pinakabarato.

“Mas makabenepisyo ang mga bata gikan sa pagpakigbahin kag pag-eksperimento sangsa pagtan-aw lamang, gani ang simple nga mga hampanganan nga nagapukaw sang paghanduraw mas maayo sangsa matahom de-baterya nga taraktarak ukon nagahambal nga monyika, nga nagalimite sa mahimo sang imo bata,” siling sang libro nga Motivated Minds​—⁠Raising Children to Love Learning. Ang ulihi ginsambit nga mga hampanganan mahimo “manami sa primero, apang masami nga madali matak-an ang mga bata sa sini bangod indi sila makaeksperimento, makahanduraw, ukon makahimuhimo sing mga butang.”

Depende sa edad sang bata, ang mga hampanganan nga makapapagsik sa hunahuna nagalakip sa simple nga mga butang subong sang masugponsugpon nga mga bloke sa pagpatindog, wala-unod nga mga kahon, papel, mga gamit sa pagdrowing, kag bisan gani balas kag tubig. “Ang magagmay nga mga hampanganan, subong sang mga sapat sa uma,” siling sang Motivated Minds, “magahatag [sa bata] sing kahigayunan sa pagparisparis, paggrupogrupo, kag pagkomparar, kag sa pagpauswag sang iya ikasarang sa paghambal paagi sa paghimuhimo sing mga istorya.” Ginpanugda man sang libro ang simple nga mga instrumento sa musika​—⁠kon maagwanta mo ang gahod​—⁠kay paagi sa sini mahatagan ang mga bata sing kahigayunan nga eksperimentuhan ang mga tunog kag ang kombinasyon sang mga tunog.

Maayo gid maghanduraw ang mga bata, kag nalangkag sila sa pagtuon kag sa paghampang. Gani buligi sila sa sining tatlo ka bahin paagi sa maalamon nga pagpili sang ila mga hampanganan.