Dibapadišwa tše Kaone Kudu

Ke sebapadišwa sa mohuta ofe seo ke swanetšego go se hweletša ngwana wa-ka? Ke swanetše go diriša bokae? Ge e ba o le motswadi, mohlomongwe o ile wa botšiša dipotšišo tše gantši. Lega go le bjalo, ditaba tše dibotse ke gore dibapadišwa tše kaone kudu e ka ba tšeo di sa bitšego kudu.

Puku ya Motivated Minds—Raising Children to Love Learning e re: “Bana ba holega kudu ge bona ka noši ba tšea karolo e bile ba nyakišiša go e na le go fo lebelela feela, ka gona dibapadišwa tše bonolo tšeo di nyakago bokgoni bja go nagana di phala dikoloyana tše dibotse tša dipeteri goba dipopi tše di bolelago, tšeo di lekanyetšago seo ngwana wa gago a ka kgonago go se dira ka tšona.” Dibapadišwa tše go boletšwego ka tšona e ka ba “tše di thabišago mathomong, eupša bana gantši ba felelwa ke kgahlego go tšona ka pela ka gobane ga di ba dumelele gore ba seka-seke, ba nyakišiše goba gore ba hlame.”

Go ithekgilwe ka nywaga ya ngwana, dibapadišwa tše di tutueletšago ngwana go nagana di akaretša dilo tše bonolo tše bjalo ka dibapadišwa tša bana tša go aga ka go kgomaganya, mapokisi a se nago selo, pampiri, dilo tša bokgabo gaešita le santa le meetse. Puku ya Motivated Minds e re: “Dibapadišwa tše dinyenyane tše bjalo ka diruiwa di tla nea [ngwana] sebaka sa gore a nyalantšhe, a bee ka magoro le go bapiša gotee le go godiša bokgoni bja gagwe bja leleme ka go hlama dikanegelo.” Le gona puku e šišinya gore go be le diletšwa tša mmino tše bonolo—ge e ba o ikemišeditše go kgotlelela lešata—ka gobane se se dumelela bana gore ba seka-seke medumo le kamoo e kwagalago ka gona.

Bana ba na le menagano e bulegilego, gomme ba fišegela go ithuta le go bapala. Ka gona eka o ka ba thuša dikarolong ka moka tše tharo ka go kgetha dibapadišwa tša bona ka bohlale.