O le ā le Tāua o le A‘oa‘oina o Fanau a o Laiti?

NA MAUA Florence i le ma‘itaga ina ua fāsefulu tausaga o lona matua. Na fai i ai lana foma‘i, atonu o lana pepe lea o le a fanau mai e iai se faalētonu i lona mafaufau. E le‘i mana‘o Florence e faapa‘ū si ana pepe, ma o le i‘uga, na fanau mai iā te ia se pepe e leai ma se mea e faalētonu.

Na ia faaigoa lana tama iā Sitivi ma na vave lava ona fai ma ana masani le faitau ma talanoa i lana pepe. A o faasolo ina matua si ana tama, sa la taaalo faatasi, ma la ō e matamata i nofoaga e manaia i le maimoa ma a‘o lana faitau fuainumera, ma fai la usugā pese. Sa manatua e Florence e faapea: “E oo lava i le taimi e faataele ai, e ma te taaalo ai.” Na i‘u lelei ana taumafaiga.

Na faauu Sitivi mai le Iunivesite o Miami i le 14 o ona tausaga, ma e maualuga fo‘i se tulaga na ia maua. I le 16 o ona tausaga, na māe‘a ai ana a‘oa‘oga faaloia ma e tusa ai ma le tala o lona olaga, na avea o ia ma loia e sili ona la‘itiiti i le Iunaite Setete. O lona tinā o Dr. Florence Baccus, o sē tasi sa faia‘oga muamua ma o se faufautua fo‘i ua litaea, sa tele se taimi o ia su‘esu‘e e tusa o le a‘oa‘oina o tamaiti a o laiti. O lona talitonuga, ua mafai ona oo lana tama i lea tulaga ona o le tele o lona taimi na ua‘i atu ai i le a‘oa‘oina o ia a o tamameamea.

Le Tulaga na Fanau Mai ai ma le Tausiga

O se vala tāua o loo avea ma finauga i tagata e su‘esu‘e i tamaiti i lenei vaitaimi, o le auala lea o loo aafia ai le tuputupu a‘e o le tamaitiiti ona o “tulaga na fanau mai ma ia,” ma le “auala o loo tausi ma a‘oa‘oina ai.” O le talitonuga o le to‘atele o tagata su‘esu‘e e faapea, e aafia le tamaitiiti i na vala uma e lua.

Fai mai Dr. J. Fraser Mustard, o sē e tomai faapitoa i lea tulaga: “O lea ua matou iloa nei mai su‘esu‘ega, e aafia le auala o loo tuputupu a‘e ai le fai‘ai o le tamaitiiti i mea e tutupu iā te ia a o la‘itiiti.” E faapena fo‘i le manatu o le polofesa o Susan Greenfield: “O se faata‘ita‘iga, o lea ua matou iloa, e sili atu ona telē le vaega o le fai‘ai ua faaaogā mo tamatama‘ilima tauagavale o tagata e tā vaiolini, na i lo isi tagata.”

 Le A‘oa‘oina o Fanau

Ua malamalama le tele o mātua i lea tulaga ma ua matuā taumafai ai lava e ave a latou fanau i a‘oga amata e sili ona lelei, ma totogi tupe mo a‘oga musika ma tomai faapena mo fanau. O le talitonuga o nisi e faapea a faamasani le tamaitiiti i le faia uma o ia mea, a oo ina matua, o le a mafai ona ia faia uma na mea. Ua taatele a‘oga e a‘oa‘o faapitoa ai tamaiti, faapea ma a‘oga amata. Ua taumafai nisi mātua e fai mea uma ina ia lelei atu a latou fanau i lo isi tamaiti.

Pe e iai moni se aogā o ia taumafaiga? E ui o loo maua ai e tamaiti ni avanoa lelei i le tele lava o taimi, ua misia ai e nei tamaiti le tāua o le a‘oa‘oina e ala i a latou lava taaloga na o i latou. Fai mai le ‘ausu‘esu‘e, o taaloga faapea, e faaolaola ai le sogasogā o le mafaufau o le tamaitiiti ma ati a‘e ai tomai e feagai ai ma isi tagata, faapea lona mafaufau, ma ona faalogona.

Ua talitonu nisi tagata su‘esu‘e faapea, o taaloga e faatautaia e mātua, ua tutupu a‘e ai ni tamaiti faigatā, e latou te lagona le lē to‘a ma le itagofie, e lē momoe lelei i le pō, ma e vina lava e tigā ma gāoi tino. Fai mai se tasi tagata su‘esu‘e i le mafaufau, e oo ane i le taimi e avea ai nei tamaiti ma talavou, e latou te lē iloa ona faafoe faafitauli ma “e latou te lagona le lē lavā, e iai uiga e latou te faaesea i latou lava, ma e tetee.”

O lea, ua lē iloa e le tele o mātua le mea e ao ona fai. Latou te manana‘o ia taulau olaga o a latou fanau, ae ua latou iloa fo‘i e lē lelei pe a soona uuna‘i tamaiti a o laiti. Pe e iai se auala paleni e faafoeina ai lea tulaga? O le ā le tele e mafai ona aga‘iga‘i ai i luma se tamaitiiti, ma e faapefea ona faatautaia lea tulaga? O le ā e mafai ona fai e mātua ina ia taulau manuia ai a latou fanau? O le a talanoaina lea tulaga i mataupu o loo sosoo mai.

[Ata i le itulau 3]

E aafia le tuputupu a‘e o le fai‘ai o le tamaitiiti i mea e tutupu iā te ia a o la‘itiiti

[Ata i le itulau 4]

O le taalo, e faaolaola ai le sogasogā o le mafaufau, ma ati a‘e ai tomai o le tamaitiiti