Pono ya Beibele

Go Godiša Bana ka Tayo ya Modimo

“Kamoo o ka Beago Melao Yeo Bana ba Gago ba ka se e Tshelego”

“Ditekanyetšo tše Hlano Tšeo o Swanetšego go di Ruta Ngwana wa Gago ge a na le Nywaga e Mehlano”

“Ditsela tše Hlano tša go Kgona go Laola Maikwelo Tšeo Ngwana yo Mongwe le yo Mongwe a Swanetšego go ba le Tšona”

“Maswao a Mahlano ao a Bontšhago Gore o Senya Ngwana”

“Tsela ya go Kgalemela Ngwana ka Motsotso”

GE E BA go kgalemela bana go be go le bonolo, batho ba be ba ka se kgahlegele dihlogo tša dimakasine tše bjalo ka tšeo di lokeleditšwego ka mo godimo. Dipuku tše dintši tšeo di ngwadilwego mabapi le go godišwa ga bana di be di tla fela ganyenyane-ganyenyane. Lega go le bjalo, go godiša bana ga se gwa ka gwa ba bonolo le ka mohla. Gaešita le nywageng e dikete e fetilego, go ile gwa bolelwa gore ‘ngwana wa setlatla o nyamiša tatagwe, gomme motswadi wa gagwe o babja ke pelo.’—Diema 17:25.

Go sa šetšwe dikeletšo tše dintši tšeo di lego gona mabapi le taba ye, lehono batswadi ba bantši ga ba tsebe gabotse gore ba swanetše go godiša bana ba bona bjang. Beibele e thuša bjang tabeng ye?

Tlhaloso ya Kgonthe ya Kgalemelo

Beibele e hlalosa gabotse karolo ya batswadi tabeng ya go kgalemela. Ka mohlala, Ba-Efeso 6:4 e re: “Le lena Bô-tata-xo-bana! Le se kê la befediša bana ba lena; sa lena a e bê xo ba etetša ka xo ba ruta le xo ba eletša tša Morêna.” Lengwalo le le šupa kudu go tate e le yena yoo a swanetšego go etelela pele tabeng ya go hlokomela bana ba gagwe. Go ba gona, mma o thušana le monna wa gagwe.

The Interpreter’s Dictionary of the Bible ge e bolela ka taba ye e re: “Ka lehlakoreng le lengwe, ka Beibeleng kgalemelo e tswalanywa kgaufsi le tlwaetšo, tlhahlo le tsebo gomme ka go le lengwe e tswalanywa le tsholo, go lokiša le kotlo. E dirišwa kudu tabeng ya go tlwaetša ngwana.” Ka gona, kgalemelo ga se feela taba ya go bolela le bana ka thata; e akaretša mehuta ka moka ya tlwaetšo yeo bana ba e nyakago bakeng sa go gola  gabotse. Eupša batswadi ba ka phema bjang go galefiša bana ba bona?

E-ba le Kwelobohloko

Ngwana o galefišwa ke’ng? Anke o nagane ka boemo bjo. O šoma le motho yo a tenegago ka pela le go fela pelo. Ga go na seo a se thabelago ka wena. Go bonagala a bona phošo selong se sengwe le se sengwe seo o se bolelago le seo o se dirago. Gantši o gana mošomo wa gago gomme o go dira gore o ikwe o sa nyakege. Na seo se be se ka se go galefiše le go go nyamiša?

Go ka direga se se swanago ka ngwana ge e ba batswadi ba gagwe ba dula ba mo opelela goba ba mo phošolla ka bogale. Ke therešo gore bana ba nyaka go phošollwa nako le nako le gore Beibele e nea batswadi matla a go dira bjalo. Lega go le bjalo, go galefiša ngwana ka go mo swara ka thata le ka tsela e se nago lerato, go ka mo gobatša maikwelong, moyeng gaešita le mmeleng.

O Swanetše go Ipha Nako ya go ba le Bana ba Gago

Batswadi ba swanetše go ipha nako ya go ba le bana ba bona. Doiteronomio 6:7 ge e bolela mabapi le melao ya Modimo e re: ‘O e tiišetše bana ba gago; o bolele ka yona o dutše ngwakong wa gago, le ge o le tseleng, ge o y’o robala le ge o tsoga.’ Bana ba belegwa ba e-na le maikwelo a go nyaka go kwa lerato le le tseneletšego la batswadi ba bona. Go boledišana le bana ba gago ka tsela e fodilego letšatši le letšatši go ka go thuša go kwešiša maikwelo a bona. Se se ka dira gore go be bonolo go fihlelela dipelo tša bona ka melao ya motheo yeo e theilwego Beibeleng, wa ba tutueletša go ‘boifa Modimo le go lota ditaelo tša gagwe.’ (Mmoledi 12:13) Ye ke karolo e nngwe ya go godiša bana ka tayo ya Modimo.

Ge e ba go godiša bana go ka swantšhwa le go aga ntlo, gona kgalemelo ke e nngwe ya ditlabakelo tša go aga. Ge batswadi ba e diriša gabotse, ba ka aga dika tše di kgahlišago dimelong tša bana ba bona gomme ba ba hlamela go lebeletšana le mathata a bophelo. Diema 23:24, 25 e hlalosa mafelelo a se: “Tata-xo-moloki ó tlo hlalala ka xoxolo; yo bohlale ó thabêlwa ke motswadi w’axwe. A xo thabê tat’axo le mm’axo, xo hlalalê wa xaxo motswadi.”

[Lepokisi/Seswantšho go letlakala 27]

‘GO BA ELETŠA TŠA JEHOFA’

Ba-Efeso 6:4 e bolela ka ‘go ba eletša tša Jehofa.’ Lentšu la Segerika sa mathomong bakeng sa polelwana e rego “xo ba eletša,” Dibeibeleng tše dingwe le fetoletšwe e le “tlhokomedišo,” “keletšo” le “tayo.” Mantšu a ka moka a bontšha gore malapa a swanetše go dira se se fetago go fo bala Beibele goba go ithola kgwara ka go akaretša taba e tšwago thušong ya go ithuta Beibele. Batswadi ba swanetše go kgonthišetša gore bana ba bona ba kwešiša seo se bolelwago ke Lentšu la Modimo, bohlokwa bja go kwa, kamoo Jehofa a ba ratago ka gona le kamoo a ba šireletšago ka gona.

Se se ka fihlelelwa bjang? Judy yo e lego mma wa bana ba bararo, o ile a bona bohlokwa bja gore a dire mo go oketšegilego go feta go dula a gopotša bana ba gagwe ka melao ya motheo ya Modimo. “Ke ile ka lemoga gore ba be ba sa rate ge ke e-hlwa ke ba opelela ka selo se tee nako le nako. Ke ile ka thoma go nyaka ditsela tše dingwe tša go ba ruta. Tsela e nngwe e be e le go tsoma dihlogo dimakasineng tša Phafoga! tšeo di bego di bolela ka dintlha tšeo ka tsela e fapanego. Ka gona, ke ile ka ithuta kamoo nka neago bana dikgopotšo ka gona ntle le go ba galefiša.”

Angelo yoo lapa la gagwe le ilego la lebeletšana le mathata a boima, o anega kamoo a ilego a ruta barwedi ba gagwe go naganišiša ka Lentšu la Modimo: “Re be re bala ditemana tša Beibele gotee, ke moka ke kgethe dipolelwana tše itšego gomme ke hlalose kamoo di bego di šoma ka gona maemong a barwedi ba-ka. Ka morago, ge ba be ba ipalela Beibele, ke be ke ba bona ba naganišiša ka mo go tseneletšego, ba naganišiša ka seo e ba rutago sona.”