E Punto di Bista Bíbliko

Lanta Yu den e Disiplina di Dios

“Kon pa Establesé Reglanan Ku Bo Yunan Lo No Kibra”

“Sinku Norma i Balor Ku Bo Mester Siña Bo Yu di Sinku Aña”

“Sinku Abilidat Emoshonal Ku Tur Mucha Mester Tin”

“Sinku Indikashon di Ku Bo Ta Tolerando Demasiado”

“E Poder di Un Minüt di Disiplina”

SI TABATA fásil pa disipliná mucha, lo no tabatin masha interes den artíkulonan di revista manera esnan menshoná ariba. E avalancha di buki tokante lantamentu di yu lo a kaba na nada. Sin embargo, nunka tabata fásil pa lanta yu. Asta míles di aña pasá, un hòmber a bisa ku “un yu bobo ta tristesa pa su tata, i amargura pa esun ku a pon’é na mundu.”—Proverbionan 17:25.

Awe, apesar di e gran kantidat di konseho riba e tema aki, hopi mayor no sa kon nan tin ku disipliná nan yunan. Ki yudansa Beibel ta ofresé?

E Berdadero Nifikashon di Disiplina

Beibel ta definí bon kla ki papel mayornan tin den dunamentu di disiplina. Por ehèmpel, Efesionan 6:4 ta bisa: “Boso, tatanan, no provoká [“iritá,” NW] boso yunan na rabia, ma lanta nan den e disiplina i instrukshon di Señor.” E teksto aki ta menshoná e tata en partikular komo esun prinsipal ku mester sòru pa su yunan. E mama, naturalmente, ta koperá ku su kasá.

Riba e tópiko aki The Interpreter’s Dictionary of the Bible ta bisa: “Nos ta mira den Beibel ku di un banda disiplina ta estrechamente ligá ku edukashon, instrukshon i konosementu, i di otro banda, e ta ligá tambe ku reprendementu, korekshon i kastigu. Por lo general, e ta ser apliká riba e tereno di eduká yu.” Ku otro palabra, disiplina ta bai hopi mas aleu ku djis skual un yu; e ta inkluí tur e edukashon ku un yu tin mester pa e desaroyá bon. Pero kon mayornan por evitá di provoká òf iritá nan yunan?

 Trata Nan ku Komprenshon

Kiko ta iritá un yu? Pensa riba e siguiente situashon. Bo tin un kolega di trabou ku semper tin mal beis i ku no tin pasenshi. E no gusta bo niun tiki. E ta piki pieu riba tur loke bo bisa òf hasi. Hopi bes e ta rechasá bo trabou i ta pon’é bo sinti manera un hende ku no ta sirbi pa nada. Esei lo no iritá bo i kibra bo?

Meskos por sosodé ku un mucha ora ku su mayornan ta pulushá kuné konstantemente òf ta korigié ku rabia. Bèrdat ku de bes en kuando mucha mester di korekshon i Beibel ta outorisá mayornan pa duna esei. Sin embargo, un mayor ku ta iritá un mucha dor di trat’é severo i sin kariño por kousa daño emoshonal, spiritual i asta físiko.

Bo Yunan Meresé Bo Atenshon

Mayornan mester saka tempu pa nan yunan. Deuteronomio 6:7 ta bisa tatanan relashoná ku Dios su instrukshonnan: “Siña nan ku tur diligensia na bo yunan, i papia di nan ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.” Yunan ta nase ku e nesesidat di sinti ku nan mayornan ta interesá profundamente den nan. Papia ku bo yunan tur dia na un manera trankil; esei lo por yuda bo komprondé nan sintimentunan. Dor di esei por bira mas fásil tambe pa alkansá nan kurason ku prinsipionan di Beibel i motivá nan pa “teme Dios i warda su mandamentunan.” (Eklesiastés 12:13) Esaki ta parti di e disiplina di Dios.

Si nos kompará lantamentu di yu ku konstrukshon di un kas, anto disiplina ta un di e hèrmèntnan di konstrukshon. Ora mayornan us’é na e manera korekto, nan por edifiká kualidatnan deseabel den e personalidat di nan yunan i prepará nan pa enfrentá e retonan di bida. Proverbionan 23:24 i 25 ta deskribí e resultado: “Tata di e hustu lo tin gran goso, i esun ku engendrá un yu sabí lo tin delisia den dje. Laga bo tata i bo mama ta kontentu, i laga esun ku a haña bo regosihá.”

[Kuadro/Plachi na página 27]

E “INSTRUKSHON DI SEÑOR”

Efesionan 6:4 ta menshoná e “instrukshon di Señor.” E palabra original na griego pa e ekspreshon “instrukshon” ta ser tradusí den algun Beibel komo “ser konsiente,” “konseho” i “spièrtamentu.” Tur e términonan aki ta indiká ku mayornan no mester limitá nan na djis lesa Beibel ku nan yunan òf pasa huntu ku nan riba e informashon den un publikashon pa studia Beibel na un manera rutinario. Nan tin ku hasi sigur ku nan yunan ta komprondé e nifikashon di e Palabra di Dios, e importansia di obedensia, e amor ku Yehova tin pa nan i e protekshon ku e ta duna nan.

Kon nan por logra esaki? Judy, mama di tres yu, a mira e nesesidat pa bai mas aleu ku djis rekordá su yunan konstantemente riba prinsipionan di Dios. “Mi a mira ku nan no tabata gusta ora mi ta ripití e mesun kosnan den e mesun manera bes tras bes. Mi a kuminsá buska diferente manera pa mi siña nan. Un manera tabata pa buska artíkulonan den e revista Spièrta! ku a presentá e puntonan ei for di un otro ángulo. Asina mi a siña e muchanan kòrda riba sierto kosnan nesesario sin iritá nan.”

Angelo, kende su famia a pasa den un tempu difísil, ta konta kon el a siña su yu muhénan meditá riba e Palabra di Dios: “Nos tabata lesa Beibel huntu, i despues mi tabata selektá sierto frasenan i splika kon esakinan a apliká na e situashon ku mi yu muhénan tabata aden. Despues, ora nan tabata lesa Beibel riba nan mes, mi tabata mira nan pensa profundamente, meditando riba e nifikashon ku esaki tabatin pa nan.”