“No Ammo La Koma Dagiti Tattao!”

KALPASAN ti panagturposna iti haiskul, ti tiempo nga adu nga agtutubo ti mangikeddeng a mangragpat kadagiti namaterialan a kalat, adda sabali nga inkeddeng ni David. Idi Setiembre 2003, duada nga aggayyem nga immakar idiay Dominican Republic * manipud Illinois, iti Estados Unidos. Ni Davey, kas pangawag kenkuana ti gagayyem ken pamiliana, inkeddengna ti agadal iti Espaniol ken makitimpuyog iti Navas a kongregasion dagiti Saksi ni Jehova iti trabahoda a panangisuro iti Biblia. Nagsayaat ti panangawat ti kongregasion kenkuana. Kinuna ni Juan, ti kakaisuna a panglakayen iti dayta a kongregasion: “Inaramid ni Davey ti amin nga impaaramidmi kenkuana. Sidadaan a nagserbi iti sabsabali, isu a dinungdungngo dagiti kakabsat.”

Nagustuan ni Davey ti destinona. “Maragragsakanak iti biagko ditoy,” insuratna iti gayyemna idiay Estados Unidos. “Makapabang-ar unay ti ministerio! Makisaritakami iti agarup 20 a minuto iti kada balay agsipud ta dumngeg dagiti tattao iti amin nga ibagami kadakuada. Addan innem nga iyad-adalak iti Biblia, ngem kasapulanmi pay ti tulong. Iti gimong iti kongregasionmi a buklen laeng ti 30 nga agibumbunannag ti Pagarian adda timmabuno a 103!”

Ngem nakalkaldaang ta idi Abril 24, 2004, natay ti agtutubo a ni Davey iti maysa nga aksidente agraman ti sabali pay nga agtutubo a kakongregasionna. Agingga iti ipapatayna, maragragsakan ni Davey iti ar-aramidenna, ken pinaregtana ti dadduma nga agtutubo a makikadua kenkuana. “Dayta ti mangbalbaliw iti panangmatmatmo kadagiti bambanag,” imbagana iti maysa nga agtutubo a Saksi.

Ti maysa kadagiti panagbalbaliw a napadasan a mismo ni Davey ket maipapan iti panangmatmat iti material a bambanag. “Bayat ti naminsan a panagawidna,” malagip ti tatangna, “naawis ni Davey a makikuyog iti panag-ski. Dinamagna no mano ti magasto. Idi naibaga ti gatad, imbaga ni Davey a dina kayat a busbosen ti kasta a gatad iti panag-ski laeng ta dayta ket pagbiagnan iti adu a bulan idiay Dominican Republic!”

Naparegta ti dadduma gapu iti regta ni Davey. “Idi nangngegko amin nga ar-aramiden ni Davey ken ti kasta unay a ragsakna,” kinuna ti maysa nga agtutubo iti lugarda, “nabigbigko a mabalinko met nga aramiden dagita a banag. Pinagpanunotnak ti ipapatay ni Davey no anianto ti ibaga dagiti tattao kaniak no matayak ken no adda ngata positibo nga impluensiak iti biagda.”

Kas Saksi ni Jehova, agtalek dagiti dadakkel ken kakabsatna a pagungarento ti Dios ni Davey iti umay a baro a lubong ti kinalinteg. (Juan 5:28, 29; Apocalipsis 21:1-4) Kabayatanna, maliwliwada a makaammo nga inusar ni Davey ti biagna iti kasayaatan a pamay-an​—ti panagserbi iti Namarsua kenkuana. (Eclesiastes 12:1) Idi pampanunotenna ti desisionna nga agserbi iti lugar a dakdakkel ti pakasapulan, kinuna naminsan ni Davey: “Sapay koma ta aramiden met ti tunggal agtutubo ti umasping iti ar-aramidek tapno mariknadanto ti marikriknak. Awanen ti nasaysayaat pay ngem iti panagserbi ken Jehova iti amin a kararua. No ammo la koma dagiti tattao!”

[Footnote]