သင်၏အရေပြားကို ထိန်းသိမ်းကာကွယ်လော့!
သင်၏အရေပြားကို ထိန်းသိမ်းကာကွယ်လော့!
“နေရောင်သည် အလွန်တရာအန္တရာယ်ဖြစ်စေနိုင်ကြောင်း . . . အရေပြား၏ဒီအဲန်အေကို ထိခိုက်ပျက်စီးစေနိုင်ကြောင်း လူတို့သတိမမူကြပေ။ ယင်းထိခိုက်ပျက်စီးမှုများလာလျှင် အရေပြားကင်ဆာဖြစ်နိုင်သည်။”—ဒေါက်တာ မာ့ခ် ဘရစ်ခ်ျ မချင်း၊ အရေပြားကင်ဆာပါရဂူ။
အရေပြားသည် ခန္ဓာကိုယ်၏အကြီးမားဆုံးအင်္ဂါဖြစ်ပြီး သာမန်အမျိုးသားတစ်ဦးတွင် ၂၀ စတုရန်းပေခန့်ရှိပြီး သာမန်အမျိုးသမီးတစ်ဦးတွင် ၁၇ စတုရန်းပေခန့်ရှိသည်။ ယင်းတွင် နာကျင်မှု၊ အထိအတွေ့၊ အပူချိန်တို့ကို တုံ့ပြန်သည့်လက်ခံဆဲလ်များ ပါရှိသည်။ အရေပြားသည် အပူ၊ အအေး၊ ထိခိုက်ဒဏ်ရာဖြစ်မှုတို့အပြင် အဆိပ်အတောက်များ၊ ဓာတုပစ္စည်းများ၊ ညစ်ညမ်းစေသောပစ္စည်းများမှ ခန္ဓာကိုယ်ကို အဓိကကာကွယ်ပေးသည်။ ယင်းသည် ခန္ဓာကိုယ်ထဲသို့အရည်များ မဝင်နိုင်စေရန်နှင့် အပြင်သို့ စိမ့်ထွက်မသွားစေရန် ကာကွယ်ပေးသည်။ သို့သော် နေရောင်သည် အရေပြား၏ ရန်သူဖြစ်လာနိုင်သည်။ နေရောင်ခြည်သည် အသက်အတွက် မရှိမဖြစ်သည့်အရာမဟုတ်ပေလော။
မှန်ပါသည်။ ကျွန်ုပ်တို့မှီခိုနေသောအပင်များ ကြီးထွားလာရန် နေရောင်ခြည် လိုအပ်သည်။ ထို့ပြင် နေရောင်ခြည်ပမာဏအနည်းငယ်သည် အရိုးများကို သန်မာစေသော ကယ်လစီယမ်ဓာတ်ကို စုစည်းပေးသည့် ဗီတာမင်ဒီ ထုတ်လုပ်ပေးသည်။ သို့သော် နေရောင်ခြည်အနည်းငယ်သည် အကျိုးပြုလျှင် ပမာဏများများဆိုက ပို၍ပင်အကျိုးပြုမည်ဟုကား မဆိုလိုပါ။ နေရောင်သည် ခရမ်းလွန်ရောင်ခြည်ကို ထုတ်လုပ်ကာ ယင်းက အရေပြားကို ပြန်လည်ပြုပြင်၍မရတော့သည်အထိ ပျက်စီးစေနိုင်သည်။ အကျိုးဆက်တစ်ခုမှာ အချိန်မတန်ဘဲရင့်ရော်ခြင်းဖြစ်သည်။
သင်၏အရေပြားအား ထိန်းသိမ်းကာကွယ်ခြင်းစာအုပ်က ပို၍ပင်ကြီးမားသောအန္တရာယ်နှင့်ပတ်သက်ပြီး ဤသို့သတိပေးသည်– “ခရမ်းလွန်ရောင်ခြည်သည် [ဆဲလ်ပွားခြင်းစသည့် ဆဲလ်လုပ်ငန်းများကို ထိန်းချုပ်ပေးသော ဗီဇပစ္စည်း] ဒီအဲန်အေကို ထိခိုက်ပျက်စီးစေပြီး ကိုယ်ခံအားစနစ်ကို ဖိနှိပ်ကာ ကင်ဆာဖြစ်စေသည့်ဖြစ်စဉ်များကို ဆွပေးသည့် ခန္ဓာကိုယ်ရှိ ဓာတုပစ္စည်းများကို လှုံ့ဆော်ပေးသည်။” “ကင်ဆာ” ဟူသည့်စကားလုံးသည် ထိတ်လန့်တုန်လှုပ်စေသည်။ သို့သော် အရေပြားကင်ဆာသည် မည်မျှတိုင်ပျံ့နှံ့နေပြီနည်း။ အထိတ်တလန့်ဖြစ်စရာ အကြောင်းရှိသလော။
အရေပြားကင်ဆာ—ခေတ်သစ်ကပ်ရောဂါ
သည်မာ့ခ်လက်စွဲစာအုပ်က အရေပြားကင်ဆာသည် ကမ္ဘာပေါ်တွင် အဖြစ်အများဆုံးကင်ဆာဟု ဖော်ပြသည်။ အမေရိကန်ပြည်ထောင်စုတွင် လူ ၆ ဦး၊ ၇ ဦးတိုင်းတွင် တစ်ဦးသည် အရေပြားကင်ဆာတစ်မျိုးမျိုးကို ခံစားနေရသည်။ သို့သော် ရောဂါဖြစ်နှုန်းမှာ တိုးများလာလျက်ရှိသည်။ အရေပြားကင်ဆာအဖြေဟူသောစာအုပ်တွင် ဒေါက်တာ အိုင် ဝီလီယံ လိန်း၏အဆိုအရ “ယခုအခါ အသက်ခြောက်ဆယ့်ငါးနှစ်ရှိသူ ၅၀ ရာခိုင်နှုန်းတွင် အရေပြားကင်ဆာတစ်မျိုးမျိုးဖြစ်လိမ့်မည်ဟု ခန့်မှန်းရသည်။” အမေရိကန်အရေပြားရောဂါဗေဒအဖွဲ့၏ အဆိုအရ ပြင်းထန်သောမြင်းမည်းကင်ဆာသည် ထိုနိုင်ငံတွင် နှစ်စဉ်လူပေါင်း ၇,၅၀၀ ခန့်ကိုသေဆုံးစေပြီး ပို၍အဖြစ်များလာနေသည်။ အသားမည်းသူများသည် အရေပြားကင်ဆာအဖြစ်နည်းသော်လည်း သူတို့လည်းအန္တရာယ်ရှိသည်။
အရေပြားကင်ဆာသည် အဘယ်ကြောင့် ကပ်ရောဂါတစ်ခုဖြစ်လာရသနည်း။ ပင်လယ်ရေမျက်နှာပြင်အမြင့်၊ လတ္တီတွဒ်၊ တိမ်ဖုံးအုပ်မှုပမာဏ၊ အိုဇုန်းလွှာအခြေအနေစသည့် ဆက်နွှယ်သောအချက် အများအပြားရှိနိုင်သော်လည်း အဓိကတရားခံမှာ နေပူခံလွန်းခြင်းဖြစ်နိုင်သည်။ ဘဝပုံစံများ ပြောင်းလဲခဲ့ပေပြီ။ အဆောက်အအုံအတွင်း အလုပ်လုပ်သူများအတွက် ကမ်းခြေ၌အပန်းဖြေခြင်း၊ တောင်တက်ခြင်း၊ နှင်းလျှောစီးခြင်းစသော အိမ်အပြင်ဘက်အပန်းဖြေမှုများသည် ပို၍ရေပန်းစားလာပေပြီ။ လူတို့၏ဖက်ရှင်များ ပြောင်းလဲခဲ့ပြီ။ တစ်ချိန်က အမျိုးသား အမျိုးသမီးများသည် ရှည်လျားသောရေကူးဝတ်စုံများကို ဣန္ဒြေရရဝတ်ကြသော်လည်း ရေကူးဝတ်စုံများသည် ပို၍ပို၍ မလုံ့တလုံဖြစ်လာကြသည်။ သို့နှင့် အရေပြားကင်ဆာလည်း တိုးများလာရသည်။ ဝတ်ရုံရှည်ကြီးများ၊ ခေါင်းအုပ်များဝတ်ဆင်ကြသည့် သဲကန္တာရတွင် လှည့်လည်နေထိုင်သော ဘယ်ဒူအင်လူမျိုးသည် ကျွန်ုပ်တို့ဂရုမပြုမိသည့်အရာကို သိထားကြသည် မဟုတ်လော။
အလွန်တရာအန္တရာယ်ရှိသော အရေပြားကင်ဆာ
အဖြစ်အများဆုံးအရေပြားကင်ဆာသုံးမျိုးမှာ အောက်ခြေဆဲလ် ကာဆီနိုမာ၊ ချပ်ပြားဆဲလ် ကာဆီနိုမာ၊ ပြင်းထန်သည့် မြင်းမည်းကင်ဆာ တို့ဖြစ်သည်။ အောက်ခြေဆဲလ်နှင့် ချပ်ပြားဆဲလ် ကာဆီနိုမာတို့သည် ပျမ်းမျှတစ်လက်မ၏ နှစ်ဆယ့်ငါးပုံတစ်ပုံမျှသာရှိသော အရေပြား၏အပေါ်ယံအလွှာတွင် စတင်ဖြစ်ပေါ်သည်။ ထိုမြင်းမည်းမဟုတ်သောကင်ဆာများသည် နေရောင်အောက်အလုပ်လုပ်သူများကဲ့သို့ နေပူဒဏ်ကြာရှည်စွာခံရခြင်းကြောင့် ဖြစ်ပုံရပြီး မျက်နှာနှင့်လက်များစသည့် နေရောင်နှင့်ထိတွေ့သည့် ခန္ဓာကိုယ်အစိတ်အပိုင်းများတွင် အဖြစ်များတတ်သည်။ * ဤကာဆီနိုမာများသည် သေးငယ်သောအဖု သို့မဟုတ် မကြာခဏသွေးထွက်တတ်ပြီး လုံးလုံးမပျောက်ဘဲ ကြီးလာသောအနာမှ စတင်ဖြစ်တတ်သည်။ အနီးတစ်ဝိုက်သို့ပြန့်ပွားကာ ပတ်လည်ရှိတစ်ရှူးကို ကျူးကျော်ဝင်ရောက်နိုင်ပေသည်။ အရေပြားကင်ဆာများ၏ ၇၅ ရာခိုင်နှုန်းခန့်မှာ အောက်ခြေဆဲလ် ကာဆီနိုမာများဖြစ်သည်။ ချပ်ပြားဆဲလ် ကာဆီနိုမာသည် အဖြစ်နည်းသော်လည်း မူလနေရာမှ ခန္ဓာကိုယ်၏အခြားအစိတ်အပိုင်းများသို့ နယ်လွန်ပြန့်ပွားနိုင်စရာ အကြောင်းပိုများသည်။ ရောဂါကိုစောစောရှာတွေ့ရန် အရေးကြီးသည်၊ အဘယ့်ကြောင့်ဆိုသော် မြင်းမည်းမဟုတ်သော ကင်ဆာများသည် ကုသရအလွယ်ဆုံး အရေပြားကင်ဆာများဖြစ်သော်လည်း မကုဘဲထားလိုက်ပါက သေစေနိုင်သည်။
အရေပြားကင်ဆာအားလုံးတွင် ၅ ရာခိုင်နှုန်းလောက်သာဖြစ်သည့် ဆိုးရွားလှသော မြင်းမည်းကင်ဆာသည်လည်း အရေပြား၏အပေါ်ယံလွှာမှ စတင်ဖြစ်ပေါ်သည်။ မြင်းမည်းကင်ဆာဖြစ်ရသည့် အဓိကအကြောင်းတစ်ခုမှာ နေပူတွင်အားလပ်ခွင့်ရက်သုံးကြသော အိမ်တွင်းလုပ်သားများ ထိတွေ့သည့်နေပူဒဏ်မျိုးကဲ့သို့ အပြင်းအထန်၊ ခဏခဏ နေပူခံခြင်းကြောင့်ဖြစ်ပုံရသည်။ ပြင်းထန်သည့်မြင်းမည်းကင်ဆာ၏ ၅၀ ရာခိုင်နှုန်းခန့်သည် ရောင်ခြယ်ပါသောမှဲ့များမှ စတင်ဖြစ်ပွားပြီး အထူးသဖြင့် ကျောအထက်ပိုင်းနှင့် ခြေထောက်အောက်ပိုင်းတွင်ဖြစ်တတ်သည်။
ဤအရေပြားကင်ဆာမျိုးသည် သေစေရန်အကြောင်းများသည်၊ စောစီးစွာ မကုသလျှင် သွေးကြောများနှင့် ပြန်ရည်တည်ရှိရာ အရေပြားအတွင်းလွှာသို့ ရောက်ရှိနိုင်သည်။ ထိုနေရာမှ ချက်ချင်း နယ်လွန်ပြန့်ပွားသွားနိုင်သည်။ ကင်ဆာအထူးကုဆရာဝန် ဒေါက်တာ လယ်ရီ နေသန်ဆန်က “မြင်းမည်းကင်ဆာသည် စောစီးစွာကုသလျှင် ကောင်းစွာပျောက်ကင်းနိုင်သောရောဂါဖြစ်သည်။ သို့သော် နယ်လွန်ပြန့်ပွားသွားပြီဆိုလျှင် ဆေးဝါးများ သို့မဟုတ် ဓာတ်ကင်ခြင်းဖြင့် ကုသမှုကို အတော်အသင့် ခံနိုင်ရည်ရှိသွားသည်” ဟုပြောသည်။ မြင်းမည်းကင်ဆာ ပြန့်ပွားသွားသောလူနာ ၂ သို့မဟုတ် ၃ ရာခိုင်နှုန်းလောက်သာ ၅ နှစ်အသက်ရှင်ကြသည်။—မြင်းမည်းရောဂါ၏ အစပိုင်းလက္ခဏာများအတွက် စာမျက်နှာ ၇ ပါလေးထောင့်ကွက်ရှု။
မည်သူတို့သည် အရေပြားကင်ဆာအန္တရာယ်ရှိသနည်း။ နေပူထဲတွင်ကြာရှည်စွာ အလုပ်လုပ်ရသူများ သို့မဟုတ် အပြင်းအထန်၊ ခဏခဏ နေလောင်ခံသူများအပြင် အသားဖြူပြီး ဆံပင်နှင့်မျက်လုံးအရောင်ဖျော့ကာ မှဲ့များ၊ မှဲ့ခြောက်များ၊ မိသားစုမျိုးရိုးတွင်ရောဂါရှိသူများ အထူးသဖြင့် အန္တရာယ်ရှိသည်။ အရေပြားကင်ဆာသည် အသားညိုသူတို့တွင် ဖြစ်နိုင်စရာအလွန်နည်းသည်။ ယင်းက သင်နေလောင်ခံပြီး အသားညိုလာလေ အရေပြားကင်ဆာဖြစ်ရန် အန္တရာယ်ပိုနည်းလေဟု ဆိုလိုပါသလော။ မဆိုလိုပေ၊ အသားညိုခြင်းသည် ခရမ်းလွန်ရောင်ခြည်မှ ကာကွယ်ရန် အရေပြား၏တန်ပြန်တုံ့ပြန်မှုဖြစ်သော်လည်း အသားညိုလာချိန်အတွင်း အရေပြားပျက်စီးသွားသဖြင့် ထပ်ခါတလဲထိခိုက်ပျက်စီးခြင်းက အရေပြားကင်ဆာအန္တရာယ်ကို တိုးများလာစေသည်။
အရေပြားကင်ဆာကုထုံး
အကျိတ်အမျိုးအစား၊ နေရာ၊ အရွယ်အစား၊ ပထမကုထုံးပေါ်မူတည်ပြီး လှီးထုတ်ပစ်ခြင်း၊ ခွဲစိတ်ဖြတ်ထုတ်ခြင်း၊ လျှပ်စစ်အပ်ဖြင့် လောင်ကျွမ်းစေခြင်း၊ အေးခဲစေခြင်း၊ ဓာတ်ရောင်ခြည်ကုထုံးစသည်ဖြင့် ကုထုံးအမျိုးမျိုးရှိသည်။ ခက်ခဲသောအလုပ်မှာ ကင်ဆာဖြစ်နေသောဆဲလ်အားလုံးကို ဖယ်ရှားပစ်ခြင်းဖြစ်သည်။ အဏုကြည့်ကိရိယာအသုံးပြုပြီး လှီးထုတ်သည့် မိုးစ်ခွဲစိတ်ကုသမှုဟုခေါ်သည့် ကုထုံးသည် ကျန်းမာသည့် တစ်ရှူးမြောက်မြားစွာကို မပျက်စီးအောင်ထိန်းသိမ်းပြီး အမာရွတ်ကြီးများ အဖြစ်နည်းစေကာ အောက်ခြေဆဲလ်နှင့် ချပ်ပြားဆဲလ် ကာဆီနိုမာများကို အမြစ်ပြတ်စေရာတွင် ထိရောက်သည် (ကုသပျောက်ကင်းနှုန်း ၉၅ မှ ၉၉ ရာခိုင်နှုန်းအထိရှိသည်)။ မည်သို့ပင်ဖြစ်ပါစေ တစ်ရှူးများပြန်လည်တည်ဆောက်ရန် လိုပေမည်။
အိုမင်းခြင်းဆိုင်ရာ ယူ.အက်စ်. အမျိုးသားတက္ကသိုလ်က ဤသို့ဆိုသည်– “အရေပြားကင်ဆာအားလုံးသည် မပြန့်ပွားမီ စောစီးစွာသိရှိပြီး ဆရာဝန်၏ကုသမှုခံယူလျှင် ကုသပျောက်ကင်းနိုင်သည်။” ထို့ကြောင့် စောစီးစွာသိရှိရန် အလွန်အရေးကြီးသည်။ သို့သော် အရေပြားကင်ဆာကို ကာကွယ်ရန် အဘယ်အရာပြုလုပ်နိုင်သနည်း။
အန္တရာယ်ကင်းသော နေရောင်ခံသည့်အလေ့အထကို သင်ယူထားပါ
အန္တရာယ်ကင်းသောနေရောင်ခံသည့် အလေ့အထကို ကလေးဘဝမှစ၍ သင်ယူထားရန် လိုအပ်သည်။ အရေပြားကင်ဆာဖောင်ဒေးရှင်း၏ အဆိုအရ ‘လူအများစုသည် အသက် ၁၈ နှစ်မပြည့်မီ သူတို့သက်တမ်းတွင် ထိတွေ့ခံစားရသည့်နေရောင်၏ ၈၀ ရာခိုင်နှုန်းကို ရရှိကြသည်။ ကလေးဘဝတွင် နေလောင်၍ပေါက်သောအပူဖုလေးတစ်ခုသည် သက်ကြီးပိုင်းအရွယ်တွင် မြင်းမည်းကင်ဆာဖြစ်နိုင်သည့် အန္တရာယ်ကိုနှစ်ဆဖြစ်စေသည်ဟု ခန့်မှန်းရသည်။’ ယင်းသို့ဖြစ်ခြင်းမှာ အရေပြားကင်ဆာဖြစ်ရန် အနှစ် ၂၀ သို့မဟုတ် ထို့ထက်ပို၍ကြာတတ်သောကြောင့်ဖြစ်သည်။—အန္တရာယ်ကင်းသော နေရောင်ခံသည့်အလေ့အထအတွက် အထောက်အကူပြုသည့် အကြံပြုချက်များကို စာမျက်နှာ ၈ ရှိ လေးထောင့်ကွက်ရှု။
ဩစတြေးလျတွင် အရေပြားကင်ဆာ၊ အထူးသဖြင့် မြင်းမည်းကင်ဆာအလွန်အဖြစ်များသည်။ * အကြောင်းမှာ ထိုနိုင်ငံသည် ဥရောပမြောက်ပိုင်းမှ ပြောင်းရွှေ့လာသည့် အသားဖြူသူများ အများဆုံးနေထိုင်ရာဖြစ်ပြီး ထိုသူအများစုမှာ နေပူသောကမ်းရိုးတစ်လျှောက် နေထိုင်ကြသည်။ ထိုပြောင်းရွှေ့လာသူများနှင့် ပတ်သက်သည့် လေ့လာမှုတစ်ခုက သူတို့ဘဝတွင် ဩစတြေးလျသို့ စောစောရောက်လေ သူတို့၏ မြင်းမည်းကင်ဆာဖြစ်နိုင်သည့်အန္တရာယ် ပိုများလေဖြစ်ခြင်းက ငယ်ရွယ်စဉ်ကတည်းက အန္တရာယ်ကင်းသည့် နေရောင်ခံသောအလေ့အထကို သင်ယူထားရန်လိုအပ်ကြောင်း ပြသသည်ဟူ၏။ ဩစတြေးလျအစိုးရသည် “တီရှပ်ဝတ်လို့၊ ဦးထုပ်ဆောင်းကာ၊ နေလောင်ကာဆေးလိမ်းကြစို့” ဟူသော ဆောင်ပုဒ်ဖြင့် နေရောင်အန္တရာယ်ကို လူတို့အားပညာပေးရန် ကင်ပိန်းကြီးတစ်ခု အစပြုခဲ့သည်။ ဘဝပုံစံတွင် ယင်းသို့ အတော်အသင့်အပြောင်းအလဲများ ပြုလုပ်ခြင်းက ထိုနိုင်ငံရှိ သက်ငယ်အုပ်စုကြား မြင်းမည်းကင်ဆာဖြစ်မှုအပေါ် အကျိုးသက်ရောက်လျက်ရှိသည်။
ခရမ်းလွန်ရောင်ခြည်အဆင့်အေ (ယူဗီ-အေ) နှင့် ခရမ်းလွန်ရောင်ခြည်ဘီ (ယူဗီ-ဘီ) တို့ကိုစစ်ထုတ်ပေးသော ရောဂါပိုးမွှားများသတ်သည့် နေလောင်ကာကွယ်ဆေးလိမ်းခြင်းသည် ကောင်းသည်။ ခရမ်းလွန်ရောင်ခြည် ၈၅ ရာခိုင်နှုန်းသည် တိမ်များကိုထိုးဖောက်နိုင်သောကြောင့် တိမ်ထူသောနေ့များတွင်ပင် လိမ်းထားရန် အရေးကြီးသည်။ ရောင်ခြည်များသည် ရေကိုလည်း ထိုးဖောက်နိုင်သည်။ နေရောင်ခြည်ကာကွယ်သည့်ဝတ္ထု (SPF) အနည်းဆုံး ၁၅ ရှိသည့် နေလောင်ကာလိမ်းဆေးကို ကျွမ်းကျင်သူတချို့ဆရာဝန်များက သုံးစေလိုကြသည်။ ထို SPF ၁၅ သည် အချိန်မည်မျှကာကွယ်ပေးသည်ကိုသိရန် သင်နေပူခံနေကျမိနစ်များကို ၁၅ ဖြင့် မြှောက်ပါ။ နေလောင်ကာလိမ်းဆေးကို အနည်းဆုံး နှစ်နာရီခြားတစ်ကြိမ် လိမ်းပေးသင့်သည်၊ သို့သော် ထိုသို့လိမ်းခြင်းက စုစုပေါင်းကာကွယ်ပေးသည့်အချိန်ကို နှစ်ဆမဖြစ်စေပါ။
ထို့ပြင် အရေပြားကင်ဆာအဖြေစာအုပ်က သင်နေလောင်ကာလိမ်းဆေးသုံးကာမျှဖြင့် အန္တရာယ်မရှိတော့ဟု လွဲမှားစွာမယူဆရန် သတိပေးသည်။ မည်သည့်နေလောင်ကာလိမ်းဆေးမှ နေလောင်ဒဏ်မှ ရာနှုန်းပြည့် မကာကွယ်ပေးသကဲ့သို့ အရေပြားကင်ဆာကိုလည်း မတားဆီးပေးချေ။ အမှန်အားဖြင့် နေလောင်ကာလိမ်းဆေး လိမ်းထားခြင်းက သင့်အား နေရောင်အောက်တွင် ပိုကြာကြာနေစေသောကြောင့် အရေပြားကင်ဆာဖြစ်မည့် အန္တရာယ်ကို သွယ်ဝိုက်သောနည်းဖြင့် တိုးများစေသည်။ စာအုပ်က ဤသို့ဆိုသည်– “အန္တရာယ်ကင်းသော နေလောင်ခံသည့်အလေ့အထကို အဘယ်အရာနှင့်မျှ အစားထိုး၍မရပါ။ လုံခြုံသောအဝတ်အစားဝတ်ခြင်း၊ နေခြစ်ခြစ်တောက်ပူနေချိန်များတွင် အတွင်း၌နေခြင်းတို့သည် အရေပြားကင်ဆာကို ကာကွယ်ရာတွင် ‘ထိရောက်သော’ လက်နက်များဖြစ်သည်။
နေမီးအိမ်နှင့် အသားညိုစေသောအိပ်ရာများသုံးပြီး အဆောက်အအုံအတွင်းမှာပင် အသားညိုလာအောင်ပြုခြင်းကော အသို့နည်း။ အသားညိုအောင်ပြုပြင်ပေးသည့်ဆိုင်တွင် ပြုလုပ်သည့် မိနစ် ၂၀ မျှသည် ခန့်မှန်းခြေအားဖြင့် နေရောင်တွင်နေသည့် လေးနာရီနှင့်ညီမျှသည်ဟု ခန့်မှန်းရသည်။ အိမ်တွင်းတွင် အသားညိုအောင်ပြုခြင်းသည် နေလောင်မှုများ မဖြစ်စေပုံရသည့် ခရမ်းလွန်ရောင်ခြည်အဆင့်အေကို အဓိကအသုံးပြုသောကြောင့် အန္တရာယ်ကင်းသည်ဟု ယူဆကြသည်။ သို့သော် အရေပြားကင်ဆာအဖြေစာအုပ်က “ယူဗီ-အေသည် ယူဗီ-ဘီထက် အရေပြားထဲသို့ ပိုမိုထိုးဖောက်ဝင်ရောက်ပြီး ကိုယ်ခံအားစနစ်ကို ချေဖျက်နိုင်ကြောင်း ယခုသိလာကြပြီ” ဟုဆိုသည်။ အင်တာနေရှင်နယ် မီယာမီသံတော်ဆင့်သတင်းတွင် ဖော်ပြထားသော လေ့လာမှုတစ်ခုက အသားညိုအောင်ပြုပြင်ပေးသည့်ဆိုင်များသို့ တစ်လတစ်ကြိမ် သို့မဟုတ် ထို့ထက်ပို၍သွားသော အမျိုးသမီးများတွင် “မြင်းမည်းကင်ဆာဖြစ်နိုင်ခြေ ၅၅ ရာခိုင်နှုန်းထိရှိ” သည်ဟု ဖော်ပြထားသည်။
ထို့ကြောင့် အန္တရာယ်ကင်းသော နေပူခံသည့်အလေ့အထကို အလေးအနက်သဘောထားရန် လိုအပ်သည်။ ယနေ့ သင်နေပူခံလိုက်သော နေလောင်မှုသည် နောင်အနှစ် ၂၀ သို့မဟုတ် ထို့ထက်ကြာသောအနာဂတ်တွင် အရေပြားကင်ဆာဖြစ်စေနိုင်ကြောင်း သတိရပါ။ အချို့သူတို့သည် အရေပြားကင်ဆာကို မည်သို့ခါးစည်းခံခဲ့ကြသနည်း၊ ကိုင်တွယ်ဖြေရှင်းရန် အဘယ်အရာက သူတို့ကိုထောက်ကူခဲ့သနည်း။
[အောက်ခြေမှတ်ချက်များ]
^ အပိုဒ်၊ 10 ခရမ်းလွန်ရောင်ခြည်သည် ရောဂါတိုက်ဖျက်ရာတွင် အဓိကကဏ္ဍမှပါဝင်သော အရေပြားအပြင်လွှာရှိ ရောဂါတိုက်ဖျက်ပေးသည့် အရေပြားဆဲလ်ကိုလည်း ပျက်စီးစေနိုင်သည်။ အရေပြားကင်ဆာအဖြေ ဟူသည့်စာအုပ်က ဤသို့ဆိုသည်– “ထို့ကြောင့် ရောဂါတိုက်ဖျက်သည့်စနစ် ပျက်စီးသွားခြင်းက အရေပြားကင်ဆာကို ကြီးထွားစေသည်ဟု အချို့သိပ္ပံပညာရှင်များ ယူဆကြသည်။”
^ အပိုဒ်၊ 19 နယူးဆောက်ဝေးလ်ရှိ ကင်ဆာကောင်စီအရ “ဩစတြေးလျလူမျိုး နှစ်ဦးလျှင်တစ်ဦးသည် သူတို့၏သက်တမ်းအတွင်း အရေပြားကင်ဆာတစ်မျိုးမျိုးကို ခံစားရလိမ့်မည်။” ၁၉၉၈ ခုနှစ်က ဩစတြေးလျနိုင်ငံ၊ ကွင်းစလန်ပြည်နယ်တွင် ၁၅ ဦးလျှင် ၁ ဦးသည် မြင်းမည်းကင်ဆာဖြစ်နိုင်သည့် အန္တရာယ်ရှိခဲ့သည်။
[စာမျက်နှာ ၇ ပါ လေးထောင့်ကွက်/ရုပ်ပုံ]
ပြင်းထန်သော မြင်းမည်းကင်ဆာ၏ အဓိကလက္ခဏာများ
၁။ အချိုးမညီခြင်း။ မြင်းမည်းကင်ဆာအများစု၏ အဦးပိုင်းလက္ခဏာမှာ အချိုးမညီခြင်း (မျက်နှာပြင်နှစ်ဖက် မတူညီခြင်း) ဖြစ်သည်။ ကင်ဆာမဟုတ်သည့် သာမန်မှဲ့များမှာ လုံးဝန်းပြီး အချိုးညီသည်။
၂။ အနားပုံမမှန်ခြင်း။ အစောပိုင်း မြင်းမည်းကင်ဆာများ၏ အနားများသည် များသောအားဖြင့် မညီမညာဖြစ်ပြီး အနားများတွန့်နေ၊ အထစ်ထစ်ဖြစ်နေနိုင်ပေသည်။ သာမန်မှဲ့များသည် အနားများ ပိုချောမွတ်ပြီး ညီညာကြသည်။
၃။ အရောင်ကွဲပြားခြင်း။ မြင်းမည်းကင်ဆာ၏ ပထမပိုင်းလက္ခဏာမှာ အညို၊ အနက်စသည့် ကွဲပြားသောအရောင်များဖြစ်သည်။ မြင်းမည်းကင်ဆာကြီးထွားလာသည်နှင့် အရောင်များမှာ အနီ၊ အဖြူ၊ အပြာတို့ပေါ်လာနိုင်သည်။ သာမန်မှဲ့များမှာ အညိုရောင်တစ်မျိုးတည်းသာဖြစ်သည်။
၄။ အချင်း။ မြင်းမည်းကင်ဆာများသည် သာမန်မှဲ့များထက် ပိုကြီးကာ အချင်းအားဖြင့် တစ်လက်မ၏လေးပုံတစ်ပုံအထိကြီးလာတတ်သည်။
[Credit Lines]
ရင်းမြစ်– အရေပြားကင်ဆာဖောင်ဒေးရှင်း
Skin samples: Images courtesy of the Skin Cancer Foundation, New York, NY, www.skincancer.org
[စာမျက်နှာ ၈ ပါ လေးထောင့်ကွက်/ရုပ်ပုံ]
သင့်အရေပြားကို ထိန်းသိမ်းကာကွယ်ရေးအတွက် အကြံပြုချက်များ
၁။ အန္တရာယ်ရှိသော ခရမ်းလွန်ရောင်ခြည် အပြင်းထန်ဆုံးအချိန်များ၊ အထူးသဖြင့်နံနက် ၁၀:၀၀ နာရီမှ ညနေ ၄:၀၀ နာရီအတွင်း နေရောင်ထိတွေ့ခြင်းကို ကန့်သတ်ထားပါ။
၂။ သင်၏အရေပြားကို ခြေဆုံးခေါင်းဆုံး အနည်းဆုံးသုံးလတစ်ကြိမ် စစ်ဆေးပါ။
၃။ နေရောင်အောက်တွင်ရှိသည့်အချိန်များ၌ SPF ၁၅ သို့မဟုတ် ထို့ထက်ပိုမြင့်သော ရောဂါပိုးသတ်သည့်နေလောင်ကာလိမ်းဆေး သုံးပါ။ နေရောင်မခံမီ မိနစ် ၃၀ ကြိုပြီး များများလိမ်းပါ၊ ထို့နောက် နှစ်နာရီခြားတစ်ကြိမ် လိမ်းပါ။ (နေလောင်ကာလိမ်းဆေးကို အသက်ခြောက်လအောက် ကလေးများအား မလိမ်းပေးသင့်ပါ။)
၄။ အသက်ကြီးချိန်တွင် အရေပြားကင်ဆာဖြစ်စေသည့် ထိခိုက်ပျက်စီးမှုသည် ကလေးဘဝတွင် အစပြုသောကြောင့် သင့်ကလေးအား ငယ်ရွယ်စဉ်ကတည်းက နေရောင်ကာကွယ်သည့် အလေ့အထကောင်းများကို သင်ပေးထားပါ။
၅။ ဘောင်းဘီရှည်များ၊ ရှပ်အင်္ကျီလက်ရှည်များဝတ်ကာ အနားသားကျယ်သော ဦးထုပ်များ ဆောင်းကာ ခရမ်းလွန်ရောင်ခြည်ကာကွယ်သည့် နေကာမျက်မှန်များ တပ်ပါ။