Usa ka Hinlong Balay—Kon Unsay Ikaamot Natong Tanan

Tinampo sa magsusulat sa Pagmata! sa Mexico

PAGKAMAKAPAHAYAHAY ang pagpuyo sa usa ka hinlo nga palibot! Apan, tungod sa pagdaghan sa mga basura diha sa mga siyudad, misamot ka lisod ang paghupot ug hinlo ug hapsay nga palibot.

Ang gobyerno naningkamot sa paghupot sa mga dalan nga hinlo pinaagi sa pagkolekta sa mga basura, apan bisan pa niini, ang basura nagtipun-og gihapon diha sa pipila ka dapit, diin ngil-ad kining tan-awon ug makadaot sa panglawas sa mga tawo. Tungod sa nagtipun-og nga basura, modagsang ang mga ilaga, uk-ok, ug ubang mga peste nga makahatag ug sakit. Aduna ka bay mahimo bahin niini? Oo, aduna. Hupting hinlo ug hapsay ang imong balay ug palibot.

Ang Hustong Kaisipan

Ang ubang tawo nagtuo nga ang mga kabos dili makahupot ug hinlo nga mga balay ug kasilinganan. Apan, dili kini tinuod. Ibutang ta, ang kakulang ug kuwarta mas makapalisod sa paghupot ug hinlo nga palibot. Apan, sama sa giingon sa usa ka Katsilang panultihon, “dili magkasumpaki ang kakabos ug ang kahinlo.” Sa laing bahin, ang pagkasapian sa usa ka tawo dili garantiya nga huptan niyang hinlo ang iyang palibot.

Ang kahinlo sa sulod ug sa palibot sa balay nagdepende sa kaisipan nga mopalihok kanato sa paghinlo sa atong balay. Sa pagkatinuod, ang paghupot ug hinlo nga balay nagdependeg dako sa kaisipan sa tibuok pamilya. Tungod niini, maayong susihon nato kon unsay ikaamot natong tanan aron mahuptan natong hinlo ang atong balay ug kasilinganan.

Usa ka Regular nga Eskedyul sa Paghinlo

Ang mga buluhaton sa balay sa usa ka inahan daw walay kataposan. Gawas sa paghikay ug pagkaon ug pag-andam sa mga bata alang sa eskuylahan, siya usab kinahanglang manghinlo sa balay ug sa palibot niini. Nakamatikod ka ba nga ang inahan mao ang kasagarang manghipos sa mga bulingon o mga gamit nga gipasagdan lang sa iyang mga anak diha sa ilang mga lawak? Ang usa ka detalyadong eskedyul sa paghinlo nga naglangkit sa tibuok pamilya makatabang sa pagpagaan sa trabaho sa inahan.

Ang ubang mga asawa nakadesidir nga may mga butang nga kinahanglang akatahon ug hinloan kada adlaw, samtang ang ubang dapit sa balay mahimong hinloan kas-a sa usa ka semana, ug ang uban pa mahimong hinloan kas-a sa usa ka bulan. Gani, adunay pipila ka butang nga mahimong hinloan kas-a sa usa ka tuig. Pananglitan, sa Panimalayng Bethel, sa mga sangang buhatan sa mga Saksi ni Jehova sa matag nasod, ang bug-os nga paghinlo sa gamayng lawak nga butanganag sinina himoon kas-a sa usa ka tuig. Panahon kini sa pagdispatsar sa mga butang nga wala na gamita ug sa paghimo sa lawak nga butanganag sinina nga hapsay tan-awon. Aduna usay regular nga eskedyul sa pagtrapo sa mga bungbong.

 May mga dapit sa balay, sama sa kasilyas, nga kinahanglan gayong hinloan aron malikayan ang sakit. Bisan tuod kinahanglang hinloan ang kasilyas kada adlaw, ang mas bug-os nga paghinlo, tingali kas-a sa usa ka semana, makasanta sa pagdaghan sa mga bakterya. Ang uban nagtuo nga ang nagkabaga nga tagiptip sa inodoro dili kalikayan ug nga kini dili gayod matangtang. Apan, adunay mga balay diin ang mga kasilyas kanunayng hinlo ug walay lama. Ang gikinahanglan lang mao ang kanunayng paghinlo ug ang paggamit ug nahiangayng mga kemikal nga panghinlo.

Ang kosina kinahanglang hinloan usab pag-ayo. Bisan tuod adlaw-adlaw kang manghugas ug mga plato ug manghinlo sa kosinilya ug sa talad palibot sa lababo, matag karon ug unya​—tingali kas-a sa usa ka semana​—kinahanglan nimo kining hinloan nga mas bug-os pa, sama diha sa likod sa mga kasangkapan ug ilalom sa lababo. Ang makanunayong paghinlo sa mga kabinet nga pondohanag pagkaon o butanganag mga plato makatabang aron dili kini puy-an ug mga uk-ok ug ubang makadaot nga mga insekto.

Pagtinabangay sa Pamilya

Ang ubang mga ginikanan naghimog mga lagda alang sa ilang mga anak ug nagbansay kanila aron nga inigbiya nila sa ilang lawak sa buntag paingon sa eskuylahan, ang ilang kama hapnig na, ang ilang  mga bulingon nahipos na, ug ang ilang mga gamit humpid na. Usa ka lagda nga makatabang sa tanan mao, “Ang tanang butang kinahanglang adunay tinong butanganan ug kon kuhaon, kini kinahanglang ibalik didto.”

Dugang pa, ang ubang membro sa pamilya mahimong hatagan ug espesipikong buluhaton o kaha pahinloon sa usa ka bahin sa balay. Pananglitan, ang amahan ba ang mangareglar sa garahe ug bug-os nga manghinlo niini labing menos kas-a sa usa ka tuig? Mahimo ba siyang tabangan sa usa sa mga anak sa paghimo niini? Kinsa may gitudlo sa pagguna sa lagwerta o pagputol sa sagbot? Unsa ka subsob kini himoon aron ang nataran sa balay hapsay tan-awon? Aduna bay lawting ang balay o usa ka bodega nga kinahanglang susihon aron ang wala-kinahanglanang mga butang madispatsar ug mahuptang hapsay ang maong dapit? Kon mao, kinsay mohimo niana? Idelegar sa ubang mga ginikanan ang maong mga buluhaton ngadto sa ilang mga anak, kinsa magpulipuli sa paghimo sa mga buluhaton.

Busa, paghimog maayong eskedyul sa paghinlo sa inyong balay. Ikaw man mismo ang manghinlo o ginatabangan ka sa mga membro sa imong pamilya o kaha kinahanglan kang mosuweldo ug katabang, hinungdanon ang pagbaton ug usa ka detalyadong eskedyul sa paghinlo. Usa ka inahan  nga naghupot ug hinlo kaayo nga balay nagtug-an kanamo kon sa unsang paagi nagtinabangay ang tibuok niyang pamilya aron huptan kining hinlo: “Gibahinbahin namo sa akong tulo ka anak nga babaye ang mga buluhaton sa balay. Si Norma Adriana maoy manghinlo sa sala, sa duha ka kuwarto, balkonahe, ug tugkaran. Si Ana Joaquina maoy mag-atiman sa kosina. Ako ang manglaba ug mag-akatar sa ubang mga butang samtang si María del Carmen ang manghugas ug plato.”

Ang Gawas sa Balay Hapsay Tan-awon

Komosta ang gawas sa balay? Ikaw man nagpuyo sa usa ka dako nga balay o sa usa ka gamay nga balay, hinungdanon ang pagbaton ug eskedyul sa paghinlo ug pagreper sa gawas nga mga bahin sa balay. Pananglitan, basin naukang na ang bisagra sa ganghaan sa koral sa imong balay. Nasayod ka kon unsa ka ngil-ad tan-awon ang ganghaan kon kini dili ayohon hangtod nga kini sa kataposan mahugno. Tinuod usab kini sa mga basura nga pasagdang magtipun-og sa ganghaan sa balay o sa mga aseras sa duol. Ang mga lata, mga gamit, ug ubang mga butang usahay pasagdan lang usab nga magtipun-og sa gawas sa balay, ug kini mahimong puy-an ug mga peste.

Ang ubang mga pamilya nakadesidir nga kas-a sa usa ka adlaw o usa ka semana, depende sa panginahanglan, ilang silhigan ug hinloan ang palibot sa ilang balay, lakip na ang aseras ug bisan gani ang dalan atubangan sa ilang balay. Tinuod nga sa ubang mga dapit ang kagamhanan adunay maayo kaayong sistema sa paghupot ug hinlo nga kasilinganan, apan sa ubang mga dapit, ang gobyerno walay ingon niana nga programa. Walay duhaduha nga ang atong kasilinganan mas nindot tan-awon ug mas dili makapameligro sa panglawas kon kitang tanan mohimo sa atong bahin sa paghupot niini nga hinlo.

Ang ubang mga pamilya wala lang magbaton ug eskedyul sa paghinlo nga naglakip sa mga buluhaton nga gihisgotan sa ibabaw kondili naglista usab niini diha sa papel ug nagpapilit niini sa dapit diin ang tibuok pamilya makakita ug makasunod niini. Kini makapatunghag maayo kaayong mga resulta. Siyempre, wala nato mahisgoti ang tanang butang nga angay nimong masayran bahin sa pagpanghinlo. Pananglitan, kinahanglan kang mopili kon unsang kemikal nga panghinlo ang maayo diha sa inyong dapit ug kon unsang mga galamiton ug himan ang maabot nimong paliton.

Kining pipila ka sugyot walay duhaduhang makatabang sa tibuok pamilya sa pagkakita sa panginahanglan sa paghupot ug hinlong balay ug palibot. Hinumdomi nga ang paghupot ug hinlo nga balay ug palibot wala magdepende sa kahimtang sa imong panalapi, kondili sa imong kaisipan bahin niini.

[Kahon sa panid 20, 21]

Usa ka Praktikal nga Eskedyul sa Paghinlo sa Balay

Gamita ang blangkong luna aron idugang ang imong kaugalingong mga nota diha sa listahan

Hinungdanong pahinumdom: Ang pagmiksla ug kemikal nga mga panghinlo mahimong peligroso kaayo, ilabina ang pagsagol sa klorin ug ammonia

✔ Adlaw-adlaw

❏ Lawak-katulganan: Hapniga ang mga higdaanan ug humpira ang mga gamit

❏ Kosina: Hugasi ang mga plato ug hinloi ang lababo. Hupting hapsay ang talad palibot sa lababo ug ang mga lamesa. Silhigi, lampasohi o trapohi ang salog kon gikinahanglan

❏ Kasilyas: Limpiyohi ang lababo ug inodoro. Humpira ang mga gamit

❏ Sala ug ubang mga lawak: Humpira ang mga gamit. Trapohi o pagpagi ang mga muwebles. Silhigi, trapohi, lampasohi o i-vacuum ang salog kon gikinahanglan

❏ Tibuok balay: Ilabay ang basura sa hustong dapit

✔ Senemana

❏ Lawak-katulganan: Ilisi ang hapin sa kama. Silhigi, trapohi, lampasohi o i-vacuum ang salog kon gikinahanglan. Trapohi ang muwebles

❏ Kosina: Trapohi ang kosinilya, mga kasangkapan, ug ang lababo ug mga gripo. Trapohi ang salog

❏ Kasilyas: Trapohi ang mga bungbong sa banyo, mga gripo, ug lababo. Esprihi ug kemikal nga pangpatay ug kagaw ang inodoro, kabinet, ug ibabawng mga bahin sa ubang butang. Ilisi ang mga tualya. Silhigi o trapohi ang salog

✔ Binulan

❏ Lawak-katulganan: Labhi ang mga habol.

❏ Kasilyas: Trapohi ug maayo ang tanang bungbong

❏ Tibuok balay: Hinloi ang bayanan sa mga pultahan. I-vacuum o limpiyohi ug maayo ang hapin sa mga lingkoranan

❏ Hardin, nataran, garahe: Silhigi ug hinloi kon kinahanglan. Ayaw pasagding magtipun-og ang mga basura o ang mga butang nga wala na kinahanglana

✔ Kada unom ka bulan

❏ Lawak-katulganan: Hinloi ang mga kobrekama sumala sa instruksiyon sa tiggama

❏ Kosina: Habwaig sulod ug hinloig maayo ang repridyeretor

❏ Kasilyas: Habwaig sulod ug hinloi ang mga estante ug hunos. Idispatsar ang wala-kinahanglana o hupas nga mga tambal o kemikal

❏ Tibuok balay: Trapohi ang mga lampara, bentilador, ug mga suga. Trapohi ang mga pultahan. Hugasi ang mga eskrin, bentana, ug bayanan sa mga bentana

✔ Tinuig

❏ Lawak-katulganan: Habwaig sulod ug hinloi pag-ayo ang butanganag sinina. Idispatsar ang wala-kinahanglanang mga butang. I-vacuum o pagpagi ug maayo ang mga kutson. Hinloi ang mga unlan sumala sa instruksiyon sa tiggama

❏ Kosina: Habwaig sulod ug hinloi pag-ayo ang mga estante, butanganag plato, ug mga hunos. Idispatsar ang wala-kinahanglanang mga butang. Iroga ang mga kasangkapan aron mahinloan ang salog sa ilalom

❏ Tibuok balay: Trapohi ang mga bungbong. Hinloi ang mga hapin sa lingkoranan ug mga kortina sumala sa instruksiyon sa tiggama

❏ Garahe o bodega: Silhigi pag-ayo. Humpira o idispatsar ang wala-kinahanglanang mga butang

[Mga hulagway sa panid 22]

“Ang tanang butang kinahanglang adunay tinong butanganan ug kon kuhaon, kini kinahanglang ibalik didto”

[Mga hulagway sa panid 22]

Basin makatabang ang pagdispatsar sa mga butang nga wala na nimo gamita