Bafsa ba a Botšiša . . .

Ke Swanetše go Swara Bjang Ngwanenyana yo a Nkgahlegelago?

“Susan o ile a gata mogato wa pele go mpotša gore o a nthata, gomme ga ke a ka ka ba le bothata ka seo. Ke ile ka re o ntšwela kae.”—James. *

“Ge e ba monna a sa botege ditirišanong tša gagwe le basadi, mafelelo e ka ba a kotsi.”—Roberto.

KGAREBE e nngwe e sa tšwa go go botša gore e nyaka go go kgopela selo se itšego. O ile wa mmona gantši le e-na le bagwera gomme ke motho yo a kgahlišago go bolela le yena le go dira dilo le yena. Eupša seo a go boditšego sona se go makaditše. Kgarebe e nyaka go ratana le wena gomme e rata go tseba ge e ba le wena o ikwa ka tsela e swanago.

Se se ka go makatša ge e ba o e-na le kgopolo ya gore monna ke yena a swanetšego go gata mogato wa pele tabeng ya go fereya. Gaešita le ge gantši go le bjalo, gopola gore ga se a roba melao ya motheo ya Beibele ka go gata mogato wa pele. * Therešo yeo e ka go thuša gore o arabele ka tsela e swanetšego.

Ka morago ga go nagana ka taba ye, o ka phetha ka gore o sa le yo monyenyane kudu go ka beana mabaka goba gore ngwanenyana yo ga a go kgahle gakaalo gona bjale. O ka ba wa ikwa o le molato, wa ipotšiša ge e ba ka tsela e itšego o ile wa mo nea kgopolo e fošagetšego. O swanetše go dira’ng? Sa pele, o swanetše go naganela maikwelo a gagwe.

Naganela Maikwelo a Gagwe

Nagana ka tsela yeo ngwanenyana a ikwago ka yona ge a le boemong bjo. Ka ge a fišegela go itirela leina le lebotse, a ka be a ile a tšea matšatši a mantši a boa-boeletša mantšu a gagwe. Ka morago ga go kopanya mantšu a swanetšego le go myemyela ka tsela e swanetšego, o ile a lwa le megopolo ya kgonagalo ya gore o ka mo gana. Mafelelong, ge a šetše a rapile sebete ka mo go lekanego, o ile a fenya letšhogo la gagwe gomme a go botša seo se lego ka pelong ya gagwe.

Ke ka baka la’ng a be a ikemišeditše go dira selo se se thata? Mohlomongwe o tšeegile maikwelong. Ka lehlakoreng le lengwe, a ka no ba a kgahlwa ke dika tša gago tše dibotse go feta batho ba bangwe. Ka gona, mohlomongwe mantšu a gagwe a be a akaretša theto e sa lebanyago yeo o sa e hwetšego letšatši le letšatši.

 Dintlha tše di akareditšwe mo ka morero wa go go gopotša gore o be le botho, e sego go tutuetša phetho ya gago. Kgarebe e bitšwago Julie e re: “Gaešita le ge monna a sa ikwe ka tsela e swanago, o swanetše go thabela gore motho yo mongwe o a mo kgahlegela. Ka gona, go e na le gore a fo re ga ke go rate, o swanetše gore bonyenyane a mo gane ka tsela e nago le botho.” Anke ga bjale re nagane gore o ikemišeditše go dira sona seo—‘go mo gana ka tsela e nago le botho.’

Go thwe’ng ge e ba o ile wa mo gana nakong e fetilego? Ga bjale o ka lekega gore o mo galefele. Lwantšha teko yeo. Diema 12:18 e re: “Xo na le babolabodi ba ma-hlaba-wa-lerumô; xe e le leleme la mohlale ké moreku.” Ke bjang o ka bolelago ka “leleme la mohlale”?

O ka fo mo leboga bakeng sa go go botša maikwelo a gagwe le bakeng sa go go tšeela godimo ka tsela ye. Kgopela tshwarelo bakeng sa go mo nea kgopolo e fošagetšego gaešita le ge o be o sa lemoge seo. Mmotše ka tsela e nago le botho eupša e le e kwagalago gore ga o ikwe ka mo go swanago. Ge e ba a sa kwešiše karabo ya gago gomme go nyakega gore o bolele o tiišitše lentšu, o sa dutše o swanetše go phema mantšu a bogale le a hlabago. O swaragane le maikwelo a gagwe a bonolo, ka gona o se fele pelo. Ge e ba o be o le boemong bja gagwe, o be o tla thabela gore le yena a go gane ka tsela e nago le botho, na ga go bjalo?

Lega go le bjalo, a ka no phegelela gore o mo forile ka boomo. A ka ba a go botša ditiro tše itšego tšeo di mo dirilego gore a ikwe ka tsela yeo a ikwago ka yona. A ka re: ‘O sa gopola ge o be o nnea letšoba lela?’ goba ‘Go thwe’ng ka seo o mpoditšego sona ge re be re sepela gotee kgweding e fetilego?’ Bjale o swanetše go itlhahloba ka mo go tseneletšego.

Lebeletšana le Therešo

Gantši banyakišiši ba kgale ba be ba lebelela dinaga tšeo ba di utolotšego e le dilo tša go thopša le tšeo ba ka ikholago ka tšona, gomme banna ba bangwe lehono ba lebelela basadi ka tsela yeo. Ba thabela tswalano ya lerato eupša ga ba nyake boikarabelo bja lenyalo. Ba leka go kgahla basadi ka go bapala ka maikwelo a bona ntle le go itlama. Monna yo bjalo o hwetša lerato la mosadi ka bofora. Mogolo yo mongwe wa Mokriste o re: “Go bonala masogana a mangwe a bapala ka makgarebe le go ratana le makgarebe a go fapa-fapana. Ga se mo gobotse go bapala ka maikwelo a mosadi ka mokgwa woo.” Boithati bjo bjalo bo lebiša kae?

“Ó etša lexafa le-betša-dirumola le mesêbê le dibolai. Ké tša motho e a forilexo, ’me a nape a re: Naa ke be ke sa bapale?” (Diema 26:18, 19) Ge monna a nyaka go ratana le mosadi ka mabaka a boithati, mafelelong mosadi o tla bona maikemišetšo a gagwe a kgonthe. Ka gona, bofora bja gagwe bo ka mo hlaba pelong, bjalo ka ge phihlelo e latelago e bontšha.

Lesogana le lengwe le be le nyaka go ratana le kgarebe eupša le se na kgahlego ya go e nyala. Le ile la e iša mabenkeleng a go jela a maemo a  godimo gomme ba ya meletlong gotee. Le be le thabela go ba le yona, gomme kgarebe yona e thabela tlhokomelo ya lona, e dumela gore le nyaka go e nyala. Ge e lemoga gore kgahlego ya lona e be e le ya bogwera feela, e ile ya kwa bohloko kudu.

Ge e ba o ile wa nea kgarebe yeo e sa tšwago go go botša maikwelo a yona pono e fošagetšego le ge o be o se wa ikemišetša go dira bjalo, gona o swanetše go dira’ng? Go ikemela le go leka go itokafatša go tla fo mo galefiša le go feta. Nagana ka molao wo wa motheo wa Beibele: “Mmipa-dikaroxô-tš’axwe xa a lêtlêxe; xo tlo xauxêlwa e a ipexaxo ’me a lahla dikaroxô.” (Diema 28:13) Ka gona bolela therešo. Amogela boikarabelo bja gago go se kwešišaneng le ge e le gofe. Le gona ge e ba o ile wa ikhola ka maikwelo a gagwe ka boomo, dumela gore o dirile phošo e kgolo. Kgopela tshwarelo go tšwa pelong.

Lega go le bjalo, o se ke wa letela gore go kgopela ga gago tshwarelo ke phetho ya taba. Kgarebe e ka tšea nakwana e go galefetše. O ka swanelwa ke go hlalosa ditiro tša gago go batswadi ba gagwe. O ka ba wa swanelwa ke go lebeletšana le ditla-morago tše dingwe. Ba-Galatia 6:7 e re: “Se motho a se byalaxo, ké sôna se a tl’o xo se buna.” Eupša ka go kgopela tshwarelo le go dira seo o ka se kgonago go lokiša phošo, o tla mo thuša gore a tšwele pele ka bophelo bja gagwe. Le gona, phihlelo ye e tla go ruta gore o ‘lote molomo wa gago gore o se ke wa bolela bofora’ ditabeng tšohle tša bophelo, go akaretša le tšeo di akaretšago batho ba bong bjo bo sa swanego le bja gago.—Psalme 34:14, PK.

Naganišiša Pele o Araba

Eupša go thwe’ng ge e ba o tloga o rata go tseba kgarebe yeo gakaone? Ge e ba go le bjalo, o swanetše go lemoga gore go beana mabaka gotee le go ratana ga e fo mekgwa ya go ithabiša. Maikwelo a matla ao batho ba babedi bao ba beanago mabaka ba a hlagolelago magareng ga bona a ba lebiša tlemong ya lenyalo. Ge ba nyalane, maikwelo ao a thuša go ba tlemaganya bjalo ka monna le mosadi. Go tseba se go ka go kgoma bjang gona bjale?

Ka morago ga go nagana ka kgarebe ye, o ka thoma go lemoga gore e kgahliša ka ditsela tše dintši. Kgarebe e butše mojako, gomme wena o tla rata go o boloka o butšwe. Eupša go e na le go itahlela lefereyong, gata megato gona bjale bakeng sa go šireletša bobedi bja lena bohlokong bjo bogolo bjo bo ka le welago ka morago.

Ka nako e nngwe o ka rata go boledišana le batho ba sego kae ba godilego tsebong bao ba mo tsebago. Dira tšhišinyo ya gore le yena a dire se se swanago ka bao ba go tsebago. Yo mongwe le yo mongwe wa lena o swanetše go botšiša batho bao ba godilego tsebong mabapi le seo ba naganago gore ke dika tše dibotse gotee le mafokodi a yo mongwe. Le gona o ka kgopela bagolo ba Bakriste gore ba go nee ditlhaloso tša bona. Ke mo gobotse go tseba ge e ba motho yoo o mo ratago a e-na le botumo bjo bobotse ka phuthegong ya Bokriste.

Eupša mo gongwe o ka ipotšiša gore, ‘Ke ka baka la’ng batho ba bangwe ba swanetše go tsena kudu gakaakaa bophelong bja-ka bja ka thoko?’ Therešo ke gore gaešita le ditabeng tša motho ka noši tše bjalo ka tša lerato, ke gabohlale go hwetša pono ya batho ba bangwe. Ge e le gabotse se se dumelelana le Mangwalo, ka gobane Diema 15:22 e re: “Maanô . . . a tlo kxônêxa xe baeletši ba ka ata.” Batho ba bagolo bao o tlago go bolela le bona ba ka se go direle phetho. Eupša “keletšô e tšwaxo pelong” yeo ba ka go neago yona e ka utolla dika tša motho yoo gotee le tša gago tšeo o sa di bonego.—Diema 27:9.

James, yoo go boletšwego ka yena pejana, o ile a dira se. Gaešita le ge a be a dula a nnoši, o ile a boledišana le batswadi ba gagwe ka Susan. Ka morago bobedi bja bona ba ile ba fana maina a batho ba godilego tsebong bao ba ka ba botšago ge e ba ba ka swanelana bjalo ka banyalani. Ka morago ga go kwa dipego tše dibotse ka yo mongwe le yo mongwe wa bona, James le Susan ba ile ba thoma go beana mabaka go bona ge e ba go ka kgonega gore ba nyalane. Ge e ba o ka latela mokgwa o swanago pele o ka rata motho kudu, o tla ikwa o šireletšegile kudu ka phetho yeo o tla e dirago mafelelong.

Ka godimo ga tšohle, rapela Jehofa. Ka ge go beana mabaka e le mogato o lebišago lenyalong, kgopela Modimo gore a go thuše go bona ge e ba tswalano ya gago le kgarebe e ka lebiša pakaneng yeo. Sa bohlokwa le go feta, kgopela Modimo gore a le thuše ka bobedi go dira diphetho tše di tla le batametšago kgaufsi le yena. Lethabo la lena ka bobedi le ithekgile ka seo.

[Mengwalo ya ka tlase]

[Diswantšho go letlakala 17]

Ge e ba o tloga o se na kgahlego, hlokomela gore o se ke wa fetiša kgopolo e fošagetšego