No Dagiti Dragon Agpukawda

“IDI nakaasidegakon iti agarup tallo a pie, pagammuan ta nagbaliw ti kababalin ti dragon,” insalaysay ni David Hall iti magasin nga Ocean Realm. “Simmardeng a mangan sa pimmanaw. Naglemmeng iti asideg a karuotan a kelp sa nagbiit a nagpukaw.” Masmasdaaw a kinunana: “Naglaing a manglimo daytoy nga animal.” Iti dayta a panagrana, naisangsangayan ti gundaway ni Hall a nakakita iti maysa kadagiti nakaskasdaaw unay a pagarigan iti nakaparsuaan a naglaing a manglimo iti uneg ti danum​—ti leafy sea dragon iti Australia.

Nabuntog dagiti leafy sea dragon ken agpannurayda unay iti pananglimo tapno maliklikanda dagiti mabisin nga ikan nga agkaan kadakuada. Ti duyaw ken berde a garitda ken ti karkarna a kasla bulong a pigarda ti makagapu a kasla agbaliw ti kolorda isu a dandani saan ida a makita no addada iti aglawlaw dagiti mula iti baybay. Agbabansag pay ketdi ken kasla agpallapallayog ti panaglangoyda, isu a naan-anay a matuladda ti panagpallayog ti mayan-anud a mula iti baybay.

Daytoy naglaing a pananglimoda ti makagapu a siaannad a maasitganda dagiti kuros a napanaganan iti mysid shrimp a paboritoda a kanen. “Agkurri unay ti panangallilawda ta dagiti kuros saanda nga ibilang ida a napeggad,” kinuna ti maysa a managpaliiw. Ti sea dragon basta alun-onenna dagiti kuros a sibubukel bayat ti panaglangoyna a lumabas, a dagus a sultopenna ida iti atiddog a subsobna. Mabayag ti baet dagitoy nga apagbiit a panaganup​—agingga iti tallo nga aldaw​—​no kontenton ti sea dragon a di umak-akar, ta tiliwenna laeng ti aniaman a lumabas a biktimaenna.

Masarakan laeng dagiti leafy sea dragon iti ababaw a danum iti makin-abagatan nga igid ti baybay iti Australia. Ti kasla uleg a bagida ken kasla bulong a pigarda ket kaasping dagiti nakaay-ayat a dragon dagiti Tsino, a nakaipasurotan ti naganda. Daddadakkel dagitoy a miembro ti pamilia dagiti ikan a pakairamanan dagiti kabalio marino, ta dumakkelda agingga iti 17 a pulgada.

No maipapan iti panagpasngay, agsinnukat ti akem ti kalakian ken kabaian. Wen, ti lalaki ti agsikog ken agpasngay! No asidegen ti primavera, ti agbalinto nga ama ket mangpataud iti ipusna iti aduan dara a pagkaptan dagiti itlog nga agarup 120 a babassit a pagkaptan, wenno pagkargaan ti itlog. Kalpasanna, ti kabaian a sea dragon ikabilna dagiti natayengteng a de rosas nga itlogna iti daytoy a pagkaptan dagiti itlog. Ipisokna ti tunggal itlogna iti saggaysa a pagkargaanda. Uppat agingga iti innem a lawas kalpasanna, maipasngayen ti 20 a milimetro nga annak a sea dragon, a tunggal maysa ket kaasping dagiti nagannak kadakuada.

Talaga a dagitoy nakaay-ayat a parsua ket sabali manen a pagarigan iti kinalaing ni Jehova a Dios nga agparsua ken iti panagayatna iti arte!​—Salmo 104:24, 25.

 [Dagiti Ladawan iti panid 25]

Masikog a kalakian a leafy sea dragon nga addaan kadagiti itlog; ipakita ti bassit a ladawan ti asideg a pannakaretrato ti pagkaptan dagiti itlog

[Dagiti Ladawan iti panid 25]

Manglimlimo a leafy sea dragon; ti bassit a ladawan a nalawag a mangipakita iti animal

[Picture Credit Line iti panid 25]

Amin a retrato malaksid iti pagkaptan dagiti itlog: Michael Morris-Immersedimagery@scubadiving.com