Kalit nga Nawad-ag Trabaho!

“Nalisang gayod ako sa dihang nawad-an akog trabaho. Ang akong pagtamod sa kaugalingon anam-anam nga nawala.”​—Tony, Alemanya.

“Nabug-atan kaayo ako. Ingong nag-inusara nga ginikanan, nabalaka ako kon unsaon nako pagpakaon sa akong duha ka anak ug pagbayad sa mga balayronon.”​—Mary, India.

“Naminghoy gayod ako sa dihang nawad-an akog trabaho, ug nabalaka ako kon makakaplag pa ba ako ug lain.”​—Jaime, Mexico.

SA TIBUOK kalibotan, daghang tawo ang nag-antos sa samang situwasyon nga naagoman ni Tony, Mary, ug Jaime. Niadtong 1999, gibanabana nga 10 porsiyento sa mga trabahante sa Uropa ug Sentral Asia​—mga 23 ka milyong tawo​—ang walay trabaho. Sa pipila ka dili-kaayo-ugmad nga kayutaan, kapin sa ikaupat ka bahin sa mga trabahante ang walay trabaho. Sa Tinipong Bansa, “tanantanan, duolan sa 2.6 ka milyon ang nawad-ag trabaho sa miaging 28 ka bulan,” matod sa The New York Times sa Hulyo 2003.

Sa daghang kayutaan, lisod kaayo ang pagpangitag trabaho. Pananglitan, matag tuig, daghang graduwado sa hayskul ug kolehiyo ang mangitag trabaho. Dugang pa, ang pagkuhag kurso sa kolehiyo o pagbaton ug linaing pagbansay dili garantiya nga ang usa makakaplag ug trabaho sa iyang gipili nga propesyon. Busa, komon na kaayo karon sa mga tawo ang pagbalhinbalhin ug trabaho. Kinahanglan pa ganing usbon sa uban ang matang sa trabaho nga ilang himoon.

Kon ikaw nawad-ag trabaho, unsay imong mahimo aron mas dako ang imong purohan nga makakaplag ug trabaho? Ug sa dihang may trabaho ka na, unsay imong mahimo aron mahuptan kana?