Hinali Lang nga Nadulaan sing Trabaho!

“Sang madula ang akon trabaho, daw ginbasyahan ako sing isa ka balde sang mabugnaw nga tubig. Nagnubo gid ang pagtamod ko sa akon kaugalingon.”​—⁠Tony, Alemanya.

“Daw subong bala nga may mabug-at nga bato nga nagatungtong sa akon ulo. Subong nagasolo nga ginikanan, nagpalibog ako kon paano ko pakaunon ang akon duha ka bata kag mabayaran ang akon mga balayran.”​—⁠Mary, India.

“Nagluya gid ang akon buot sang madulaan ako sing trabaho, kag nabalaka ako kon bala makakita pa ako sing lain nga trabaho.”​—⁠Jaime, Mexico.

SA BUG-OS nga kalibutan, minilyon ang kaangay nanday Tony, Mary, kag Jaime. Sa pagsulod sang bag-o nga siglo, ginbanabana nga 10 porsiento sang mga mamumugon sa Europa kag Central Asia​—⁠mga 23 milyones ka tawo​—⁠ang wala sing trabaho. Sa pila ka indi tanto ka mauswagon nga mga pungsod, kapin sa un-kuarto sang mga mamumugon ang wala sing trabaho. Sa Estados Unidos, “halos 2.6 milyones ka trabaho ang nadula sang nagligad nga 28 ka bulan,” siling sang The New York Times sang Hulyo 2003.

Sa madamo nga kadutaan daku gid nga mga balagbag ang nagaatubang sa mga nagapangita sing trabaho. Halimbawa, kada tuig ang mga gradwado sa hayskul kag kolehiyo nga nagapangita sing trabaho nagabaha. Isa pa, indi garantiya ang natigayon nga kurso ukon pinasahi nga paghanas nga ang isa makakita sing trabaho sa iya ginpili nga propesyon. Amo kon ngaa, kinaandan na karon nga magbag-obag-o sing trabaho ang mga tawo. Ang iban gani nagabag-o pa sing karera.

Kon madulaan ka sing trabaho, ano ang mahimo mo agod mas daku ang posibilidad nga makakita ka sing trabaho? Kag kon makakita ka na sing trabaho, ano ang mahimo mo agod mahuptan ini?