Go Felelwa ke Mošomo o sa Letela!

“Ge ke be ke felelwa ke mošomo, ke ile ka ikwa eka ke tšhetšwe ka meetse a go tonya. Ke ile ka inyatša o šoro.”—Tony, kua Jeremane.

“Ke ile ka ikwa eka ke rwešitšwe lefsika le legolo. Bjalo ka motswadi yo a se nago molekane, ke be ke tshwenyegile ka taba ya gore ke tla fepa bjang bana ba-ka ba babedi le gore ke tla lefelela bjang ditshenyagalelo tša-ka.”—Mary, kua India.

“Ke be ke nyamile kudu ge ke be ke felelwa ke mošomo, gomme ke be ke ipotšiša gore afa ke tla hwetša o mongwe gape.”—Jaime, kua Mexico.

BATHO ba dimilione lefaseng ka bophara ba lebeletšane le maemo a thata a swanago le a Tony, Mary le Jaime. Mo e ka bago mathomong a lekgolo le la nywaga, go ile gwa akanyetšwa gore 10 lekgolong ya batho bao nywaga ya bona e ba dumelelago gore ba ka šoma kua Yuropa le Bogareng bja Asia, e lego batho ba ka bago dimilione tše 23 ba be ba nyaka mošomo. Dinageng tše dingwe tšeo di sa hlabologago, palo ya ka godimo ga kotara ya batho bao nywaga ya bona e ba dumelelago gore ba ka šoma ga e šome. Ka July 2003, The New York Times e ile ya bolela gore kua United States, “mešomo e dimilione tše ka bago 2,6 e ile ya nyamelela ka mo go feletšego dikgweding tše 28 tše di fetilego.”

Dinageng tše dintši go tsoma mošomo go tšweletša mathata a magolo. Ka mohlala, ngwaga le ngwaga barutwana ba bantši bao ba feditšego dithuto tša bona kholetšheng goba yunibesithing le sekolong se se phagamego ba nyaka mošomo. Go oketša moo, go ba le degree goba tlwaetšo e kgethegilego ga se kgonthišetšo ya gore motho o tla hwetša mošomo wa modiro woo a ithutetšego wona. Ka baka leo, lehono go tlwaelegile kudu go bona batho ba fetoša mešomo ya bona ka makga a mantši, nakong ya ge ba sa dutše ba šoma. Ba bangwe ba bile ba swanelwa ke go ithutela mošomo o mofsa ka mo go feletšego.

Ge e ba o sa šome, o ka dira’ng go kaonefatša ditsela tša gago tša go hwetša mošomo? Ge e ba o šetše o o hweditše, o ka dira’ng gore o se ke wa go lahlegela?