E Mafai Ona E Maua le Fiafia Moni!

I LE lalolagi aoao, e tele tagata ua iai le manatu, o le auala e maua ai le fiafia, o le iai o se taavale manaia, ma tele tupe i le faletupe, po o se galuega maualuga, ma se fale telē, faapea mea eseese faaonapōnei, ma lelei le fuaitino. Ae faamata e faalagolago le fiafia i ia mea?

Ua taʻua e se lipoti faapitoa a le Time e faapea ua “tele le mau suʻesuʻega ua fai e faatatau i le fiafia, o faamoemoega, o lagona mautinoa, ma uiga e maua ai le soifua lelei.” O mea ua iloa mai i ia saʻiliʻiliga, e maofa tele ai le toʻatele. Auā o loo aliali mai pea i faamaoniga e faapea, o tagata e ola ma le manatu e latou te maua le fiafia mai tupe, le lauiloa, po o le aulelei, ua faasesēina. O le mea moni, o loo ati aʻe o latou olaga i se faavae e mafai ona oo ai ni aafiaga lē lelei i o latou mafaufau, ma atonu e oo ai ina maua i le gasegase o le loto mafatia.

I le Iunaite Setete, ua agaʻi ina toʻatele tagata mauʻoa na i lo le taimi muamua. Ae ua faapea mai le Time: “E lē faapea ai ua faaopoopo lo tatou fiafia.” E faapena foʻi le tulaga o isi atunuu. E ui ina saosaoa le tamaoaiga lea ua oo i ai Saina, ae ua faatoʻateleina foʻi i latou e lē o fiafia. I lenā atunuu, ua avea le pule i le ola ma “māfuaaga autū o le maliliu o tagata mai le va o le 15 i le 34 tausaga,” o le faamatalaga lenā mai le pepa Access Asia. O se tasi o vala ua māfua ai lea tulaga, ona ua uunaʻia faamalosi talavou ia taulau i se lalolagi ua sili ona faigatā, i galuega ma le saʻilia o le lelei faaletino.

Ua manino la, e lē avea le sologa lelei faaletino, ma tulaga e aveesea ai le popole, ae ua faateleina ai. O le manatu o se suʻesuʻega mai se tasi iunivesite e faapea: “Ua avea le auala ua tatou ola ai, ma māfuaaga autū ua lē sologa lelei ai i faalogona ma le mafaufau.” Na faapea mai Van Wishard, o sē e suʻesuʻe i faiā faaletagata: “I le tele o kamupani, pe a faapea e fai inisiua tau soifua mālōlōina o tagata faigaluega, ua avea le soifua mālōlōina o le mafaufau ma faalogona o tagata ma vala autū o inisiua.”

E oo foʻi i tamaiti, ua aafia ona o le televave o suiga i le lalolagi. Ua iai tusi mo tamaiti e taʻi valu tausaga ua “faamatalaina ai faailoga e latou te iloa ai ua lagona le omia, ma le auala e feagai ai ma ia tulaga,” o le faamatalaga lea a Wishard. E tusa ma se pepa o faamatalaga e faatatau i le gasegase o le loto mafatia i nisi atunuu i Sisifo, ua vave le faatelega o tamaiti ua maua ai, e tusa o le 23 pasene i le tausaga, ae o le vaega lea ua tele ina aogā i ai fualaau e faatoʻafilemu ai, o tamaiti e leʻi amata ona aʻoʻoga.”

Ua faatuputupulaʻia foʻi le mataʻu, ma e lē na o le popole i le tulaga tau tupe ua māfua ai. Ua matataʻu tagata po o le ā e tupu ā taeao, ona ua ova uunaʻiga faapolotiki ma ua sasao le mapo lotu o tagata. O fea e maua mai ai se fesoasoani?

E uiga ese le matagofie o le olaga na aʻoaʻo mai e Iesu pe ā ma le lua afe tausaga ua tuanaʻi, ma e faaitiitia ai foʻi le popole. Sa faaautū lana aʻoaʻoga i se manatu e moni ma faigofie. Na ia faapea mai: “E fiafia i latou e manatu mamafa i o latou manaʻoga faaleagaga.” (Mataio 5:3, NW) Ioe, na uunaʻia e Iesu ē na faalogologo iā te ia ia uaʻi atu i le mea e sili ona manaʻomia e le tagata, o le upu moni lea faaleagaga e faatatau i Lē na faia i tatou ma Lana fuafuaga mo i tatou.

O le a tatou iloaina mai mataupu e sosoo mai, o le a aogā lea upu moni ia iloa ai po o le ā moni e tāua, ma oo atu ai i se olaga e sili atu ona fiafia ma iai sona uiga. Ua faaalia mai ai foʻi se faamoemoe matagofie, ona e faaalia mai e lea upu moni faaleagaga le fuafuaga a le Atua.

[Faamatalaga faaopoopo i le itulau 3]

Pe e faalagolago le maua o le fiafia i mea faaletino?