Le Auala e Maua ai le Fiafia Moni

A LELEI le fua e fai ai se kuka ma agavaa lē e kukaina, o le a lelei ma susua se taumafataga e maua mai ai! E tai faapena foʻi le mauaina o le fiafia. E lē tasi se vala e ala mai ai, ae e tele ni vala eseese o le olaga a tuufaatasi, ona maua lea o le fiafia. E aofia ai galuega, tafaoga, taimi mo le aiga ma uō, ma galuega faaleagaga. E aofia ai foʻi ma vala e lē iloagofie, e pei o uiga, ma faanaunauga, ma sini i le olaga.

O le mea e lelei ai, ona e lē o tuu mai e saʻili e i tatou lava ia po o le ā le mea e maua ai le fiafia. Ua aumaia faamatalaga i se tusi matagofie ua foaʻi mai e Lē na Faia i tatou, o le Tusi Paia lea, ma ua lomia atoa, po o ni ona vaega foʻi, i gagana e sili atu ma le 2,377, o lona uiga ua sili atu gagana ua lomia ai na i lo se isi lava tusi i le lalolagi aoao!

Ua iloa le naunau alofa mai o le Atua ia fiafia ma sologa lelei faaleagaga tagata uma, ona o le tele o Tusi Paia ua maua i le tele o gagana. (Galuega 10:34, 35; 17:26, 27) Ua fetalai mai le Atua: “O aʻu . . . o loo aʻoaʻo iā te oe i mea e aogā.” Ua ia folafola mai lo tatou mauaina o le filemu, e “tusa ma se vaitafe,” pe afai tatou te usitai i ana poloaʻiga.—Isaia 48:17, 18.

Ua faamanatu mai ai i lea folafolaga upu a Iesu ia na taʻua i le mataupu muamua e faapea: “E fiafia i latou e manatu mamafa i o latou manaʻoga faaleagaga.” (Mataio 5:3, NW) E lē o faatatauina lea manaʻoga faaleagaga i le uiga mapo lotu. Ae o se mea e aafia ai lo tatou olaga atoa. Ua faaalia ai lo tatou naunau e faalogo, ma ia aʻoaʻoina e le Atua, i le iloa lelei ua sili lona silafia o i tatou. Na faapea mai Ero, o se tasi ua silia ma le 50 tausaga o suʻesuʻeina le Tusi Paia: “O le mea ua ou matuā mautinoa ai lava o le Tusi Paia e mai le Atua, ona pe a faatatauina  ana aʻoaʻoga, e ese le aogā!” Ia o se faaaʻoaʻoga, seʻi o tatou talanoaina ni fautuaga e sili ona lelei mai le Tusi Paia, e tusa o mea e pei o le saʻilia o le ʻoa ma fiafiaga.

Fautuaga Poto e Tusa o Tupe

Ua fetalai mai Iesu: “Auā e lē ola se tasi i le tele o ana mea ua iā te ia.” (Luka 12:15) Ioe, o lou aogā o se tagata, aemaise lava i le silafaga a le Atua, e lē faalagolago i le tele o au tupe. O le mea moni, o le saʻilia o ʻoa, e atili ai ona e popole, ma mou ese ai le olioli i le olaga, ma leai ai se taimi mo mea e sili ona tāua.—Mareko 10:25; 1 Timoteo 6:10.

E tusa ai ma le faamatalaga a Richard Ryan, o se polofesa i le Iunaite Setete e suʻesuʻe i amio ma manatu o tagata, o le tele e saʻili ai tagata ia faamalieina i mea faitino, o le itiiti foʻi lea ona faamalieina. O le faamatalaga lenei a Solomona, o sē na tusia le Tusi Paia: “O lē ua manaʻo i le ario, e lē malie o ia i le ario; o lē ua manaʻo foʻi i le oloa tele, e leai sana mea e maua ai.” (Failauga 5:10) E ono faatusaina lea tulaga i se mageso na māfua mai le ū a se namu, o le tele e te valuina ai, o le tetele foʻi lenā o le mageso, ma oo ai lava ina avea ma poʻu.

Ua fautua mai le Tusi Paia ina ia tatou toʻaʻaga e galulue ma ia fiafia i mea lelei mai iā tatou galuega. (Failauga 3:12, 13) O le a tatou maua ai le fiafia iā i tatou lava, ma o se isi foʻi lea vala o le fiafia. Atonu foʻi e mafai ona tatou maua le fiafia mai nisi mea lelei o lenei olaga. Ae e iai le eseesega o le fiafia i mea lelei e maua e ala mai tupe, ma le avea o le saʻili o tupe ma taulaʻiga autū o lou olaga.

E Iai Lava le Taimi Tatau mo Fiafiaga

O le iai o se vaaiga faaleagaga i le olaga, e fesoasoani lea ia maua ai aogā sili mai fiafiaga eseese. Na auai Iesu i ni fiafiaga e aofia ai ni faigaʻai tetele. (Luka 5:29; Ioane 2:1-10) Ae e lē o mea ia na avea ma māfuaaga autū o lona olioli i le olaga. O mea faaleagaga, na sili ona faafiafiaina ai o  ia, e aofia ai le fesoasoani i isi ia iloa le Atua ma lana fuafuaga mo tagata.—Ioane 4:34.

Na saʻiliʻili Solomona i mea faafiafia eseese ia iloa ai, po o le ala lea e maua ai le fiafia. Na ia faapea ifo iā te ia lava: ‘Ou te tofotofo iā te oe i le olioli, ina ia e fiafia i mea lelei.’ E leʻi faatemutemu le faamalieina e lenei tupu mauʻoa o ia lava i fiafiaga eseese, ae na matuā sulu i ai ma lona ulu! Ae, o le ā sona lagona mulimuli ane? Na ia tusi mai: “O le mea faatauvaa lava lea.”—Failauga 2:1.

E masani ona lagonaina le gaogao ma le leai o se mālie, e i latou e saʻili e faafiafia i latou lava. O le mea moni, ina ua faatusatusa e tagata suʻesuʻe ia le saʻili i faafiafiaga ma mea e pei o galuega aogā, galuega faaleagaga, ma le faatasitasi ma aiga, na iloa ai, e sili ona itiiti le aogā o le saʻili i fiafiaga.

Ia Agaalofa ma Loto Faafetai

O tagata fiafia, e agaalofa ma naunau i isi, ae e lē manatu tau o i latou lava. Na fetalai Iesu: “E sili le manuia [po o le fiafia] o lē na te foaʻi atu, i lo lē na te talia mai.” (Galuega 20:35) E lē gata i le foaʻi faaletino, ae e mafai foʻi ona foaʻi lo tatou taimi ma le malosi, lea atonu e sili atu ona talisapaia, aemaise lava e o tatou aiga. E ao i tane ma avā ona maua taimi e faatasitasi ai, ina ia māfana ma fiafia a latou faaipoipoga, ma ia maua foʻi taimi e faatasitasi ai mātua ma fanau, ia talanoa, ia faaali i ai le alofa, ma aʻoaʻoina i latou. O le faia faapea e tagata uma o le aiga, o le a sologa lelei ai ma avea ai le aiga o se mea e maua ai le fiafia.

I le isi itu, pe e te faaalia le agaga “faafetai” pe afai e faaaogā e se tasi lona taimi ma lona malosi mo oe, po o se isi foʻi auala? (Kolose 3:15) O le ola e tusa ai ma le agaga moni o lea upu, e aogā tele iā tatou faiā ma isi, ma saga faaopoopo ai foʻi i lo tatou fiafia. Pe a faaali atu e se tasi lona loto faafetai iā te oe, pe e te lē lagona ai ea la le fiafia?

O le faaalia o le loto faafetai o le a atili ai ona tatou mataala i mea lelei ua oo iā i tatou. I se suʻesuʻega na vaavaaia lelei, na faia i le Iunivesite i Kalifonia i Riverside, i le Iunaite Setete, na fai atu ai lē na faia le suʻesuʻega i tagata na suʻesuʻeina e fai ni a latou “tusi faafetai,” po o api e faamaumau ai mea ua māfua ai ona latou loto faafetai. E lē o se mea e ofo ai ona, a o faasolo le ono vaiaso, na oo iā i latou le lagona, ua sili atu ona faamalieina i le olaga.

O le ā se lesona mai lea suʻesuʻega? Po o le ā lava le tulaga o lou olaga, ia e loto faafetai i mea lelei ua e maua. O le mea tonu lava lenā ua uunaʻia i tatou e le Tusi Paia ia fai ina ua faapea mai: “Ia outou saga olioli pea lava, . . . ia outou faafetai i mea uma lava.” (1 Tesalonia 5:16, 18) Ina ia mafai ona fai lea tulaga,  e ao ona tatou taumafai ia manatua mea lelei ua oo iā i tatou. Ae ā pe a fai sou sini faapena?

Ina ia Fiafia, e Tāua Tele le Alofa ma le Faamoemoe

Ua moni le upu e manaʻomia e tagata le alofa, mai le taimi e fanau mai ai seʻia oo ina oti. A aunoa ma lea, e lagona le vaivai. Ae o le ā tonu lava lea mea e taʻu o le alofa? I nei aso, ua tele auala ua faauiga i ai e tagata, ae e ese le manaia o le faamatalaga a le Tusi Paia. Ua faamatalaina faapenei: “E onosai le alofa, e agamalu, e lē losilosi le alofa, e lē mitamita vale le alofa, e lē faafefeteina, e lē amio matagā, e lē saʻilia e ia ana lava mea, e lē faaitaitagofie, e lē faitau leaga ua tuuina mai e nisi, e lē fiafia i le amio leaga, a e fiafia i le faamaoni. O le alofa e lavātia mea uma, e leai se mea e gata mai ai lona faatuatua, ma lona faamoemoe ma lona onosai.”—1 Korinito 13:4-8.

E matuā lē manatu faapito lava le alofa moni! E na te faamuamua le fiafia o isi, auā “e lē saʻilia e ia ana lava mea.” O le tulaga faanoanoa lea ua iai, ua tauau ina mou atu lea ituaiga o alofa. I le valoaga tāua a Iesu e faatatau i le iʻuga o lenei faiga o mea, na ia taʻua ai o le a ‘maalili le alofa o le toʻatele o tagata.’—Mataio 24:3, 12; 2 Timoteo 3:1-5.

Ae e lē faapea o le a tumau ai lea tulaga e faavavau, auā o se faatigā lea iā Ieova, o Lē o le alofa lava ia! (1 Ioane 4:8) E lē o toe umi ona aveesea lea e le Atua o i latou uma o loo tumu i le ita ma ua pulea e le manaʻo tele. O le a ia faasaoina na o i latou e taumafai e ati aʻe le alofa lea o loo taʻua i luga. Ona mafai ai lea ona soo le lalolagi i le filemu ma le fiafia. Ua mautinoa e taunuu le folafolaga a le Tusi Paia e faapea: “E toe itiiti, ona leai lea o le tagata amio leaga; e te mafaufau foʻi i le mea sa i ai o ia, a e leai lava. A o ē agamalu, e fai mo latou le nuu; e faafiafia foʻi i latou iā te i latou ona o le manuia e tele.”—Salamo 37:10, 11.

Seʻi manatu la i le taimi o le a faatumulia ai aso uma i le ‘fiafia’! E lētioa a faapea mai le Tusi Paia: “Olioli i le faamoemoe.” (Roma 12:12) Pe e te fia iloa atili lea faamoemoe matagofie mai le Atua mo tagata usiusitai? Ia faitau la i le mataupu lea e sosoo mai.

[Faamatalaga faaopoopo i le itulau 7]

“E sili le manuia [po o le fiafia] o lē na te foaʻi atu, i lo lē na te talia mai.”—Galuega 20:35

[Pusa/Ata i le itulau 5]

Tala o Tagata ua Taulau—Po o Taulau Moni?

E iai taimi e tatou te faalogo ai i tala e faatatau i tagata na ola mai i ni olaga faigatā, ae na avea ma ē mauoloa ona o lo latou tauivi. I le pepa San Francisco Chronicle, ua faamatala mai i se lipoti e faatatau i le fiafia e faapea: “O ia tala, e tusa o se faamaoniga lea o lo latou tauivi ma faigatā, ma ua iʻu lelei ai, e ui ina faanoanoa o latou olaga a o laiti. E tusa ai ma suʻesuʻega, o le faafitauli i lea manatu, ona atonu e lē faapea ua iʻu lelei, ae pau o lea, ua mauoloa.”

[Pusa/Ata i le itulau 6]

O le Fiafia e Tupu ai le Soifua Lelei

Ua avea le uiga fiafia ma vailaau aogā. Ua fai mai se lipoti mai le Time: “O le fiafia ma isi uiga e pei o le faamoemoe, le mautinoa, ma le loto malie, e foliga mai e faaitiitia ai le avanoa e maua, pe leaga ai le fatu, le māmā, maʻi suka, toto maualuga, le fulū, ma maʻi e aafia ai le isu ma le faaʻī.” E lē gata i lea, o se suʻesuʻega na faia i Holani mo le iva tausaga i ni tagata mamaʻi ua loa lo latou soifua, na faaalia ai, o se uiga fiafia ma se vaaiga mautinoa, e paʻū ai i le 50 pasene le oo vave o le oti iā i latou!

E lē o mautinoa po o faapefea tonu ona aafia le tino ona o le mafaufau. Ae ua faaalia i suʻesuʻega, o tagata e iai le uiga mautinoa ma faamoemoe fiafia i le lumanaʻi, e lē tele se cortisol (o se vailaau e iai pe a lagona le omia) e maua i o latou tino, lea e faalavelave i galuega a le tino e puipuia ia lava.

[Ata i le itulau 4, 5]

E maua se taumafataga susua pe a mulimuli i le fua e fai ai se kuka, e maua foʻi le fiafia pe a mulimuli i taʻiala a le Atua