Mga Batan-on Nangutana . . .

Nganong Kinahanglan man Akong Mobasa?

“Dili ko makalahutay sa pagbasa. Motan-aw na lang kog TV.” —Margarita, 13, Rusya.

“Kon papilion ko sa pagbasa o pagbasketbol, magbasketbol na lang ko.”—Oscar, 19, Tinipong Bansa.

KON nakaabot ka ug basa kutob dinhi, lagmit naamgohan nimo nga importante ang pagkat-on sa pagbasa. Bisan pa niana, naghunahuna ka tingali nga ang pagbasag usa ka libro o bisag usa ka artikulo sa magasin morag susama sa pagtomar ug tambal: Nahibalo ka nga makaayo kana kanimo, apan dili lang ka gustong motomar niana.

Ang Pagmata! nag-interbiyo ug mga batan-on gikan sa 11 ka nasod aron sa pagsusi kon unsay ilang ikasulti bahin sa mga hagit ug mga kaayohan sa pagbasa. Ang mosunod maoy ilang giingon.

Nganong hagit alang kanimo ang pagbasa?

“Morag wala na akoy panahon sa pagbasa.”—Semsihan, 19, Alemanya.

“Hago ang pagbasa. Tapolan lang tingali kong mobasa.”—Ezekiel, 19, Pilipinas.

“Dili ko gusto nga pugson sa pagbasa ug makalaay nga mga ulohan.”—Christian, 15, Inglaterra.

“Kon nipis lang ang libro, tingali ganahan kong mobasa niana. Pero kon baga, mahadlok na ako niana.”—Eriko, 18, Japan.

“Dali ra kaayo akong malinga sa ubang mga butang. Dili nako ikabug-os ang akong pagtagad.”—Francisco, 13, Habagatang Aprika.

Ang Kristohanong mga batan-on gidasig sa pagbasa sa Bibliya. (Salmo 1:1-3) Nalisdan ka ba niana? Kon mao, ngano man?

“Dako man god kaayo nang Bibliya! Tingali dili ako makahumag basa niana sa tibuok nakong kinabuhi!”—Anna, 13, Rusya.

“Ang ubang mga bahin sa Bibliya lisod sabton ug dili gayod makalingaw.”—Jezreel, 11, India.

“Nalisdan ako sa pagbasa sa Bibliya nga regular kay nagkalamukat ang akong eskedyul.”—Elsa, 19, Inglaterra.

“Nalisdan ako kay kinahanglan akong mogahin ug daghang panahon para sa akong mga buhatbuhaton sa balay ug sa eskuylahan.”—Zurisadai, 14, Mexico.

“Nalisdan ako sa pagbasa sa Bibliya kay morag dili nako makuhaan ang panahon nga akong gigugol sa akong paglingawlingaw.”—Sho, 14, Japan.

Dayag nga usa ka hagit ang pagbasa. Apan takos ba kining paningkamotan? Unsang kaayohan ang imong nabatonan sa pagbasa?

“Ang pagbasa nakapauswag sa akong kahibalo, ug nakapahimo kanakong mas masaligon sa dihang makigsulti sa ubang tawo.”—Monisha, 14, India.

“Ang pagbasa makaparelaks kanako ug makatabang kanako nga dili maghunahuna sa akong mga problema.”—Alison, 17, Australia.

“Ang pagbasa daw magdala kanako ngadto sa mga dapit nga dili gayod nako maadtoan sa personal.”—Duane, 19, Habagatang Aprika.

“Ang pagbasa makatabang kanako sa pagsusi mismo sa mga butang, imbes magsalig lang sa kon unsay isulti sa uban kanako.”—Abihú, 16, Mexico.

Unsay nakatabang kanimo nga malingaw sa pagbasa?

“Sukad sa akong pagkabata, ang akong mga ginikanan nagdasig kanako sa pagbasag kusog.”—Tanya, 18, India.

“Ang akong mga ginikanan nagdasig kanako sa paggamit sa akong imahinasyon samtang nagbasa, sa paghanduraw sa nahitabo.”—Daniel, 18, Inglaterra.

“Ang akong amahan nagsugyot nga sugdan nakog basa ang mga basahon sa Bibliya nga nakita nakong mas makaiikag, sama sa Salmo ug Proverbio. Karon ganahan na akong mobasa sa Bibliya, wala na ako malisdi.”—Charene, 16, Habagatang Aprika.

“Sa kuwatro anyos ako, gihatagan ako sa akong mga ginikanan ug usa ka lamesa ug estante uban sa tanang basahon nga ilang gihiposan alang nako sukad sa akong pagkatawo.” —Airi, 14, Japan.

Sa imong hunahuna, nganong hinungdanon ang pagbasa sa Bibliya?

“Ang mga tawo daghag gituohan bahin sa Bibliya nga dili tinuod. Labing maayo kon ikaw mismo ang mosusi niini.” (Buhat 17:11) —Matthew, 15, Tinipong Bansa.

“Ang Bibliya kinahanglang palandongon pag-ayo. Apan ang pagbasa niini nakatabang kanako sa pagpahayag nga may pagsalig ug may pagkatin-aw sa dihang makigsulti ako sa uban bahin sa akong mga gituohan.” (1 Timoteo 4:13)—Jane, 19, Inglaterra.

“Kon magbasa akog Bibliya, akong bation nga si Jehova gayod ang nakigsulti kanako. Usahay kini makatandog sa akong pagbati.” (Hebreohanon 4:12)—Obadiah, 15, India.

“Nakakat-on na ako sa pagkalipay sa pagbasa sa Bibliya kay kini nagtug-an kanako kon unsay hunahuna ni Jehova bahin kanako ug kini naghatag kanakog maayong tambag.” (Isaias 48:17, 18)—Viktoriya, 14, Rusya.

Kanus-a nimo ginabasa ang Bibliya ug ang mga literatura sa Bibliya?

“Aduna akoy eskedyul. Magbasa dayon akog usa ka kapitulo sa Bibliya inigmata nako sa buntag.”—Lais, 17, Brazil.

“Magbasa akog Bibliya ug uban pang Kristohanong mga literatura diha sa tren inigpaingon nako sa eskuylahan. Akong nahimo kini nga walay hunong sulod sa miaging upat ka tuig.”—Taichi, 19, Japan.

“Magbasa ako kadiyot ug Bibliya kada gabii ayha pa matulog.”—Maria, 15, Rusya.

“Magbasa akog upat ka panid sa ‘Ang Bantayanang Torre’ o ‘Pagmata!’ kada adlaw. Mahuman nakog basa ang usa ka magasin sa dili pa moabot ang sunod nga gula.”—Eriko, 18, Japan.

“Magbasa akog Bibliya kada buntag sa dili pa ako moadto sa eskuylahan.”—James, 17, Inglaterra.

 Sama sa gipakita sa mga komento sa ibabaw, ang pagbasa makapauswag sa imong pagsalig ug makapalapad sa imong kahibalo. Ang pagbasa sa Bibliya ug sa binase-sa-Bibliya nga mga literatura—lakip na niining magasina—makatabang usab kanimo sa ‘pagpakigsuod sa Diyos.’ (Santiago 4:8) Busa, bisan tuod nalisdan ka sa pagbasa, ayaw paghunong!

ANGAYNG HUNAHUNAON

◼ Nganong hinungdanon alang kanimo ang pagbasa sa Pulong sa Diyos?

◼ Sa unsang paagi ikaw ‘makapalit ug panahon’ aron imong mabasa ang Bibliya ug ang mga literatura sa Bibliya?—Efeso 5:15, 16.

 [Kahon sa panid 16]

IKONEKTAR ANG IMONG GINABASA

Ikonektar ang imong ginabasa sa imo nang nahibaloan bahin sa imong kaugalingon ug sa imong palibot. Suknaa ang imong kaugalingon sa mosunod nga mga pangutana:

◼ Sa Imo Nang Nabasa Ang mga situwasyon o problema nga gibatbat susama ba sa gilarawan sa ubang mga basahon, magasin, o mga estorya nga ako nang nabasa? Ang mga tawo nga gihisgotan susama bag mga kinaiya sa ubang mga tawo nga akong nahibaloan?

◼ Sa Imong Kaugalingon Sa unsang paagi kining impormasyona adunay kalabotan sa akong mga kahimtang, akong kultura, akong mga problema? Ako bang magamit kining impormasyona aron akong masagubang ang akong mga problema o moarang-arang ang akong kinabuhi?

◼ Sa Imong Palibot Unsay gitudlo kanako niining impormasyona bahin sa kinaiyahan, kalikopan, lainlaing mga kultura, o mga problema diha sa katilingban? Unsay gitudlo kanako niining impormasyona bahin sa Maglalalang?