بچے دہشت‌گردی کا شکار

شام ہوتے ہی ملک یوگینڈا کے شمالی علاقے میں ہزاروں بچے سڑکوں پر ننگے پاؤں چلتے دکھائی دیتے ہیں۔‏ یہ بچے رات پڑنے سے پہلے ہی اپنے اپنے گاؤں چھوڑ کر شہروں کو چلے آتے ہیں۔‏ وہاں پہنچتے ہی وہ مختلف عمارتوں،‏ بس کے اڈّوں،‏ باغوں اور صحنوں میں چھپ جاتے ہیں۔‏ سورج نکلتے ہی یہ بچے سڑکوں پر چلتے ہوئے اپنے گھروں کو لوٹتے نظر آتے ہیں۔‏ وہ ایسا کیوں کرتے ہیں؟‏

کئی لوگ ان بچوں کو ”‏رات کے مسافر“‏ کا نام دیتے ہیں۔‏ یہ بچے رات کے وقت کام کرنے کے لئے اِس سفر کو طے نہیں کرتے۔‏ وہ اِس لئے گھر سے نکلتے ہیں کیونکہ اندھیرا پھیلتے ہی دیہات میں رہنا اُن کے لئے بہت خطرناک بن جاتا ہے۔‏

تقریباً ۲۰ سال سے گوریلا فوجی اِن دیہی علاقوں پر حملہ کرکے بچوں کو اغوا کر رہے ہیں۔‏ یہ فوجی ہر سال سینکڑوں بچوں کو اغوا کر لیتے ہیں اور پھر گھنے جنگلات میں چھپ جاتے ہیں۔‏ اِن بچوں کو زیادہ‌تر رات کے وقت اپنے گھروں سے اُٹھا لیا جاتا ہے۔‏ یہ باغی فوجی کئی بچوں کو سپاہیوں کے طور پر استعمال کرتے ہیں،‏ اور کئی بچوں کو قلی کے طور پر۔‏ لڑکیوں کے ساتھ وہ جنسی بدسلوکی کرتے ہیں۔‏ اگر یہ بچے تعاون کرنے سے انکار کرتے ہیں تو فوجی اُن کی ناک یا ہونٹ کاٹ دیتے ہیں۔‏ اگر ایک بچہ بھاگنے کی کوشش کرتا ہے تو پکڑے جانے پر اُسے اتنے خوفناک طریقے سے قتل کِیا جاتا ہے کہ اِس کا تصور بھی نہیں کِیا جا سکتا۔‏

دُنیا میں اَور بھی بہت سے بچے دہشت‌گردی کا شکار بنتے ہیں۔‏ ملک سیرالیون میں کئی نوجوان صرف بچے ہی تھے،‏ جب دہشت‌گردوں نے بڑے بڑے چھروں سے اُن کے ہاتھ پیر کاٹ دئے۔‏ افغانستان میں لڑکے اور لڑکیاں،‏ تتلیوں کی شکل میں بنی ہوئی بارودی سرنگوں سے کھیلتے ہیں۔‏ اور جب یہ رنگین تتلیاں پھٹتی ہیں تو یہ بچے اپنی اُنگلیوں اور آنکھوں سے محروم ہو جاتے ہیں۔‏

کئی بچے دہشت‌گردی کا نشانہ بن کر اپنی زندگی سے ہاتھ دھو بیٹھتے ہیں۔‏ مثال کے طور پر سن ۱۹۹۵ میں امریکہ کے شہر اوکلاہوما میں ایک بم دھماکے میں مر جانے والے ۱۶۸ لوگوں میں ۱۹ بچے شامل تھے۔‏ یہ کھیلتے کودتے،‏ ہنستے مسکراتے بچے تھے۔‏ اِس دہشت‌گرد حملے نے ایک تیز آندھی کی طرح اِن ننھی شمعوں کو بجھا دیا۔‏

یہ تمام واقعات حال ہی میں ہو رہے ہیں۔‏ لیکن جیسا کہ ہم اگلے مضمون میں دیکھیں گے،‏ دہشت‌گردی تو صدیوں سے انسان کی زندگی کو کچلتی چلی آ رہی ہے۔‏

‏[‏صفحہ ۳ پر بکس]‏

بچوں پر موت کا سایہ

”‏آج صبح جب مَیں نے اپنے گیارہ سالہ بیٹے کو جگایا تو اُس نے مجھ سے پوچھا:‏ کیا آج کا دہشت‌گرد حملہ ہو چکا ہے؟‏“‏ یہ تھے مصنف ڈیو گروس‌مین کے الفاظ جو اُس نے اپنے ملک میں ہونے والے تشدد کے بارے میں لکھے۔‏ اُس نے آگے کہا:‏ ”‏میرا بیٹا بہت خوفزدہ ہے۔‏“‏

حال ہی میں بہت سے بچے دہشت‌گرد حملوں میں مارے گئے ہیں۔‏ اس لئے اب کچھ والدین اپنے آپ کو ذہنی طور پر تیار کر لیتے ہیں،‏ تاکہ اگر اُن کا ایک بچہ دہشت‌گردی کا نشانہ بن جائے تو وہ اس صورتحال سے نپٹ سکیں۔‏ گروس‌مین اپنی کتاب میں ایک جوان جوڑے کے بارے میں لکھتا ہے:‏ ”‏اُنہوں نے مجھے بتایا کہ وہ چاہتے ہیں کہ اُن کے تین بچے ہوں۔‏ صرف دو بچے نہیں بلکہ تین،‏ تاکہ اگر اُن کا ایک بچہ دہشت‌گرد حملوں میں مر بھی جائے تو دو بچے باقی رہ جائیں۔‏“‏

اُس جوڑے نے یہ نہیں کہا کہ وہ ایسی صورتحال میں کیا کرتے اگر اُن کے دو یا پھر تینوں بچے دہشت‌گردی کا نشانہ بن جاتے۔‏ *

‏[‏فٹ‌نوٹ]‏

‏[‏صفحہ ۳ پر تصویر کا حوالہ]‏

Sven Torifnn/Panos Pictures ©