Le Manatu o le Tusi Paia

O le ā le Uluaʻi Agasala?

E TĀUA tele lenei fesili iā i tatou. I le ā le itu? Ona ua aafia tagata uma i le lē usiusitai o Atamu ma Eva i le Atua. Ua fai mai le Tusi Paia: “Faapei ona oo mai o le agasala i le lalolagi i le tagata e toʻatasi, o le oti foʻi ona o le agasala, ona oo mai ai lea o le oti i tagata uma lava, auā ua agasala uma lava.” (Roma 5:12) Ae ua faapefea ona oo mai lea tulaga pagatia ona o le ʻaina o le fua o se laau?

Ina ua faia e le Atua Atamu ma Eva, na ia tuu i laʻua i se faatoʻaga matagofie na tumu i laau ʻaina eseese. E na o le tasi le laau na faasāina, o “le laau e iloa ai le lelei ma le leaga.” Na tuu ia pule i laʻua i a la filifiliga, pe la te usitai i le Atua pe leai. Peitaʻi, ua uma ona lapataʻia Atamu, “o le aso e te ʻai ai [le laau e iloa ai le lelei ma le leaga] e te oti ai lava.”—Kenese 1:29; 2:17.

O se Faasāsāaga Talafeagai

E lē faigatā le faasāsāaga, ona na tuu atu laau uma iā Atamu ma Eva e aai ai. (Kenese 2:16) E lē gata i lea, e leʻi faapea ua ala ona faasā ona e iai ni o la leaga, pe ua leai so la aogā. Pe ana faapea e faasā e le Atua mea inosia e iai le feusuaʻi ma manu ma le fasioti tagata, e iai nisi o le a faapea mai foʻi, na manaʻomia, ona sa iai ni uiga leaga i le tagata lelei atoatoa. Ae o le ʻai, o se mea e masani i le tagata ona fai.

Ae pe e moni manatu o nisi faapea, o le fua faasāina, o faiga faaleituaiga? E lē o i le Tusi Paia lea manatu. Muamua lava, na o Atamu na iai i le taimi o le faatonuga a le Atua, ma e foliga mai na ola na o ia mo sina taimi. (Kenese 2:23) Lona lua, na fetalai le Atua iā Atamu ma Eva, “ia fanafanau ia, ma ia uluola, ma ia tumu ai le lalolagi.” (Kenese 1:28) E lē taitai ona ia faasalaina i laʻua i le oti, ona o se mea ua uma ona ia faatonuina i laʻua e fai! (1 Ioane 4:8) Lona tolu, o Eva na muamua ʻai, ona ia avatu lea i lana tane. (Kenese 3:6) O lea la, o le fua, e lē o faiga faaleituaiga.

Taumafai ia Tutoʻatasi

O le laau e iloa ai le lelei ma le leaga, o se laau moni. Ua faaatagia ai le aiā a le Atua, o ia o le Pule e filifilia le lelei ma le leaga mo tagata. O lea, o lo la ʻaina o le fua, e lē na o se gaoioiga o le gāoi, ona ua la ave le mea o le Atua e ana, ae ua la fia tutoʻatasi foʻi, ia lē pule mai le Atua iā i laʻua. Ia mātau, ina ua uma ona ʻolegia e Satani Eva e faapea a la aai i le fua o le laau o le a la “lē oti lava,” ona ia fai atu lea: “Auā ua  silafia e le Atua, o le aso lua te aai ai, e pupula ai o oulua mata; ona avea ai lea o oulua e pei ni atua o loo iloa le lelei ma le leaga.”—Kenese 3:4, 5.

Peitaʻi ane, ina ua la aai i le fua o le laau, e lē o le tulaga lenā na oo iā Atamu ma Eva. Na fai atu Eva i le Atua: “Na faasesē mai le gata iā te aʻu.” (Kenese 3:13) Ae na ia iloa lelei le faatonuga a le Atua, auā na ia faamatalaina atu i le gata lea na faaaogā e Satani e tautala ane ai. (Faaaliga 12:9) O lea, sa ia lē usitai ma lona iloa. (Kenese 3:1-3) Peitaʻi, e leʻi faasesēina Atamu. (1 Timoteo 2:14) E leʻi faamaoni o ia e usitai i Lē na faia o ia, ae na faalogo i lana avā ma mulimuli i lona fia tutoʻatasi.—Kenese 3:6, 17.

I le faaalia o lo la fia tutoʻatasi, na matuā faaleagaina ai lava e Atamu ma Eva lo la faiā ma Ieova, ma ua tumau ai aafiaga o le agasala i o la tino. E moni na la ola pea mo le faitau selau o tausaga, ae na amata ona la feoti i “le aso” na la agasala ai, e pei ona pē o se lālā pe a gau ese mai le laau. (Kenese 5:5) O le taimi muamua foʻi lea ua la lagonaina ai le leai o se filemu. Na la lagona ua la lē lavalavā, ma taumafai ai e lalafi mai le Atua. (Kenese 3:7, 8) Na la lagonaina foʻi lo la sesē, le lē mautonu, ma le māsiasi. Na la matuā lagonaina le faalētonu o le agasala, auā na fagufagu atu o la lotofuatiaifo i le leaga o le mea ua la faia.

Na tausi le Atua i lana upu ma ana tapulaa paia, ma na ia faasala ma le tonu Atamu ma Eva i le oti ma tutuli ese mai Etena. (Kenese 3:19, 23, 24) O lea, na leiloa ai le Parataiso, le fiafia, ma le ola e faavavau, ae ua iai le agasala, puapuaga, ma le oti. Pagā se tulaga faigatā ua oo i ai! Ae ina ua faasala e le Atua le uluaʻi tagata, ona ia folafola loa lea e toe faaleleia uma mea ua leaga ona o le la agasala, e ui e lē suia ana tapulaa amiotonu.

Na fuafua e Ieova ia mafai e le fanau a Atamu ma Eva ona saʻoloto mai le agasala ma le oti. Ua ia faia lea mea e ala iā Iesu Keriso. (Kenese 3:15; Mataio 20:28; Kalatia 3:16) E ala iā Iesu, o le a aveesea e le Atua le agasala ma ona aafiaga uma ae avea le lalolagi ma parataiso, e tusa o lana fuafuaga i le amataga.—Luka 23:43; Ioane 3:16.

PO O E TAUMĀNATU EA I NISI TAIMI?

▪ E faapefea ona iloa o le fua faasāina e lē o faiga faaleituaiga?—Kenese 1:28.

▪ Ina ua ʻaia e Atamu ma Eva le fua faasāina, o le ā ua taʻu mai ai?—Kenese 3:4, 5.

▪ O le ā le faatulagaga ua faia e le Atua ia aveesea ai aafiaga o le agasala?—Mataio 20:28.

[Ata i le itulau 11]

O le fua faasāina, e lē o faiga faaleituaiga

[Ata i le itulau 10, 11]

Na manaʻo Eva ia pei o le Atua, e pule i le mea e lelei ma leaga mo ia lava